Prophylaktisch haan  ich do die Impfig doch gnoo
S isch  saubleed jetz  isch d Grippe laider  nit  koo,
I ha nämlig ghofft  i bikääm  dangg   däm   Schutz,
nimm ständig  vo  jeedere  Schääse  e Schmutz.

Der Béglé mischt d Boscht uff – jä, die  goot  jetz ab,
der Leuebärg staggeled  -  babberla-bapp.
Är  dänggt sich, wie guet  ischs  ass  gar niemer waiss,
ass  ich jo in Wiirggligkait  Rumpelstilz  haiss.

S Dram macht  Regglame fir d Muba, fir Wesch,
im Dram kaasch au teschte ob Faasnachts-Gen hesch.
Au d Kiirche nutzt d  Drämli und schryybt  si grooss  aa
Nur waiss i  nit  was  me  denn  deert  teschte  kaa.

Der Sarkozy dä  git  sich  z Davos ganz galant,
bidanggt sich  bi  zwaine, wo glatsche am Rand.
Wuurd d  Wält  äntlig  so, wie verzellt wiird am WEF,
no   näämti  am  Ändi  au  dää  no  als Chef.

Ibi au in d Stüggi – ganz  frie  am Neijoor,
kauff  deerte  säggs  Fäärnsee mit allem Komfort.
No haan i d Verpaggig  an d Wiese chauffiert,
zää  Stutz haan i  gspaart – jä  fir mi het s rentiert.
As  Bängger  ziesch  Booni – s System isch so hool,
bringsch d Daate  em  Staat – kassiersch  noonemool !
Der Staat macht die Daate au wiider zue Gäld –
Ain  bschisst  der  ander  –  soo goots  uf der Wält.

Dää  Winter isch  saukalt – und s Salz  rationiert,
drum hänn si in Bäärn scho mit Zugger brobiert.
Sott das funktioniere, no haissts  denn bigott,
ass  jeede  mit  Zugger  uf  d Strooss  schiffe sott.

Demokratisch  goot   nyt mee  – s het  jeede sy   Ryych,
Sait :  yych bi der Keenig - und Du bisch mir glyych.
So gsee verstuunts mi, das hätt  i  nit  dänggt,
ass  dääne   fir s Dängge  s „20 Minute“  scho  länggt.

Wo im Merz si  Häärz  stillstoot  -  sait der Arzt explizit,
Eb s  Hiirni no lauffi,  das  wiss  är no nit.
Doch d Rais   zem Gaddafi –die macht är elai -
Und kunnt denn – oh Wunder –elai wiider hai.

Der  Himmel wär grooss  gnue,  doch s  Gsichtsfäld  bischränggt,
drum het s bi der Abstimmig  daasmool  nit glänggt.
Derbyy  dänggt  vo der SVP  jeede :  i wett,
ihätti  gäärn  zoobe  s  Minarett   in   mym  Bett. 

Bim  Bundesroots-Fotti  gseesch s Huus nit ganz glaar,
die ganz schaarfi Schar wiirggt  esoo  bsunderbaar.
Bim  Saich wo die mache, wär  myni  Ydee,
me  wuurdi  die Siirmel  uf  em Bild gaar  nit  gsee.

Mir hättes  zwoor  gschafft,   mit em Impfstoff – hänn Schwein,
nur impft sich geeg d Grippe am Schluss doch e kain.
Mir hättes fascht gschafft – as  die  SVP  leert,
ass  der  „Volggswille“  numme  de Stimmende  gheert.
Mir hättes fascht gschafft mit em Uusfuer-Verbott
Mir liifere wyter,  wills d  Waffe –Lobby  so wott .
Mir hättes fascht gschafft, e besser Klima fir d Wält,
Doch  au z Kopehaage regiert halt nur s Gäld.
Mir hättes fascht gschafft, d Bängger in Griff z bikoo,
doch s Drägg-Gschäft  laufft  wyter, au d Booni  gits no.
Doch immerhin  hämmers  jetzt denne glyy  gschafft,
ass  kaine wo raucht – in  der  Baiz inne pafft.