zurückzurück

Gasladärne 2011

Gasladärne Comite-Schnitzelbank Basler Fasnacht 2011

 

 Anzahl Mitwirkende: 5
 Comité-Bank seit 1977

 gasladaerne@bluemail.ch

 

 


Mir hänn ys gopfergässe miesse duureringe
noo däm Theater-Nai fir Eych no miesse z’ singe.
Und dorum mache mir hüt zoobe das esoo:
Die wo vom Land sinn, solle jetzt schnäll uuse goo.

Es sait dr Berlusconi zue sym junge Kätzli
Mir mache zerscht e weeni Bunga Bunga, Schätzli.
Denn dien mir aifach e bitz speeter ässe, waisch,
s kunnt no dr Merz verby und dä bingt Bübübündnerflaisch.

Unsri Frau Wänger, wo jetzt in dr Migros putzt
und jeede Oobe fluecht, well’s Putze gar nyt nutzt.
Kuum isch si fertig liggt do wider so e Bärg
Jetzt putzt si nümm - jetzt suecht Si zerscht dä kaibe Zwärg.

Was duet dr Sarkozy und FCB verbinde?
Mir sage’s alle, wo’s nid sälber uusefinde.
Dr ainti schfft’s dr ander nid, es isch zem Schreje
Denn baidi mechte ändlig d Roma uuse gheje.

Hundert Frangge will jetzt Basel Stadt kassiere
wenn me dr Abfallsagg z frieh dusse duet platziere.
Das isch uns schysseglych, das drifft uns nid so hart.
Mir hänn jo s letscht Joor ain verkauft während dr Art!

Jetzt sinn im Bundesroot vier Fraue yyne koo.
Kuum hänn die d Mehrhait, sinn die erschte Lämpe doo:
Das bringt die Herre Bundesrööt jetzt bees ins Schwitze,
denn pingglet wird vo jetzt aa numme no im Sitze!

Es isch erfrailig gits jetzt wider s Schaarivari
sait dr Pheeter zue sym alte Speezi Kaari.
Baidi fröie sich scho uf e Mòòrgesträich
und finde s nöie Basler Wörterbuech e Säich.

Au dr Morin isch ans Uni-Fescht marschiert
und voller Gnuss isch är deert duur dä Darm stolziert.
Deert blieht är uff und grootet sichtbar in Erreegig
und het dä Furz vo dr Museumszämmeleegig.

D Islamischte derfe ihri Ehefraue
Wenn die nid folge dien,- ganz legal verhaue.
Numme darfs e kaini Spuure hinderloo.
Kai Wunder mien die alli under d Burka goo!

Was isch au pletzlig mit em Benedictus loos?
Sy Inträsse an Pariser schynt jetzt grooss!
Zem Schutz vor Grangget duet är jetzt das Ding entdegge.
Aber numme wenn si dien nach Weihrauch schmegge.

Jetzt isch die armi Angi Merkel wider bloggt,
well so e Stoker laufend um si umme hoggt.
Wo mir das gheert hänn fallt ys numme aine yy:
Das ka doch nur dr Presidänt vo Frankrych sy!

Dr Herr Vertaidigungsminischter vo de Schwoobe
bringt mit sym Plagiat e Huffe Lyt zem toobe!
Mir garantiere Eych, und dien nid iiberdryybe,
- as mir unseri Värs syt jehär sälber schryybe.