zurückzurück

Dreydaagsfliege 2011

Dreydaagsfliege Comite-Schnitzelbank Basler Fasnacht 2011

 

Anzahl Mitwirkende: 2
Comité-Bank seit 2011

 


Ych ha dr Schaich vo Katar gfrogt
Wie hesch denn du dr Blatter gloggt
Do het er glacht und gsait: „mi seel -
Ych kauf dängg jede Daag Kameel!“

Drämmli, Drämmli, Drämmli, Drämmli
Jä Drämmli uff di wart i nämmli
Dä prächtig Väärs dä findsch im Wäärgg
Vom Theodor zue Guettebärg.

S ney baseldytsche Wörterbuech
Sie - dasch glaub ärnschd und kai Versuech
Sit i’s gseh ha findi’s nümme s Lätze
Ass d’Hääfelischuel muess Hochdütsch schwätze.

Dr Kundert het e Droot zue Gott
Waiss, wo dä hoggt und was är wott
Verkündet flott si elft Gebot
Das man nicht Schlittschueh laufen sott.

D’Unfäälbarkeit vom Baapscht gits zwoor
Scho sit 140 Joor
Dr Jetzig füllts mit neyem Lääbe
Är ligt unfäälbar dernääbe.

Dr Räägewurm isch s Dier vom Joor
Mir kunnt das zimlig haiggel vor
Schliimig, glatt, s Profil wo fäält
Wird jetzt dä Morin nommol gwäält?

Die halbe Jooreszitte sinn:
Frühl und Somm und Herb und Win
Im Frühl, das hoffe alli fescht
Isch dr Somm dr Schnee vo gescht.

Barteidaag vo de wysse Schoof
D Hirni sinn in diefem Schloof
Rääge peitscht uff d Haimetäärde
So dass si als wie bruuner wäärde.

E Buur stoht an dr Chilchemuur
Är luegt ganz stur uf d Chilchenuur
„Die schloot in Moll und schloot in Dur
Das isch doch währli gnue Chultur!“