zurückzurück

Die Polyvalänte 2011

Polyvalänte Comite-Schnitzelbank Basler Fasnacht 2011

 

Anzahl Mitwirkende: 4
Comité-Bank seit 2010

 


Willsch z‘Basel in e Restaurant, muesch hitte friener bueche,
Näbscht ID, Bangge-Kärtli duesch dr Fümoir-Pass glyy sueche.
S‘Portmonnaie wird immer digger, bald scho platzt das uff,
zum Gligg koschtet das Kärtli Gäld, so goht‘s vom Platz här uff.

D‘Gräbe wärde immer tiefer zwische arm und ryych.
Au d‘Gräbe zwische Stadt und Land – mir ticke nimme glyych.
Und d‘Fasnacht 2000ig und 12 – das wird Eich allne gfalle,
fyyre mir denn alli zämme inre Mehrzwäckhalle.

S‘Wätter isch wie d‘Politik, es isch ständig am schiffe.
Mir Basler sin von Huus us fuul und genn lieber go kiffe.
Die einti Hälfti verpennt d‘Wahl, die andri regt sich uff,
neii Wahlzeedel fände mir kai Saich, mit em Krützli fertig druff.

Öb Winter, Friehlig, Summer, Herbscht, s‘Wätter spielt verùggd.
Dr Deiss ladet drum d‘Uno i, doch die dien nur bedrùggd.
E Lösig het jetzt s‘Radio Basel – löhnd Eich iiberrasche,
wenn‘s Katze haglet duet dr Kachelmaa die schnäll vernasche.

Die ganzi Wält sie rätslet no was Bunga Bunga meint,
mir wisses nit und sueche drum nach öbbis wo sich reimt.
Es fallt is schwär und dorum,_ hän mir öbbis baschtlet,
s`isch dr Lumengo wo bim Zeedel schriebe sich verhaschplet.

Im Kinderspittel stoht dr‘Udo, är het grad operiert,
är winkt mir zue, sait „Grützi“ – jetzt isch au s‘Spittel infiltriert.
Mir kenne aine dä het‘s no e bitzli schlauer gmacht:
als Aff verkleidet aifach bi dr Fasnacht no mitgmacht.

Als Urwaldtier sind mir schnäll z‘ha fir alles Primitive,
mir Affe mache dòòrùm eh Iischaffigsinitiative.
In Rieche, dört am Zoll do mache mir e klains Versiechli,
Dr Pass bruchsch nimm zum innekho, do längt e Banggsparbiechli.

S‘Theater brucht ganz dringend Gäld, dr Moritz goht go sammle.
S‘Gigi git jetzt au nyt meh, neii Fisch bruchts an dr Angle.
Dr FCB verdient mit Menschehandel eh paar Kischte.
Mir tüschle drum dr Guy Morin gege zwei Statischte.

E jede isch e Teil vom Ganze me gseht‘s an dr Blaggedde,
bim Puzzle hän mir feschtgstellt, s‘passt nit, egal wie‘s au duesch legge.
Stadt und Land g‘höre trennt, verbinde würd‘s kai Sau:
e Pegoraro-Morin-Kombi wär dr Super-Gau!

E jede Binggi wartet gspannt uf em Mami sini Gugge
Di Nanos die kasch ruggele, stapple oder schlugge
S'Genie wo die erfunde het, das würde mir gärn gseh
Erfolg durch wenig Sinn, s'muess ein si vo dr SVP

Mir sin d‘Affe – vom Urwald-Beggi 2.
Trämli, Trämli, Trämli, Trämli fahr mi bitte Häi.
Und inestäche, umeschloo, durrezieh und abeloo
Dä Bangg hän mir vom Doggter Guettebärg zuegschiggd bikoo