zurückzurück

Schwoobekäfer 2011

Schwoobekäfer Comite-Schnitzelbank Basler Fasnacht 2011

Anzahl Mitwirkende: 2
Comité-Bank seit 2000

 

 


Die Fümoar Baizer hän e ganz e schlaue Club erfunde
Dä isch ans Rauchverbott dangg de Statute nimmi bunde
So ka jetz jeede saage, das Gsetz basst mer und säll looni
S git ein, dä machts scho lang eso und dä heisst Berlusconi.

Dr FIFA-Blatter-Seppeli, dä zieht s in Wieschtesand.
Dä het halt dängg im Voruus scho e wieschte Sunnebrand.
Do sait dr Sepp: Im Gegedail – ych ha kai daigi Biire;
In Katar hän si s wichtigscht, nämlig gniegend Eel zem Schmiire!

Die Prämie vo de Granggekasse kasch jo nimme zahle
Und s wird jetz no vyl tyrer mit de neje Fallpauschale.
Ych bruuch kai Granggekasse meh und zahl mi nimme wund:
Dä Wunderdoggter z Rom macht doch die Grangge gratis gsund!

Dr Morin het s bigoscht als Presidänt vo Basel schwär:
Är waiss nit rächt, was mache, und är wird nit populär.
Do het är gsait, won är grad eso ummegstande isch:
Ych glaub, ych wird im näggschte Läbe lieber Wiggelfisch.

Mir hän jo nyt drgege, dass ys d Schwobe iberschwemme
Und in dr Schwyz scho nägschtens jedi zwaiti Stell bikemme.
Doch wenn si no so frintlig dien – das isch dr usser Schyn;
Me gspyrt im Umgang mit ene halt aifach s Dioxin.

Im Corso-Kino wänn si kaini Sexfilm me lo laufe
Me kenn die blutte Schwarte däre Kundschaft nim verkaufe
Das Corso soll ys doch mit syne Sado-Streife blose
Mir kenne jetz dr Kachelma am Radio Basel lose!

Dass d BaZ no soll neutral sy, das belächle mir nur mild
Si bringe ständig s Gschwätz vom Blocher und drzue sy Bild.
Was soll ys denn e Blatt mit däre Blocher-Schnuure nutze?
Mit däre Zytig kasch jo nit emol me s Fänschter butze.

Ai Rammel sait zem andere: Mir zahle nüt an d Stadt!
Mir hei s bi eus au ohni däne ihr Theater glatt.
Denn d Dame-Riigi z Titterte ersetzt ys d Balletteuse
Und singe löhn mir gratis vo de Autobus-Chauffeuse!

Als Schwoobekäfer han ych mi scho miesse dureringe
Das Joor so vor Sii ane z stoh und myni Värsli z singe
Drum möchte ych ganz klar sage, vor no öbber sich vergisst:
Mir sin nit an dr Dschungelpriefig, wo me Käfer frisst!

D Frau Hueber het e Buse gha, e bitz e glaine flache
Do het si sich in St. Louis e grössere lo mache
Dehaim het ihre Ma si gfroggt: Was schmeggt denn do so räs?
Do sait si: Waisch, in Frankrych macht me das mit Minschterkäs!

Dr Morin pfläggt e neje Stil vom Kopf bis zue de Flosse
Är het sich au fir das professionell beroote losse
S isch alles in Pastell und d Schueh sin Lindegrien und Rot,
Was aber nit vyl bringt, wel är jo doch drnäbe stoht.

D Verkäufere, die zwai, wo in dr Stücki no verblybe
Hän gsait: Mir kennte d Zyt ys mit „Verkäuferlis“ vertrybe.
Si gän sich d Händ, si stelle d Fiess am Bode zämme und
Druffabe hän si abzellt: Siggsaggsugg – du bisch dr Kund!