Dr Rotscher macht e Sprint und pfyfft scho uus em Lüngli,
doo lütted s Deelifon: Hallo? – S isch Lindt und Sprüngli.
Und scho het .. sy Konto über Nacht,
dank Sprint und Lüngli, dank Lindt und Sprüngli,
dank Sprint und Lüngli graad e Quante-Sprüngli gmacht.

Golf isch schön, Golf isch wunderbaar,
sogaar die Reegle wäärde uns jetzt langsam glaar.
Me muess daas Dings Bumms aifach immer dinne haa,
daas isch soo schön, soo wunderschön,
das isch soo schön, y glaub miir mälde-n-ys graad aa.

Dr Ueli Muurer schlooft bym Schaffe yy,
soo kaa-n- äär für Beamti sogar Voorbild syy.
Bym Schloofe dräumt äär vo dehaim und syyne Schoof
und s ganze Land, joo, s ganze Land,
hofft mit em Ueli: Syyne git s dr Herr im Schloof.

S Comité, daas git s scho hundert Joor,
und s hochi Alter bringt si zuenähmend in Gfoor.
Ai Diagnoose lutted Überdrugg im Bluet,
daas isch nit guet, isch gaar nit guet,
denn wääge däm lüpft s ’ne die ganzi Zyt dr Huet.

Adie Ospel, adie Charivari,
s isch nit soo schlimm, sait s Miggel zum Kaari,
wenn me-n-ys jetzt daas Charivari au duet nää,
denn isch es s bescht
denn isch es s bescht,
s bescht Programm, woo s in de letschte Joor het gää.

Dr Bundesroot, d Regierig vo däm Land,
spaziert duur Bäärn, in Zwaierraihe, Hand in Hand.
Do zwängt e glaine Binggis, woo s kuum kaa erwaarte:
Y wott jetz au,
y wott jetz au,
ych wott zum Frolain Doris in dää Kindergaarte.

Zirka 90/60/90, Köörbli F.
Dr Maa am Scanner fliegt vom Stuehl und rieft em Chef.
Dää fluecht und tobt und fuchtled mit em Aarm.
Wo isch dää Kaib, wo isch dää Kaib,
wo isch dää kaibe Gnopf für Sex-Bombealarm.

Jeede-n-Oobe bätte miir für granggi Kinder,
für die in Afrika – und die aarme-n-Inder,
dass alli z Ässe hänn, wie miir an uns’rem Disch
und danggschön au und danggschön au
und danggschön au no, dass dr Couchepin gange-n-isch.

Dr Carli Hiirschmaa het in Basel über Nacht,
aim us ere graade Naase kurz e krummi gmacht.
E Psychiater maint: dää isch noormal – daas spüür y,
dää isch normal, isch ganz normal,
dää isch normal, es isch halt aifach ain vo Züüri.

Kuum isch die Autidüüre zwai Sekunde-n-offe,
isch dr Silvio in s Gläbbergässli gloffe.
Sym blonde Gschpuusi isch voor Schregg graad d Luft wägbliibe,
y glaub, y glaub, het si gsait, y glaub, y glaub, het si gsait,
jetzt hesch s bym Lifte doch e bitzli überdriibe.