Vor dreyne Joor z Glaihyynige hänn die mit Hoochdrugg boort.
Wo z Baasel d Ärde bebbt, sinn mir verschrogge – Eerewort!
Doch jetz, jetz hänn mir gar kai Angscht – s näggscht Beebe isch no wyt.
Solang dr Morin doo regiert, bewegt sich z Baasel nyt.

Es schlyycht ain haimlig duur dr Wald, verdramplet jeede Pilz.
Eb Pfifferling, eb Fliegepilz – fir jeedi Soorte gilt s.
Jä Sii, das isch dr Mörgeli, wo kaini Pilzli wett:
Die schiesse au zem Boode uss so schnäll wie Minarett.

Im Herbscht isch d Goma fuffzig gsii. Der Zolli macht e Fescht.
D Regierig kunnt und s Radio kunnt und d Präss und Eeregescht.
Dä Aff wird gstailt und uffpoliert, das isch jo pippilyycht
Es bruucht nit vyyl, ass so e Aff em Berlusconi glyycht!

Der Bruunbäär Finn luegt hungrig zue, wie ain in Graabe stygt.
Zem Znacht e Portion Menscheflaisch – jä Sii, das iiberzyggt.
Dä Bäär het jo e Riise-Gligg: Nit jeedes Flaisch isch gsund.
Ai Biss vom Tony Brunner – s wär em Bäär sy letschti Stund.

Rasanti, sait dr Tettamanti, ych will jetz die BaZ.
Und s Hagemanns rasanti tutti ruume iire Blatz.
Rasanti kauft dr Tettamanti d BaZ grad subito –
Und doch hänn mir au hit am Moorge d BaZ vyyl z spoot bikoo.

Im Oschte wyss – im Weschte au, verspricht ys d Wätterfee.
Doch nur im Oschte, nit im Weschte hesch Schneefleggli gsee.
Eb Oscht, eb Wescht, sait do dr Ospel, mached doch kai Gschyss,
My Weschte isch bi mir im Oschte allewyyl no wyss!

Am Kannefäldblatz frogt ys ain: Wie kumm ych in d Friidmatt?
Mir zaige iim dr Wääg – hejoo, nit jeede kennt die Stadt.
Är findet weeder Schlooff no Rue, das isch verdeggel schlimm.
Är schafft drum bi dr Credit-Suisse und hett sy CD nimm.

Will d Lyt sich geege d Schweinegrippe nit hänn impfe loo,
Hänn mir dr Impfstoff donnewyys vo Bäärn graad ibernoo.
Wäär waiss, vilicht vergäärt dä Saft und griegsch e Top-Essänz,
Wo schitzt vor säll're Pandemie – dr SVP-Demänz!

Wenn d ganz e nätti Frindin hesch und dänggsch, hyyroote wäär s:
«Drum prüfe, wer sich ewig bindet», haisst e alte Väärs.
Vo wääge Gligg und Sääligkait – du bisch doch e Fantascht!
Wenn d immer Sex und Uusgang wottsch, gang z Solothurn in Gnascht!

Zwai Auge, Oore, Naase, Muul, um d Glatze bizzli Hoor –
Scho isch es glaar: Das isch dr Merz in syyne beschte Joor.
Jä nai, das isch doch nit dr Merz! Das dyyscht vo A bis Z:
Will dä doch z Libye bim Ghaddaffi s Gsicht verloore het.

Designer-Kuchi, Swimmingpool, e Villa au z Davoos,
Ferrari, Porsche, Curling, Golf – als Bängger läbsch famoos.,
Doch s letscht Joor, wo s kai Boonus git, het d Bangg ys pfände loo.
Drum hänn mir jetz mit neye Booni d Bangg grad ibernoo.

Pro Daag bestyggt der Muezzin fimf Mool sy Minarett
Und rieft zem Bätte d Muslim uff, will Allah s gärn so het.
Als stramme Aidgenoss wärsch froo, du derftsch dert oobe stoo
Und kenntsch bi jeedem Saich us Bärn dy Fruscht lut uuse loo.