D Schwoobe numme Fuessballgaischter,
d Schwyzer aber sin Wältmaischter
sisch super gsi, mir hänn alli gschlaage,
aber kaine ka die Nämme saage.

Ych zell fählerfrei bis drey,
drum mäldi mi bi dr Bolizey,
so Uniforme hänn doch Charme,
und lut em Chef, gän sie erscht no warm.

Vor 100 Joor hän sy verkindet,
s Fasnachts-Comité isch grindet,
agstosse hänn sie mit eme Gleesli Wy,
und die maischte sin no hit derby.

E Schlange duet sich kuum bewege,
dr Siibeschlööfer sie Schlööfli pflege,
au s Fuultier hett kai guete Ruef,
do dänggt me grad an Lehrerbruef.

Das sind Spargle und kaini Minarett,
au wenn ihr so dänggt hänn, y mach e Wett,
mit em Standort gits aber au do Broblem,
sie vertrage weder Moos (no) Leem.

An de gratis Speerguetdäg,
lyge Bärge vo Grümpel aim im Wäg,
fir e huffe haig sich s aber glohnt,
do frogsch die wie hänn die vorhär gwoont.

Die Säuligrippe-Pandemie,
ka fir uns Basler nitzlig si,
s wird agnähm still, si git nit z klage,
wenn alli Ziircher e Mundschutz drage.

D Kaderlyt wärde entloo,
sie kenne s sälber kuum verstoo,
bim gääle Riis do seht me root,
dasch s erschtmool dass dert Boscht abgoot.

Mit Schoggi im Muul vo dr Kamera stoo,
fir das soll dr Rodscher Stutz bikoo,
do dra mergsch, s muess allem aa,
dr Lindt, scho e bitz e Sprüngli haa.

Y has au brobiert am Selfcheck-in Schalter,
s isch gar nit schlächt gange fir my Alter,
kai Brobleem – das wär scho glooge,
y bi denn halt im Frachtruum gflooge