zurückzurück

Singvogel 2011

Singvogel Comite-Schnitzelbank Basler Fasnacht 2011


Mit de Politiker us Züri duets nümm stimme.
Der Ueli Murer, typisch Zürcher, duet nur schwimme.
Doch wemme d SVP betrachtet und ihr Kader,
dunggts aim: No schlimmer als e Schwimmer isch e Bader.

Imme Affezahn dur d Stadt fahrt s Rösli Meier
und überholt uf ihrem Flyer no der Zwaier.
Und im Spitaal do sait si denn zem Dr. Käller:
Bi mym Rollator do zieht d Brämsi aber schnäller.

Es git allergattig Lüt, die bhaupte kritisch,
s Schwyzer Fäärnseh sygi z links und und zue politisch.
Ob die der glyychi Sänder luege, wo das gilt?
Bi mir isch immer der Sven Epiney im Bild.

Frisch pensioniert suecht aine Spitzewyy z Italie.
En andre suecht im Alter s Glück und züchtet Dahlie.
E dritte suecht Entspannig uf Safari z Kenia.
Was suecht der Leuebärger ächt bi der Implenia?

Im Bläsi-Schuelhuus sait der Hansli zimmlig stolz:
Mir sinn scho bald Kollege, gäll Frau Ruschterholz.
Zerscht mach y e Lehr als Pizzafahrer oder soo,
doch bin y bald als Queeryystyyger wider doo.

Do letschti Wuche vor em Fäärnseh: ai Empöörig!
Zwai Stund lang s glyyche Bild, die hänn bestimmt e Stöörig.
Bis ych nach gnauem Aaneluege denn erkenn:
Dasch gar nit s Standbild, nai, dasch immer no der Sven.

Es schiggt der Willy Surbeck d Lüt ins Schloss go koche,
und trotzdäm seht me bim Tamara jeede Gnoche.
Dass die so maager isch, verstoht me mit der Zyt:
Jä, bi däm Chef vergieng mir au der Appetit.

Wäge Misswirtschaft hänn d Grieche böös der Bammel.
Und ähnlig trischt sehts uss vo Schönebuech bis Ammel.
Kultur und Bildig blybt am aigene Mischtstogg hange.
Jä, vo Entwiggligsländer kasch nit meh verlange.

In Rieche maint der Karli Schwyzer, wenn au hölzig,
dass är so öbbis wie der Bulle dert vo Tölz syg.
Er sprängt fascht d Kamera in sym Sälbstdarstelligsfieber.
Do wär de maischte der Sven Epiney no lieber.

Si wärde uf mym Zeedel, vorne und au hinde,
partout kai Värs vo däm Vulkaan in Island finde.
Das Eiafiatlajökytl brächti zwoor no hii,
doch waisch jo nümm, schrybsch s jetz mit y oder mit i.

Är isch scho richtig elegant, der Morin Guy,
sit syynere Stil- und Farbberootig nach Feng Shui.
Är duet sich scho als Doubel vom George Clooney gseh,
in der Hand – what else? – e Dässli Grüttertee.

Vyyli finde s Früeh-Französisch e Tortur,
doch die Sprooch isch Dail vo unserer Kultur.
Französisch het bi uns e wohlvertraute Klang,
zem Byspiil Réception und Etablissemang,
zem Byspiil Patron, Fondue-Caclon, Trottoir, Boulevard,
Fumoir, Buvette, Buvette, Fumoir, Pissoir, Couloir,
Masseur, Coiffeur, Café mélange, Service public,
moitié-moitié, Chinoise, Cordon bleu statt Schüblig,
Jeton, Coupon, Fouton, Molton, Separée,
Chopin, Copin, à point, ébain, Epiney.

 

Anzahl Mitwirkende: 2
Comité-Bank seit 1997

www.singvogel.ch