Melodyy: Fever vo der Ella Fitzgerald
I haa so haiss, wenn du mir nooch bisch
Und denn dr Vodka aneziesch
I-mergg enttyscht, dass daas jo nur isch,
Dermit du mi mit dämm Schnapps desinfiziersch.

Mir hän Grippe.
Die ganzi Sippe, sogar dr Hund und s‘iPhone sind grangg.
Bitte loss mi nippe an dim hippe Grippe Impfigs-Trangg.

Wär niest, dä macht sich mächtig verdächtig
Dr Bligg waiss: S’neggschti Opfer bisch du.
Novartis-Roche verdiene ganz prächtig.
Alli guurgle numme no Tamiflu.

Mir hän Grippe. Bittibitte! Loss mi äntlig an dr Medi-Schrangg!

My Fieber isch jetz nimm normal
Drum renn-i z’Rieche schnäll ins Spital
Dert sag-i: Gäänd mir eiri Grippedrooge
Sunscht nies-i äxtra nid in mi Ellebooge!

Mir hän Grippe. S’isch zum flippe!
Dä Bangg macht uns vom Singe scho krangg.

    Melodyy: Rock me Amadeus vom Falco
Es isch im Summer ooni Kummer und e klaari Nacht
Dr Karli Hirschmann goot ufd Pirsch, Mann,
wien-äär das so macht.
Kai Miss isch vor im sicher, wenn äär goot goo graase.
De Frinde vo de Misse gitt dr Karli gäärn uf Naase

Äär isch milliooneschwäär, das macht in populäär
D’Fraue bedangge sich seer und wänn jetzt grichtlich meer.
In Hinterzimmer sait äär immer: «Dasch min Jet
Und wänn de Luscht häsch und kchän Fruscht wettsch,
ja dänn weisch, was-i wett!»

Karli Hirschmann, du kriegsch kai Kirsch, Mann.
Will denn zimftig brinftig wirsch, Mann, und randaliersch, Mann.
Es wird Zytt, dass d’akzeptiersch, Mann,
du bisch kai Hirsch, Mann! Karli Hirschmann!

    Melodyy: Mamma Mia vo ABBA
Silvio, mir finde, du, du bisch ain vo de Beschta.
Wiirde gärn, so wie du mit Achzääjäärige feschta.

Mache mir Festa, du hesch jo di Villa
Hesch voll ain in Testa wenn d‘Orgie fyyrsch
mit der Porno-Milla
Und Gott danggsch fir di tägligg Viagra-Pilla.

Du hesch Hoorimplantat – uf de Zeen.
Bisch e Stroof- & Ybeltaat und hesch es gsetzligg scheen.

Berlusconi, du hesch uns grad no gfäält.
Sogar dr Boobscht hett vo dim Grinse gnueg.
Berlusconi, mir hätte di nie gwäält.
Mi liftets scho nur, wenn-i di alueg.

Jetze muesch undeduure. Kriegsch no e Bhaltis in d‘Schnuure.
Trotz Dom im Gsicht bisch du nur schyynhailig.
Berlusconi. Es goot au ooni.

    Melodyy: S’Lied vo de Baanheef vom Mani Matter
Das isch s’Lied vo der Gryyse, wo uns d’Bangg ufghalst hett,
und wo nid rächt will goo,
will d’Bangg gmerggt hett, dass mir iire die Gryyse dien zaale.

Denn mir styyre mit Styyre dass ys d’Bangg frindligg danggt,
fir was mir ihre hän doo
und d’Politiker schwyyge, will es sin noni Waale.

Aber gly kemme d’Waale und fir das brucht me Gäld,
und drum hett me e Bangg.
Denn die zahle die Waale, und d’Politiker straale.

Nach de Waale, de fahle, sait d’Filiale mit Strahle e banale Dangg
Während d’Wääler die Fääler vo de Waale mien zaale.

Das isch s’Lied vo dr Gryyse, wo uns d’Bangg ufghalst hett –
und wo wider wird koo…

    Melodyy: Auf der Schwäbische Eisenbahn
S’isch zwoi for nüüni und chalt verruss.
S’Tram chunnt nid, eech chumm nid druss.
Doch halt, eech wart, eech dummi Nuss,
Jou uff dr 48er Bus!

    Melodyy: I’ll Be Watching You vo de Police
Wenn de ins Stadion goosch
Oder am Cortège stoosch
Sygg’s bim Grilliere am Ryy oder im leere Sticki,
Es hett e Kamera.

O Hanspi Gass – Dr Gass macht ys kai Gspass
Dä Herr wott iiberaall e Kamera, will är so fotogen lächle ka.

Yberwachig isch modäärn. Uf Google gseen-i, du bisch z’Bärn
Dank Google han-i jetzt au scho sytt zwai Wuche e Frau.
Schad, gseen-i si nur duur e Kamera.

    Melodyy: Muhammar vo Touch El Arab
Mach d’Auge zue und stell’s dir voor:
S’deent wiene Schwyzer Jodelchoor.
Dr Morin findet do no ächt:
«Die singe gar nid mool so schlächt.»

Bi uns deerfsch nid aifach eppis glaube
Uswaal dien mir nid erlaube.
Kaini Rächt em schwache Gschlächt!
Mir pfyffe ächt uff Menscherächt.

Au Schwuuli finde mir nid Cooli
Wenn-i dr Minu gsee, denn muul-i.
S’gytt nur ai Gott, das wirsch scho see,
Wenn d‘Mitgliid wirsch vo der SVP.

    Melodyy: Beat It vom  Michael Jackson
Dr Michael Jackson isch au unser Idol
Drum sin mir operiert. Und das rund 130 Mool.
Mir hän si Dood betruurt, im Färnsee internationaal
Im BBC und CNN, sogar im Kaffi Bâle.

Är hett e Leesig für Rassismus, und hett’s gsait.
Noch sym Sälbschtversuech hesch nimm gwisst: Isch är Bläck or White?
Und denn das mit de Buebe – mir sage’s jetzt mol soo:
Dä hätt vom Bund s’Patänt zum Änggel hyete nie bikoo.

Jetzt bisch du innre bessre Wält
Bruuchsch kai Aff, kaini Drooge und au kai Suurstoffzält.
Kasch mit em King Elvis singe und dini Hiifte loo schwinge.
E perfäggti Wält. Fir di und fir uns.

    Melody: Dynamit vom Mani Matter
Im Gschäft duen-i flyssig e jede Daag seerfe
I-suech drum e Mister Schweiz, wo lääse ka.
Erfolglos! Derfyr han-i uf Youtube deerfe
Dangg gueter Bewäärtig e Video ha.
E Video, das erkläärt mir Bit fir Bit.
Wo’s z’Basel die billigschte Parkkaarte git.

Will Bus-Priigeleie kasch schnäll abelaade
Und live d’Sensation gsee, wenn z’Ziiri ein dänggt.
Ka Cyberspace mänggem Seerfer rächt schaade
Wenn dä sini Klicks uff die falsche Sites länggt.
Bim Styyrebeglyyche kligg ych aimol z’wytt:
Und jetzt han-i mit em Herr Staibrigg e Strytt.