zurückzurück

Stächpalme 2011

Stächpalme Comite-Schnitzelbank Basler Fasnacht 2011

 

Anzahl Mitwirkende: 2
Comité-Bank seit 2006


Für dii sing iich my Schnitzelbank!
Du machsch käi Wank. Isch das dr Dank?
Verziehsch di Muul nid, bisch no z fuul zum lachen, also wäisch,
s äinzig, wo bi dir no hilft, isch Bü-Bü-Bündnerfläisch.

D Laiebühni Ormalinge
wott „Geld und Geist“ vom Gotthelf bringe.
Do mäint d Souffleuse Binggeli: mir spiile gschyyder Kleist.
Mir häi doch i Gotts Naame hüür wäder Gäld no Geist.

Dr Bundesrot duet möölele.
Dr Grübel, dä duet chöölele.
Wäg BP duets fescht öölele, dr FCB wott göölele.
Und wenn dr Somm sich tröölelet, denn foots mer afo wöölele.

Jetz gits bim Benedikt in Rom
gebenedäiti Papscht-Kondom.
Dr Silvio darf au äis haa, mit Weirauch draa, doch s Dummi:
Dä praktiziert als stränge Chrischt jo nummen ohni Gummi.

Santi Niggi Näggi,
hinderem Oofe stäggi.
Du und au dr Schmutzli syt so fyys, dir alte Freaks.
Dir wüssed all das Züggs vo mir jo nur dank Wikileaks.

Im Gaarte lyt e Huffe Sand.
S isch Herbscht, dr Hansli grabt vo Hand.
S Mami rieft, s isch Ässeszyt, dr Hansli foot a schreie:
I cha nid choo, dr Moritz wott my Tunäll no yyweie.

S macht Freud, das Basler Wörterbuech.
Männgmool find i, was i suech:
Statt Veegeli häissts Vöögeli, statt scheener schrybt me schööner.
Dr Kenner wird zum Könner und dr Denner glatt zum Döner. 

Klar, dass s Färnseh Quote brucht,
Drum plaants jetz: Pfarrer, ledig, sucht.
E Kandidat us Buebedorf mäint zu deer Wahl, iim längi
im Chinderbecki rasch e Zöllibeedli in dr Mängi.

Jeede Bundesroot, wo goht,
wird neuerdings Verwaltigsroot.
Dr Moritz wehlt d Implenia, s Micheline drybts no dräischter:
Äs wäggsled in Verwaltigsroot vo sym Coiffeurmäischter.

Dr Hunkeler, dr Kommissar,
het ammen au chly Mieh, dasch klar.
Dr letscht Mord ime Schwarzwaldort fiert iin zur Hulda Meier.
Die het dr Maa ins Jensyts kocht mit dütsche Spiegeleier.

D Gebuurteraate chlättere
wäg vill meh alte Vättere.
Jä, au dr alti Elton John isch mit sym Goof am ziggle.
Do frogsch di, wäär vo deene zwee muess do weele wiggle?

Lueg, wie s Micheline s Zepter fiert,
wie d Simonetta s Rächt schüstiert.
S Doris sorgt für d Energyy, s Evelyne für d Kasse.
Nur dr Ueli fluecht, är suecht - e vierte Maa zum jasse ...

Häit dir au Angscht um d Gäischtlichkäit?
Miir duet die Spezies schampar läid:
Käi Trouig, käi Bestattig meh, e Prieschter chlagt, nüt laufi.
Wenn är nid under d Lüt gieng, gebtis nid mol meh e Taufi.

Karl-Theodor, Karl-Theodor,
als Dockter chunnsch mer spanisch vor.
Dy Muul isch grooss, dy Grinse bräit, d Locke glänze nass.
Gnau e sone Luulaatsch suecht me jetz für „Wetten dass“.

Do säit e Beck zur Beckere,
är glaub, dr Däig verreckere.
Druf mäint die Beckere zum Beck: loos mer zue, verdeggeli.
Du chasch doch hüt nümm bäides ha, Schatzi: d Baz und s Weggeli.

Bim Kachelmann hangt d Sunne schief.
I glaub, dä het e Zwüschetief.
Dr bescht Ersatz uf sym Gebiet het s Färnseh schwer umwoorbe,
doch churz vor Abschluss vom Vertrag isch Paul, der Krake, gstoorbe.

O Benedictus, Pontifex,
urbi et orbi sunt perplex.
Protectibus erectibus in spiritu sanctis nomine:
dona nobis pacem, halleluja, in condomine.