Das Basel anderscht tickt, duet uns im Prinzip gfalle
Nit nötig wär das allerdings in unsrer Bahnhofshalle
Im Innre hesch e Druggede und Duss isch‘s Dram e Gfohr
Als Hommage an die Situation singe mir drum im Chor
Stägeli uf Stägeli ab juhe
Stägeli uf Stägeli ab oje
Basel dini Bahnhofshalle duet is iberhaupt nit gfalle
Stägeli uf Stägeli ab juhe
Stägeli uf Stägeli ab oje
S‘einzig Scheeni an dr Halle isch wenn‘s hörsch durch d‘Halle schalle: Blaggede, Blaggede

Wenn d‘Maitli hesch denn kennsch das jo, s‘droht ständig naime Gfohr
Unsri Tochter isch jetzt duss zum Gligg mit ihre 18 Joor
Nach Rinderwahn und Vogel-Schweinegripp mien mir nim uf d‘Pirsch
Do droht vo Züri die näggschti Süch, s‘neu Untier isch dr Hirsch

Sie hueschte, niese, schnupfe sich und hän e miede Stai
Mir hän denn gfroggt, was mache dir do, worum sind dir nit Dehei
Das wän mir nit, hän die uns gsait, denn mir sind gimpft hurra
Doch leider sind si gege d‘Vogelgrippe gimpft, die hän si no vo letscht Joor kah

S‘Menscheaffe-Huus im Zolli baue si jetzt um
Sie baue e scheen natirlig Gheg, mit Wasser no drumm-um
Doch während dert dr Bagger schafft, wysse d‘Affe nit wohi
Dr letscht bekannti Ufenthalt isch d‘Uni-Aula gsi

D‘Minarett-Initiative hän mir jetzt, zue so Diirmli sage mir nai
Was andersch isch das isch nit guet mir sin lieber ellai
Mir sind vo Grund uf skeptisch, es wird jetzt nimme zwängt
Dä Kran bim neye Kinderspitel hämmer sofort gsprängt

E Stücki-Bsuech, das sait dr Schorsch, das isch e gross Erläbnis
E Show so imposant und gross wie em Jackson si Begräbnis
Denn dert gäbs alles kunterbunt vom Fingge bis zum Moscht
Das isch nit Neis sait sini Frau, das gits au bi dr Poscht

Im Albisgüetli findet me e unhaimligi Lischte
Mit Type wo me packe will in e grossi Kischte
Naili, Zarkovic, Da Costa und no me Exote
E nai sait den dr Toni gschockt, s‘isch d‘U17 nit Kaote

Es klepft eh Schuss was mag das si, hyt tanzt doch kaine uf em Rhy
Wo isch dä Schuss den gfalle, isch‘s dr Schugger wo z‘Rhyfälde duet knalle
Jetzt gseht mers gnau s‘isch kai Schuss gsi, s‘tanzt wirklich kaine uf em Rhy
Doch tausig Basler lache, dr Vasella duet vom Thron abekrache

Unsre Fründ dr Schaggi dä isch zur Zyt elai
Är het es grosses Handicap denn d‘Fraue sage Nai
Drum goht är jetzt go Golfe und das isch au nit e Spleen
Dr Tiger Woods dä locht au i, egal uf wellem Green

Wilsch e Brief verschigge, gosch zur Poscht, s‘Poschtauto nimmt en mit
Das isch ganz gäl und zueverlässig, was e Kaibegligg
Dr Moritz bstellt so sini Lit, au dr Béglé isch so kho
S‘gäle Wägeli het en anebrocht, uf die kasch di halt verloh

Die arabisch Wält die wird ganz klar vo Männer dominiert
Fraue frogt me dert nit gärn, will d‘Männer das brüskiert
Dr Merz het bim Ghaddafi sich an die Regle khalte
Und vor däm wibisch Lumpeträger sini Schnuure ghalte