zurückzurück

Penetrante 2011

Penetrante Comite-Schnitzelbank Basler Fasnacht 2011

 

Anzahl Mitwirkende: 4
Comité-Bank seit 1997

 


Fir der Kachelfrosch isch s naimeduure bitter,
wenn äär verkinde muess s git Gwitter hinter Gitter.
Wo si iin in Kette leege maint äär fraidig: „wow,
das Spiil mach ich mit myyne Fraue amme n au.“

Im Pult vom Merz do findet d Widmer-Schlumpf e Mogge
B… B… Bündnerflaisch, dä Kaib isch zimmlig drogge.
Doch wenn dä Mogge denn so gseesch deert uff em Disch,
isch im Verglyych zu iire dää no zimmlig frisch.

S duet der Carl Gustav z Schweede sich im Buff vergniege.
Der Berlusconi ka vo Maitli nie gnue kriege.
S bestygt der Sarkozy si Bruni, s isch e Bracht.
Nur d Schwyzer Bundesrööt die schloofe Daag und Nacht.

Wenn d Kondoom verwände duesch, muesch nimmi biesse.
Kardinääl und Bischeff kenne s ändlig gniesse.
Do maint e Doomherr z Rom, äär wurd das au begriesse,
äär mecht sich numme nit Kondoomherr nenne miesse.

„Wenn iir wännd pfyffe,“ sait der Frei ganz eschoffiert,
„bi n ich ewägg, wenn mi doo niemerts eschtimiert.
Ich ha n e Aagebott, iir kennet mir jetz bloose,
vo der Spuggerwaageclique als Mimose.“

Es froggt der Ratzi bi sim Chef: „sag Liebe Gott,
worum hänn mir e Pfyffli dra und e Verbott?“
Dää sait: „es het si guete Grund, das isch e so,
so muesch nit alle Saich nur oobe n uuseloo.“

S isch dangg der Leuthard an der Olma ebbis los.
Au näbenem Rindvieh isch iir Muul iidriglig gross.
Fir aimool het s em Doris au no ebbis gnutzt,
bi der Kuebrämierig het ääs nämmlig butzt.

Es sait der William, „listen you my lovely Kate.
Bis ich bi King, you have halt noo n e bitz to wait.
I am the first in our family geboore,
doch vor mir kunnt no sälle mit de grosse n Oore.“

An der Achterschlaufe duet d Bevelkerig steene.
D Drämmli wuurde glatt der Fluugläärm iiberdeene.
Fir das Giggse z stoppe het me reagiert
und der Blatter Sepp zem Schmiire anngaschiert.

Unter www.wämm-gheert-hit-d-baz do stoot,
wämm das Kääsblatt gheert und wie s em Blocher goot.
Und Sie, dää Somm dää finde mir ganz ussergweenlig,
dää kennt die letschte siibe Lääser no perseenlig.

Ob Deo, Kaffi, Schuegrääm, Biirebrot, Clematis,
bi Lidl, Denner, Aldi, Migros – halber gratis.
Bim Coop muesch sälber scänne, s wäär no knapp z verdrätte,
doch woorschiints muesch no bald di Brotdaig sälber knätte.

Mit em Empfang vom IPhone 4 isch s nit wyt häär.
Das isch egal, will maischtens isch der Akuu läär.
Dää Äpp wo alli Iphone Bsitzer drumm jetz wänn,
zaigt umm di umme Händis wo no Akuu hänn.

Der Didier Cuche gwinnt Renne no mit Säggsedrissig.
Der Tennisgruufti Roger macht no d Geegner schissig.
Jä wenn so Alti gwinne wisse mir e Digge,
dien mir doch an d Miss Wöörld Waal s Trudy Gerschter schigge.

De gheersch der Mubarack in Sharm-el-Sheik lut flueche,
s soll der Ghadaffi sich e neie Zältblatz sueche.
Au der Ben Ali isch uff Frankriich und das schnäll,
sogar der Merz isch wider zrugg ins Appizäll.