zurückzurück

Hanslimaa 2011

Hanslimaa Comite-Schnitzelbank Basler Fasnacht 2011


Wo si dr NEAT-Tunnel dien duurejätte,
duet e Pfaff zu dr Hailige Barbara bätte.
Do maint e Kumpel halber bsoffe:
„Die han yych no nie in dr Kantine droffe!“

Und wo dr Leuebärger und dr Ogi – die gaile Giele,
sich im Tunnel geegesytig ins Giletäschli briele,
maint e Mieneur uus Spanie – wo nid grad duet boore,
die zwai Oranjes hän jo geegen uns an dr WM verloore!

Mii frogt e Maa – wäm ich d Stimm wurd gee:
„Wääle si d SP oder sogar d SVP?“
„Eerlig gsait“ sag ych denn däm Maa:
„Me wäält nid zwische Pescht und Cholera!“

Dr US-Botschafter maint – und s wird wool so syy,
d Schwyz syyg e frustrierendi Alpedemokratie!
Derbyy: Lieber mit Rambasse Mais uff em Gämpe,
als joorzääntelang mit de Talibaan Lämpe!

Wo dr Hans Fehr im Albisgüetli het welle
sich wie dr Winkelried de Chaote stelle,
röchlet är zem Schwarze Blogg: „Yych bii berait“
und het no „Asta la Vista Baby“ gsait!

Wenns jetz jeede Winter so wyter schneit
und wäge däm dr Euro uff 50 Rappe gheit
und dr Doller gratis griegsch - no wärdet Iir gsee,
denn hämmer dusse - eppen zää Meter Schnee!

Z Bärn hämmer jetz numme no 3 Fläsche,
wie Yyglemmti zwische 4 Wyyber-Däsche.
Gäbs no zwai Gumsle mee, kenntsch gsee wie die Drache,
us em Murer Höörnli mit Ghaggts dien mache!

Dr Sarazzin bhauptet kurz und gnabb,
wäg de Türke schafft sich Dütschland ab!
Ych find die Uussaag gar nid schlächt,
jetz hoff y nur – er haig au rächt!

und neierdings waiss me – ooni z ibertryybe,
ass me d Schwoobe wirgglig ab ka schryybe!

DIGNITAS macht jetz per Delifoon,
zem halbe Briis - e Stärbe-Aktion.
fir 30 Stutz griegt jetz d Frau Maier,
statt e Gift-Cocktail - 3 Schwoobenaier!

Dr Regierigsroot diktiert als Fümoarschregg,
jetz isch fertig mit Rauche im Schiefenegg.
Drum schigge si d Raucher – wo nid bariere,
jetz in d Muttenzer-Kurve go inhaliere!

Myyni Frinde maine zem greeschte Dail,
yych syyg scho lang „Too big to fail“.
Das stimmt denn nit, denn im Grosse Ganze,
isch s Quadrat vo mym Umfang vyyl länger als dr Ranze!

An dr Aida hän vor em Drey-Keenig zwai Fraue,
vo dr Schiffländi (!) uus - nooch dr Fääri gschraue!
Kämti dr Fäärimaa rhyyuffwärts jee dert hii und zrugg,
wär das e Migrante-Uusschaffig ab dr Mittlere Brugg!

Die Klimaerwärmig schloot mir uff d Gamälle,
statt haiss hämmer duss ständig e Kältiwälle.
Doch drotz warme Prognose frier ych bim Schlooffe,
jetz mach yych us däm Kachelmaa e Kacheloofe!

Im Summer han y im Eglisee,
emool s Fraueli welle vo inne gsee,
y han e Tanga aaglegt und gang ooben ooni
und scho schreien alli Bunga-Bunga Berlusconi!

Im Färnsee leer y was y muess nee,
ass es bi mir kai Blaibuuch däät gee.
Bis geschter han y alli die Mitteli gno
und jetz lueget do aane, dr Buuch isch no doo!

 

Anzahl Mitwirkende: 2
Comité-Bank seit 1979
hanslimaa@greenmail.ch