Inschallah, o salem aleikum.
Hassan, Ali: dali hai kum!
Döner kebab, Fatima - Burka, Tamoilbenzin:
yych statt Schnitzelbänkler dänk glyy Schnitzelmuezzin.

Jä, dir, bi eus im Baselbiet
singe alli s glyyche Lied.
Am liebschte hai mer luti Döön, kai Ghöör hai mer für lyysi.
Zum euch e chly dra gwöhne, schänke miir ech gäärn dr Gysin.

S Bankeghaimnis isch begraabe.
Dr Merz gönnt sich e Schnaps drufaabe.
Er wäggsli jetz dr Job, verkündet är in „Wetten dass“.
Dank de Referänze wäärd är Chef vo Dignitas.

Dr Ospel isch in Züüri Chloote
in de neu Nacktscanner groote.
Sprängstoff het me kain entdeckt, so öppis miech de Heer nie,
doch zwüsche Wiirbel fünf und säggs e riise Fiskushernie.

Dr Unggle Schaggi hets kapiert,
sich jeede Daag desinfiziert,
het d Nase butzt, kai Mensch verschmutzt, nümm gnosse, nur no gnickt
und isch, wo d Impfig choo isch, am e Lachaafall verstickt.

De Marmordom haut s Naasebai
vom Berlusconi glatt entzwai.
Do rieft im Wallis ain: zum Glück ich hab gepackt die Finken,
bevor man mir die Bundeskuppel schlug auf meinen Zinken.

Dr Schumi schuent jetz nümm dur s Gras,
druckt im Mercedes voll uf s Gas.
De Chaare fahri tadellos, strahlt das grosse Bübelein.
Päch isch nur: dem Bübelein fehlt zoberscht halt ein Schrübelein.

Bim Raise gspüürt dr Merz am Häärz
dank de Bypäss gar kai Schmäärz.
Doch lut em Doktor FMH brucht das Büürschli dänk
in de Chneu nach all de Bückling dringend neui Glänk.

Als Biebli het er giigelet
und uf em Stiehli gaagelet.
Chuum isch är erwaggse gsi, het er afo güügele.
Im Altershaim, do gseet men iin wie alli nur no googele.

Jetz schluckt de Maa us em Ticino
d BaZ nach siibe Boccalino.
Mi macht de Deal vom Tettamanti scho ne bitz betroffe.
Tito, gibs doch zue: e sone Zytig chaufsch nur bsoffe.

Am erschte Basler CSI
isch au dr Morin Guy drby.
Bim Wassergraabe bockt sy Gaul und iin hauts us de Büügel.
S Martina Hingis wyyheret: zum Rytte bruuchsch glaub Züügel.

Z Bärn bychunnt dr höggschti Chef
zwai Bärli vom Herr Medwedew.
Druf mailt us Rom dr Silvio im Üüberschwang das Sätzli:
Wenn yych in d Schwyz chumm, schänk y euch zwai vo myne Chätzli.

Dr Roger het dehai vyyl Spass.
Mit aim Ball schloot de Bursch zwai Ass,
im eheliche Centre Court, first service, höörsch en strahle,
und Wollerau het zwee Chnöpf meh, wo kaini Stüüre zahle.

S Stucki het vom Gault-Millau
sibzää Gourmet-Pünkt bychoo.
D Tanja Grandits het drno, wenn au mit letschter Chraft,
s Grillexaame vom Herr Kessler für an s Ryyboord gschafft.

I bi scho alles gsii  im Lääbe,
Milchmaa, Wyybuur in de Rääbe,
Schnitzelbänkler, Santichlaus, Matroos uf eme Boot.
Jetz wird i halt em Moritz zlieb no Boscht-Verwaltigsroo.

Im Winter lauft ain, mir gfriert s Bluet,
füüdleblutt und ohni Huet
dur Appizäll und zimmli schnäll, me gseets fascht nid vo hinde:
S ainzig, wo de trait - um s Muul: e Schwainegrippebinde.

S Tamara ladt zum Barbecue.
S isch mit der ganze Stadt per du.
Eymann, Heeb und Ceccaroni, all die stramme Bürschtli
sin choo, d Wält frogt erwartigsfroh: wäär isch ächt s gröschte Würschtli?

Dr Muurer wott jetz für d Armee
e Baschtelbiechli uusegeh.
Me chönn im WK Fluugi falze und für fufzig Rappe
gebs e tolle Baschtelsatz für Panzer-Pappattrappe.

Au ich ha jetz e soon e Brenner.
Diir, de Brenner isch e Renner.
I brenn dehai im Chäller und das Zügs wird znacht verchauft:
Scho verruckt, wie Aigebrennts im Schwoobeländli lauft!

Mir g-gohts wie euch au, g-ganz genau,
i w-wird us dääre W-wält nümm schlau.
Mir f-fönge langsam a-alli myni Ch-chläider afo schlo-lottere,
syt i s ganz Johr d Ch-chrankekassep-prämie mues ab-sto-to-to-to-tottere

Sei bella Carla, Anna, Franca.
Ti amo Gesualda, Bianca
e Gina, strahlt dr Silvio, anche Laetizia.
Nur uf  di Bruscht han ich kai Luscht, haus ab, Juschtizia.

D U-17 isch das Team der Stunde,
dr Alex Frei der Mann der Runde,
dr Cuche der beschti Schwyzer Sportler, trotz des lichten Haares,
und dr Merz Hansrudolf - trotz mee Hoor: der Tor des Jahres.