zurückzurück

Schnaabelwetzer 2011

Schnaabelwetzer Comite-Schnitzelbank Basler Fasnacht 2011

 

Anzahl Mitwirkende: 3
Comité-Bank seit 1997
bis 2004 Fläädermyys
seit 2005 Schnaabelwetzer

 

 

Schnaabelwetzer Comite-Schnitzelbank


Helge Schnaabelwetzer Fasnacht 2011

In Ziiri bi dr Fifa haige d Lytt schyynt s gaar nit z due.
Drum spiile die Monopoly, Mikado, Blindi Kueh.
S wird gschieberet und pokeret und gsörft im Wörld Waid Webb.
S isch alles schnorzegaal – doch wehe: Aine spiilt «Tschau Sepp!»

Helge Schnaabelwetzer Fasnacht 2011

S Theater überchunnt käi Gäld, säit euse Fritz vo Buus,
Dört hesch nur Gschwätz, so komplizierts, do chunnt käi Sou me druus.
Komöödie! Draama! Oopere! Ballett! Nur Schäyawäy!
Eus Rammel gfallt nur s Luschtspiil – und das spiile mir dehäi!

Helge Schnaabelwetzer Fasnacht 2011

Jä, Drämmli, Drämmli, Drämmli, Drämmli, Drämmli – jo, das wär s.
Was mir do dichtet hänn, isch nämmli dää Joorhundertväärs!
Jetz hänn mir nur ai Bitt an Sii: Verroote Sii uns nit,
Wenn s z Bayreuth wäg däm Väärs fir uns dr Doggter-Titel git.

Helge Schnaabelwetzer Fasnacht 2011

Mir stääle haimlig, bschysse, mugge, raube in dr Nacht.
Mir filze, schmiire, korrumpiere, wisse, wie me s macht.
«Was fäält denn no?», hänn mir ys gfroggt, «git s ebbis, wo nit stimmt,
Ass uns dr Berlusconi nit in sy Regierig nimmt?»

Helge Schnaabelwetzer Fasnacht 2011

Mir dringge ab und zue e Bier – ai Stange, zway, hesch glyy.
Drey Ziegelhoof, vier Ueli Bier, jä mai, die faare yy.
S Calanda Bräu isch so-la-la, und s Eichhof – halb so schlimm.
Doch syt dr Koch in Rom verkeert, schmeggt s Cardinal uns nimm.

Helge Schnaabelwetzer Fasnacht 2011

D Helvetia glaagt, sy haig im Buuch moll do moll dert e Schmäärz.
Kennt s d Niere syy, au d Lääbere, jä d Lunge oder s Häärz?
Denn bletzlig grieggt sy Grämpf und rennt uff s WC – heggschti Not!
E Wooltaat, wo der Merz und denn der Leuebärger goot!

Helge Schnaabelwetzer Fasnacht 2011

E knappi Waal bedyttet schlicht: Politisch bisch k.o.
D Frau Calmy-Rey im Bundeshuus, die gseet das nit esoo.
Bisch nit beliebt, denn schaffsch halt mee, het si d Erfaarig gmacht.
Jä, wenn das wiirgligg stimmt, denn grampft der Morin Daag und Nacht.

Helge Schnaabelwetzer Fasnacht 2011

Jä, d Schwoobe sinn scho aarmi Sieche mit däm Dioxin:
Mit Hienerflaisch und Aier schlugge sii s wie Medizin.
Wirsch gsee, die sinn scho glyy immun bei Giften aller Art.
Jä denn wär s glatt, mir schängge dääne s Wasser us der Hard.

Helge Schnaabelwetzer Fasnacht 2011

S Hemmli z kuurz und d Hoose z lang – mir hänn der Ballmer gsee,
Finanzminischter z Lieschtel – Sii, als Clochard kenntsch dä nee.
Doch s Gsicht, d Frisuur, dr Teint, dr Schnauz – das alles isch perfäggt.
Dä macht s wie bi de Styyre: Dert wird au nur oobe pfläggt.

Helge Schnaabelwetzer Fasnacht 2011

D Miss Schweiz, das Schätzli Kerstin Cook, macht schyynts – so hänn mir gheert –
E Fäärnkurs, Sii, in Physio-Psycho-Bio-Pädagogi-Sozio-Turne – oder isch es umgekeert?
Klappt s nit mit iirem Fäärnstudium, denn biet ych dääre aa:
Griegsch Noochhilf, wenn ych dii drby vo nooch studiere kaa.