Schnitzelbank-Comité


Archiv
Alle anzeigen

Filter anpassen

Zum Archiv

Schnitzelbänke 2020

Rückblick

Anggewegglimaitli

Steckbrief

Hinter em Minschter hält das Comité Frauenpower feil. Mit herrlichen Anggeweggli-Versen des Anggewegglimeitli.
Comité-Bank seit 2008

Video

Verse

Wo D aaneluegsch, e Drottinett,
I draum sogar no z Nacht im Bett.
Si faare mi aa, i kaa mi fascht nimme rette,
Und jetz sinn si au no uff der Faasnachtsblagette!

Der Trend isch glaar noo de letschte Waale,
Au d Faasnacht muess iiren Obulus zaale.
Ersetzet bitti, und zwoor gschwind,
S Comité dur die Griene Hind!

Mir kennen is jetz grateliere,
Der Wessels losst sich bangsioniere.
Jetz sott me no d Ackermaa ganz wyt hinde,
Im Museumskäller nimme finde!

D Frau Brandeburger het e Brandreed ghalte,
Me soll noon em Wessels e Frau lo walte.
Mir isch glyych, eb Frau, eb Maa,
Hauptsach s isch äntlig epper, wo s kaa!

Am 14. Juni vom letschte Joor,
Jetz lachet nit, s isch wiirgglig woor,
Me het s sogar uff Instagram glaiggt,
Het doch voll mi Wäschmaschiine gschtraiggt!

Es spiilt kai Rolle me, offebaar,
Was me so schlaifft vor e Draualtar.
Eb Maa, eb Frau, Katz, Hund und Reptilie,
Mir sin alli zämme fascht e Familie!

«Ei kän inglisch anderschtänd»,
Bim Parmelin verwirf ych d Händ.
Der Martullo iiri «sinking schteps»,
Deene nit numme fir mii ganz scheps.
«Ei kän nassing sey tu dis ischiu» vom Muurer,
Das macht sogar e Zydroone suurer.
Was aber guet isch bi dääne, das saag ych iine:
Die sin besser als jeedi Schiffriermaschiine!

In Gämf, do wänn si s bsunders guet mache.
E dypischi Frau – do muess ych graad lache.
Wenn z Baasel das kunnt, no macht s mi muff,
Isch nit s Anggewegglimaitli druff!

Bim Sutter-Begg, doo haisse die Dinger,
Statt Maitlibai jetz nei «Glücksbringer».
E Froog an dää, wo dä Namme schänggt:
An was genau hesch Du Gluschti dänggt?

D Grättimänner haisse jetz halt,
«Zum Verzehr geeignete Teiggestalt».
Und isch er aabrennt, daarfsch als Wysse,
Wäge Rassismus nimmen yynebysse!

Impressionen

von

Brunzguttere

Video

Verse

Dr Albert Röschti het für äimool sälber dänggt -
die Zyt als Byylaag uff em Däller het im glänggt.
Drum loot dää Raffel-Flaade d SVP im Stich
jetz sin die andre Wüürscht halt wiider unter sich.

Händ iir das au vernoo? Jä, d Bilder hänn sich gliche.
Jetz het‘s scho wiider son e Schääse-Gaul verstriche!
Nit wägg de Dooledeggel, näi, die sin versiiglet.
Es heig en über e Eleggtrodrotti gschtriiglet!

Jetz het au d’Läitig vo dr BVB begriffe
dass s Personaal in syyne Pause kuum ka schiffe.
Drum hänggt me schyyns, damit die Käibe nümm so pfuttere,
an jeedi Ändstazioon, wo’s git e son e Guttere.

Die grieni Wälle bi de Wahle het is gfalle
mir hän dr Wandel gsee dur d Wandelhalle walle.
Do kaa dr Cassis knapp no „Zauberfoormle“ lalle –
scho isch dr Wandelhallewandel am verhalle.

Miir kippe Rattegift ins Voogelbaad im Gaarte,
mir spränge d Räägewasserdonne und mir waarte
versteggt im Komposcht mit me scharf dressierte Hund -
mir sin baraad wenn son e Diigermugge kunnt.

Jetz löön au mir als Bangg die äigne Lütt beschatte -
Zum Byspiil dää, wo unsre Helge hebt, die Ratte!
Uff dääre Noochuffnaam doo gseesch en allem a
grad im Bewäärbigsgsprööch bim Doggter FMH.

Do iebe d SP-Männer in dr Yoga-Stund
grad us Karrieeregrüünd dr „aabeluegend Hund“!
Zwüsch iirne Gnöchel unde sueche si bizyte
für’s näggscht Parteimandaat e feminyyni Syte.

Dr Ueli Muurer gniesst no kuurz vor syyner Ränte
bim Putin Kaaviaar und bim Schi Schibing en Änte -
und falls per Zytmaschiine d Gläägehäit erschyyni
wett är Spagetti mampfe mit em Mussolini.

Mir sin am Frauesträigg im zwäite Gliid marschiert –
hän gjoolt und pfiffe, gsunge, danzt und randaliert
und wüsse über d Glyychberächtigung sithäär:
Me hätt se gwunne, wenn si dää Wääg z gwinne wäär.

Uns goot’s wie allne do, mir hasse d Greta au.
Was si uns gmacht het? Jä, mir wüsses nit genau.
Die rettet d Wält und kunnt im Fäärnsee, wäisch wie schygg?
Und mir Ydiotte sin ins Franzi und Füsygg…

Im Grund gnoo sin „Alternative“ gaar nüt schlächts –
mir hän se linggs no gäärn und d Schwoobe hän se rächts.
Wobyy dr Naame döört dr Sach nit ganz entspricht -
will, wäär se wählt, für dää sin Wahle bald scho Gschicht.

Hoho hoho haha haha hahi haho!
Hoho hoho haha haha papi papo!
Haha haha hahu hahe haho hahi!
Das wäär denn d Abschiidsreed vom Hampe Wessels gsii.

Das mit em Glyych-Syy isch jo an sich nit so schwäär.
Zum Byspiiil si isch glyych wie si und är wie är.
Au si und är sin glyych, nur är isch bitzli ryycher.
Und im Diräggtverglyych isch är halt glyych no glyycher.

Me kaa uns gärn haa – mir sin uf Feissbug und Inschdagramm!
brunzguttere@gmx.ch

Impressionen

von

Doggter FMH

Steckbrief

Aaaah jä: Das ist unser Doggter FMH und seine Schwester Gundula. Wo er auftritt ist das Wartezimmer meistens borzig voll.
Comité-Bank seit 2005

Video

Verse

Ych bi dr Doggter FMH
und das isch d Schweschter Gundula
si wohnt ganz hinde im Baselland
dert fange si d Viire no vo Hand

Si, Ych bi mit dr Greta Thunberg am WEF go Käffele
denn het sy iber s Verschwände vo Ressource afoo wäffele.
Zem s Klima rette muess ych jetz - het die befoole
myni Röntgebilder sälber moole!

Bschtellsch bim Sutter Begg "Maitlibai", luege sy Di aa -
das haisst neu "Glüggsbringer" - guete Maa.
Hätt dr Sutter Begg gsee wie my Gundula lauft,
hät är sy "grummi Schaiche" dauft!

Diagnoose: Zem Thema Bai sag ych nur schnurz
lieber e bitzli grumm, statt kurz

My Hoor-Geel twitteret dr Trump, dä sygi s Beschte.
Vorsichtshalber han y dä, an Ratte lo teschte.
S Resultat isch do, y glaub me sott ems saage:
de Ratte hets uf s Hirni gschlaage!

Diagnoose: au griege die Ratte vo däre Substanz
nach 14 Dag ä Ringelschwanz

Ich ha vom Herr Wessels ä Röntgebild gmacht
Di Buch und si Kopf sin schwarz wie d Nacht.
Hejo - Kopfarbet het är jo immer gmiide
und alles us em hohle Buuch entschiide!

Diagnoose: Sy beschte Buuchentschaid sit lang:
woner aanestoot und sait ych gang!

"Mir baue unser Spital us", sait Lieschtel stolz!
Für glaineri Bräschte bruuche mer s Bruederholz.
Dört wärde denne, wärs intressiert,
vor allem Hiehnerauge operiert!

Diagnoose: Wo myni Hiehnerauge das Spittel sehn,
mache sy d Auge zue und gehn!

Im Zircher Unispittel bysst e Fuggs, ai ai ai
e schloofendi Patiäntin ins lingge Bai.
Jä me bysst doch kai Zircher – dä Fuggs isch naiv
Jetz liggt dr uf dr Intensyv!
Si, dr minu het sy Buech, jä ych has kauft
nid ohni Grund "Die rosa Seekuh" dauft.
Denn dä will doch numme in Grossformat
füdleblutt uf e Zolliplakat!

Diagnose: das git mehr Zueschauer hört mä sage
vor allem an dä warme Dage

My Frau froggt mi: "was haltsch dervo,
söll ych an Frauestreikdaag go?"
Gang numme Schatz, rief ych vom Stuubedisch -
lueg aifach, dass denn scho vorkocht isch!

Delifon:

Doggter FMH - Frau Rasser, e Notfall, jä Si saage.
Y kumm sofort verby mit em Granggewaage.
i dr Läppli het in Buggde - jä do bruuchts mi als Mediziner
dr Schnauz yglemmt am Karabyner!

Impressionen

von

Dootebainli

Video

Verse

Wäg all däm schlimme Killer-Viirus-Umme-Niesse,
Sottsch d Faasnacht nuur dehaim und mit em Mundschutz gniesse.
Miir hänn kai Angscht, wil au wenn s Viire setti haa,
Hänn an dr Faasnacht d Baasler eh e Laarven aa.

Bi Bränd im Amazonas sinn vyyl Dier umkoo, Und
in Australie het s nid numme d Koalas gnoo.
Me gseet jetz dytlig: Fir Dier wiird s Lääbe schwäär –
Sogaar in Baasel, doo verbrennt e schwaarze Bäär.

D Schwyz het dr Rueff, si syyg politisch bitz vrstoggt,
Si loost nid zue, dänggt nuur an sich, bloggiert und boggt.
Derbyy isch d Schwyz doch uffmerggsaam syt vyyle Joor:
Miir hänn dangg Crypto jo fir d Wält en offe Oor.

Gheit me e Frosch in kochigs Wasser, gumpt äär uuse,
Machsch aaber s Wasser langsam haiss, denn isch s zem Gruuse:
Äär merggt nid, was bassiert, blybt dinn, bis äär verreggt,
Miir sinn wie Fresch – daas hänn au d Granggekasse tscheggt!

Friener isch s soo gsi: Het diir di Lääbe glänggt,
Denn bisch in Wald und hesch di an en Eschtli ghänggt.
Daas gieng hit nimm, wil d Escht sinn diir vom vyyle Schwitze, Jetz
spaarsch dr Strigg, du goosch nuur under e Baum go sitze.

Miir zaige d Handys unsrem Unggle – em ganz alte, So
ganz neii, mit me Display wo d kaasch falte.
Doo brummlet dää in Baart: «Wäg waas d Lyt hit so renne,
Myyni Agenda het me immer falte kenne!»

S het d AfD jetz nei dr Umwältschutz entdeggt.
Em Meer goot s eeländ, und daas het si seer verschreggt!
Fir sii isch glaar, ass d Flichtlingswälle dschuld draa isch:
Geen Schluuchboot under, isch dää Blasdigg schlächt fir d Fisch.

Dr Eppstein isch e Gryysel gsii, ganz ooni Gwisse,
Het andre Maitli bsoorgt, fir waas, wottsch gaar nid wisse.
Won äär denn stiirbt git s Gricht, daas syyg en Attentat –
Uns isch daas glyych, fir uns zellt numme s Resultat.

Wäg dääne Bränd sinn Feerie in Australie miis,
Es brennt dr Amazonas, Notre-Dame z Paris.
Drum bueche Feerie mir am Wasser, daas isch s Richtige,
Und geen im Schluuchboot go dr Markusdom besichtige.

D Sommaruga wintscht bim Begg e guet Neijoor,
Zwische Broot und Oofe, mit bitz wirre Hoor.
«S isch nimm wie friener», brummt dr Blocher doo verdrosse,
«D Brieder Grimm hänn d Häxe no in Oofe gschosse.»

Es gheit em Newton en Epfel uff sy Biire,
Doo entdeggt äär d Schwäärgrafft, und bringt d Menschhait fiire!
Hit gääb s kai Foortschritt mee – sy Lääbe wäär verbyy,
Wil s kääm dr ganzi diiri Ascht grad hindedryy.

In ganz Baasel gseesch E-Drotti umeholpere,
Verstelle s Drottwaar, muesch im Dunggle dryyber stolpere!
Verschandle no dr scheenschti Oort, mache sich wichtig – Wäg
soo aim gseet me nid emool d Blaggedde richtig!

D Greta waarnt dr Trump: D Wält brennt, äär soll nid liege,
Me gsääch im Summer jo scho kuum me Bienli fliege!
Si soll nid schwiirig due, maint dää, wäg so baar Imme – Die
sinn nid doot, die fliege wäg dr Fluugschaam nimme!

Voor em Interview, doo bi CNN,
Sait dr Ueli Muurer: «Inglisch, yes wi ckän!»
Doch sy Änglisch hätt dr Shakespeare eenter gsteert:
Äär het daas dängg vo dr Martullo-Blocher gleert.

Bi Bränd z Australie lyyde vyyli Dier, und soo
Hänn mir e glains Koala-Waisekind uffgnoo.
Es isch ganz häärzig, wenn s so duur e Gaarte laufft – Und
wil s iim glyycht, hänn mir s denn Niki Lauda daufft.

Wil die Junge nuur no in Zivildienscht renne,
Fääle de Litnant d Lyt, zem fertigmache kenne.
Jetz bruucht s scho Alti mit Rollator, s isch verruggt,
Sogaar dr HD Läppli isch wider iigruggt.

Isch e Frau schwanger – Sii wisse, wie das isch,
Muess wäg all de Glischt vyyl Schoggi uff e Disch. Am
Moorge kunnt ere s Kotze, wien e bruune Bach,
Ganz schlimm isch s wenn si Schoggi isst vom Läderach.

D Wält wiird immer digitaler – s fiirchte d Lyt,
Ass es glyy nuur no fir Roboter Aarbed git.
Wottsch du e Job, wo Zuekunft het uff dääre Äärde,
Sottsch am beschte Mitgliid bi dr Fyyrweer wäärde.

D CVP, die mecht sich gäärn modäärnisiere:
Nuur mit dr Biible kenn me nimm politisiere.
Daas «C» muess wägg im Zytgaischt, wil s nimm alle gfalli,
Statt s «C» fir sich elai, wänn si e Ee fir alli.

Hesch friener miese iiber s Porno-Luege liege,
Isch s hit scho fascht normaal, drfiir schämmsch di fir s Fliege.
Drum wääre neii Fluugitype ideal –
Nuur finde miir dää vo dr Boeing z radikaal.

Die «Game of Thrones»-Serie wiird zimftig diskutiert,
S verhunzte Ändi het die ganzi Wält fruschtriert.
Mit Liege, Gwalt, Intrige, Ringe um mee Macht
Het s eppe soo vyyl Sinn wie daas Impeachment gmacht.

Impressionen

von

Dreydaagsfliege

Steckbrief

Diese Gruppe ist eine Augenweide und eine Ohrenweide. Bemerkenswert sind auch die raffinierten Helge in Fliegeschissli-Technik.
Comité-Bank seit 2011

Verse

Me het in Bärn e weeneli am Cassisbäumli gritzt
No het sich aber zaigt: Dr Ignorazio isch gschitzt.
Jetz naage mir am Crypto-Schogg, do hilft er in dr Plaanig
Will im glaubt jede sofort wenn är sait: "I ha kai Aanig."

S isch allewyyl das eewig glyychlig Lied und lengscht bekannt:
Wenn Lieschtel ebbis usstreggt derno isch s die hooli Hand.
Dr Rammel-Kantonalbangg-Chef het gmaint: "Wie-n-ich mi freu
Dass mir d Stedter jetz am Barfi vor Ort mälche cheu".

Z'erscht s Dreiraad, derno s Trotti, denn hesch Velofaare gleert
Mit dr Elektronik goot dä Wääg hüt umgekeert:
Mir schritte zrugg vom E-Bike uff dr Roller, sozuesaage
Und warte uff dr sälberfaarend, appgschtüürt Buschiwaage.

Die Made und die Würm uff sällem Helge, will's aim schyyne
Frässe sich mit Gusto in dä schööni Öpfel yyne.
Derby, wenn d luegsch, isch s umgekeert: Die mache sich uff d Sogge
Wär will scho mit dr SVP im glyyche Öpfel hogge.

Dr Giachen het em Gian verzellt: "Das isch jo allerhand
Als Plüschdier sinn mir baida a Symbol für ds Bündnerland".
Dr Gian het gmaint: "Do hemmer Glück", und frisst no schnäll e Pilz
"Will ds Baukartell und Richter und d Regierig sinn us Filz."

Dr Rolf, y main jetz dä wo moolt vo dr Familie Knie,
Stimmt, als wär är gfroggt, ins Greta Thunberg-Bashing yy.
Wie alli andre Klima-Löigner macht au är grad s Lätze:
Är steggt dr Kopf in Sand - do blybt halt nur dr Arsch zum schwätze.

D Elsbethe bröggelet, me froggt sich wär's wird zaale miesse.
Im Münschter mien si dr Kiosk us Koschtegründ bald schliesse.
D Botschaft vo dr Kanzle isch no allewyl e freudigi
Nur hets halt in dr Kirche fascht mee Gläubiger als Gläubigi.

Was mir scho lang vermuetet hänn ligt jetze uff em Disch:
Nämmlig dass dr -minu so-n-e rosa Seekue isch.
Jä wurde sich auch anderi zem innre Dier bekenne
No miessti sich dr Köppel jo dr bruuni Nacktmull nenne.

D Kirche sammlet jedes Joor e Batze oder zwai
mit däm schöne Spände-Uffruef "Loo mi nid ellai".
Wottsch immer öbber by dr ha vom Juni bis in Mai
Denn kasch au grad zer Crédit Suisse - die löön di nie ellai.

E Huffe fuuli Witz hänn s Image vo Blondine präggt
Derbyy: dasch gendermässig und politisch nid korräggt.
S git männligi Blondine und die sinn als Witz no trischter
In Ängland hänn si jetz so ain als Primitivminischter.

Bim Theater stoot die schöni Laitere zum Mond
Me het si welle wägnäh, aber jetze wird si gschont
Es bruucht si für dr Fall dass s Elsbeth Ackermaa, die Tschättere
wo hinderm Mond dehaim isch eventuell möcht aabeklättere.

Dräggspatze

Steckbrief

Zwei freche Vögel mit rollenden Augen. Was sie während dem Jahr so aufpicken, werfen sie an der Fasnacht als geballte Ladung zurück ins Publikum.
Comité-Bank seit 2015

Video

Verse

musikalisches Intro: Pentatonik
I ha grad, dass dFaasnacht nid abverheit,
mini kineesische Nuudle fuurtgheit

blowing in the wind
sKlima stresst alli, das isch kai Lappalie,
und fiert bis zum burn-out - in halb Australie

Winter ade
Zum Schneemaa sait dr Gletscherfloo:
bald sin mir zwei nümme do

he joo, meint dr Schneemaa, i merks alls wie feschter
wie dFDP au, bin ich Schnee vo geschter

Matter: Eskimo
dr Iisbär fänds cool, wenn me sKlima so gstaltet
dass är am Noordpol wiider emol kalt hät

ä chliises Träumli gsi
Dr Wessels wott Grönland nid kaufe, well nämmli
sGländ sig nid so geeignet für Drämmli

Ich gang und bi stolz, sait dr Wessels und lacht,
uf all dä Saich, wo n i nid ha gmacht

Schubert Forelle
Kai Ozeanium, brielt em Fisch si Buschi,
jetz muess i am Änd denn doch no ins Suschi

zBasel an mim Rii
Im Historisch Museum het me ganz unde
Im hinderschte Källerfach – wiider nüt gfunde

Vo Schönebuech bis Ammel
Dr Cassis het dStreggi rifflig erwooge
Denn isch är vo Allschwil nach Binnige gflooge

Lacrimosa
Ich sorg mi um dGsundheit vom Trump scho seer mächtig
s’git kuum me ä Hoffnig uf - Zuestandsverschlächtrig

unsere Güggel dä isch tot
I leg kaini Eier mee, sait sHuen zum Haan
Vo jetz aa läb ich nämlig vegaan

Mir Senne hais luschtig
i ha, sait dKue, grad ä Furz unterdruggt
sunscht wird doch wiider die Greta verruggt

Marseillaise
Dr Macron sait zur Ackermaa: du muesch di nid scheniere
Au ich due scho sit ä paar Joor ooni Erfolg regiere

Es isch eso, maint dAckermaa und zupft am Schal schiniert
Bi mir goots amigs zimlig lang, bis als denn nüd passiert

Dört äne am Bärgli
dr Thiam suecht dringend ä Geiss für si Stägge,
um dr Drägg vom sim Stägge wäg’zschlägge

Freut euch des Lebens
Trump, Trotti,Trämmli, China und Klima
Machsch ä bitz Yoga - und alles isch prima

Impressionen

von

Fäärimaa

Steckbrief

Der Fäärimaa ist eine absolute Institution. Er ist auf unserem Fluss genau so wenig wegzudenken wie in unserer Bänkler-Landschaft.
Comité-Bank seit 1998

Video

Verse

Falls Du gsehsch vo usse – ou – doo vertringgt öbber im Rhyy
denn wart lieber ab – gump nit sofort dryy
will, es könnt jo syy – nit dass Du nochhäär no s Dotteli bisch
dass das wingge vo däm Schwimmer nur für e Foteli isch

Dr Bligg uffe zur Schwyzer Fahne, dää isch in Lieschtel gängig
nur, öbb die darf hängge dört oobe, blybt längery Zytt hängig
und momentan wird ganz genau unter d Lupe gnoo
öbb dää Felse, wo sie draa hängt, überhaupt doo darf schtoo

Im Regierigsroot behaupte nit nur böösi Zunge
es syg im e Ent-Wesseligskünschtler s Kunststügg glunge
är wird sogar Ehrebürger, hänn mir vernoo
die Mäldig allerdings, isch us Saint-Louis koo

Das VAR fiehre sie yy in dr Super League
es entschaidet womööglig über Niederlaag oder Sieg
das kunnt au am Cortège und zaigt bi jeedem Gaul
hett äär sich gheye loo oder isch es wirgglig e Foul

Wenn s muess syy, hett är gsait, dr Dario Cologna
lauf y no geera vo Chur uff Bologna
und genau doo wär jetz e Pointe mit SBB nötig -
duet mir Laid, die hett e halb Stund Verspöötig

Es isch nit ain dr Carlos und ain dr Brian
dr Brian isch dr Carlos, dää Brian wo y main
dr Unterschied zwüsche Brian und Carlos isch höggschtens dää
für dr Brian hänn mir bis jetz no kai Gäld ussgää

Im Prinz Charles hänn sicher d Ohre glütte
am liebschte gieng au äär no hütte
aber hütt muess är dringend d Queen go bsueche
es isch die Gläägehait, es gitt Dreikönigskueche

Äär isch bald zwölf Joor im Amt – aber öbbis stöört
hänn Sie ai Mool e Väärs über dää doo ghöört?

EBBE!!!!!!!!!!

Sie könne s jo, wenn s muess syy – aber, es fühlt sich aa wie e Stroof
au Hiehner könne fliege, no knapp über e Buurehoof
und, me gseht das vor allem bim starte und lande
es isch sogar doo e gwüssy Fluugschaam vorhande

Y waiss nit, was die Minderhaite, die Randgruppe so hänn
wo jetz au no e gliichschlächti Ehe für alli wänn
y wett nur gärn gsee, hett irgend öbber vo dääne dr Maage
so öbbis diräggt mynere Schwiegermuetter z saage

Es isch e glaini Sensation
dr Läppli gitt s z Basel à discretion
jetz erwartet scho die ganzi Stadt
es kääm bald e zwaite Karli Odermatt

Grad wo dr Alt-Bundesroot Villiger so gmietlig e Villiger raucht
lüttet s Telefon, doo hett dr Villiger hässig „Villiger“ gfaucht
jaa, daa isch Firma CRYPTO in Zug – ych verbinde: düüt:

Nüüt, hett sie gseit, nüüt, nüüt – duu weisch immer no nüüt, hett sie gseit, nüüt, nüüt, nüüt, hett sie
gseit, nüüt, nüüt . . . du weisch immer no nüüt

Impressionen

von

Gasladärne

Steckbrief

Eine Gasladärne ist vielleicht nicht CO2 neutral. Dafür erhellt sie Jahr für Jahr unzählige Gesichter in bummsvollen Beizen.
Comité-Bank seit 1977

Video

Verse

S isch jeedem klaar, as unser Klima zimmlig spuggt.
Denn gohsch in Wald, wirsch vo de dürren Escht verdruggt
Und bald sin d Gletscher nur no halb so gross wie friehner
Numme s Bundeshuus in Bärn,- wird als wie griener

Der Wessels sait är möcht sich nümme wäähle loo!
Jä, das erstuunt ys well s isch unerwartet koo!
As är jetzt goht, do hänn mir sicher nüt dergeege
Uns bloggt nur d Angscht, är wurd sichs nomool überleege.

Unsri Schweschter het e Gottikind dasch s Lotti
Und das Lotti griegt vom Gotti do das Trotti.
Das Trotti losst denn s Lotti uff em Trottwaar schtoh...
Jetzt muess halt s Lotti wider z Fuess zem Gotti goo.

Well dä Chauffeur offebar der Hunger bloggt
- het är d Fahrgescht wo im Bus sinn zimmlig gschoggt.
Denn bim Neubad losst är sy Fahrzüg kurz ellai
und holt bim Sutter-Begg die letschte Maitlibai.

Unsri Frau Wänger goht zem Sutter näbedra
Und froggt eb si no e baar Maitlibai kennt ha.
Do maint d Verkäufere, si kennes jo probiere
In Ihrem Alter wirds halt schwär zem opperiere.

Was isch denn das doo für e Lärm am Himmel oobe?
Jä duet me doo emänd scho für e Luftkrieg proobe?
Do fliege Düüsejäger hi und wider zrugg.
Ah nai, sisch d Patrouille Suisse, die sueche Langebrugg!

Liebi Regula, schrybt d Greta der Frau Rytz,
as Du nid gwäält bisch, das beduur i scho e bitz.
Me ka als Grieni offebar halt numme glänze,
wenn me, wie ych, an jeedem Fryttig d Schuel duet schwänze!

Hundertfümfezwanzig Johr scho BeVauBee.
Das isch e langi Zyt, das muess me aifach gseh.
S Ainzig was uns an däm Laade hüt no steert..
Über hundert Johr und immer no nüt glehrt!

Im historische Museum fääle Sache
Drum sin si schnäll im Lager d Inwentur go mache
Die arme Sieche sueche hüt no wie verbisse
Wärs nur d Frau Ackermann, jä die wurd kein vermisse.

Mir hänn ys gfroggt eb mir e Brexitvärs wänn singe.
No hämmer dänggt es wird e jeede Bangg ain bringe.
Und wenn e jeede Bangg sy Brexitvärs will singe
Hänn mir ys gsait - mien mir nid au no aine bringe

Impressionen

von

Hansli Bargäld

Steckbrief

Wenn Hansli Bargäld den Saloon betritt, schweigt das Piano und es sinken die erhobenen Fäuste. Seine Schüsse ins Schwarze sorgen für rhythmischen Beifall.
Comité-Bank seit 2014

Video

Verse

Der Wessels glopft jetzt d Fingge,
der Brutschin - goht em nooch
in wohlverdiente Ruehestand,
jä doo verschloot s aim d Sprooch.
Als Zuegab für die Abgäng
y main es wär e bracht,
und e Sääge fir ys alli, -wenn
sich d Aggermaa vom Agger macht.

Der Pabscht sait faadegraad:
„Das Zelibaat goht nimm“!
der Ratzi isch verzwyyflet,
erhebt empört sy Stimm:
„Mien mir jetzt au mit Fraue,
und nimm nur Maa zue Maa?
Nai,- der ainzig Grund isch numme:
me mecht e Variante haa.

S Biozentrum koschtet,
110 Millioone meh!
S Baudep lächlet numme,
als däät s ne gar nid weh.
Me haig e tolle Job gmacht,
es stoht jo,- immerhin
und wird au ai Joor friehner fertig,
als dä Flugblatz deert z Berlin.

D Greta sitzt am Bode,
im dytsche ICE.
Sy macht e suure Stai,
denn s Fudi duet ere schampaar weh.
Bi der SBB do wär sy
vo dääre Qual befreyt,
will sy scho bim glainschte Ränggli
zer offne Düüre uuse gheyt.

E Graf und none Herzog
Ich frog my, ob das goht.
im Ständeroot fir Basel,
das basst nit zue Grien-Root!
Und Gender-grächt ischs au nit,
do hänn si voll versait:
Denn koräggt wär s ehnder wenn me
Frau Gräfin und Frau Frauzog sait!

By der CREDIT SUISSE git s Lämbbe,
der THIAM gege der KHAN,
es git e riise Buff,
und leggt die ganzi Bangg fascht lahm!
Au im Federer syni Näärve
liige komblett blangg
"Jä isch die CS jetz en Kiosk,
oder gottfriidstutz e Bangg?“

Machsch Duu e Bicicletta,
driffsch d Balle iber Kopf.
Und spiilt me Catenaccio,
do saisch als Stirmer: Gopf!
Kassiersch du e Tunello,
kas sy, dass jeede lacht.
Und fliegsch als Sportchef hochkant uuse
Hesch du e Pipistrello gmacht!

D Gletscher schmelze drastisch
der Meeresspiegel styggt,
me sait es syg dramatisch,
deert am Gipfel in Madrid.
Sy sind sich alli ainig:
Das liggt am CO2!
Jä und denn gehn all die Schnuuri
mit em Fluugi wider hai.

Är isch e rächte Fäger,
und macht au zimmlig Lärm!
Die ainte dien en hasse,
die andre hänn en gärn.
Kunnt är, denn goosch uffd Syte
am beschte mit aim tschamp.
Das isch kai Offroad-Kare,
Ych red vom Donald Trump!

Dä Mega-Meghan-Meghxit,
erstuunt die ganzi Wält.
D Queen entschaidet sofort,
es goht jo au um Gäld.
Kai langi Diskussione,
die Sach isch schnäll vom Disch.
Jä d Brite kenne schnäll si;
wenn ebbis wiirgglig wichtig isch.

D Wätterfee vom Färnseh
sait: "D Wätter spiilt verruggt!
E grossi Depression herrscht,
wo diräggt uff Basel druggt!“
Doch wurdis bald scho besser
„Vorbei ist Eure Not!“
Der Grund isch glar, und aifach:
der Hanspi Wessels goht.

I bin e bitz am muudere
und s isch mer zimmli Stuurm.
Y han e son e Kötzele,
was isch das für e Wuurm?
Isch das die China-Grippe
won ych dra fascht grepier?
Nai, dasch nit s Corona-Virus
Das isch z viil Corona-Bier.

Impressionen

von

Heiri

Steckbrief

Jo, jo, jo - diesen Baselbieter haben alle Städter schon lange ins Herz geschlossen. Grund: Er ist einfach ein geiler Siech.
Comité-Bank seit 2006

Video

Verse

E Huus mit zwanzig Zimmer, Summerfeerie in Hawaii,
e S-U-V zum go boschte, e Indoorpool dehäi.
Denn uf New York go shoppe. Wäisch, nur e Trip, e churze.
Aber tschuld, dass d Gletscher schmelze, syge myni Chie, wo furze.

Bim Sutter Beck häi sy d Mäitlibäi Glücksbringer tauft.
S wird nid lang goh, bis me im Dezämber Grättimensche chauft.
Damit mr käi Verchäufere e Strick wird chönne dräie,
bstell y, wenn dört e Zwätschge stoht, en Aprikoosewäie.

S Groosi goht nüm in d Chilche. Es macht jetz alles mit em Handy.
S het en App für s eewige Lääbe. Y hoff s nimmt käi bööses Ändi.
Y gseh s Groosi vor em Petrus stoh. S daarf nid in Himmel goh.
S het dr Zeedel mit em Passwort am Chielschrank hange loo.

An däm Frausträik do chöme die wohre Brobleem uf e Disch.
Hesch gwüsst, dass Mehrwäärtstüür uf Tampon frauefindlig isch?
Es frogt my äin: Wo isch Broblem, äimool pro Monat Mehrwärtstüür?
Ich zahl zwäi Stutz jeede Woche, vollkrass Mann, Sackgebühr.

Y tauf myni Dierli alli noch em änglische Köönigshoof.
Charles häisst my lahmi Änte. Harry häisst mys blinde Schoof.
S verrücktischt Huehn häisst Megan. E Prinz Andrew han y au.
Dä wird jetzt aber umtauft. Wäisch, my Eeber isch käi Sau.

"Miir wänn kai Spidaal mit de Rammel, kai Brugg vom Calatrava.
Miir wän kai Ozeanium, suscht mache miir e Draama."
Basel isch Provinz und blybt Provinz und wird s no soo lang blyybe,
bis me Fisch mit V und Gälterchinde wird mit CKDT schryybe.

Friener het d BaZ e Sinn ghaa, me läit se in d Chatzechischte
oder schützt drmit dr Boode bim Voogelcheefig mischte.
Jetzt git s das Cheesblatt digital: Hey Alte! Heschs begriffe?
Drum muess dys aarme Büüsi hüt diräkt ufs iPad schiffe.

Letscht Summer sy d Chälbli äinsaam, sy luege truurig dryy,
well ihri Mami ganz wyt fuurt uf dr Strooss am Sträike syy.
Au dr Muni isch nid umme, dää macht sich us em Staub.
Dää räist uf d Maledive in Vaterschaftsurlaub.

Dr Läppli isch wiider zrugg, Basel fyyrt sy Superstaar.
Är isch buureschlau, het Witz und Charme, är isch äifach wunderbaar.
Sy Ehrlichkäit, sy Disziplin het äär us guetem Grund,
well dr Läppli halt, genau wien iich, us dr Wältstadt Buckte chunnt.

Dr Ueli Murer säit im wysse Huus: Hello Mister Trömp.
Ych bin en Buur vom Zürisee, my hart it makes a Gömp.
Ych han dyhäi en Gäissbock. He look s like you. Y am sorry, Sir.
Y think you and my Gäissbock, you have the same Coiffeur.

In dr Joggeli-Halle sääge sy: Die Rapper rappe nid!
Miir wän nid, dass es mit em Heiri e riise Theater git.
Dasch richtig soo! Dört rapp nur iich, y hoff scho glyy, nid z spoot.
Dört rapp ich für en FCB, wenn dr Koller ändlig goht.

Fridays for future find y super. Die Junge gönge uf d Strooss.
An de Wahle gwünne die Griene. Dr Frehner wird arbetsloos.
D Natuur isch voll in Moode. Y daarf my uf e Summer fröie,
wenn alli Griene, in de Flip-Flop, wäi miir cho hälfe höie

Wäär findet, my Chalb würd stinke, däm sääg y, das muess so syy.
Es isch e Biogaas-Reaktor, Mühlebärg isch lengscht verbyy.
Es wäiss, dass es do voorne sächs Mol äin lo fahre sett.
Das längt für e volli Laadig vo eusem Elektrotrottinett.

D Maya Graf isch e Höhepunkt, wo fascht nüm hööcher goht:
E grieni Büürin us em Baselbiet isch jetz im Ständeroot.
D Eva Herzog chunnt vo Prattele, wäisch worum y daas betoon?
Dank deene zwäi isch s Baselbiet e richtige Vollkanton!

Y iss uf mym Buurehoof grundsätzlich regionaal.
S Fläisch us äigener Schlachtig, s Gmies us em Läimedaal.
Dä Corona-Virus blogt my glyych, es stinkt mr gopfergässe,
dass y d Chineesenuudle muess mit eme Mundschutz ässe.

Die Bäiz zum blut go ässe macht nid uf, dasch denn e Mischt.
Wo aane gohsch jetzt z Basel als hungrige Nudischt?
Nöime stöört dy Runzle-Ranze nid. Döört loot me dii in Rueh:
Hock doch äifach füüdleblut in die blindi Chue.

Impressionen

von

Hopfestopfer

Steckbrief

Der Hopfestopfer ist kein Lückenfüller. Er ist ein bierernster aber durchaus kreativer Neuling des Comités.
Comité-Bank seit 2020

Video

Verse

Wemme Bier braut, denn bruuchsch Wasser, Malz und Hopfe
S’Bier wird bitter, wenndes duesch mit Hopfe stopfe
Hesch uff dr Bangg hütt Gäld, bringsch finanzielli Opfer
schiggs lieber uns de „B ä n k e r s f o r B e e r“, de Hopfestopfer !

Für d Wältuusstellig z’Dubai het är gmaint: är hassi’s
wenn d Schwyz e schlächti Falle miech, so sait dr Cassis
Die schlächti Falle aaber –---- jä mr gseen’s graad voor is
Macht äär graad sälber zämme mit dr Philipp Morris

Jä, s Riisikoo am Baanhoofblatz wird glyy vyyl glainer
n ä b d e G l a i s git’s bald mee Blatz für unserainer
Dr Wessels waiss wie me daas macht, mir saage’s iine
Hejo ------ as Scheff stoot äär jo maischtens näbde Schiine.

Wenn hinter Flieger Flieger fliege, maint dr Hurter
denn fliege Flieger Flieger nooch, dasch wichtig murrt är
Luftruumschutz isch gwünscht, s Viola isch am Blaane
Für d M i l l i a r d e sitze denn no mir am Haane

Hüt bausch in d Hööchi, so wird weenig Blatz versaut
Au Herzog de Meuron hänn hinter em Baanhoof baut
dr Oppeheimerglotz, iir löchrig Wu nderwäärgg
Mr maches glyych drmit ------ wie die in Müülebäärg

Die Griene, Lingge und Nätte dryybe’s immer bunter
d Naduur erhalte! Dää Wunsch froogsch di, wohär kunnt är?
Me isch jo gscheit und ryych und s Klima nid verdoorbe
und s isch bis jetz au nur ------ e glaine Gletscher gstooorbe

Noch öppe dausig Nächt und denn no ainer Nacht
hänn si z Bäärn e neui Dausgernoote gmacht
Die Hunderternöötli in de Köffer ooder Däsche
kaa niemerts bruuche ------ zem go Schmiirgäld suuber z wäsche

Im Stille Oozeaan in dr Baiz zer Korallebracht
ässe ne Oktopus und e Haifisch zämme Znacht
Sait dr Okti zem Haifi: d’S c h w i z e r r a i s, sone Shit
die miemer vergässe ------ z Basel baue si s’Hotel nit

Fritz an Laitstell BVB: Wenn kunnt my Schlitte ?
Megge, bisch z Weil ? I gsee di nit, s Systeem spinnt hytte
In Schöönebuech losch d Lyt halt stoo, dr Räscht gheisch uuse
denn goosch ins Depot ------ döört kaasch denn e Rundi pfuuse

Kai Nobällbryys griegt si und isch nid erbaut
doch wäg dr Greta isch für d Schieler s’fliege-n „out“ !
Dangg em Sproochkuurs „M i l l e f e u i l l e s“, wo si hütte griege
dien si bi schlächte Franzi-Noote trotzdäm fliege
In Züüri kennt me d Street Parade und „s Chnaabeschüsse“
uns längt s Wältkultuureerb „d Faasnacht“, daas muesch „wüsse“
Au um d Picasso Bilder nyyde-n-is d Züürcher – schnallsch es ?
und hiete drum e Gmäld vom Tiziaan ------ e falsches

Dangg em Boris hänn si äntlig „Brexit now“ !
Wie’s wyter goot, daas waiss in Ängland zwoor kai Sau
Mir wüntsche Glügg, drzue em liebe Gott syy Sääge
Me waiss jo ------ Noch dr Sunne kunnt halt denn dr Rääge

E Riisewälle uff em Ryy, daasch schyynts dr Ort
zem aabesöörfe druff ------ jä d Jugend sait däm Spoort
Do wäär für uns und anderi gwaggligi alti Tschumple
gscheiter e F i s c h d r ä b b e zem go aabehumple

Z’Sanggt Peetersbuurg do het mi letschti öppis gstöört
haa’s uff em Friidhoof bimne Graabstai rumple ghöört
Im Rächne - waiss me jo - hänn d Baasler Kids versait,
Het ächtsch dr Euler sich im Graab grad ummedrait?

Impressionen

von

Penetrante

Steckbrief

Auffallende Kostüme, spitze Nasen und kräftige Stimmen. Mit wohltuender Penetranz singen die Penetranten über Gott und die Welt.
Comité-Bank seit 1997

Video

Verse

S Brobleem vo Handy Sucht das het me glaar erkennt
Und e Teenie erschtmool s vo sim Handy drennt
Ob der Teeny iiberläbbt isch nooni glaar
Doch der Siri isch scho wider aaschbrächbar

Der Prinz Andrew maint, was soll dää ganzi Krach
Jä mit däm Maitli ha n ich gschbiilt – ich glaub fascht Schach
So ebbis isch em Charles zem Gligg no nie bassiert
Will äär sich nur fir alti Schachtle interessiert

Der Ueli Maurer sait, jä grüezi Herr Jinping
Können Sie mir sagen wo d Uiguren sinn
Aha im Umerziehungslager - dasch e Digge
Kann ich Ihnen auch d Frau Somaruga schigge

S git au no hit Rassissmuss mien mir glaar bedoone
Drumm kriegt der Thiam au numme drissig Millione
Wenn dänggsch was Lääbensmittel koschte isch das hart
Jo will Banane kaufft me hit jo an der Art

D Patrouille Suisse het Langebrugg aifach nit gfunde
Das isch au schwiirig, ob vo oobe oder unde
Mit de Pilote wird jetzt dääglig hart trainiert
die wäärde nei vom HD Läppli instruiert

D Idee vo Job Sharing die schloot uns uff e Maage
Die Heidi Mück die kasch au halbtags kuum ertraage
Die Idee isch au nit nei dien mir do kund
S halbe Pensum bi der Soland - schafft der Hund

Es froggt der Pabscht e Kardinal – wurd Dir das gfalle
Wenn s Zölibat in unsrer Kirche wuurdi falle
Dää iiberleggt und bättet: Vater, der Du bischt
Statt e Frau hätt ich viil lieber ein Gardischt

S sait d Basler SVP zem Frehner noo de Waale
Der Sitz in Bärn isch wägg, der Frehner liidet Gwaale
Äär foot a zwängele, äär wurd au gratis goo
und wenn der Sitz ewägg isch wuurd äär aifach schtoo

Es waiss d Frau Ackermaa brezyys wie si was will
Der hailig Oobe nur „en famille“ und ganz still
Und s Sylveschterfyyrwärgg uff der Pfalz ganz kuurz
Am allerliebschte nur e griene Frauefuurz

Der Luca Zuffi het sich laider s Kriizband grisse
Und der FCB spiilt aifach nur – blamabel
Statt renne penne, dääne gheert der Arsch versoolt
D Verletzig het dää sich woorschiints bim Dusche ghoolt

Dangg em Wessels sine lange Rotliechtphaase
Kunsch z schboot zer Aarbet und das bringt di Chef zem Raase
Schtigsch um uff d SBB gseesch garantiert nie root
Denn kunnsch immerhin nur ökologisch z schboot

Der Wessels mecht bim Fäärimaa e Rootschlaag kauffe
Wie me das macht, wenn d Sache uss em Rueder lauffe
Fimf Meter Pegelstand maint dää isch nit pregäär
Wenn dä numme nit im Biozentrum wäär

Impressionen

von

Pierrot

Verse

Dangg em Thema Klima,
goots dä Griene, prima,
besser wär es giengt em Klima,
au ohni Grieni, prima.

Ängland isch bolitisch nimme gsund,
au d Wäärig isch zimmlig uf em Hund,
numme fir d Schwyz laufts no rund,
e Kilo isch und blyybt, zwai Pfund.

Dass das Kunschtwärgg duet yberlääbe,
sotsch es im Huus inne nit aneklääbe,
will d Banane jo schnäll fuule ka,
mues dr Kaiffer au e Wand dusse ha.

Mi Frau isch flyssig scho am spaare,
si mecht e aigene Kaare faare,
bim Kauf mies ych unbedingt in Garage mit,
si haig gheert, dass no 3 Riise fir ire Alte git.

D Greta sääglet vo Riff ze Riff,
mit em e Luxus-Säägelschiff,
y hätt ere scho lang dr Wind us dä Säägel gno,
und die Klima-Göre schwimme loo.

Fascht täglig kunnt si in dä Medie vor,
d Greta mit zwai Zepf, statt luftigt s Hoor,
si het au kaini Flause im Grind,
dr absoluti Draum, vo me Göttikind.

D Frau Merkel git sich jetz e Rugg,
bolitisch schrubbt si langsam zrugg,
si liess es mit em Maa, so richtig lo krache,
aber zerscht, well si mit em Dutzis mache.

Y ha bolitisch nit vyyl am Huet,
au wenn e Parteichef zrugg drätte duet,
fir mi isch die Mäldig nit die greeschti,
y ha au gärn Spiegeleier, ohni Reeschti.

Im Schlussgang duet dr Stucki aimool zugge,
scho liggt dr Wicki uf em Rugge,
wo dä Koloss näbem Muni stoot, bi dr kreenig,
froggt so ne Knilch, wele vo baide isch dr Keenig.

Zwai Wuche isch s Mami nit elai,
au dr Papi blybt dehai,
me sott s all däne wider stryyche,
wo s Buschi nit, duet baide glyyche.

Dä Winzling hänn si Greta dauft,
will är nit fliegt, numme blind umme lauft,
so hett me us iire yber Nacht,
doch no e flotte Käfer gmacht.

Mujinga Kambundji isch ganz glaar,
dr nei Schwyzer Sprinterstaar,
das “Maitschi” verdient d Medallie, mit Rächt,
scho wäge iirem urchige Bärner-Gschlächt.

Jetz hett är doch no miese goo,
und bestimmt no ne huffe Stutz mit gnoo,
lut CS syg d Situation e soo,
är haig s uf kai Fall, schwarz bikoo.

Au d Leerer finde 3 Mooned Summerferie grass,
wenn si zrugg sin, kenne si kuum me iiri Glass,
me gheert si scho saage, i glaub i spinn,
he - wie die Kinder scho wider gwaggse sin.

Impressionen

von

Schlyffstai

Steckbrief

Der Schlyffstai ist ein hochkarätiger Diamant der Bänkler-Szene. Die Verse haben Witz und der kunstvolle Vortrag ist ein absoluter Genuss.
Comité-Bank seit 2006

Video

Verse

Melodyy - Dert ääne am Bärgli.

Dert ääne am Bosporus, stoot e seer korrupte Bresidänt
D’Europäer dien schwyyge, will si syni Flychtling nit wänd.

Und dr Assad schyyrt dr Hass grad. Är und d Diirgge dien jetz Kuurde aabeloo.
Und bi allne Strytt mischle d Amis mit. Mit Embargo oder si leen Droone koo.

Dr Putin macht sich grad ans Wärk, und duet wichtig mit syne Flieger.
Mit em Erdogan fühlt sich dä Zwuggelzwärg, wiene grosse stargge Krieger.

Und d Saudis kaufe Waffe fir hundertdausig Mylioone.
Do sell no ain bhaupte, Diggdatuure dääte sich nit loone.

Jalladulli - kauf Crypto-Moduul yy. Unser Chiffriergräät, das het kai Verschlaiss.
Haissisch Erdogan git’s e Speziaalbroogramm: S git zum Chiffriergräät no e wyssi Gaiss.

Melodyy - Friday I’m in Love vo The Cure

Mir doch egaal, was ych am Määntig saag
Am Zyschtig mache d May und dr Corbyn schlabb
I gib am Mitwuch und am Donnschtig dr EU uff e Sagg
Am Frytig wird dr Brexit gmacht.

Am Wuchenänd mi Coiffeerdermin
Am Samschtig schnupf-i ändlig Kokaiin.
Ab Sunntig git‘s nur no wiider Ritaliin

Aarbedsblätz und Wirtschaft sin mir doch glyych
Ych ha in Oxford studiert, hösch, ych bi scho ryych.
Wenn s Barlamänt in d Ferie sett, sag immer no ych.
Am Frytig wird dr Brexit gmacht.

D Megan und dr Prince Harry. Mache nei Cash und Carry,
verleen s singgende Schiff, d Queen motzt nonstop.
Wird dr Brexit e Flopp, sag-i euch ganz salopp;
«Wääled doch dr Jürgen Klopp!»

And now you walk alone!

Melodyy - King of the Road vom Roger Miller

Ych miet fir mi Schatz en E-Trottinett, das macht Cruise wirgligg adrett.
Mir faare klimakuschelfrindligemissionsfrei - grad wie d Baasler Bolizei.
Nur, wo hett’s jetz, woni’s aimol wett, ains vo dääne zäädausig Trottinett?
Ändlig findi soone Trotti bi dr hinterschte Buvette. Nur: Das hett e lääri Batterii!

Nach däm Fiasko mit em Schrottinett, gang i hitt woorschyynts elai ins Bett.
Und denn träumi vo minere gliebte Suzette und zwanzig Hippsterbäärt uff aim Trottinett!
Die kryz und queer barggierte E-Trottinett, die ignorier-i jetz und verdräng-i komplett
Will die lande sowisoo, do mach-i jedi Wett, nodisnoo alli im Rhy!

Mit läärer Batterii!

Melodyy - My Name is Luca vo der Suzanne Vega

I bi dr Lukas. Ych bi ibrigens Regiirigsroot.
Ych bi scho lenger derbyy, waiss immer nooni wie’s goot.
Mi Spitalfusioon, die will kai Sau. Und was-i sunscht sett mache, weiss-i nit genau.
Ych sett en Aanig vo Gsundhait haa. Und wisse wie me d Keschte sängge kaa.
Doch wenigschtens bin ych e rächte Maa, denn fallt’s nit so uff, as ych das nit kaa.

Melodyy - Waterloo vo ABBA

S’isch haiss uff dr ganze Wält und in Greenland zirbbe d Grille
Ych waiss, iir dien viil lieber in eurem gaile SUV chille.
Doch uffs Mool, zaigt e Maitli uns allne wie’s goot.
Will si am Frytig e bitz ummestoot.

Greta du machsch, as mir uns jetz mien schämme.
Wenn mir mool e Fluugi und Cordon Bleu nämme.
Greta, du hesch Ruggewind ibere Ozean.
Greta du bringsch Klima-Waan uff e Stundeblaan
Greta, du, fir dr Trump bisch schlimmer wie d Taliban

Im Summer kasch nimm in Wald mit de Kind
will dääne gheie dert Escht uff e Grind.

Greta du, di Klimastraigg sell sich do loone
Bitti due dr Federer mit Frooge verschoone.
Sunscht beschattet di Credit Suisse mit Spitzel und Droone.

Greta du, Schwedischi Klima-Ikoone
Fir di wurdi sogaar in IKEA go woone.

Melodyy - Englishman in New York vom Sting

Du bisch fachlig guet und ych bi grien
Du hesch e Blaan, ych lääb vegaan.
Du hesch e bolitische Draum, ych umaarm e Baum.
Du suffsch Schämpis, ych kau Majoraan.

O-o, e Griene im Bundesroot. Solarmobiil statt Gummiboot.
Ych sett aifach wisse, wo s Bundeshuus stoot.

O-o, e Griene in Bundesroot. Wenn’s nit glappt, verkauf i Biobroot.
Do waiss-i wenigschtens, wie das goot.

Melodyy - Weil ich ein Mädchen bin vo dr Lucylectric

D Fraue geen im Juni in der Stadt go straigge, ganz in Lila fir mee Rächt fir d Frau
Fir mee Wirggig dien si’s denn uff Facebook laigge. Und driiber schwätze dien si sälbverständlig au.
Und wäärend si so poose, firs Selfiibild vom Joor
Hän d Männer e Machtneuroose und d Fraue singe lutt im Chor:

(R) Mir Fraue straigge will mir besser sin, weniger gstresster sin.
Mir multitasgge mit Familie, mit dr Aarbed und de Kind
will mir drum kesser sin und nit vo geschtert sin.

Hesch’s au gsee, do letschti bi de Waale git’s e wunderscheene feminiine Rugg.
Und uffs Mool griege all die alte faale | gwäälte wysse Männer mächtig Drugg.
Die alte Männer duet das quääle. Die dängge bi sich: «Shit
Die deerfe doch scho wääle, längt denn das no immer nit?»

(R) «Die Fraue wänn jetz bletzlig au no Loon, wo sich loont, wo iri Laischtig betoont.
Es wird kai Ma me gschoont, wo in dr Chefetage woont,
Will am Horizont bald e Frau scho droont.
Derbyy bewundere mir glaar, was ire Straigg erraiche kaa:
Zwei Wuche Vatterschafts-Ferie — fir e Maa.»

Melodyy - Drei Chineese mit em Kontrabass (Alti Chinesischi Melodyy)

Dr neggschti Värs hämmer vo dr Chinesische Botschaft priefe loo.

Drei Chineese mit em Kontrabass,
demonstriere uff em Tiananmen fir irgendwas.
Denn kunnt d Bolizei und froggt: Was sell denn das?
Jetzt fääle drei Chineese und ai Kontrabass.

Dreidausig Chineese geen uff Afrika
Biete allne geege Roostoff Blastiggspiilzyyg aa
Mir Europäer kenne so Verhalte gar nit haa!
Jetz geen die kaibe Chinese an unsri Kolonie draa.

Drei Mylioone Päggli kemme do vo China aa
will jede will drum billig s naischti WC-Birschtli haa.
An allne hett’s e Zeedel mit em Hiwiis draa:
Ka Spuure vo Sglaave- oder Kinderaarbed dra haa.

Drei Myliaarde Kameras stelle sofort schaarf
Wenn e Chinees eppis macht, won är eigentlig nit daarf.
Nimm di 5G-Huawei-Handy und griess mol lächelnd dryy
As die z Peking gseen, mir Baasler kenne fryndlig syy.

E Land, wo so lauft, macht im Grund kai Gspass
Dr Xi isch Bresidänt ooni Augemaas
E meeglig Leesig wäri, und die isch e bitzli krass.
De hausch em uff e Kopf mit eme Kontrabass.

Melodyy - Die kleine Kneipe am Ende der Strasse vom Peter Alexander

Am Oobe duets dunggle, d Ladäärne dien funggle, d Faasnacht hett d Käller uffgweggt.
Doch isch’s schwäär aabezwelle, will dr Wessels d’Baustelle uff d Stroos vor de Käller verleggt.
Uns kunnt uff dr Stääge, dr vo Wattewyl entgääge und sait lutt: Schalts Liecht yy, du Pfyffe.
Und dr -minu, dernoo, sitzt im Eggeli do, schryybt e Bricht, wo nur är wird begryffe.

Im Cliquekäller wird gloost und sälte gsoffe
Eso hämmer d Elsi Ackermaa im Käller troffe.
Si turtlet mit me Maa, es wird als wie suschbäggter
Si huucht em ins Oor: Du wirsch dr nei Museumsdiräggter.

d Tanja Grandits vom Stucki isst ains zwai ruggzuggi e Määlsuppe mit Wääie vom Disch
Denn straalt si uffs Moll, und sait still träänevoll: «Ändlig weiss-i was guets Ässe isch.»
Dr Christoph Brutschin kunnt miteme Guetschyyn fir e glaine Räntner-Rabatt.
Dr Conradin Cramer luegt d Brandaalaag aa und sait: «Das Konzäärt do, das findet nit statt!»

Im Cliquekäller wird maischtens rächt vyyl gsoffe
So hämmer geschtert dr Roger Federer droffe.
Dä isch mit säggs Mylioone vo dr Credit Suisse koo
Und hett derfiir im e Schliessfach si schlächt Gwisse gloo.

So trifft me Tout Bâle imne Käller nach Waal. Mir Schlyffstai finde’s famoos.
Jede isch derte glyych, sygg är arm oder ryych. Mir sage «Sali Zämme» und leege los.

Impressionen

von

Schnaabelwetzer

Steckbrief

Schon das Goschdym bereitet auf einen bunten und rassigen Auftritt vor. Und er kommt. Mit bestechenden Pointen und Helgen.
Comité-Bank seit 1997

Video

Verse

Mit Riise-Uffwand wird dr Bahnhofblatz totaal saniert.
Belaag und Schiine, alles neu, s wird baut und renoviert.
S Verkehrs-Chaos, das blyybt, und trotzdäm isch es nit für d Katz:
Kunnsch unter s Dramm, liggsch gottseidangg jetzt am e schööne Blatz!

Bim Bsuech in Moskau mäint dr Ueli Muurer: Wladimiir!
Äi'm wery praud for Switzerland, dät äi darf syy bäy diir!
Dä Trump, oh shit – bät yuu e Hit! Let's gou, mir stoose-n aa!
Und dänggt drbyy: Scho gäil, ass ich esoo guet Russisch kaa.

Kennsch du d Nancy Pelosi nit? Dr Trump kennt die sehr guet!
Nach ihm isch das die gröschti Häx, uf die het dä e Wuet.
S Impyytschment sig e Häxejagd und Schluss! und Punggt! und Fakt!
Im Grund gnoo het dä rächt: Will jo die Häx dr Tüüfel jagt.

Äi Fliege säit zer andere: « Jetzt gib dir moll e Schupf!
Hoggsch numme uf em Fänschterbrätt – hesch äigetlig käi Pfupf?
Lueg duss dä heerlig Kuehmischt aa, das wär s doch – häyäyäy!»
«Näi, syt dr Greeta ha-n ich Fluugschaam, ich blyyb hütt dehäi.»

Hüt fliegsch doch nümm in d Feerie, näi! Näi, hüt blyybsch brav dehäi.
Dr Greta Thunbärg machsch e Freud – vo wäge CO2.
Verzicht uf s Flugzüüg, luttet s Motto, denn blybt d Weschte wyss.
Du wäisch au nie, wo d aane kunnsch – genau wie d Patrouille Suisse.

Grad wo dr Albert Einstein uf re wysse Wolgge schwäbt,
Froggt ihn dr liebi Gott, ob är im Himmel gmietlig läbt.
Näi, mir goht s schlächt. Y dängg z vyyl nooch, jä s Ganze isch verzwaggt:
Y ha drumm immer noonig z Bärn die Zauberformle knaggt.

Me hett halt s gläiner Übel gwählt – au mir sinn konschterniert.
Dr Cassis blybt im Bundesroot, die Grüene sinn fruschtriert:
Entsorge sottsch dä Bürogummi – d Schwiirigkäit do draa
Isch, ass me Gummi überhaupt nit komposchtiere kaa.

Bisch online, spiilsch am Händy – hüt wird alles regischtriert.
In Bärn, Sanggalle, Basel wirsch per Video kontrolliert.
Das wäiss doch jede gläine Goof vo Gämf bis Disentis.
Wo findsch no äin, wo das nit wäiss? He, bi dr Credit Suisse!

Rächt schryybe het die äint nit könne, lääse nit dr zwäit.
Die dritti hett kuum gschwätzt, dr viert im Rächne voll versäit.
Zerscht sinn die in e Gläiklass koo, damit s doch vorwärts goht,
Und ganz zum Schluss, do hogge sy denn im Regierigsroot.

Scho wider wärde d Billjee tüürer bi dr SBB.
Tessin und zrugg, Samaade äifach – s koschtet alls wie meh.
Im Gäägetäil, s wird billiger, will d Rächnig anderscht goht:
Hütt kasch vyyl lenger sitze blyybe – d Züüg sinn alli z spoot.

Sit vyylne Johr wird plaant und baut am Airport in Berlin.
No immer stinggt s noch Teer und Staub und nit noch Kerosin.
Bestimmt goht das no hundert Johr – mir mache jeedi Wett,
Ass Basel zletschtammänt no zerscht sy Biozentrum hett.

De griegsch mit bizzli Räinbenzin fascht jeede Flägg ewägg.
Au Soosse, Fett und Kaareschmiiri, Bluet und Katzedrägg.
Bi allerschwäärschte Fäll, do gosch mit Schawellwasser draa.
Das nützt – nur nit bim blonde Schandflägg us Amerika.

Impressionen

von

Schooffsuuri

Steckbrief

Sorgt für etwas Entschleunigung an der Fasnacht. Während sich das Publikum entspannt zurücklehnt, singen die Schooffsuuri Verse, die sitzen.
Comité-Bank seit 1992

Video

Verse

Im BMW luegt di hit jeede schreeg aa
Und sait dasch e Raaser wo nit faare kaa.
Derzue mues i saage - in der hittige Zyt :
Biker die sinn doch die ganz glyyche Lyt !

Im Goggi isch nimmi der halb Liter dinn,
Der Bryys isch der glyychi, das macht e kai Sinn.
Jetz git s e Gschrei, me echauffiert sich do draa.
Der Wessels die Fläsche het no nie Inhalt ghaa !

Daarfsch Di fraie, saumäässig und lache wie lätz,
Kaasch wietig und daub syy , verruggt wie ne Mätz
Daarfsch miiraa au muff syy , und das kolesaal,
Aber -worum sait me allewyyl nur „emotionaal“.

Laschtwääge und Auti steen uf em Drottwaar voruss
Und deert wo d kenntsch lauffe kemme d Weeloo im Schuss.
Derhinder mache d Schieler mim Drotti der Gloon
Drum draag i als Fuessgänger jetz au s Schyylee jaune.

Hit isch me „achtsam“ – das isch e nei Woort,
Me luegt zu sich sälber und zwoor ab sofoort.
Esoo bisch nimm ainsam – sondern mit dir sälbzwait
Was bringt is ächt Nyynsam- und dernoo Zääsamkait ?

Peschtizid sinn im Wasser – Nitrat in de Fisch,
und all daas kunnt allewyyl frisch uf e Disch.
Mit Gift und mit Gille dien d Buure wie lätz
Fir sich hänn si alli e Bio-Pflanzblätz.

„Bueberampft“ sait me der Kruschte vom Broot
Au bi „Grättimänner“ findt jeede, das goot
Worum denn die verloogeni Ydiottie
Ass jeedes „Maitlibai“ soll e „Gliggsbringer“ syy ?

Bim Alkohol und au bim Zugger isch es esoo,
Ass e Maa mee verdrait, ass ere Frau wuurd bikoo.
Wenn ain do druus schliessti – es gääb e schwach Gschlächt
No wäär is das wiirgglig jetz gaar niene rächt !

Me fliegt nimm oder weenig – wil das s Klima steert,
Bi de Bundesreet isch daas hit grad umgekeert :
Die mien mee fliege mit em Bundesroots-Jet,
ass jeede vo deert oobe au d Iibersicht het.

I saag zem Baschi – worum hesch das gmacht ?
Gseesch nit, wie doo jeede Gängschter nur lacht :
Bis Du mit dym Tesla an Tatoort kaasch koo
Faart dää doch scho lengschte mim Drotti dervoo.

Me schiggt mi in d Reere – will y Ruggewee haa
No maint druff der Doggter jetz lueg au do aa :
D Niere het Lecher und au d Lääbere kunnt draa…
Mai bin i froo, luegt dä mi Hiirni nit aa.

Es isch zwoor lang gange – doch jetz isch me draa
Ass me s „Schwaarzi Loch“ s eerscht Mool au föttele kaa.
Bim Zaige vo däm Fotti schreit ain - und erblaicht
So guet het der Wessels no nie aine braicht !

Impressionen

von

Schunggebegräbnis

Steckbrief

Selten sorgt ein Begräbnis für soviel Witz, Unterhaltung und gute Stimmung wie dieses. Übrigens nicht nur bei Veganern.
Comité-Bank seit 2012

Verse

Bisch gärn einsam und elai, hesch nach Stilli s Verlange
Denn bisch friehner ins Stücki oder d Märthalle gange
Möchtsch di hütt nit lo störe
Niemerts gsee, niemerts höre
Kauf e Karte, si isch s dr Wärt
Für e Joggeli-Konzärt

Dr Barell will Auti und Parkplätz in Masse.
Für Grieni und SP isch das nid zum fasse
Dr Platz in de Gasse
Es syg nid zum gspasse
Bruuchts jetzt einzig und elai
Für d Klimademo am halb zwei

Kultur, Uni-und-Theater sind wärtvolli Sache
Ohni Gäld losst sich dört aber au nit vyl mache
D Baselbieter wänns probiere
Zahle nüt und profitiere
Mr löhn si drum – das muesch verstoh
Am künstlig Rotliecht duss lo stoh

Herzog und Wessels wänn beidi nüm schufte
Brutschin hets iigseh und duet au vrdufte
Streller, Okafor ziehn d’Leine
Denn bliibe wott keine
Es göhn alli wäg vo do
D Topverdiener-Stüür wird ko

Gscheit und Digital – e ganz smarti City
Innovativ vo links bis rächts und au in dr Mitti
Standortvortail und Wüsseschaft
Gän dr Wirtschaft die nötig Kraft
Basler Fortschritt usser Gfoohr
Nur s Biozentrum bruucht zäh Joor

Es brennt in Australie, es brennt au Notre Dame
Es brennt im Amazonas und s Gränzwärt stoht in Flamme
Jä, die ganz Wält duet brenne
Aber mir eini kenne
Wo für gar nüt brenne ka -
Gälle Si, Frau Ackermaa!

Oje, was muess me gseh? Me traut kuum de Auge
Uff Platz 3 dr FCB - si dien nümmi tauge
Doch es git no e Sparte
Dört hän si die beschte Karte
Mit däne schlöön si jedi Stadt:
D’ Läberwärt vom Odermatt

Bi de SBB duet me jetz d Weiche neu stelle:
Gly ka me sy Billjee per App nur no bschtelle
Jede Zug hett e Coktailbar
Mit Cüpli, Wodka, Kaviar…
Liggsch denn bsoffe undrem Tisch
Merggsch nümm, dass de verspöötet bisch

Der Umwält z lieb isch hütt dr Plastigg verbotte
Mir meine, dass das alli so langsam wisse sotte
Telebasel, mir sage s frindlig
Isch massiv umwältfindlig
Ohni Plastigg ka s nur go
Wenn d Adela duesch entloh

D Frau Amherd het s Vertraue in d Menschheit nit verlore
E abhörsichers Grät brucht si nit an den Oore
Via Satelliteschüssle
Duet si ihri Gspröch verschlüssle
Abhörsicher und perfäggt:
Si schwätzt eifach Dialäggt

Zem hundertschte Mol - mr mien fascht bitz lache
Wänn d Franzose jetz Fesseheim wirgglig zuemache
S isch jo nit schwär z erroote
S wird au das mol nit groote
Abefahre liggt nit din
Will alli grad am streike sin.

«Herr Doggter, y bi krangg und mach täglig in d Hoose
Ha-ne usgwaggsni Angscht- und no andri Neurose
Y bi muetlos, ohni Power
alli andere find y schlauer….»
«Sinn Si», stoppt är my Gschrey
«In re bürgerlige Partey?»

Mr hänn in St. Jakob e brandneui Halle
Wo alle mit Usnahm vom Brandschutz duet gfalle
In obere Reihe
Könnt s Rauch yyneweihe
Dorum schryybt me dört an d Wand:
«Reserviert für Baselland!»

Si könne nid reede, nid argumentiere
Si kenne kei Dossier, dien nur delegiere
Si könne nid fiehre
Nid repräsentiere
Si, Si wäre doch am Änd
E Regierigspräsidänt!

Vor kurzem, bim Fische, an dr Birs nööchi Laufe
Hän mir d Angle welle schwinge, zum e Rägewurm taufe
Do schreyt dä: „Mi letschti Bitt
Teilet das allne andre mit:
Lieber so mi Läbe geh
Statt moddle für die SVP!“

Die Greta und mir, also mir und die Greta
Mr dörfe zämme koche, doch ussschliesslig Feta
Kei Schpägg und kei Schungge
Do hän mir schnäll abgwungge
Und uns geinigt: „Es längi nur
Traage mir die gliich Frisur!“

In dr Clubschuel vom Migros lernsch Sprooche ohni Ändi
Dass au du, si oder är sini Zweitsprooch dört fändi
Au Bruefssprooch kasch dört büffle
Zum Kollege zämmerüffle
Doch gosch di Laufbahn politisch aa
Kasch jetz au Muurer-Änglisch haa

Die Ussaag isch heikel, doch darf me se mache:
Dä Virus isch jetz do und mir könne nümm lache
D Gränze bliibe trotzdäm offe
Doch öbbert duet im Stille hoffe
Het ächt Ängland d Finger dinn
Denn nur so macht Brexit Sinn?!

Jolololo, jololo, jolololo nur schön singe
Jolololo, jololo, keini Pointe könne bringe
Jolololo kei Erfolg kaa
Jolololo neui Lösig haa
Jololo göhn mir zum Tescht
Ans eidgenössisch Jodlerfescht

Impressionen

von

Schwingbääse

Steckbrief

Der Schwingbääse ist akustisich auch ein Swing-Bääse. Was er anrichtet ist kunstvoll aufgeschäumt, aber niemals aufgewärmt.
Comité-Bank seit 2019

Video

Verse

Mir hän s ne gsait, mir hän sy gwarnt, mir hän s ne bumpt
es isch völlig glaar, Britannie verlumpt
sy veraarme ooni Brüssel und kömme gross in Not
als Byschbyyl kaasch jo gsee, wie schlächt s de Schwyzer goot

Maitlibai, Spitzbuebe und au Schänggeli
dr Pariserring isch wichtig, muesch dra dänggeli
vor em Vogelnäscht e Brunsli, bim Schnägg do ha n i glitte
drum kauf i nüt, gang haim und mach e Fotzelschnitte

Wäg dr Greta ha n i my SUV abgstoosse
e so hets vyyl mee Blatz gää uff de Stroosse
denn hän sich d Trotinett vermeert, es isch jo total gspunne
jetz frees i wiider BMW, my Jagdinstinkt het gwunne

D Klaagemuur am Barfi duet mir fääle
das mit dr Delifoonkabine duet my gwääle
s het alles miesse wäg, i kaa das nid verstoo
wo kaasch denn jetz dr Drugg ab dyner Blose loo

D SVP wär gärn «the voice of switzerländ»
sy wänn Sproochroor sy als ächti rächti Bänd
los zue, bass richtig uf, jä denne merggsch es wool
je luter so ne Roor isch, desto isch es inne hool

Achtzäähundertzwanzig hän sy z Oxford gschriibe
die Dampfyysebaan sig gföörlig übertriibe
will ab Tempo Drissig s Hirni schwere Schade nimmt
hütte waiss me ganz genau, dass die Studie stimmt

Dr CIA und d Bundesrööt dien karisiere
und e so d Neutralität neutralisiere
sy hän s nid ganz unter e Debbig gwüscht, i mach e Wett
will s z Bärn jo unter de Debbig gar kai Blatz me het

Meghan and Harry die sin uff und dervoo
d Froog isch numme, wo söll s denn aane goo
d Waal wo sy denn dräffe isch nid dr gscheitschti Ort
will Kanada an Waansinn gränzt und das in Süd und Nord.

Die katholisch Kirche het s Klima au entdeggt
dr styygend Meeresspiegel het die Gselle gweggt
die wüsse scho was mache, wenn s Wasser sötti koo
sy styyge in e Arche und faare denn dervoo

Freispruch Trump und d Hoffnig isch verby
dä Senat isch wie n e Käller voller Wy
es haisst im Wy seb d Woret, in vino veritas
by soovyyl leere Fläsche bezwyyfle mir grad das

Dante Schuggi duet im Hienerstall als bike
unsri Klimakinder könne das nid like
druss het die Dante gleert, e so isch s bicobello
sy het jetz Freilandhiener und überfaart sy mit em Velo

Impressionen

von

Schwoobekäfer

Steckbrief

Zählt zu den kostbaren Insekten des Comités. Mit fein gedrechselten Versen bohrt er Pointenstachel ein, die sitzen.
Comité-Bank seit 2000

Video

Verse

Was isch in die in Ängland gfaare? Spinne die e bitz?
Jetz seggle die em Boris nooche, däm Blondyne-Witz!
Do z Basel ka das nie bassiere bim Regierigs-Wärbe,
Wel me dr Baschi Dürr jo gottseidangg nit blond ka färbe.

S ney Biozäntrum goht nit uf – si mien s no repariere:
Es rünnt, es roschtet; s koschtet meh, wel d Planer sich saniere.
Als Styyrezaaler kasch do nur no sage: „S wär doch nätt,
Wenn me für so Figure s Schällemätteli no hätt!“

Im Pfadilager hän si sich, in dunggler Näbelnacht,
Uf d Jagd nomene Bösewicht im Tannediggicht gmacht.
Däm Biebli, wo gärn haim het welle, sait me: „Mach kai Gschyss!
Du bruuchsch das speeter, wenn Du Chef bisch vo dr Crédit Suisse!“

Dr Pauli Buess vo Weislige, dä goot mit syner Frau
Ans Stedtlifescht in Lieschtel und är seit zu ihre „Wau!
De Musiger kchä Gage gee, das gränz a s geniale
Das isch jo fascht so schlau, wie wemmer d Stedter liessä zaale.“

Es mischt dr alt Papscht Benedikt, statt still und zfriide z sy,
In d Gschäft vom Neye sich als alte Besserwisser y.
Do sait dr Papscht Franziskus hässig: „Das find ych nit glatt!
Dä isch jo wie bim FCB dr Karli Odermatt!“

Me waiss jetz: D Basler Schieler sin die Schlächtschte in de Sprooche,
Si schrybe kuum und kemme au im Aimolains nit nooche;
Si wisse nyt, si kenne nur e groossi Schnuure fiehre -
Die kasch jo z Basel speeter heggschtenz bruuche zem Regiere.

Dr Euroairport wird all Henneschiss evakuiert
Sobald e Däsche ummestoot goot nyt me – bisch laggiert
Ich glaub jo nit dass d Lyt die Däsche eifach so verliere,
Die goot doch - haimlifaiss - als d Greta Thunberg go blatziere.

Me kas efang in jeder Zytig lääse, jeede daag
Dr Trump dä het e Schyybe und si Muure isch am Haag
Är hät die Muure so gärn baut, zer Noot durchs eige Land
Derbyy faart dä au ooni Muure logger s Land an d Wand.

E Kinschtler kläbt e gweenligi Banane ane Wand
Das Maischterwärgg wird gfyyrt und git e Heidegäld uf d Hand
Banause meine jo, so Gschäfter mieche numme Schurgge
Derbyy macht das dr FCB scho lang mit sine Gurgge.

Die, wo d Tourischte scharewyys an Morgestraich verfrachte,
Die feen jetz äntlig a, uf unseri Traditione z achte:
So derfe d Schwoobe kaini Naarekappe importiere
Und die us China mien sich scho fir d Ane-Rais masggiere.
Jetz soll me sich mit Hahnewasser nim dr Hals erfrische,
Wel d Buure in das Wasser Peschtizid wie Sirup mische.
Em Parmelin, wo s Sage het, däm lyychtet das nit y:
Das Wasser isch doch immer no vyl gsinder als sy Wy!

Impressionen

von

Schyynhailig

Steckbrief

Einer der brilliantesten Geistlichen ist nur schyynhailig. Im Bänkler-Himmel hat er trotzdem seinen festen Platz.
Comité-Bank seit 2017

Video

Verse

Ych straigg jetzt do vorne well my dra stör
dass y my Refrain vo Euch nonyg hör

Für grossi Ghaimnis bruucht s Kryptolooge
für glaineri ka me au d Credit Suisse frooge

Damit me nid kryptisch muess d Wooret erkunde
hän d Katholygge dr Byychtstuehl erfunde

Heb Dy fescht das haisst loss nit loos
erklärt dr Pfarrer däm Kind uf sym Schoos

well im Wallis d Gletscher schmelze
vermiete sy d Schyy jetzt als Stelze

Jetz kasch mit em Dreyer uf St. Louis go
und unterwäggs d Auge no lasere lo

Vor dr Wessels goot do wett y druff
hebbt dä sy Veloparkblatz no uff

S muess im Grossroot kain iebe fir dä Jodler-Empfang
denn d Händ in de Hoosesegg hän die scho lang

Dr Franziskus duet sich für s Zölibat weere
und hofft dass sich d Prieschter so trotzdäm vermeere

Sy Nai regt my uf denn mir lääg öbbys dra
dass y my Fründ ändlig hüroote ka

Für d Ängländer isch doch dä Brexit no gsund
so verliere die ändlig emoll e paar Pfund

Vor ebbe drey Joor oder ungefäär so
het s wysse Huus sone Gäälstich byko

Schöni Helge Raim und Pointe koschte Härzbluet und Zyt
dr Donald Trump isch das alles nid wärt

Wär sich vor Klimaschääde duet gruuse
luegt uf dr Krüzfahrt halt aifach nimm uuse

Bim Krüz vo dr CVP muess me sich frooge
het ächt die ganzi Gschicht nit scho ne Hooge

D Notre Dame dänggt sich s isch gscheyter e Brand
d Elsbeete trifft s heerter die gheit usenand

Dangg dr Schyynhailygkait und dr guete Fygur
kumm y denn s näggscht Joor als Bischof vo Chur

Impressionen

von

Singvogel

Steckbrief

Dieser Vogel kann nicht nur singen - er ist auch ein komischer Vogel. An jeder Fasnacht setzt er zu neuen Höhenflügen an.
Comité-Bank seit 1997

Video

Verse

Jetz spändet nägschtens scho der zwäiti Roche-Duurm Schatte,
und au der Clara-Duurm stoht bald scho vor der Matte.
Und wenn die fertig sin mit allem Drum und Draa,
fangt me bim Biozentrum äifach nomoll aa.

Si föön aa d Zügelkartons bstelle, d Royalischte.
S halbe Königshuus hoggt scho uf paggte Kischte.
Loos, Charly, froh zu sein bedarf es zimmlig wenig.
Und wenn du döört blybsch, wirsch villicht sogar emoll König.

Wo der Leader vo der Patrouille Suisse im Ziel isch
und denn erscht merkt, dass Langebrugg nit Mümliswil isch,
do rieft d Frau Amhärd: Halt! Die neue Jets mien warte!
Zerscht mien jetz Kompäss aane und e Schwyzerkarte.

Der Megge datet s Vreni, s Esthi und d Sabine
jewyyls am Barfi bi der Delifonkabyyne.
Jetz, wo die züglet isch, git das e tüüre Spass:
Bi so vyyl Dates do lohnt sich e Museumspass.

S wird schon e Grund gää, denn s Museum nimmt d Kabyyne,
wo sich als Dräffpunkt so bewährt het, zue sich yyne.
Für zue dym Schatz muesch zerscht bim Münschterschatz verbyy.
Es git si also doch, d Museumsstrategie.

Ych hätt als Maa, als wysse, alte, nie der Maage,
amene Grüppli Fraue "alti Dante" z saage.
Derbyy, wenn d d Larve wäglosch und dr ganzi Plunder,
denn sinn jo mäischtens alti, wyssi Männer drunder.

Bim Znacht im Altershäim frogt d Schweschter Erika:
Wär will morn Halma spiile? Wär macht Mandala?
Do säit d Frau Huubesack und stryychlet ihre Puudel:
Für soone Froog do machsch normaalerwyys e Doodel.

Y bstell e Pfünderli, drzue e Mäitlibäi.
Do häissts: Dasch nit korräggt, Sii, göhn Sii wider häi.
Y dräi mi um, kumm wider zrugg und sag vergniegt:
Y möcht e Pfünderli und e Genderli. – Do han ys griegt.

Y möcht gärn wüsse, was Ibiza alles bietet,
und han e Flug buecht und schyggi Villa gmietet.
Wo denn die russisch Oligarchin yynestögglet,
do han ere d BaZ verkauft. – Die han y schön versegglet!

Es söll schyynts Bänker gää, die hänn sich uf der Latte.
Si gänn sich geegesytig Uffdrääg zum Beschatte.
Und für das positive Image – allemaa –
mien si vo uns die negative Zinse haa.

Drei, wo nöi gwählt sin, hän in Bärn e Wohnig gfunde.
Der WG-Ämtliplaan isch mit ere App verbunde:
en App, wo yykauft, putzt und uffruumt in der Wohnig.
Nur wär se vor der Sitzig wigglet, wäiss me nonig.

Impressionen

von

Spitzbueb

Steckbrief

Der Spitzbueb ist ein spitze Bueb. Seine zugespitzten Verse sorgen für spitze Pointen.
Comité-Bank seit 2007

Video

Verse

Dr Sutterbegg säit „Mäi mäi mäi!
Nümm Beggeschmutz, nümm Mäitlibäi.
Au Fuudiweggli kaasch vergässe.“
Guet, Haubtsach s wird no Spitzbueb gfrässe!

Im ’Elle et Lui’, nid ganz bache,
will äin e Bäiz füür Blutti mache.
Ych gang döört goo n e n Ässe haa.
Aaber d Laarve bhalt y aa!

Sii, waas miir uff d Latte goot;
y haa s nid gäärn, wenn me miir droot:
Doch d Aggermaa, ganz unscheniert,
säit, dass si nomool kandidiert.

Abdäilig „miir wäi scho n e bitz, aaber miir häi nüt“

Im Bruederholzspidaal, verglemmi,
meerggsch gaar nüt vo dr Äärzteschwemmi.
Y bii go luege, haa käin droffe.
Aaber s Kiösggli isch no offe!

S Baselbiet duet wiider glänze,
mit neue Schildli an dr Gränze:
„Häärzlig willkomme“, s macht mi hii.
Miir sinn döört nie willkomme gsii!

Si hänn uff em Mars, im Boode n unde,
schyynt s Lääbe, brimityyvs, no gfunde.
Ych saag s no schnäll, bevoor y gang:
Daas git s im Baselbiet scho lang.

Abdäilig „dr Halbschue git käi Rue“

Dr Trump, z Davoos, er schnuurt und schnuurt
und schnurrt und goot denn wiider fuurt;
er schnuurt und schnuurt, es duet mr läid,
er schnuurt und het denn doch nüt gsäit.
Abdäilig „Drämmli, näärvsch mi völlig, nämmli“

„Do’sch d Läitstell vo dr BVB;
jeede Daag e Glanzidee;
neu in unserem Brogramm:
Im Momänt faart gaar käi Dramm!“

„Do’sch d Läitstell vo dr BVB;
bim Noochezelle hänn mr gsee;
die Mäldig vorhäär het nid gschtumme:
S faart nöime no n e Drämmli umme!“

„Do’sch d Läitstell vo dr BVB;
das Dramm, wo faart isch niene mee;
s isch grien und hinde het s e Waage.
Wäär s gseet, dää soll s doch bitte saage!“

Abdäilig „“

Bii dr BAZ, doo dien si gryyne;
am Moorge, zoobe, zwüschenyyne;
dr Wessels goot, daas drifft se schwäär:
Jetzt blybt die ganzi Zytig läär.

Abdäilig „vo Hiroschyymaa bis uff Lyymaa isch s Klyymaa aaber bryymaa“

Vo Müülebäärg dien d Brennstääb straale,
no äi Millioon Joor, daas sinn Zaale.
Und zwäi Joor druff, wenn s käin versaut,
wird z Züüri denn e Staadioon baut.

Friener het me n allem aa
Angscht ghaa vor em Schwarze Maa.
Dasch verbyy, drfüür het jeede
Angscht voor em Mäiteli uss Schweede.

Ych höör vom Mami hüt no d Döön:
„Iss uff, denn wird moorn s Wätter schöön!“
Jetzt hämmer d Stroof, dass Gott erbaarm:
Yych vyyl z digg und s Klyymaa z waarm.

Impressionen

von

Spootschicht Rhygass

Steckbrief

Mit der Spootschicht Rhygass gehen die Comité-Bänke in die Verlängerung. Die Spootschicht ist ein willkommener und vielversprechender Comité-Zuwachs.
Comité-Bank seit 2020

Video

Verse

Für öpis isch im Bundeshuus dr Frehner sehr bekannt
Nach jed’re groosse Sitzig nimmt är s’ Büürschteli in d'Hand
Me kan-en kritisiere aber das muess me-n-em loo:
Zää Joor im Nationalroot ooni Spuure z hinterloo

Syt vyyle Joore fäälts em Telebasel an Profyyl
D' Reporter alles Glöön und denn no dä vo Wattewyyl
En-uffgschreggts Huehn als Chefin, jä es isch jo no verrruggt:
Me wünscht sich hüt scho fascht d' Tamara Wernli wider zrugg

D' Frä Meyer uss-em Santihans, die lauft halt nümm so rund
Drum rennt si au nit wäg, wo das E-Bike z'raase kunnt
Im Himmel säit si denn, liebe Gott ych bi so froh
Dass ych klimaneutral vo däre Wält ha dörfe go

Wenn'd hütte no Verkehr willsch mit-re Frau wo Dir entspricht
Jä denn bruuchsch e Bewilligung vom höggschte Bundesgricht!
Sex nur no nach Noochfroog – mir wüsste wie's könnt go:
Fraue frooged uns, well mir sage sicher «Jo»

«Wie wird ych d'Stadt verändere?», isch d' Tanja Soland gspannt
Als Regierigsröötin isch's für sii dr erschti Daag im Amt
No bevor si in iir Büro kunnt, isch s erschte Gschäft scho greeglet:
Iir Hündli het grad suuber äins vors Roothuus aanekeeglet

Israel macht Friide, dr Assad au no grad
Dr Trump isch plötzlig gschyyder, s Klima singgt um fuffzää Grad
Im Sudan gits käi Hunger und käi Flüchtling styggt ins Boot
Well ändlig isch dä Wessels nümme-n-im Regierigsroot

Ganz Chennai isch verzüggt und duet de vyyle Götter dangge
dr Cecca isch uff Indie koo und zäigt wie-me duet flangge
Doch bi däm ganze Rummel isch em Cecca gaar nit wohl
Är wäiss zwar scho wie Flangge göön - abr numme hinter's Gool

Bim Schyyrennfahre-Luege gsehsch die bruune Stelle glaar
Wäg-em Klimawandel schmilzt dr Schnee jetz scho im Februar
Und au in dr Basler Kirche wird dä Wandel offebaar
Nur find'sch die bruuni Stell dört in dr Mitti bim Altar

D Rhygass die het brennt, die ganzi Bäiz die stoot in Flamme
Wenn so öppis passiert, hejo denn frogt me sich scho amme
Für d Bäizer, glaar, isch schlimm, aber au mir hän schade gnoo:
Sin uusegrennt und hän drby drei Bier miesse lo stoo

Do isch allwä e mänge gläine Biezer zimmlig baff
Zäädausig Stäi beziet dr Hakan monatlig vom RAV
Mir finde's aber fair, hän uns sogaar bi iim bedanggt
Jetzt stelled Euch mol vor, dä hät no Kindergäld verlangt!

Iir wüsset jo syt kurzem schloot me nümme syni Frau
Und schimpfe gegen Usländer verbiete si äim au
Syt neuschtem ischs verbote, üüber Schwulewitzli z'lache
Me frogt sich was am Wuchenänd jetz d'Baselbieter mache

D’Gleis kaputt und d Lüt sin krank und d’Scheffe die mien go
Jä scho sit vyyle Joor laufts bi de Bvb eso
Doch öpis macht uns Yydrugg will au in dr gröschte Noot
Kömme d’Drämmli zueverlässig fünf Minute z’spoot

Impressionen

von

Stroossewischer

Steckbrief

Die Strassenfeger der Stroossewischer haben Kultstatus. Ihre Bänke sind eigenwillig, schön gereimt und brilliant vorgetragen.
Comité-Bank seit 1996

Video

Verse

Mir wische ammen au bim Kindsgi ummen Egge
und dien bim Fäschter unsri Naase yynestregge
Die Glaine zaige dört, in ihrer grosse Wält,
wien ys allne zämme s Zwölfiglöggli schällt.

E BSIECHLI IM KINDERGARTE:

Der Paul isch ehnder schwiirig und e bitz e Fätze,
dä duet der Kindergärtnere in s Fuudi pfätze,
bumm, päng, e Fuurz abloh, em Kevin aini bache
und maint: „Y daarf als Bresidänt jo alles mache!“

Do dien zwai Kinder zämme Hänsel und Gretel spiile,
doch s Gretel deubelet, die kaa so gföhrlig schiile!
Der Hänsel griegt grad Schiss, sy isch jo au scho säggs
„Lueg nit so böös, du bisch doch s Gretel und nit d Häx!“

Der Lukas spiilt so gäärn mit Glötz und baut ganz flyssig
ai Duurm am andere, es sind glaub meh als dryssig.
Und denn grad nomol ain, scho feertig isch dä Bau!
Und wenn er gross isch, villicht s Bio-Zentrum au.

Und d Sophie spiilt e schyggi Daame doo vom Daig,
wo scho ne Billijee für d ART in Honkong haig.
Sy riefft, will d ART usfallt: „Herjee, Frau Saaresyy!
Jä saage syy, wo kauff y jetz Banaanen yy!?“

Bim Spaziergang duudele die letschte Baide.
„Dir lauffet wie zwai Schnäggli, s kaa aim scho verlaide.
Soo kömme mer gaar nie mit euch baide Maitli hai.
Jetz hopp! Und lüpfet euri haide Mä... Glüggsbringerli“

Der Kai spiilt ganz ellai, dä het glaub kaini Soorge.
Er macht e riise Buff und lacht der ganzi Moorge.
Macht Saich mit Brio-Bahn und Auteli, jä nai!
„Voilà, mir stinkt s, y ruum nöd uff, jetz gang y hai!“

„Jä guete Daag, y bruuch e Kilogramm Banaane.
S isch für my Bäärli do, y leg ne s Gäld grad aane.
Ou sii, y gseh grad... Jee dä Drägg in myner Däsche!
Gäll du Bäär, mir mien das Gäld no zeerscht go wäsche.“

Am spöötere Moorge kunnt denn no der Fotograaf
und d Kinder freue sich und sind denn bsunders braav.
Er duet se büschele... „Achtung jetz, y mach e Fotteli!
Nai, Lisabethli! Stand nit aane wie ne Dotteli!“

Impressionen

von

Vermieter

Video

Verse

Bi däm Biozentrum-Turmbau zaigt sich glar:
Biologisch sin Millione abbaubar
Und d Noochhaltikgait isch erscht no schampar hoch
Will Stüürezahler wachse drum vo sälber noch

Im BVB-Drämmli-Museum isch jo s tolle
Dur d Stadt per Simulator mit em Drämmli z rolle
Bis de cheggsch: das Grät hät dringend Updates nötig
S fähle d Baustell mit Umlaitig und d Verspötig

Schieler sorge sich syt neuem mee ums Klima
Statt ums Lääse, dasch luut Pisa nümm so prima
Sogar d Franzose mache's besser, was denn zaigt:
Mit Lääse goht's erscht rächt voraa je me me straikt

E neui Metropole ka ma schyyns begiesse:
Es wänn sich Arisdorf und Hersberg zämmeschliesse
D Fusionsverhandlig macht si uff s Mol zu Rivale
He wär vo baidne spiilt dr Basler wo's muess zahle

Mi Sohn duet staili Häng ungsicheret bezwinge
Macht Bungeejumpe und goot als go Fallschirmspringe
I sag ihm loos, dä Kigg holsch günschtiger am Rhy
Laufsch aifach mol bi dr Dreirosebrugg vrbyy

Zum am Rhyyboord Grillchaote sanft z ermaane
Keit d Stadtrainigung e Abfallbärg dört aane
No sagi zum Tourischt wo uff dä Huffe starrt
"Hè we could sell this for five Million an dr Art"

Wäg dr Image-Gryyse trifft sich d Fierigstruppe
Vo dr CS zunere Sälbschthilfegruppe
Si sueche Lösige im schygge Sitzigszimmer
Und sin si noni gstorbe sueche si no immer

Gä und nä duet's neui Gsetz kurz zämmefasse
Duube deerfsch nüm Fueter gä sunscht kunnsch an d Kasse
Drfür machsch jetzt legal als Bättler hohli Hand
Drum freut's aim goht's wieder bärguff mit Baselland

Wo s im FCB-Holding-Verwaltigsroot
Um e Business-Management-Strategy goot
Fasst dr Odermatt si Laitgedangge zämme:
Bursche, i schloo voor, as mir jetzt aine nämme

Finde d Lüt e kulinarisch Wort aastössig
Isch Umdaufe wie bi Maitlibai als d Lösig
Do freut's mi sehr kasch bi dr SVP erkenne
As gly dr Grund entfallt zum d Röschti umbenenne

Git's vorem Pharmasondermüll ächt e Entrinne?
Dä Schyssdrägg schwimmt sogar im Hahneburger inne
Zum Glück git d Fasnacht do drey Dääg Sorglosigkait
In Eppesses het's drum niene Pharma wyt und brait

"D rosa Seekueh" heisst em -minu si Versuech
für e autobiographisch aaghuuchts Buech
I ha s nit glääse, drum ka ich do nur bekunde
I hoff as d Seekueh au e rächte Stier het gfunde

D Papeterie vo dr Miranda Jenny schliesst
Während dr Marco Denoth jetzt e Uszyt gniesst
Und d Susanne Brunner findet Sproochreglige dumm
Das no d Stadtnews fürs Telezüri-Publikum

Bim Meret Oppehaim-Bau und dr Erlematt
Wie au bim Bahnhofplatz frogsch di amme grad
Me wott as d Stadtbildkommission Yyfluss verliert
Jä het die bishär überhaupt je existiert?

Impressionen

von

Wanderratte

Steckbrief

Die Wanderratte ist eine schützenswerte Spezies. Ihre glänzenden Pointen und lustigen Helgen haben absoluten Seltenheitswert.
Comité-Bank seit 2013

Video

Verse

Y draag en usspändlets Staiketteli zem pfuuse,
und gang nie ooni Aluhuet voruuse.
Nimm jeede Morge siebe Schisslersalz,
e halbs Globuli und e Löffel Malz.
Vo mir us kenne jetz die Gselle,
d`Antenne uff 5G umstelle.

Dä Waggel-Daggel wird als Kultobjäggt
vo mir syt Joore ghäggt und pfläggt.
Au my Waggel-Elvis isch e Pracht,
wo in jeedere Kurve dr Hüftschwung macht.
Was y jetz no unbedingt wott ha,
isch e Merkelfigur wo zittere ka.

Die "Rosa Seekuh", wie kas au anderscht sy,
isch dr Titel vom minu synere Biografie.
Verfasst dr Wessels hingeege no syni Memoire,
git das e Buech ibers Parkplätzspaare,
mit em Titel: „Wie ich, sonscht so lieb,
ganz Basel in den Wahnsinn trieb.“

Das isch doch dr Brutschin? Ebbe gäll!
Dä het doch, dä isch doch, eh wart jetz schnäll.
Das isch doch dä Regierigsroot,
wo kirzlig gsait het das er goot.
Jetz wisse mers und wärdes nie vergässe,
är isch emool in dr Regierig gsässe.

Do liggt scho wider ain ime Gipskorsett,
wo d`Gfoore nit richtig ygschetzt het.
Är het dr Spalebärg durab voll gutzi gää,
und dänggt wenn er schwänggt es längt em allwää.
Aber dä Schwängg het dängg zem Brämse nit glängt.
Jetz het er sy E-Trottinett verschänggt.

Fir mi dien sich die Diskussione,
ume Vaterschaftsurlaub wirgglig loone.
Y miesst nie mee in Stolle, weisch wie gediige,
kennt s Lääbe gniesse und hindere liige.
Will myni Fraue, do gits nit z`kääre,
mindeschtens vier mool im Joor gebääre

Dr Roger brobiert, y kennt fascht wette,
sy Millionegage bi dr CS z`rette,
dr Greta nit an Kaare z`faare,
und sy guete Ruef z`bewaare,
in däm er e neyi Wärbig lanciert,
woner das nätte Maitli integriert.

Damit dr Greta iir Protäscht jetz nit verpufft,
wiene kurze droggene Furz in Luft.
Und will me jo weiss, dass genau die s`Klima kille,
han ich bi mir Dehaim im stille,
mit dr grosse Schäär wie vom Deyfel gritte,
my Furzkissi abenander gschnitte.

D`Partouille Suisse fliegt wiene Pfyyl,
statt iber Langebrugg iber Mümliswil.
Sy haige s`Ziel verfäält so em Pilot sy Bricht,
wägeme Vogelschwarm und dr schlächte Sicht.
Asso wenn de mi froogsch, ich glaub jo dass die liege,
die wän doch aifach nit ibers Baselbiet fliege.

Dr Johnson und dr Trump, dass sin die Baide,
wo sich kuum vonenander unterschaide.
Baidi hän dr Charakter vome Silberrugge,
und Baidi hän dr IQ vonere Mugge,
s hän au Baidi e bitz e Martullo-Figur,
nummen ain het die scheeneri Föhnfrisur.

Do gsesch wie sich alli ganz vergässe,
duur dä saftig Epfel frässe.
Das het d`SVP jo nit entziggt,
en Epfel go ässe wo me ganz frisch pfliggt.
Bi iine kunnt dä nämlig erscht uffe Disch,
wenn er richtig bruun worden isch.

Y ha mym Bueb hitt gsait, so goots nit wyter,
e Zwaier in Änglisch, dasch wirgglig schyter,
will nur mit Änglisch, Nundefahne!,
kunnsch im Lääbe neymenane.
Do rieft doch dä Siirmel ganz empeert:
„Du hesch no nie dr Ueli Muurer gheert!“

Impressionen

von