zurückzurück

Blauäugige 2011

Blauäugige Comite-Schnitzelbank Basler Fasnacht 2011

 

Anzahl Mitwirkende: 4
Comité-Bank seit 2000

 

 

 


Hoochdütsch lehrsch im Kindergaarte – in dr Schuel Franzöösisch,
Aenglisch, Spanisch, au Latiinisch – wenn de nit grad döösisch;
denn bruuchsch e scheen pflägt Baaseldytsch fir d Väärs und s Intrigiere
und Serbisch, Türkisch,  Suaheeli – zum dy integriere.

D Flugi, die sinn nümme gflooge – wäägem Eyjafjalla;
die wääre wäge dääre Äsche – alli aabagfalla.
Dr Waagefiehrer Bochsler maint: -  d Piloote sinn doch Fläsche!
Mir Drämler mien au jeede Daag – zem Banggverain dur d Aesche.

Ganz erschöpft goht ain zem Arzt – dä sait es isch esoo:
sy schaffe z vyyl, dr Darm macht Lärm –  isch d Libido no doo?
Sy bruuche Stilli, bruuche Rueh – y hoff, ass s ihne glüggi;
s elai Syy wääri  s Bescht für sii – göhn sy doch in d Stüggi!

'Harasselauf' ,  so duet me dääre – junge Sportart saage,
wenn Fläsche nääbe Fläsche laufe – und no Fläsche draage.
Die Deppe, wo die Fläsche schleppe – finde s ebe toll,
wenn d Fläsche alli läär sinn – und sii alli voll.

Mir frooge s Evi Widmer-Schlumpf: - jä isch dä Wäggsel wohr?
Die sait: das isch doch loogisch – bi in de Wäggseljohr.
Drum mach y in däm letschte Johr – waas y wirgglig kaa;
jetz schaff y nämli nümmi us – jetz schaff y wider aa!

Die Schwyzerisch VerfolgsPartei – portiert dr Accola,
wil dää als Schystar in Graubünde – Stimme hoole kaa;
doch Pauli waisch, wenn duu denn z Bärn – vor allne öppis saisch,
bisch duu für d Nationalrööt nur – e Mogge 'Bü-Bü-Bündnerflaisch'.

Dr Phaapscht well jetz in gwüsse Fäll – sogar s Kondoom erlaube;
dr Benedikt wett doodermit – sy Glaube glaub entstaube.
Wie mir sy Hailigkait verstöhn – nimmt dää dä Gummi numme,
wenn er öppis gummele muess – und s isch kai Gummi umme.

Dr nümmi Doggder Guttenberg – isch scho jetz am Aend;
dä wird nur miehsam Arbed finde – mit zwai lingge Händ.
Sy Seggretärin het ys gsait – und uf de Stoggzehn glacht:
Scho numme bim Kopiere – haig dää dr Doggder gmacht!

Dr Schwyyzer wott sy Gwehrli bhalte – soone Tällesohn,
dä kaa jo gar kai Gwalt entfalte – ohni Munition.
Bim Silvio isch s gnau esoo – dä bruuchti s Gwehrli nie,
wennd däm alte Gluschti – s Viagra wurdsch entzieh.             

Bi dääre 'Stüürgerächtigkait' – hänn mir dergeege gstumme,
denn nääbe schwääre Millionääre – wääre mir die Dumme.
Angscht hänn mir vor allem ghaa – es wääri noch eme 'Joo',
verdriibe us em Paradies – dä Ospel wider koo.

Jetz sott me neu uff Baaseldütsch – ma kaa s au überdryybe.
Phariiser rain phoneetisch – mi eme ‚Ph’ schryybe.
Und bringt dy Frau Phariiser denn – in falscher Gröössi hai
no saisch: dä isch rain p-hysisch – für my P-hallus z glai.

Dr Gottschalk duet sy Schoggijob bim ‚Wetten dass’ jetz kinde
s dütschi Färnseh muess en ander – Gummibärli finde.
Mir schlöön statt däm dr Morin vor – dä wurdi sicher nie
will er gar nüt z saage het – die Sändig überzieh.