Ych gratulier ganz härzlig em Fasnachts-Comité,
zem Hundertschte - e rundi Sach - e tolli Idee!
Doch luegsch d Figuren aa – isch es lyycht dr nääbe,
denn d Grindigsmitgliider - sin no alli am Lääbe!

Z Bärn dien uns die Klima-Rumpelstilze,
mit der CO2-Abgoob dr Zaaldaag filze;
Noch em Motto: Ach wie guet, ass niemerts waiss,
dass dusse kälter isch - statt haiss!

Am Fluughaafe hän si e Nacktwanderer welle,
zer Kontrolle in e Nackt-Scanner yynestelle,
do schreit e Zöllner: HALT – ze syyne Lyt,
dä het jo kaini Glaider – doo gseet me jo nyt!

Dr Morin jammeret nooch em 1. Amtsjoor bedroffe,
als „Stapi“ bin  ych doch immer fir alli ganz offe.      
Derbyy het er doch gleert - im Schuelunterricht:
„Isch ain immer offe – isch er nimme ganz dicht!“

D Wirtschafts-Gryyse spyyr ich esoo:
Mäntig – Zyschdig duen y im Büro ummestoo,
Mittwuch - Donnschtig butz y no s Büro - koschteloos
und am Frytig - stell ych mii sälber uff d Strooss!

D Ziircher hogge wie immer ständig im Schilf,
si mache scho Standesreegle fir d Stäärbehilf.
Mir z Basel finde die Reegle doch seer kommod,
hejoo, stäärbe d Zircher friener – sin si lenger dood!

Was Sii doo gseen, er isch no lyycht warm,
isch das Stiggli vom Blocher sim Darm.
Und wenn dr SVP zäädausig Stai duesch spände,
darfsch e Reedli dervoo - als Reliquie verwände!

Au im Bundesroot gits nyt wos nid git,
das Schyssdräggziigli lauft nid im Schritt.
Das gäb Lämbbe z Basel und zwoor gwaltig
und wie bi dr Lälli - e Clique-Spaltig!

Au z Ziiri isch d Geothermie im e Gäldloch verschwunde,
denn s haisse Wasser im Boode - das het me nit gfunde.
Z Basel hets grumplet - iiber d Ziircher kasch nur lache,
wel die nid emool kenne - e richtigs Äärdbeebe mache!

Au z Basel an mym liebe Rhyy,
wänn alli Schwoobe woonhaft syy.
Jetz dängg y, ass es z Basel nimm lang goot,
no hoggt dr eerschti Schwoob - im Regierigsroot!

D Frau Widmer-Schlumpf brobiert dr Polansky z kaufe:
„Wenn us mir e Filmstar machsch – no loo di laufe!“
Jetz griegt si vom Polansky fir hundertdausig Stai,
d Haupt-Rolle im Film - vom Sennetuntschi zwai!

S Schwiizer Volk het de Muslim e Gränze gsetzt,
und mit em Minarett-Verboot d Mässer gwetzt.
S Minarett isch e Symbol - wie s Schwärt vome Wikinger
aber niemools so schregglig - wie em Busaca si Finger!

Mir wärde näbscht dr OECD no vonere CD bedrängt,
wo dr Schäuble uns gstooleni Date an Ranze hängt.
Mer sin doch dääne entgeege koo mit alle Norme
und vor allem mit de bruunen Olympia-Uniforme!

Mir isch‘s schissegal, wies eich dr Facklam verkauft,
ass me dr Voltablatz in H-P Tschudi-Blatz dauft.
Yych bstand numme druff - hee – dängget draa,
d Freyestross haisst no immer - Boulvoire Hanslimaa!