zurückzurück

Anggewegglimaitli 2011

Anggewegglimaitli Comite-Schnitzelbank Basler Fasnacht 2011

 

Anzahl Mitwirkende: 3
Comité-Bank seit 2008


Syt 40 Joor ändlig – das find ich nit schlächt -
hänn mir Fraue politisch jetz au unsri Rächt.
Mir zaige der Wäg, d Männer folgen aim,
si sin s jo scho gwoont, denn es isch wie dehaim.

D EU isch stuur, sy will nit noochegää,
mir solle doch gfelligscht iir Rächt ibernää.
Die Wälle het s au scho uff Basel verschlage,
em Baseldytsch geen jetz scho Fremdi an Graage.

S git working-poor, die hänn wenig Loon,
und armi Kaibe, fascht ooni Pension.
Wär esoo zem Lääbe wird z weeni haa,
dä mäldet sich bi der Implenia.

D Grieche und d Ire, derzue kemme d Rammel,
hänn wäge de Schulde ganz gheerig der Bammel.
Vom Leesige sueche, do hänn si e Kater,
nur der Rammel sait aifach: „Mer möche kei Theater!“

In der BAZ het der Suter, dä alt Pilot,
em Blocher grad zaigt, wie s Fliege so goot.
Kasch nit, liebe Moritz, i wurd di vereere,
em Markus Somm no der Abflug leere?

Bim Durchbruch am Gotthard vo doo no dert ääne
git s e Wasserybruch, vo so vyle Drääne.
Jetz hämmer der Drägg und e Loch no im Gnais
und vom Schwoobeland här kai Aaschlussglais.

Eb ächte Nespresso oder dä vom Denner,
isch mir doch egal, denn ich bi kai Kenner.
Bi jeedere Dasse duen ich my druff freye,
vom Himmel kennt der George Clooney gheye.

Är isch im e Hooch gsi, är het d Chance paggt,
jetz sin aber d Uussichte nimm so intaggt,
will s iim wääge Stirm und Tornados im Bett,
d Karriere so zimlig verkachlet het.

E Luschtmolch isch au no der alt Berlusconi,
het Fraue en masse und ka s nooni ooni.
S Fazit isch aifach, do ka me druff baue:
Es goot halt scho gar nyt, ganz ooni uns Fraue.

D Frau Merz schiggt der Maa, Kommissione go z mache
und sait: „Bring mer dasmool die richtige Sache,
bring nit scho wiider Schwartemaage,
numme will de nit kasch Bindnerflaisch saage.“

Der zu Guttenberg het sich nit geniert
und mit eme bschissne Doggter blagiert
Ich hoff fir e Doggter FMH
dass är sy Titel bhalte ka.