Mir luege in der Baiz als au e Bitz in d BaZ.
S het schööni Bildli, mänggmool lääse mer e Satz.
Jä will das Blettli am Kiosk halt nit eso laufft,
stohts grooss uff Sytte Ains, wenn s aimool ebber kaufft!

Maischtens blabbere und kichere und gaggse sy,
im Christian Heeb sym neye Radio für Erwaggseni.
Dass är e Radio het, das duet jetz nit so wee,
würd dää no Färnseh mache, miesstsch en au no gsee!

In der neye Stücki gsehsch nur Glaider, Glaider!
Findsch fascht nüt z Ässe, numme Glaider Glaider, laider.
Sogar d Verkeyfferinne, wo dört ummelungere,
gsehn alli us, als ob sy näggschtens mien verhungere.

Ganz ohni Sponsor, jä do laufft hüt kai Event.
Am Pfyfferli, do isch s zum Byschpyyl Kukident,
de gsehsch s bim Charivari, wenn sich ain duet drugge,
glyy sponsret d Swiss der Harasselauf mit ihrne Gugge.

Jä uff der Boscht, jä sii, do laufft s jetz wie der Blitz!
E Brief het kuum zää Wuche no vo Schlitz zu Schlitz,
e  Böschtler bruucht numme no zää Daag für sy Route
und der Verwaltigsroot blybbt gnabb no zää Minute.

Unsre Verkehrsminischter Leuebärg in Ehre,
könnt mit sym Waggelkontaggt vo Dütschland öbbis lehre,
denn dangg ere digge Abwrackprämie dien jetz die,
so Glabbergschtell wo roschte zum Verkehr us zie.

Graad juscht zem Hundertschte, jä soo, das isch en Ehr,
gsehsch z Basel vo däm Wieschtesohn e ganzes Heer!
Jetzt schiggt em s Comité zum d Wooge wider z glette,
zu syne Blächli non e goldigigi Blagette.

Wenn aine Gäld vertlehnt, won äär nit wirgglig het
an ain, wo s no vill besser inveschtiere wett,
und dää denn Gwünn macht und nit waiss wo hii dermit,
duet s uff e Konto z Liechtestai, wo s gar nit git…

Het ain e Konto z Liechtestai, wo s gar nit git,
wo ganz vill Gäld druff liggt und niemerts waiss es nit,
und die vertlehnes denn, obwohl sy s Gäld nit hän,
grad an e Schwyzer Bangg au wenn s die gar nit wänn.
Drum het die Bangg denn wäge däm Buff e Kryysesitzig,
der Bundesroot verspricht sofort sy Unterstitzig
und duet denn Gäld, won äär nit het, grad überwyyse…
So jetz isch Schluss, sunscht griege diir denn non e Kryyse!