Sitzt höit ein Schwoob im Bublikumm?
Ohne Saich, ich frage drumm:
Für ai Million – tra-ry, tra-raa –
kanscht uns’re Kontodaten haa!

Abdailig „Groossi Schnuure und anderi Lecher“

S zaigt sich dr Silvio Berlusconi
gäärn zwischenyyne unde n ooni.
Und was me gsee het, undeduure,
entschuldiget sy grossi Schnurre.

E Mailander-Doom-Modäll-Adagge
drifft dr Berlusconi an d Bagge.
Y hoff, dass es jeede yygsee het:
Kirche sinn gfäärliger als Minarett!

Abdailig „Baasel“               

Kuum isch dä neii Bolizei-Chef doo,
muess d Gigi Öri dr Christian Gross entloo.
S git do e Gsetz, wo mr yyhalte sotte:
Mee als ai Zircher isch z Basel verbotte.

 „Es git kai Gott, woorschyynlig, nämmli!“
will ain als Wäärbig uff de Drämmli.
Vyyl gscheiter wäär, wenn deert druff stoot:
„Das Drämmli kunnt woorschyynlig z spoot!“

Dr Haagemaa und sy Verwandti
verkaufe d BAZ em Tettamanti.
Wenn dää dr Köppel hoolt, Sii dasch nid stryttig,
wird d BAZ denn wider d Nazi-Zyttig!

Abdailig „Wieschte-Seen“

Ai Joor Gaisle bim Gaddhafi:
Da’sch hart, aber y glaub, das schaff y!
Vyyl herter isch, das wurd mi kille:
Bim Tamara Wernli grille!

Em Gaddhafi si Soon, jee, dä armi Maa,
soll ändlig e rächti Entschuldigung haa!
Drum schloo n y vor, dass ych das miech:
„Also, Entschuldigung! – Du bleede Siech!“

Dr Rodscher duet dr Hakan schelle:
„Waisch, ych ha myni Zwilling welle!
Du aber“, het dr Rodscher glacht:
„hesch halt e Dobbelfääler gmacht!“

Abdailig Schwyz

Wär im Abbezäll blutt wandered, muess
jetzt zaale, Sii, das git e Buess.
Und ych ha jetzt s Brobleem entdeggt:
Wo het so ain s Gäld versteggt?

S kunnt ain in e Bangg – mit fiechte Libbe –
und sait zem Kassiee: „Y ha Seiligribbe!
Und wenn d jetzt s Gäld nid ussegisch,
no niess dr drei Mool uff e Disch!“

In der Kardiologie vom Kanti Sant Galle
heersch nach vier Stund Duurlyychte dr Chefarzt lalle:
„Herr Bundesroot Merz, mir hänn s wider gfunde:
Iir Härz isch in de Hose n unde!“

D Jasmin Hutter goot sträng nach de n SVP-Wärt:
Griegt e Buschi und goot wider haime n an Härd.
Gääb s e Grächtigkait uff Ärde,
dr Mörgeli wurd schwanger wärde!

D Frau Maier sait zem Maa im Bettli:
„Schatz, zaig mr schnäll di Minarettli!“
Denn hieschtlet sii so zwai, drei Mool,
und maint: „Da’sch doch kai Machtsymbool!“