zurückzurück

Glettyse 2012

 

Anzahl Mitwirkende: 2
Comité-Bank seit 1985


Was macht Italje goppelooni ohni,
Em „Errectus permanentis Don Fratelli Berlusconi ?“
Är machi Ferie im e Grindelwalder Loch,
Und bestiggt jeede Daag dr Jungfrau s`Joch !

Bi dr Bangg Sarasin am Elsbethe-n-Egg,
Gitt`s e neye Service fir riichi Segg.
E neye Kundedienscht, e ganz e „bsondere“ :
S`hängge d`Kundedate ab sofort in dr Montere !

S`CERN jublet : mir hänn e Neutrino, schnäller als s`Liecht !
Also ych hät mir fir dä alti Huet geniert.
Do hätte mir in Basel scho lang e Jubel-Grund :
Mir hänn e Fink, wo schnäller goot als kunnt !

Wäg däre Sex-Box fir d`Basler Kindergärte,
Gitt`s vor allem vo de Lehrer tonnewys Beschwärde.
Ich verstand`s, dass ihne s`Gschyss uff d`Närve got,
Wenn e Goof im Lehrer saage muess, wie`s richtig goot !

S`befiehlt dr Pabscht im Petersdom,
Im Klerus dr Gebruuch vo Pariser und Kondom.
Vor allem dr Klerus sell dä Gummi nütze,
Schliesslig muess me d`Mineschtrante schütze !

Als wyttere Schutz gitt`s im Gottedienscht e neji Norm:
Sie bruuche statt Wejrauch ab sofort Chloroform.

Die letschti Stiirsänggig isch apart,
Ych ha daussigi vo Frangge gschpaart.
Ych ha kuum e Jubel-Gschrey lo goo,
Scho hett`s mir d`Granggekasse wider gno !

Sett do inn e lutte Knall dy Gheergang blogge,
Das isch kai Bombe, blibb ruehig hogge.
Do isch sehrwohrschynlig im e siesse Spatz,
S`Implantat uss Franggriich platzt !

Mir zwai dien dääglig, dass mir nit roschte,
Z`Fuess im Konsi unser Ässe sälber poschte.
Uff ai Mool schreyt my Schatz, my Himmelryych :
Ych ha-n-e Klepfer gfunde, dä isch jo fascht so alt wie-n-ych !

Ych als Bebbi ka do doch numme lache :
Selle doch dr Blocher und sy Somm uss dr BaZ e Volggssturm mache.
Was kimmeret`s e-n-ächti Basler Aiche,
Wenn zwai Zircher Ratte uns an d`Wurzle saiche !

Duesch dir hyt e BaZi yyne brämse,
Stoose Drooge und Alkohol an ihri Gränze !

Worum denn e dyyri Schaidig wooge ?
Und sich mit hooche Keschte umme blooge ?
E Maa vo Wält duet vyl wytter dängge,
Und sinere Frau e Kryzfahrt schängge !

Worum denn e dyyri Schaidig wooge ?
Und sich mit hooche Keschte umme blooge ?
E Maa vo Wält duet vyl wytter dängge,
Und sinere Frau e Kryzfahrt schängge !

Fir Asie d`Vogel- und divärsi Säuli-Peschte,
BSE, EHAC und Salmonelle sin fir dr Weschte.
Und dr Ueli Maurer ? Do wänn mir zwai nit liege
Dä sell allefalls d`Tollwuet, aber jo kai d`Grippe kriege !

Ych ha die Schuelreform syttelang studiert,
Und bi vor Wuet fascht explodiert.
Hätte die das Harmos scho vor Joore gschriibe,
Wär ych Tschumpel nit aimool hogge bliibe !

Als dr „Amorphophallus Titanum“ ändlig stinggt und blieht,
Hänn sich s`Clärli und ych in Botanische Garte bemieht.
Als mir ändlig dert sin, sait my Himmelryych :
Wenigschtens schmegge dien dr glyych !