zurückzurück

Syydiaane 2011

Syydiaane Comite-Schnitzelbank Basler Fasnacht 2011

 

Anzahl Mitwirkende: 3
Comité-Bank seit 1999
syydiaane@bluemail.ch

 


Normalerwyys singt jeedes Joor
e Bromminänte mit.
In däm Joor, biduure mir’s,
haut das laider nit.
Irgendwie do kenne mir
dr Alex Frei bigryffe,
an dr Fasnacht, het är gmaint,
wuurde si zvyyl pfyffe.

Als gwitzti Lääser hän au Si
sicher mitbikoo,
syt em Wäggsel kasch die BaZ
besser fliege loo.
Wenn jetz no ain dr Somm wuurd schigge,
kennt is guet basiere,
dass dä Flieger mit dr Zyt
dr Rächtsdrall wuurd verliere.

D’Bollitigg vom Bresidänt
guttiere d’Amys nit.
Wär das demonschtriere will,
dringgt e Teeli mit.
Laider funggzioniert das z’Basel
mit em Morin nit,
sovyyl Tee wie d miestisch suffe,
macht kai Maage mit.

Fir Basel und fir s’Baselbiet
gsäächti är sich z’Bärn.
Wenn alli das au wiirgglig wänn,
machi är das gärn.
Är wäär dr bescht, sauguet vernetzt,
git sich nie e Bleessi.
Was no fäält zum Bundesroot,
wäär e gwiissi Greessi.

Syt dr Murat Yakin
in däm Thuner Land trainiert,
wird dert wiider gschuttet
und sinn alli motiviert.
D’Laischtig stimmt, si hoole Phinggt,
geen mit Eergyz draa,
vor allem aber bhalte d’Buebe
iiri Hoose aa.

Stolz hän unseri Binggis uns
am Samschtig demonschtriert,
wie me richtig spachtlet
und e Fänschter isoliert.
Si kenne au dr Unterschiid
vo Moole und Beschichte,
das kunnt dervo, wenn Queryystyyger
Matee unterrichte.

All baar Meeter stoot e Schugger,
losst di nit verbyy.
An somene Bierlauf, dass isch klar,
muess au e Helli syy
Am Wille fir s’Theater mache,
fäälts in Lieschtel nit,
numme wenn’s um s’Zaale goot,
mache sii nit mit.

Im Gotthard kunnt dr Leuenberger
zimmlig ins Studiere.
Är dänggt an Chile und är dänggt,
was alles kaa basiere.
Wenn ich mi hätti miesse
uss däm Gotthard rette loo,
wie wäär ächt myni Schnuure
duur das Roor mit uffe koo?

Vierzig Joor hänn d’Fraue bruucht,
jetz saage si, was goot.
D’Meerhait het e BH aa
im neie Bundesroot.
Wo aane luegsch, uff jeedem Boschte
hogge Fraue druff.
Dr Elton John isch Mami woorde –
mir hoole wiider uff!

In finf Minute wiirsch vo Lörrach
uff em Barfi stoo.
Vo St. Louis do deerft is eppe
drei Minute goo.
Die blaanti Metro isch e Gwinn
und au e rächte Gnuss,
denn z’Oobe wääre d’Waggis
und au d’Schwoobe schnäller duss.

Hänn Si das Speggdaggel gsee
Aida uff em Bach.
Me het zwar nyt verstande,
trotzdäm isch’s e tolli Sach.
S’näggscht Projäggt, das stoot baraad,
s’ isch scho yystudiert:
Am Claraplatz wird jeedi Nacht
„Die Räuber“ inszeniert.

Bappe, gäll, im Brinzelääbe,
wo mir zwai so händ,
gits doch alls wie in de Määrli
immer e Happy Änd?
Willy, maint dr Charles zum Soon,
do kann i numme lache:
Du bikunnsch d’Brinzässin d’Kate
und mir blyybt nur dr Drache.

Hinter em Wachturm gseeni Wulgge
vilicht git’s hit e Gwitter
Morn schyynt sicher d’Sunne wiider
dur mi Fänschtergitter
Ob’s au windet, saagi speeter,
wenn ych uuse kaa. –
Das isch s’Basler Wätter
glääse vom Herr Kachelmaa.

Do hänn mr no e Helge
vo däm Pavillon z’Shanghai.
Hooch oobe hanggt im Gondeli
d Frau Leuthard ganz ellai.
Au wenn als Bundesbresidäntin
zimmlig vyyl vertraisch,
gits Momänt, do fielsch di
wie e Mogge Bübü-Bü-Bü-Bündnerflaisch.