Wär het scho d Säuligrippe ghaa?
Kain vo iine, nimmy aa!
Hän Si sich wirgglig impfe loo?
Und schachtlewys Tamiflu lo koo?
D Chemie het wiider guet verkauft,
dr Vasella wott, dass ebbis lauft

Dr Gui Morin well sich schynts jetz wandle,
statt d’Paziänte, die ganzi Stadt behandle.
Das haisst, nur pfluudere, numme nyt mache,
iiberall frindlig griessen und lache.
Dä verwäggslet d Regierig, so wien y gsee,
mit unserem Fasnachts-Comité!

Am Morge frieh, no unrasiert,
e grosse Schrägg – was isch bassiert?
Isch my Spiegel äggscht kaputt,
oder byn y äggscht emänt scho futt?
Dr Merz gratzt hinder baiden Oore.
Jäsoo y haa jo my Gsicht verloore!

E baar Jungi laufe in Fätzen umme,
ooni Orientierig, das isch s Dumme.
Ain isch grad us dr Kischte koo,
die andere laufen däm hindenoo,
si faaren im enen alte Saurer
Dasch d Super-Armee vom Ueli Maurer!

Bi dr UBS am Personalbankett,
gits nummen e Pizza, die no gschtreggt.
D Müllere froggt dr Hueber schnäll,
du nimmsch vo mir die Halbi gäll?
Gib si lieber zrugg, waisch ych haa dänggt,
dass es de Cheffe fir mee Bonus länggt!

Als Hauptfach sott me im Kindergarte,
mit Baseldytsch-Lektione starte,
au s Friehfranzeesisch isch jetz gfroggt,
scho die Jingschte wärde mit Änglisch bloggt.
Als Leerer mäldet sich spontan,
dr Roman Polansky fir dä Plan!

Ojee ojee jetz goots ins Nassi,
my liebe Hund, dä muess jetz Gassi.
Är luegt my wirgglig truurig aa,
wie ain wo kai Wässerli triebe kaa.
Dä Bligg maant my graad an Hanspi Gass,
numme macht sich dä nie nass!

E Schwellemer-Buur wo sy Milch verschänggt.
Y haan en gfroggt, was hesch au dänggt?
Är haigg s brobiert, wie vyyli au,
bi n ere Staffle  „Buur suecht Frau?“
d Milchmaitli haigen alli e Maa,
nur s’Trudi Gärschter syg no z haa!

Dr Gadaffi wott schynts d Schwyz verdaile,
isch dä Brueder denn no z haile?
Mir wurde zue de Schwoobe gheere,
d Zircher wurd das zwoor nit steere,
wär blybt denn schliesslig zletscht no do?
E baar Gfangeni uus Quantanamo?

Mischter und d Misse sin vo Natur uus scheen.
Doch Gschythait gheert nit zue de glyche Geen.
D Miss Schwyz wo, nit emool s Materhorn kennt,
im Mischter isch s’Lääsen und s’Schrybe fremd!
Numme bim -minu het d Natur ibertriibe
Är findet sich scheen und kaa trotzdäm schrybe.