Ych ha d Schweinegrippe-Impfig bi mym Kälbli duuregfiehrt.
Kurz druffaabe isch das Kalb zunere grosse Sau mutiert.
S neue Huustier isch primitiv, schloot regelmässig d’ Tüür yy.
Äs fluecht und sufft, isch's bsoffe schreyt's: „Vorwärts FC Züüryy“!

D Paris Hilton het e Säuli, e richtig rosaroots.
Dasch lieb und nätt und frogt am Morge: „Paris, sag wie goht's“?
My Sau isch am Morge fräch, wott e RedBull statt me Kaffi.
Sy isch groob, bricht alli Reegle, ych nenn sy drum: Gaddafi.

In de Basler Puff, do sage d'Grytte neyschtens ungeniert:
„Wäsch dr d'Händ und putz dr d'Zehn, mir sin do zertifiziert.“
Dr Staat muess s Sexgwärb priefe, ’s goht laider nimmi ohni.
Italie prieft das Gwärb scho lang. Dert macht's dr Berlusconi.

Die Frau dert ääne het e dräggig Nasduech in dr Däsche.
Dä Herr het non em Brünzle d'Händ wider emol nit gwäsche.
Nur kai Panik, händ kai Angscht, steere duet nur dr Gschtangg.
Gfährlig isch dä Gravatteträger: Dä schafft bin ere Bangg.

Ych ha my grauehaft verloffe, y bi ummegiirrt voll Stress.
Bi stundelang tschumplet und tschumplet. Y ha kai so GPS.
Well y Muskelkater griegt ha, het mi Liebschti aafoo foppe:
„E sone alte Sagg wie Du sott nimm in d'Stücki go schoppe.“

D'Doris Leuthart, d'Erika Forster und die Pascal Bruederer,
die drey sin im Sumpf vo Bärn die allerheggschte Ruederer.
Villicht isch jo das dert oobe ney: Frauen an die Macht!
Für mi isch das doch Alltag: Das han ych jedi Nacht.

Isch das do e Ragete oder doch e Minarett?
Y waiss nit, ob’s do in ain git, wo die richtig Antwort het.
Sicher bin y bim Presi vo de SVP-Prolete:
Dr Toni Brunner us Sanggt Galle, dä isch kai Ragete.

Au d’Burka will me verbiete, ych find das isch extrem.
Mit däre ka Frau doch spare, zum Byspiil Falte-Crème.
Sy brucht kai Make-Up, Lippestift, muess sich nimmi wäsche
und gwinnt erscht no Platz im Schrangg fir Schueh und no meh Täsche.

Wäg däm CO2 han y myne Kieh ’s Furze striggt undersait.
Ych sälber ha fir’s Klima dr Knobli uff d’Syte glait.
Y ha ne Wermepumpi, Fotizälle, die mache z’Oobe häll.
En anderi Pumpi macht haissi Luft, sy haisst Merz us Appezäll.

D’Schwyzer liebe Basel nit, Ziiry griegt meh Sympathie.
D’Blagette vo de letschte Johr wärde Schuld dra sy.
Mit däm Jubeltäggscht vom Comité, do wird me meh erraiche.
Dasch jetzt emal es würkli schöns Basler - Fäschtabzeiche.

Isch e Grippewälle gfährlig und trifft sy wältwyt y,
denn weiss syt letscht Johr jede: Däm saisch e Pandemie.
Kunnt die Wälle zu uns in d’Schwyz, denn muess’s ere verlaide.
Bi uns kasch so ne Pandemie vo Kanton zu Kanton unterschaide.

Äs git Expäärte fir d’Bolytigg, fir Sport und Medizin.
Expäärte fir Promis, Chemie, Physik, Tier und Disziplin.
Expäärte fir Bildig, Pädagogik, fir Tadel oder Loob.
Macht so ne Expäärte d’Schnuure uff, isch’s jedes Mool e Schwoob.

Im Fuessball isch’s jetzt offiziell: ’s wird bschisse überall.
Ehrlichkait isch hüt nimm Trumpf, falsch spiile isch normal.
Und doch, ych kenn e Usnahm, die macht gligglig, liebi Lyt.
Bi unsrem Maischter, däm us Ziiry, do nutzt au ’s Bschysse nyt.

H1N1 duet eme Buur nit wirklig ebbis sage.
Y ha my gfroggt: Mien myni Sey au so ne Mundschutz trage?
Scho wiider het’s hoochi Boni gäh fir die Bänkersippe.
Aha, jetz isch au klar für mii: Das isch d’Schweinegrippe!

Zum Abschiid vom Herr Couchepin het d’Krankekasse gschriibe,
my Prämie stygi gwaltig. Vor Schregg isch my Härz stoh bliibe.
Doot bruuch ych die Kasse nüm. Y freu mi: Die Prämie spaar y.
Als Lych kumm ych uff ’s Hörnli, dert triff y ’s Charivari.

D Wält hebt kurz dr Schnuuf aa: Dr Michael Jackson isch nimm do.
Sy Abgang het e riisegroossi Lugge hinderloo.
Die Lugge isch nit lang so grooss, e Ziircher isch bald Top.
Nai singe ka dä Hirschmaa nit – und wird doch King of Pop.

Dr Milchprys, dä macht d’WTO, d’NATO macht dr Krieg.
Dr Dow Jones dä sait mir, ob ych emol e Ränte grieg.
D’EU, die duet sälbschtgerächt ’s Bangg-Ghaimnis ney erfinde –
Und mir Schwyzer bestimme stolz über d’Waldwäg z’Gälterkinde.