zurückzurück

Schlyffstai 2011

Schlyffstai Comite-Schnitzelbank Basler Fasnacht 2011

 

Anzahl Mitwirkende: 3
Comité-Bank seit 2006
schlyffstai@gmx.ch


Melodyy: Aisha vom Khaled

Tüünesii, e Revolution
Z'Algier broodlet's wägg dr Korruption
Syrie straiggt und z'Libye lipft's ne de Huet
Mir wänn nur wisse: Lauft's z'Aegypte guet?

Kasch z'Hurgada, no go baada? Das isch zentraal.
Bisch elai deert, het's no Hai deert. Lauft's iPhone normaal?

Kasch trotz Barrikaada, no im Meer go baada, und schnorchle derbyy.
Danzt d'Aisha nimm im Laada erotische Lambaada? S'gitt kai Bier oder Wyy!

Das gitt's jetzt alles nimme! Denn baad i halt z'Baasel a mym Ryy!

Melodyy: Über den Wolken vom Reinhard Mey

Eyjafjallajökull: Dä Ussländer macht is Soorge.
Integrationsaasträängig: Null. Macht diggi Luft am friene Moorge.
Toleranz in dr Schwyz isch grooss - fir die mit groosser Baarschaft
Doch rennsch byy Rot gschwind iiber d'Strooss - denn wirsch grad ussgschafft.

Isländischi Wulgge, dangg dynre Äsche isch dr Himmel so glaar
Will kai Fluugi fliegt und d'Sunne jetz lacht
Han-i glatt lenger Ferie gmacht
drumm wirsch exklusiv als unsere Star, Mitglied vom Fümoar.

Das glaine Fümoar byy uns in dr Strooss
Deert kasch no dampfe wie ne Vulkan, s'isch famoos.
Im glaine Fümoar sitze d'Raucher binenander
Und folge noo dis noo em Peter Alexander.

Melodyy: Alperose vom Polo Hofer

Amene scheene Daag im Mai
Han-i mir gsait: Hit blyyb i nit dehai.
Bi zur Grien Achzig, wäg em Dino deert
Und won i aakoo bi, do han i en gheert:

Superpuma, du soorgsch fir unsri Rue!
Superpuma, hesch denn nit bessers z'tue?
Dä Riiseysatz hett is enerviert.
Das Gäld hätt logger s'Stadttheater finanziert.

Superpuma, du stoosch firs Militäär.
Superpuma, mi Gweer gib ych nit häär.
Superpuma, markiersch du dys Revier?
Dehaime wartet d'Pegoraro mit emene Bier.

Melodyy: I bin en Italiano vom Nöggi

Ig haisse Tettamanti
Suech z'Basel Toleranti
Bi schlächt im Schueluffsatz
Drum kauf i mir dr BaZ

O mio Zyttig, könntsch e bitz Gwünn magge
Wurd Tamedia nümme so dumm lagge.
Ha zwanzig Redaktore vor die Türe gschtellt.
Will ig waiss ganz genau: Jede Rappe zellt.

Min Name isch Herr Somm
Us Züri ich herkomm
Bin Chef i de Redaktion
Und Rächts isch mini Mission.

Christoph, ich glaube, dass die miich nöd wänd
Das sin doch alles Linki, wo kän Tüüfgang händ.
Chumm hilf und säg mier, was-i schryybe darf
Mini Teggschte sind wiä Döner: Mit Alles ohni Scharf.

Dr Suter, dä bin ych
Zwar bin i nit seer riich
ain gitt mir sicher Gäld:
Ych kauf die ganzi Wält

Iir Baasler dängget sicher: S'gitt e Puff.
Do kauft ain eiri Zytig aifach uff.
So lueg i als lokale Patrioot
As mir e Zytig hänn, wo au e Ziircher grad verstoot.

Melodyy: Männer vom Herbert Grönemeyer

Mir meergge, s'isch an dr Zyt: Fraue bestimme politisch mit.
S'herrscht fraidig-aitli Zueversicht, au dr Muurer stryycht sich Crème ins Gsicht.

In Dytschland regiert scho lenger au e Frau
Und in Italie isch's zwar kai Frau, fir Bunga Bunga wär e Frau vyyl z'schlau

Fraue fääge und sin aifach in - sait dr Kachelmaa
Sin beschaide, hän Greessi und Sinn - nit wie dr Malama.

Die kadoolischi Kiirche schyynt no - eppis geege Fraue z'haa
Will Prieschter hän firs dieffe in sich goo - lieber hibsche Maa.

Nach em Hayek kunnt jetz e Frau,
die tiggt sicher ganz genau.
E Frau isch d'Pegoraro au,
nur merggts kaine so genau.

Nur fir eppis bruucht d'Frau no e Maa (BABA),
Fir gwiisi Stunde ischs guet e Maa z'haa. (BABA)

Äär bruucht nit lang und isch oft nit seer guet (BABA)
Wien äär s'Parkiere erglääre duet.

Melodyy: Aux Champs Elysées vom Joe Dassin

Dr Sarkozy wäär gäärn derbyy, mecht greesser syy as d'Frau Bruni
doch syni Ambitione blyybe nur Theorii.

Hett Sympatii fir Tüünesii, doch nit Sinti und Straiggendii
Und glaubt derbyy - do lachsch di hyy - är sig e Genii.

Är hett Fantasii, D'Wält isch sy Koolonii.
Bim z'Vieri setzt är sich ii fir Frankofonii mit Wyy und Brie.
Dr Sarkozy mecht i nit syy – drotz Carla Bruni!

Melodyy: Baby You Can Drive My Car vo de Beatles

Cologna, Janka, Cancellara, s'isch glaar.
Meier, Ammann, das sin unseri Staar.
Dr Roger Federer serviert unhaltbaar.
Nur fir d'Nati spaare mir uns dr Koommendaar.

Kumm, miir faare nach Quatar. Die Schaichs, die schmiere d'FIFA baar.
Mit Dinar und Dromedaar, will Dollar sind nimm zuemuetbaar.
Fir unsere Hailand: Sepp, Sepp. Sepp Blatt-aar

Doch sin mir eerlig - es isch elementaar:
Uff Sand bitz schutte, hösch, das isch lapidaar.
I ziee dr Huet, wenn i denn molle erfaar:
D'Ski-WM isch neggscht Joor in Sansibaar.

Zwelf Stadie lauffe voll solaar. D'Frau Leuthard hätt's gärn nuklear.
Dr FIFA-Chef maint är syg Zar, und wott fiirs Z'morge Kaviar,
Drum goot's zerscht uff Russland. Sepp. Sepp. Sepp Blatt-ar!

Melodyy: Rosegarden vo der Lynn Andersson

Jetz muesch grad waarte. Kumm Schatz, mir bsetze unsre Schrääbergaarte.
Bring no d'Jasskaarte. Es wird e lange Summer und e haarte.

D'Baudeppe wänn unsri Oase usradiere
Und denn mit niue Woonige Styyre garniere.
Do wird nyt wäggno! Die Gäärte bruucht's no!

Was sell dr Alex Frei sunscht in dr Frei-Zyt mache?
Är losst's mit Huggel, Streller hinter dr Rabatte krache
Au dr Malama nimmt äin, är hett gheert, dass är deert niemerts steert.

Bim Schrääbergaarte, trifft Bluet und Boode uff die Griiene zarte.
Hool d'Hellebaarde. Mir baue Grääbe und e Schiess-Schaarte

Und dr Hampe Wessels kriegt e Beetli voll mit Gartezyygs
Denn so macht er wenigschtens in synre Freizyt eppis gschiids.
Si Luxus-Gartepavillon kreiere Herzog und de Meron.

Das deerf nid starte! Kumm Schatz, mir spränge unsre Schrääbergaarte.

Melodyy: Griechischer Wein vom Udo Jürgens

In Athen steen d'Lytt hit uff dr Gass und protestiere.
Au Portugal schlyycht wirtschaftlig uff allne viere.
Multipliziere iir Reklamiere. Muesch's ignoriere.

Schaffe duet kain, und wenn si sich zum Straigg uffraffe
merggt's nit mol ain, will si nit mol das rächt schaffe
Dä Spiilgäld-Verein. Dr Euro stoot e bitz im Stau - dä will kai Sau!

Doch au sunscht hett d'Fuulhait männge in e Kriise gfiert
Baron zue Googlebäärg hett flyssig syni Diss kopiert
Hett ungeniert sini Karriere duuregschtiert.

Do schryybt nit nur ain. Dä Doggter schyynt is gschtoole.
Das isch gemain, sait dr Merz do unvrhoole. Ych gang jetz heim, denn sone Ti-ti-ti-ti Titel wott ych jetzt au!