Bivoor mir afeen singe
sotte mir e Antwort haa,
Sitzt do in im Publikum
e Al Jaziraa Maa.
Falls däm so wär denn kennti dä
jetz haim deelefooniere,
syt 10 Joor leen sich d Syydiaane
d Värs nit zensuriere.

S’Rosi Merz het uns
ganz im Vertraue wisse loo:
S’Debaggel mit em Ruedi z’Lybie
haig sii jo gsee koo.
Wenn ych en in e Migros schigg
zem Boschte ganz elai –
denn kunnt äär als mit gar nyt
oder mit em lätze hai.

Hundert Daag, die git im Gass
d’Basler SVP,
denn wott die scheeni Trachtegruppe
kai Verbräche mee.
Eerlig gsait hänn mir uns gfrogt,
ob ain vo dääne Gselle
iberhaupt und fäälerfrei
kaa uff Hundert zelle.

Sportler gspyyre s Doping
maischtens an dr Libido,
je no Pille kasch dr Sex
fir Wuche blyybe loo.
Bim Tiger Woods näm uns no wunder
was me däm als git,
18 Lecher länge ihm
schyynts jo amigs nit.

Dä neii Schuggerkommandant,
het Rom verluute loo,
syg sträng katolysch gsee,
jo laider nit ganz comme il faut.
Vo uns uss isch bi Männerliebi
wiirgglig nyt derbyy,
nur hets denn ums Verregge grad
e Zircher miese syy!
S’Lotti isch e siessi Boone
mit lange, blonde Zeepfli.
Laider het das nätte Kind
nit grad vyyl im Kepfli.
Rächne, Läse, Haimedkund
hänn fir sii kai Raiz:
Das bruuch y speeter sicher nit,
denn ych wird Miss Schweiz.

Vo Baasel zeerscht uff Lieschtel
denn vo dert uus ins Tessin.
Via em St. Bernhard
no en Stopp in Savognin.
Zimlig uff dr Schnuure
sinn mir spoot ins Wälschland koo:
Z’Gämf hänn mir die Grippeimpfig
ändlig iberkoo.

Jeedes Joor im Summer
träffe sich in Saignelegier
e Huffe Schwyzer Buure
in olympischer Idee.
D’Goldmedallie im Schiesse
het e Bündner iberkoo:
Sy Gummistiifel isch dr Leuthard
klar am neechschte koo.

De ainte isch dä Rettigskaschte
fascht e bitzli z’root.
Die andere finde d’Geegeleesig
het jo vyyl zvyyl Droot –
iirgendwenn hänn sich d’Barteie
sicher naime droffe…
Im andere het das nyt mee gnutzt,
denn är isch versoffe.

Schaut euch mal die Jungs da an:
Das ist ein Schnitzelbank!
Bilder habn sie auch dabei,
bunte, Gott sei dank!
Wenn als Bangg duur d’Baize ziesch
frogsch di naimeduure,
Minarett gits kaini,
aber d’Schwoobe leen mer schnuure!
Hello Barack, here is Guy –
the President of Basel!
You know me sicher, I’m the one
mit em hool Geschwaafel!
Yes, I can und waiss genau,
that will sicher goo:
Au yych wird e Nobelbryys
nur firs Ummestoo bikoo.

Bim neie Trainer gseesch die Buebe
nit nur vyyl trainiere,
sii mien au dytschi Värbe
kenne richtig konjugiere!
D'Hoffnig vom Verain isch,
dass, wenn alli Dytsch versteen,
d Chance styyge, dass sii sich
nimm an d Guurgle geen

Dä Rammler uff däm Helge
das isch unsere ganze Stolz.
Sii, dä hoggt uff alles druff,
usser s’isch us Holz.
Am liebschte het är jungi Hääsli,
das isch nit ganz ooni.
Fir die, wo d’Rasse wisse wänn:
S’isch e Berlusconi!