zurückzurück

Stammtisch 2011

Stammtisch Comite-Schnitzelbank Basler Fasnacht 2011

 

Anzahl Mitwirkende: 3
Comité-Bank seit 2011


Jede Oobe nach em Stamm – schalt ich dr Färnsee ii
ob Gsundhaitssändig, Kochstudio - oder au Krimi
hundertausig Sändige - pro Joor und no vyyl me
wye schön wär’s numme eini z’gsee – ooni Epiney

Dr Kachelmaa – dä pändlet zwüsche Gricht und Zällegitter
und schnuurt bim Radio Basel - über s’Wätter, Sunne, Gwitter
wo dä au immer hoggt – und was dä macht in sym Beryych
das isch doch - we mir eerlig sinn – am Wätter schysse glych

Käller Sutter, Widmer Schlumpf - isch daas e Namensgstotter
denn Schneider Ammann no drzue - au dä meint s'töni flotter
wo mir ihn frooge hetts dr Schneider - Ammann so erklärt:
„sy syge ooni zweite Naame - numme d’Helfti wärt“

Dr Blatter Sepp – dr Fuessballgott – so ne gfizzte Siech
Mir wüsste nid was jeede Schutter – ohne Blatter miech
Ganz ooni Skrubbel sait är – was iin duet an Katar raize
Är könn jetzt mit korubbtem Oel – s’ganze Wallis haize

Ain e lai ka nit so dumm sy - hämmer alli gleert
das isch zum Byspyl au bim Merz nit unbedingt verkeert
das gilt au für d Frau Calmy Ree - mir saagere nur Calmy
dye muess bestimmt zwai Brieder ha dr Salvi und dr Almi

Mir stelle nüt me gratis uuse – verby isch’s mitt em Glügg
Jetzt muess e Vigniette dra – an jedes Möbelstügg
Trotzdämm hänn d’Waggis glyych e Freud – do kasch fascht druff wette
Jetzt löön sy aifach alles stoo – und nämme nur d’Vignette

Griecheland hett’s droffe – und au d’Iire die hett’s braicht
d’Schulde hänn die Länder drum so zimmlig fescht uffgwaicht
dr Euro dä nimmt dägglig ab – s’isch bald nüd me an iihm dra
schaad - dass mir das nid passiert – maint d’Merggel Angela

D’Cheffe vo dr Bolizei – und dr BVB
und au die vom Volggshuus dört – sind Zürcher – das macht wee
goot das so wyter z’Baasel – eerlig gsait – denn hämmers Gschängg
no singe s’näggscht Joor vor und noch uns - alles Zürcherbängg

Überall wo’d aaneluegsch – do gseesch nur Spreyereie
Graffitis, Täggs und Gläggs – die Sauerei isch doch zem schreye
Baasel sotti suuber wärde – de Farbe goots an Kraage
Usser bim Guy Morin – jä wurd Farb vertraage

Hütt wais me wär do alles dra hangt – am Naame Tettamanti
Wagner, Blocher und dr Somm – sinn schwiigendi Verwanti
Dr Moritz Suter sait halt au nüt – s’isch scho fascht pervärs
Drum bringe mir – s’gäb nur e schlächte – aifach gar kai Värs

Dr Benediggt duet seeligschpräche – am 1. Mai in Rom
und zwar der Paul secondo – dr friener Scheff vom Petersdom
waisch, wie sind mir do enttüscht – beschtimmt – nid ganz elai
verdient hätt’s vor dem Paul – dr Schorsch vom Haafebeggi zwai

Do kunnt doch letscht dr Müller Paul – gryydewyss an Stamm
und sait är haig s’Rumore gha – im Darm und zwar im Dramm
är haigi Friggadelle ka – mit Mayonees an Heernli
kai Wunder hänn mir zwai do gsait – SO kocht Tamara Wernli

S’Ussschaffigs-Gsetz sait klipp und klar – und das isch au dr Zwägg
wär stääle und vergwaltige duet – muess uss dr Schwyz ewägg
ain wo z’erscht hett miese go – vor allne andere quasi
obwool är nie vergwaltigt het – isch’s Nilpfärdli Farasi

Mir nämme jede Oobe – kilowyys Papier in’s Bett
D’Zytig, Heftli und au s’neuschte – druggt vom Internet
Mir schniides uss und sammle das – wo uns könnt intressiere
Denn mir zwai wänn im Schwoobeland – scho bald go doggdoriere