zurückzurück

25 Joor Glettyse 2011

Glettyse Comite-Schnitzelbank Basler Fasnacht 2011

 

Anzahl Mitwirkende: 2
Comité-Bank seit 1985


Dr Leuebärger, spoot leggt är d`Karte uff e Disch,
Blyybi Bundesroot, bis dr Gotthard durchstoche-n-isch.
Laider hett das kaine gwisst vor Ort,
Sunntsch hättte die vyl schnäller boort !

An dr WM z`Garmisch im Starthuus – „das weiss ein jeder“ –
Piepst vor em Start bi jedem Renne dr Chronometer.
Ussgnoh, s`staarte Schwyzer Männer, unsri Pischte-Gracher,
Bi däne piepse EKG und Härz-Schrittmacher !

S`verletzt sit Neuschtem „Wetten dass…“, s`isch zem hyyle,
Näbem guete Gschmagg jetz au no d`Wirbelsyyle.
Uss däm Grund derf bim Näggschte Mool e Wett uss Basel ko :
„Wieviel Schwimmer ka-n-e Färimaa zem Grübbel schlo ?“

Em Kachelmaa sy Wättersoose,
Ka me jetz uff Radio Basel loose.
E soo entstoot bestimmt kai Schaade,
E kaine gseht sy offe Hoose-Laade !

Zem SVP-Partey-Daag im Freye bi Schnee und bi Yys,
Gitt`s zwai Mäldig - die aint isch guet, die ander mies.
Die Guet : Dangg dr SVP isch d`Landsgmaind neu geboore,
Die Schlächt : s`isch lader kain verfroore !

S`gitt im Arisdorfer Tunnel, sett dert ain duurerolle,
Ney e „Abschnittsgeschwindigkeitskontrolle“.
Angscht muesch wäge däm e kaini ha,
Will kai Schugger das Wort richtig schriibe ka !

Joorelang hänn Männer s`Gligg an d`Deggi gschosse,
Jetz wird s`Erotigg-Kino Corso laider gschlosse.
No 30 Jöhrli haisse Drajm und nasser Wöhli,
Isch das kai Kino meh, dasch hytt e Dropfstaihöhli !

S`wird Gianna Nannini, die Gueti,
Mit 54 s`erscht Mool Mueti.
Ains isch sicher bi däm nimm ganz junge Schlabbe :
Dr Berlusconi isch sicher nid dr Babbe !

Das „Tier des Jahres“ isch e Rääge-Wurm !
Also, my Härz eroberet dä Wurm im Sturm.
Trotz Drägg und sich verbiege hett dä glaini Gnoot,
Me Ruggraat als dr gsamti Bundesroot !

S`duet dr „Freiherr Theodor zu Googleberg“ gar nyt kenne,
Und kopiert e jeede Grimpel, bis d`Kopierer brenne.
Dr Bescht, uf Syte dreihunderelf ganz unde,
Hän mir sogar e Värs no vo dr Striggedde gfunde !

 

start on klick Vers hören 1

start on klick Vers hören 2

start on klick Vers hören 3

start on klick Vers hören 4

start on klick Vers hören 5