zurückzurück

Heiri 2011

Heiri Comite-Schnitzelbank Basler Fasnacht 2011

 

Anzahl Mitwirkende: 2
Comité-Bank seit 2006

heiri-basel@sunrise.ch


Am Claraplatz styyg ych noch em Jasse in e Säggser y.
Im Tram in het’s vier Laveri, ein drvoo ka ’s nit loo sy:
„He du alte Sagg, was luegsch blöd ? Wotsch aini in d’Frässi ha ?“
„Pass uff“, sag ych ganz sälbschtbewusst: „Ych verzell’s em Fährimaa !“

Y sitz im e Combino-Tram, ’s isch Summer und sauhaiss.
Y triff e hundert Kilo Pflutte, die schwimmt in ihrem Schwaiss,
trotz Buuch-frey-Shirt und Mini-Rock, mir schloot’s grad uff e Maage:
Wenn die nur über all däm Späck wurd e Burka trage.

Z’Auschtralie hilft dir schwimme nümme, ’s het Wasser überall.
Drzue jetz no dä Wirbelsturm, das isch aifach nümm normal.
Au mir Schwyzer hän vyyl Sorge, wenn d’ gnauer überlaisch:
Mir hän riisigi Problem – mit em B B Bündnerflaisch.

Historisch gseh, ghört jede Basler zue de Allemanne.
Die git’s au in Süddütschland, ihr liebe Fraue und Manne.
Drum sin alli Basler Schwoobe, oder isch’s ächt umgekehrt?
Uff jede Fall sin mr kaini Schwyzer, het uns dr Blocher glehrt.

Züüri verlangt vom Stroossestrich pro Kopf e Standgebühr.
Drum wird e Nümmerli z’Züüri wäg de Gebühre tüür.
Ych hoff, in Basel fiehrt me glyy e Gebühr für Zürcher yy.
Denn hän au mir Gebühre für öbbis, wo sott verbotte syy.

Sii dört hinde, jo gnau Sii, mit dr Blagette am Krage.
Könnt’s ächt syy, dass Sii vilicht e Plagiat dien trage?
Dr Toni Brunner, dä waiss nit, was e Plagiat soll sy.
Kai Angscht Toni, Du bisch kains: Du bisch e billigi Kopie.

Dr Sarazin schrybt e wichtigs Buech: Deutschland schafft sich ab.
Uff Baseldütsch übersetzt haisst das: D’Schwoobe mache schlapp.
Dass Türgge schuld sin do dra, dasch voll krass Mann, e Witz.
Schwoobe git’s doch massehaft: Die sin alli in dr Schwyz.

Neu sin bi däne siibe Zwärge vier drvo Schneewittli.
Ändere wird sich wenig, wäg däm munzig glaine Schrittli.
D’Frau Herzog het me z’Bärn nit welle, jo, was wott me mache.
Die hän e Bärner Bärin lieber als e Basler Drache.

Letscht Wuche fahr y mit mym Velo in Richtig Kaffi Spitz.
Do haut’s mi noo dr mittlere Brugg vor em Achter voll uff d’Schnitz.
Im Himmel sait mr dr Petrus: „Bisch dr dritt us dr Gryffegass.
Waisch, dä wo z’Basel d’Stroosse plant, dä schafft für d’Dignitas.

Die dreyedryssig Kumpel z’Chile in dääre Myne unde,
die hänn kämpft wie die Wilde, drum hän si e Ainhait gfunde.
’s lauft dr Match geg d’Insle Malta, do sait zue mir my Schatzi:
„In däm neue Gotthardloch hätt’s Platz für unseri Nati.“

In Neapel liige tausig Tonne Abfall uff dr Strooss.
Dä riise Huffe stinggt brutal, für d’Mafia isch’s famos.
Für e Giovanni isch das Kunscht: „Das Stingge magge niente,
questo Schyssdrägg isch e Portrait del nostro Presidente.”

Triffsch am e Fescht e Huffe Lüt, denn gisch di megacool.
Punggte duesch mit: „Ych bi gschiide, arbetslos und schwuul.“
Fründe gwinnsch, saisch: „Ych bi Prieschter, han e Minischtrant zum Schatz.“
Richtig negativ fallsch hütt nur uff, saisch trocke: „Ych liis d’BAZ“.

Usschaffigs- und Styyrabstimmig, dasch mer aifach z’kompliziert.
D’Frau Sarasin het das nit nur gsteert, sy het sich echauffiert:
„Dy Butzfrau ka nie usgschafft wärde“, beruehigt si ihre Sohn.
„Wie soll die d’Styyre bschysse? Die griegt doch gar kai Lohn.“

Die glaini Fatma goht in d’Schuel, nur go schwimme darf si nit.
Dr Babbe Ali, dä sait „Nai“ au wenn’s e Buess vom Eymaa git.
Git’s in Lieschtel e Buess, wenn e Schieler nie ins Rächne goht?
Nai, jede wo nid rächne kaa, wird zur Stroof Regierigsrot.

Dä Vulkan in Island spuckt sy Äsche hooch ins Himmelszält.
D’Flugzüüg blyybe drum am Boode, sy fliege nümm um d’Wält.
Vulkan findsch doo in Basel kain, das waiss jede Idiot.
Sogar d’Vulkän sin informiert: Bi uns herrscht Rauchverbot.

Wottsch guet ässe, gohsch in e Baiz, hesch Durscht, gohsch in e Bar.
Zum Rauche duesch e Fumoir bsueche, sowyt doch wunderbar.
Wottsch Kultur, gohsch ins Theater, holsch dr Nahrig für dy Gmiet.
Wenn d’immer numme spaare wottsch, denn gang ins Baselbiet.

Dä von und zue, dä aadlig Schwoob: Dr Herr zue Guetebärg.
Dä isch doch in Sache Bschysse, beschtefalls e halbe Zwärg.
Karl Theodor wär so dumm bschysst, dä isch e riise Depp.
Ych empfiil Dir drum e Praktikum bi unserem Blatter Sepp.