zurückzurück

Dootebainli 2011

Dootebainli Comite-Schnitzelbank Basler Fasnacht 2011

 

Anzahl Mitwirkende: 4
Comité-Bank seit 2005

 


E Ziircher isch vor eme Kiosk vermeeblet woorde
Dr Bolizey sait är, me haig en welle moorde
Är sig ganz braav gsii, heeb nid provoziert und sich mit niemerem grauft
Är haig nur gsait, är hätt gäärn d Baasler Zytig kauft.

Dr Ghadaffi losst duur d UNO sich nid irritiere:
Diend wäg däm bitzli Moorde nid so kritisiere!
Dir wäärdet gsee: wenn ich, wär uffmuggt, abmuurggs grieg i bald e Oorde
Schliesslig isch au China so zer Wältmacht woorde.

Me setzt in dr Schwyz jetz schwäär uff Dradition
Schwinge, Alphornbloose, Fondue, Jodeldoon
Raasemaie wird zer Haiet, uf em Balggong zichtisch Gaisse
Und bald soll d BaZ au wider Nazi-Zytig haisse.

  

Mir hänn gschrubbt und butzt und gwäsche und frottiert
Sogar mit Maischter Proper hänn mer s ussbrobiert
Es nitzt alles nyt, mir hänn scho wundi Händ bikoo drvoo -
Dä bruuni Blocher-Schandflägg will nid ganz usgoo.

So ne Blageeri hoggt zue uns und wott is saage
Wie me wuurd Helge moole und nach Pointe jaage
Frisst unsri Pommes Frites, sufft dr Gschpritzti wäg, denn goot är ooni z zaale -
Dää gwinnt woorschins die näggschte Baaselbieter Waale.

Stramm gstande, d Hagge zämme, wehe, wenn ain niesst!
Denn zallererscht mit gstreggtem Aarm dr Schef bigriesst
Drno Rapport, und wär nit rächts spuurt griegt kai Desseer-Ration
So fiert dr Markus Somm jetz d BaZ-Redaktion.

Wenn mit em Sturmgweer ain d Familie aabemait
Mit dr Pistole luegt, dass d Frau macht was är sait
Und sich aine s Hiirni wägschiesst, sott me das nit iberdryybe
Wichtig isch, dass Schwyzer rächti Schwyzer blyybe.

Hänn si s scho gheert, dr Bush dä het Memoire gschriibe
Wo n är verzellt, was är als Breesi so het driibe
Mir hänn das Buech jetz gläse und was uns biydruggt het do draa
Isch dass dää sich iberhaupt erinnere kaa.

D Dante Ruth verzellt am Kaffigränzli-Disch
Wo si grad von ere USA-Reis haim koo isch
Si syyg an die Tea Party, haig sich gfrait uf Gutzi, Dischmaniere
Doch s syygi schlicht zem Kotze, was die deert serviere.

  

S isch toll dass all die Kumpel z Chile, äng ufenand
Organisiert sinn gsi, und frindlig zuenenand
Au bi uns hogge baar im Dunggle, wo doch zämmeschaffe sette
S sinn numme siibe, aber laider nimmi z rette.

S wird immer schlimmer mit der Jugend und dr Gwalt
D’Täter immer jinger d Opfer schwach und alt
Naischtens wärde alti Fraue vor em Migros überfalle
Will sich Kinder ihri Nanos wänn go kralle

Si mien is glaube, es isch woor, nit iberdryybe:
Dä Väärs do het fir uns dr Harry Potter gschriibe.
Är well dr Zauber vo dr Fasnacht, Hogwarts sig e z grossi Gfoor
Jo und d Pointe sing är denn im näggschte Joor.