Weisch Babbe, ych finds biirewaich, das Harmonisierigs-Gschyss!
Denn au ooni frie-französisch verstand ych „PereFyss“.
Näggscht Fasnacht isch mit „Father and Son“ s frie-änglisch denn no draa.
Dääwaääg sammlen yych so “Credit Points” fir Bolognia.

Hösch Babbe, ych ha d Schnauze voll vom Schuelsagg ummedraage.
Los Biirschli, glaubsch doch nit im Äärnscht, yych faar di mit mym Waage!
Nai ych wott numme s Glyyche ha, wie die zwai z Lybie griege,
Und loss mir drum my Schuelgepägg vom Bundesroot heime fliege.

Gäll Babbe, d Mina – unseri Katz – isch letschti fascht versoffe!
Zem Gligg bin ych in däm Momänt an Brunne aane gloffe.
Schnäll hämmer d Mina uusegfischt und si miesse drogge glette.
Obwool doch jede Duubel weiss, darfsch joo kai Mina – rette!

Hit hämmer s Bundeshuus aagluegt, lägg kasch di doo veriire,
Vom Käller bis in Kuppelsaal goosch dur zwaiesächzig Diire.
Dert oobe joomeret e Zwärg, draait sich derzue im Grais:
„Scheene Scheiss, ass e jeede weiss, dass ich Merz Hansruedi heiss!“

Sag Bueb, was macht dä Playboy zwische Lego und Teddybääre?
Dasch nit esoo wie du jetz dänggsch, yych kaa dir das erklääre!
Dää Playboy han yych sälber baschtlet – das Heftli fir uns Männer,
Losch eifach sonen Anabelle, duur dä ney Naggt-Scanner!

Wurum mien die Deppe, wo z Kopehaage daage so versaage,
Die hätte lieber s Klima grettet, anstatt numme z klaage!
Näggscht Winter isch es dängg verbyy mit Kelti, Yys und Schnee,
Und im Kunschtmuseum gitts statt Yys, Äntli uff eme See.

Sag Babbe, wurum griegt dä Rodscher uff ai Schlaag zwai Goofe?
Los Bueb, dasch schampaar kompliziert und du sottsch längschtens schloofe.
Nai Babbe, yych erkläär dirs jetzt, falls du das nit sottsch schnalle:
Der Roger griegt fir sy Uffschlaag au allewyyl zwai Balle. 

Los Babbe, hesch jetzt äntlig emool dää Stapi Morin gfroggt,
Wurum är jede Oobe am Rhy anere neue Grillstell hoggt?
Bimene Glas Rivella grien sait är mir ganz im gheime:
„Unter so vyyle andere Würscht füül yych mi halt dehaime!“ 

Mi Frind, der Lars, sott ins Spidaal, god Mandle lo uuseschnyyde,
Daas goot hütt rugg-zugg-zagg-zagg, do muess är nit lang lyyde.
Nai si operierenen dehaim, är hett kai Platz im Spittel,
Denn d Zimmer sinn alli bis oobe voll vo däm Schweinegrippemittel.

Gäll Babbe, d Eva Herzog isch e Bombe Regierigsröötere.
Die Bombe isch scho längschtens platzt und unser Gäld goot flöötere.
Nai d Eva isch e hälle Kopf, s Volgg ka sich nit so iire.
Wirsch see, sgoot nimm lang und die Lyychte ändet als Spaarbiire.

Hey Babbe ych ha gescht doch glatt my erschti Buess bikoo!
Jä nai, hesch aimool mee di Göbbel im Parggverbott lo stoo?
Nanaai bi numme uff mim Rollbrätt d Freye aabe gflitzt,
Do hänn mi doch die miede Bulle mit eme Vierzger blitzt!

Dä Bryys fir d Basler Opere, gäll Babbe, dasch denn scheen.
Dasch sicher wägem Malama, dä singt gärn in heggschte Deen.
Wie kunnt Basel zue dääre Eer, wie hett das könne glinge?
Die Jury hett dängg mitgriegt, ass mir zwai im Theater singe.