zurückzurück

PereFyss 2011

PereFyss Comite-Schnitzelbank Basler Fasnacht 2011

 

Anzahl Mitwirkende: 2
Comité-Bank seit 2010

 


Der Muurer schimpft im Bundesroot: „Loosed Kameraade!
Vierhundert Panzer fääle mir, das isch e riise Schaade!“
„Hee Ueli“, sait doo d Calmy-Rey, „muesch üüs nöd aaschreie,
Mit däne Panzer hann ich wölle d Geisle go befreie.“

S ägyptisch Volgg hett gnueg und goot uffd Strooss ganz unverfroore,
Der Mubarak isch konschterniert – syy Macht fliegt iim umd Oore!
Au andri Diggdatoore drätten ab – s goot besser ooni,
Doch laider, laider, laider, laider goot der Blocher nooni. 

Scho glyy faart s Achter-Drämmli zue de Schwoobe z Weil am Ryy,
Und mit em Dreyer kaufsch z Burgfälde ginschtig Kääs und Wyy.
Per Drämmli kemme alli Pändler denn ind Schwyz go schaffe,
Und umgekeert ka d Schwyz per Drämmli Ussländer ussschaffe!

Das Drummeli im Mässesaal, daas Drummeli isch gstorbe,
Drum hett jo s Musical-Theaater s Drummeli umworbe.
Wo s näggschte Drummeli stattfindet, wäär fird FIFA glaar,
wennd gar nimm waisch wo aane goo – denn gang doch uff Katar!

Mir hänn der Alex Frei aagfroggt: „Los Alex, bisch derbyy?
Als dyyni dreye Fään laade mir dii an Goordeesch yy.“
„Nai dangge“ sait der Alex doo, „iir wäärdet mii begryffe,
S Drummle find ych schandbaar cool – im Geegesatz zem Pfyffe!“

En Uffschrei goot dur Basel und me stygt uff d Barrikaade:
"Dää Tettamanti und dää Blocher dien der BaZ doch schaade!"
Me hett die zwai ind Wieschti gschiggt, jää richtig uuse gschmisse,
Dochs Niiwoo vo däm Blabla-Blatt, isch und blybt versch…..

Im neye Basler Weerterbuech stoot luter kuurligs Zyygs,
Wie Händi, Thiischi, Boxerschoorts, Kompjuter, Wiggiliiks,
Es heisst au nimmi Schnitzelbänggler, sondern Trubaduur,
Kennsch all die Weerter, no bisch ryff fird Fremdsprooche-Matuur.

Das Feisbugg isch e gaili Sach zem Gränze iiberwinde,
Denn au der schreegschti Voogel dää ka dääwääg Frinde finde,
Graad letschthi bättlet soone Thyp: „Ää – bitte, bitte – ää….
Ää – ich will au emool e Frind – ää – danggscheen, Guy Morää.“

S steen finf Verkäufer hinterem Fleisch, ai Frau vorne draa,
Und zwische Bäärge vo Salat, stoot ganz ellai e Maa.
Die schyggi Butigg menscheläär, mit Sändwitsch ischs verby,
So geen die Lääde an der Wiise – Stigg fir Stiggi yy. 

In Rümmlige do griiblet aine uff sim Gillewaage:
„Joo waimer Subvenzioone uff das Basel aabe draage?
Nai Subvenzioone bruuche d Stedter kaini – ych blyb stuur,
Uff all Fäll kenn ych z Basel unde nit ai ainzge Buur!“ 

Jää näi Doktor zu Guttenberg, druurig isch die Posse,
Sii hänn jo gar nyt sälber gmacht, si hänn jo mache losse!
Was hänn Si denn scho sälber gmacht, mir wänn Sii jo nit grängge,
Doch Iiri beide Kinder, Sii was miemer is doo dängge!

E Pfläschterli, e Watte-Bausch und zwei Duulix-Duube,
E Spritzi und e Sagg voll Gips, säggs Neegel und drey Schruube.
Gniggt keere d Schwyzer Schii-Ass haim, si hänn zvyyl Zyt verloore, 
Medallie hetts grad aini gää, gottloob isch kain verfroore!

E Zircher hett d Määrthalle kauft, mir glaube s isch e Buur,
Der Bruuni Mutz in Zircherhand, do wird dir s Bier jo suur,
Fir d Kunschthalle isch fertig Kunscht, e Zircher wietet doo,
Und au e Zircher losst d Sanggt Jakoobshalle untergoo,
Im Charivari-Volggshuus sitzt e Zircher – ain uss Kloote,
Es leitet s Musical-Theaater – joo iir händs verroote,
Jää zem uns armi Basler zschlyffe, hänn Zircher e bsundri Goob,
No schlächter goots im EffZeBee, denn dert befiilt e Schwoob!

Wennd ginschtig wotsch e Butzfrau haa, holsch aini uss Schwarzaffrika,
Denn nummen uss Schwarzaffrika, kasch ginschtig schwarz e Butzfrau haa.
Hesch denn die Frau uss Affrika, gnueg lang schwarz als Butzfrau ghaa, Denn schaffsch se uss noch Affrika, wäär schwarz schafft wämmer nit do haa