zurückzurück

Peperoni 2011

Peperoni Comite-Schnitzelbank Basler Fasnacht 2011

 

Anzahl Mitwirkende: 3
Comité-Bank seit 1988

 


E Päärli wo in’s Fümoir goot,
verloot’s denn wider zoobe spoot.
Benääblet hueschte die zwai haim, und speeter denn im Bett,
merggt er, dass er us däm Qualm, die lätz Frau haimgnoo het.

In der “Nacht der langen Messer“,
wo jede maint:  äär wiss es besser,
wird taktiert bis spoot in d Nacht. Der Filz wird als wie dichter.
Und kuum isch gwäält, kunnt denn der Daag vo de lange Gsichter.

Der Merz Hans-Ruedi sait: „ych stuun
ab däm Wyyb us em Grischuun.“
Und dreeschtet d Simonetta:  „z Bärn lauft’s halt so und waisch:
Da hesch jetz vo dem choge zeeche Bü… Bü… Bündnerflaisch!“

Wenn sich d Ärde nimm rächt drillt,
will dief im Meer Ööl uuse quillt,
denn isch d Äärd-Aggse z wenig gschmiirt – sy gyyrt in irer Noot.
Frooget doch der Blatter Sepp - dä weiss, wie s Schmiire goot.

Wäge eme Pfyffkonzäärt vo zwai Minute,
will der Alex nimme schute.
Är verdraag das Pfyffe nit – Alex, o jee mi nee,
gang jo nie an e Moorgestraich – dert pfyffe si no mee!

Der Unterschiid zwischen em Kachelmaa
und em Schwedekeenig isch allem aa:
Dr aint mutiert vom Wätterfrosch zem Luschtmolch - dasch nit nei.
Und em andere rutscht der Gürtel sammt em Sääbel bis an d Gnei.

Won är die Zyttig ibernoo het,
aant er jo nit, was äär bikoo het.
Nur naime kasch der sicher syy – uff bräche und uff biege,
dass gwissi Redaggtore no – bim Moritz leere fliege.

Finanziell gsee lauft im Baselland
em Balmer s Rueder us der Hand.
Drum bruucht au äär e Glaikredit – und lyttet syyner Bangg a:
S isch fir e DOC-Film mit em Titel: Ich und die Cassa …Blanca!

S Fäärnsee isch uf Quotejagt
und suecht e Sändig, wo aim paggt!
Wie wäärs mit: Bischoff ledig sucht   …e glaine Ministrant?
Und wenn’s nit glabbt, däät’s au zer Not e junge Braggtikant.

Der Lumengo sait am Fäärnsee quäält:
„Y glaub, y ha mi sälber gwäält.
Zwoor bi mer kainer Schuld bewusst, dasch alles reguläär!“
Dä kennt jo glatt ins Fuessballgschäft - als FIFA Funkzionäär.

Der Baapscht het e Pariser gnoo,
bloost en uff und maint denn frooh:
„Die Dinger do, die schitze doch, dasch raini Prävenzioon.“
Und stülpt ein, vor der nägschte Breedigt, iber s Mikrofoon.

Vier Grieche hänn e ganzi Nacht,
in der Tavärne duuregmacht.
Und bi der grosse Völlerey, dien sy gmeisaam praale:
„S bescht an unserem Stammdisch isch, dass d Schwobe alles zaale!“

Am Eurowischen Song Contescht
isch e Schwoobemaitli s Bescht!
Mit nuur zwei Pinggtli sin mir Schwyzer in der Eer verletzt.
Vermuetligg hän mer, in däm Fall, uf s lätze Maitli gsetzt.

Das wo uf dääre Fotti stoot,
das isch der neiy Bundesroot.
Und dä wo uffstreggt unde rächts, nai wär hätt das dänggt,
dasch unsere Herr Malama – uff s Bild het’s nit ganz glängt!

Dä Helge do, dä stellt ganz glaar
der Blick us eme Auti daar,
wenn aini inere Burka so schreeg no hinde gneisst.
Und jetz waisch au, worum so ebbis doote Winggel heisst.

Im Ziirisee het me wyt unde,
uf Grund e baar so Urne gfunde.
Ai Heggtygg, will so eppis, däm See doch kennti schaade.
Kasch dännge, dä vertrait sogaar, dass Zircher dinne baade.

Peperoni_08