zurückzurück

Doggter FMH 2011

Doggter FMH Comite-Schnitzelbank Basler Fasnacht 2011

 

Anzahl Mitwirkende: 2
Comité-Bank seit 2005

 


D Frau Hueber chunnt zu mir, ihr Biebli miech no Sache,
Si heig en scho wiider verwütscht bim Döggterlis mache.
Nit s Döggterle sigi do s Schlimme dra,
Aber in dr Schuel sage si ihm scho dr “Kachelmaa”.

Diagnose:
Dr Belusconi, i mach jedi Wett
Ass dä s Döggterle erfunde het.

Hän Sii gwüsst, ass d Schweschter Erika, gebore im Stärnzeiche Fisch, 
Im Urinfläsche wäsche schaurig ungschiggt isch?
Die meischte loht si falle  – si muess se nit zahle,
Mir rächne das ab über d “Fallpauschale”.

Diagnose:
I bin e chli schutzlig – i cha mache was i wott,
Bim Füglistaller han i scho Huusverbott.

Sit me duss muess rauche – han ich uusegfunde,
Isch dr Raucherhueschte bi de Männer fascht verschwunde.
Drfür nimmt bi de Fraue, das lohnt mr kei Rueh,
D Bloose-Entzündig saumääsig zue.

Diagnose:
I griegg das nit – i cha’s euch gaggse,
 due an de Bei halt d Hoor loh waggse.


Sii, dr Alex Frei haut mi aa – kürzlig im Bus,
Er liidi ame saumässig starke Tinnitus.
Er heig immer - öb gwunne oder verlore,
Bim Schutte sone Pfiffe in den Ohre.

Diagnose:
I kenn das Gfühl – das cha eklig sii,
Mir pfiffe d Männer hindedrii.

E Logopäd erklärt mir: Weisch,
I kenn e Maa, dä het Mieh mit em Wort B-B-Bündnerfleisch.
Derbi cha dä nämlig – dä het e Maage,
Fehlerfrei “Salamitaktik” saage.

Diagnose:
Derbi isch dä Maa – do lachsch di hii,
S ganz Lääbe e chlis Würschtli gsi.

I warn alli Fraue über 60 do,
E Schwangerschaft im Alter isch nit ohni Risiko.
Denn d Chinder chöne, - wenn si’s emoll checke –
Ihne die dritte Zehn verstegge.

Diagnose:
Jetzt mien halt d Dame, im Herbscht vom Lääbe,
Ihr Gebiss mit Araldit aachlääbe.

D Gschlächtskrankete göhn zrugg, au bi de Kathole,
Sit si mit em Sääge vom Papscht chöne Pariser hole.
Die dörfe dr aber, duet dr Heilig Vatter huuche,
Nur an de hooche Fyrtig bruuche.

Diagnose:
Dr Klerus duet – dir wärdet’s ahne,
Jetzt ganz vill neui Fyrtig plane.

Wägem Goldpriis duet sich e Wäggsel zu mim Zahnarzt lohne,
Denn dä bruucht Goldblaggedde für d Chrone.
Jetzt bliibi aber mit dr Zunge, i hätt mir’s chöne dängge,
Allbott an däre Noodle hägge.

Diagnose:
E Zürcher Zahnarzt-Praxis, wo guet lauft,
Het alli chupfrige Blaggedde zämmekauft.