Schnitzelbank-Comité

E Hampfle Värs us 100 Joor

Geniessen Sie hier ein paar ausgewählte Jahrhundertverse, die heute noch genauso Spass machen wie anno dazumal.

Was macht die Baslerkepf ganz wirr
Das Ehverkündigungdsgeschmirr
Bledsinnig stehn si Muul an Muul
Vom Schmutze sin si fuul
Ains sait zem andre: kumm i drugg di
Mer mache au in Sache "buck di"
Der Stöckli het dä Schandfläck gmolt
Und d Sittligkait versohlt
            Verunrainigte Schnitzelbank 1921

Es griegt en Arzt, und das nit mys
Sähnsucht non em Paradys
Er und none Wyberfidle
Tien drum uf ere Insle sidle
Mit där durebrennte Schachtle
Duet er Rohkoscht dert jetz spachtle
Wird vo däm er nonig satt
Frisst er halt no s Fygeblatt
            Bettschoner 1930

's isch schad, dass d Sophia wo so stramm isch,
nit z'Basel wohnt und nit e Tram isch.
Ych wär doch däre gopfergässe
gärn emol uf d Schine gsässe!
            Standpauke 1970

S Dram wird dyyrer, doch me spart
Wel s jo gweenlig grad nit fahrt.
            Bäredräggschlägger 1962

Drämmli, Drämmli, Drämmli, Drämmli,
Drämmli, Drämmli, Drämmli, Drämmli,
Drämmli, Drämmli, Drämmli, Drämmli,
Jä, Drämmli, uf Di wart y nämmli!
            Anggebliemli 1973

Die neji Wärbeflechi vo dr BVB
Isch am beschte Ort und bringt us däm Grund meh:
Well mir jo maischtens, wenn mir uf e Haltstell geen,
S Drämmli numme no so scheen vo hinde gseen!
            Gasladärne 1986


Wär het däm guete Hirt in Rom befohle
So hoochverdienti Hailigi z entloh?
Dr Georg gryfft verzwyflet zer Pischtoole
Und numme grad dr Santiglaus isch froh.
Är brummlet in sy wysse Bart: Jetz schrytt y grad zer Tat
Und verstooss im Schwarzwaldhüsli geege s Zölibat!
            Schellede 1970

Dr Papscht verbietet d Luscht bim Liebe
Darfsch au nimm an dir sälber iebe
Au schwul sy findet är nit guet
Mai die Bischöff hän e Wuet
Herr Papscht, e Ruggtritt wär sehr schlau
Und sage Si e Gruess dr Frau!
            Zyttigs-Anni 1976

Wo me dä schtaialt Gletschermaa ganz hoch im Yys entdeggt
Hän mir scho glaubt sy haige jetzt uff s Yys dr Waldheim gleggt
E Oeschtrycher isch’s aber nit – d Sandaale sin voll Stroh
Und mit Sandaale ka jo nur e Schwoob in d Bärge goh
            Die graue Panther-Veegeli 1992

Lut sym Doggter isch dr amerikanisch Presidänt

Körperlich und geischtig uf 100 Prozänt

Telefonisch han ych jetzt em Trump empfohle

Sofort e zweiti Meinig z hole!
            Dr. FMH 2019

Wie soll dr Zircher Stadtroot s Dirnevolgg logiere?
Si sin uf Hamburg graist zem d Hafebuff studiere.
Dert haisst s: Die beschti Leesig isch de Basler ihri;
Die hän dr Hafe und als Haferviertel Ziri
            Rätschdätsch 

Dr Solschenizyn muess fir syni Biecher biesse
Är het, wenn das kai Strof isch, zue de Schwobe miesse.
Und sag ys nit, är haig jo denn uf Ziri derfe -
Das het me sälbverständlig gmacht zem d Strof verscherfe!
            Rätschdätsch 1974

E Buur vo Buus het iber Nacht
Salami us sym Esel gmacht.
Dä Sirmel haig - trotz allem haue -
Am Abstimmsunntig "J-A" gschraue!
            Stachelbeeri 1970


Jetz waiss me: S Baselbiet wot sich ellai verwalte,
Ass-es sich speeter in zwai Helftene ka spalte.
Und denn in Viertel und in Achtel wie-n-e Waje,
Bis uffem Mischtstogg zletscht dr Manz ellai duet kraje!
            Rätschdätsch 1970

Me darf in Zuekumft nimm e Doppelnamme ha:
Nimm Schneider-Ammann, Hueber-Hotz, Vetsch-Boodemaa
Me muess sich halt entschaide, und dasch doch kai Schand:
Nimm Meier-Bluem, nimm Müller-Frey, nimm Basel-Land.
            Singvogel 2013


Im Grund gno isch s mir völlig schnurz,
Ob Aine Lang haisst oder Kurz.
Numme waiss y iber kurz oder lang,
Dass y zimlig lang zem Kurz nim gang.
            Stachelbeeri

Won ych das Jesuskäferli bschau,
Sag ych zue myner Frau: gsehsch s au,
Dass die kaini Pünggt am Ranze hän?
Jetz wüsse mir, dass mir Wanze hän!
            Standpauke