zurückzurück

20 Joor Schooffsuuri 2011

Schooffsuuri Comite-Schnitzelbank Basler Fasnacht 2011

 

Anzahl Mitwirkende: 3
Comité-Bank seit 1992
- 1 Jahr als 'Ziggelfritze'
- 1993 bis 2000 'Seeleweermer'
- seit 2000 'Schooffsuuri'

 

start on klick Vers hören 1

start on klick Vers hören 2

start on klick Vers hören 3

start on klick Vers hören 4

start on klick Vers hören 5


Wenn der Mond amme abnimmt, no spyyr ichs enorm,
ai Drittel ewägg und ich haa ne Saufoorm.
Vom Gligg halber bsoffe  dängg ich , wenn i schwääb
wenns dä SVP Drittel doch aifach nit gääb.

Hoggsch als im Kaare so zmitts im e Stau,
d Fresch alli gflemmt und an Ranze friersch au
Denn wintschisch e Wunder wo s Ganze zwäägbiegt,
wie der Sir Elton John wo e Buscheli griegt .

Suechsch am Bahnhof e Taxi, no bisch denne gstrooft :
zwai sinn am Schwätze, der dritti dä schlooft.
Der viert kennt der Wääg nit, der fimft het grad wee
Bim Bundesroot z Bärn kaasch jo s Glyyche au gsee.

Der Boopscht isch e Dytsche, drum schryyb em e Brieff,
loos mit de Baryyser – do ligsch zimlig schieff.
Dasch nit nur fir Aids dänggt – hesch eppis verbasst,
Nai  –  „Urbi et Orbi“  hätt vyyl  besser basst.

Der „Cavaliere“ isch e typische Tschingg,
E Doopi, e Rammel und au no e Fingg.
E Bogg isch dä Pfriender, e Spritzer, e Ruech .
Jä - ich bruuch der Suter -  nit s nei Baaseldytsch-Buech.

S Glepfschyt daarfsch bhalte – es isch ene glyych,
kaasch d Frau gfange halte – s git eppe e Lyych.
Jeede daarf schiesse s git ai Glepferei.
Wenn der Letscht duet versäärble – no simmer denn frei !

S Bolschter isch duure,  der Boode dä glääbt,
d Schyssi macht s Parfum, wo dur s Abtail schwääbt.
Wäg em Grach kaasch kuum reede,  es schittlet und schloot
Und fir die Faart mit der Baan zaalsch di bald emool doot.

Mi Clärli mecht  gäärn mit em Benoit & Co
Uf d Ängschtligenalp aane Älplerfescht goo
Der Bryys vo däm Byylljee hätt is glatt ruiniert,
drum hämmer mit Easy Jet z Londe diniert.

Hesch d Schmalzlogge aagmoolt,  die alt Brille aa,
fuurzisch dehaime,  längsch kai Gnooblech aa.
D UBS het e „Dresscode“, dass e Gattig soll haa,
derbyy  het deert kain me die wyss Weschte aa.

Im Dschungelcamp wiird ain vom e Eschtli verletzt,
E Meersau im Däschli wiird am Baanhoof ussgsetzt.
E Filmstäärnli wiird vo sym Gspuusi verloo .
liisisch s „20 Minute“ -  het d BaZ hailoos Nivoo.

I bi am Neijoor do in Wynige gsii,
deert laadet e Grufti zer Gmiessuppe yy.
Är schwaafled vo Gotthälf, zaigt e Helge derzue,
i hoff nur der Heergott hälff däm  bald zer Rue.

D Subvention fir s Theater stryyche mir is ans Bai,
D Rambasse sääge ass si das nit wei.
D Mischthyffe länge – jä das mues es due
Und mir mache wie friener d Stadtdoor  zoobe  zue.

Z Haiti bäbbt d Äärde, in China grad au,
d Türkei wiird denn gschittlet – Chile het e Gau.
Der Vulkan het zerscht grumplet isch dernoo explodiert,
und Fluugi sinn alli am Boode blockiert.
Der Summer isch haiss gsy, in Russland brennt Wald,
dernoo  kunnt e Rääge mit richtiger Gwalt.
D Pakistani driffts zerscht und es sufft alles ab,
in Brisbane isch denn au der Fluss ibergschwappt.
Denn kunnt no e Stuurm und rysst alles ewägg,
und au iber d Staate isch ain yynegfägt.
Si friere an Ranze, versuffe im Schnee
Und wiider goot nyt mee – der Deifel hets gsee.

D Wält  iiberboordet und d Wälle geen hooch
Vilicht macht si s aifach nur uns Mentsche nooch.

Der Sarko  will d Minischter nur in  Franggryych haa
bym Feerie mache hänn si d Naase nit ghaa,
Was mainsch, wenn au s Comité s glyych proklamiert,
und im Summer d Grischoone fir sich reserviert.

I dangg fir die Eerig – mi fraits kolessaal,
no dr Kritik all die Joore – esoo ne Labsal
I stuun au as ihr – wonys verrupfe dien

s Goschdym und d Larve sälber nie wäggsle mien.