zurückzurück

Stroossewischer 2011

Stroossewischer Comite-Schnitzelbank Basler Fasnacht 2011

 

Anzahl Mitwirkende: 2
Comité-Bank seit 1996
stroossewischer@bluemail.ch

 


Mer hän grad gsunge do im Fumoir ummen Egge.
Ou, in däm Club isch diggi Luft, kaschs richtig schmegge!
Kuum hueschte miir e Väärs, rieft ain vo hinde „zaige!“,
und dää ganz voorne froggt, jä ob mir Helge haige.

Au an de Swiss Indoors, do darf me nümme rauche,
jetzt sponsret Davidoff nümm Tennis, sondern Dauche.
Kasch zwoor kai Stummbe gniesse mit der Daucherbrülle,
drum dien s der d Suurstofffläsche im ne Fumoir fülle.

Es isch an alli Schnitzelbängg e Schryybe koo,
mer solle d Värs vom Blatter Sepp doch blyybe loo.
Die maischte pfyffen uff d Zensur und bringen aine,
miir hän dä Zuestupf sehr gärn gnoo und singe kaine.

Wo an däm Contescht unsre Michael von der Heid'
kai Chance mit sym Chanson het, duet äär aim laid.
Ob s an den Ohre liigi, froggt er ganz verdatteret,
He nääi! Jä und denn isch er wider haime gflatteret.

Ou, bi däm Brand bim Bell het s halt scho zimmli gschmeggelet
und s greychte Flaisch het aim dernoo e weeni geggelet.
Statt nomol z füürle überleggt sich jetzt der Bell,
ob är ächt d Würschtli in e Fumoir hängge sell.

Mir säged ine jetz für nur drüü Franke zäh,
was ine Zuekunft bringt, drum düemmer d Charte näh.
Oh ja, jetz gsemmers grad; der Mike zieht gläb nach Basel,
nur isch nid klaar, was z Basel s Gfasel vo däm Maa sell.

Au im Spital, do mien si aifach no meh spaare.
Zum Byspiil dien sy döörte d Haizig aabefaare.
Und statt Narkoosegaas verbruuche, dien jetz die                   
e Laitig grad diräggt ins näggschte Fumoir zieh.

Vier Powerfraue hän s jo lyycht bi drei so Schneuz,
nur d Simonetta het e Bitzli z weeni Speuz.
Jä für meh Oberäärm duet sy am Flügel iebe,
statt numme spiile, duet s en quer duur d Wohnig schiebe.

Dangg däm Plakat blybbt alles in der Schwyz bim Alte.
Dä  Typ hät sowiesoo sy Waffe dörfe bhalte!
Jä uff däm yydruggsvolle Helge kam e gseh,
wie so ne Jungschütz usgseht vo der SVP.