Schnitzelbank-Comité


Archiv
Alle anzeigen

Filter anpassen

Zum Archiv

Schnitzelbänke 2015

Rückblick

Anggewegglimaitli

Steckbrief

Hinter em Minschter hält das Comité Frauenpower feil. Mit herrlichen Anggeweggli-Versen des Anggewegglimeitli.
Comité-Bank seit 2008

Video

Verse

Die halbi Stadt wird gschlossen und gspeert,
Dass niemert der Kerry und Co. doo steert.
Der Morin maint hässig und gryydewyss:
„Fir mii macht niemert son e Gschyss.“

Dangg Apple, wo s mer offeriere,
Loss ych mini Aier jetz lo gfriere.
Und frai mi jetz scho insgehaim
Uff e Buscheli im Altershaim.

D Zircher entsorge dä sinnlos Graane,
An Limmat-Quai basst dä gar nit aane.
Bim Entfärne hänn d Basler greesseri Sorge:
Wo kennt me numme dä Wessels entsorge?

Wo d aaneluegsch isch Dichtestress,
So schimpft mi Maa, ych sag em kess:
Ych kaa dir hälfe, liebe Schatz,
Muesch nach Ziiri an Matsch, denn dert hesch Blatz.

My Bueb sait: „Das Rächne, aso das is doch ööd.
Und Srybe und Gsicht find ych mega blööd.
Ych wird Politiker und mach Konferänz,
Do muess i nyt wisse, do längt Kompetänz.“

E Bratteler Lehrere, d Frau Grässli,
Lauft disziblinaarisch in s Gläbbergässli.
Si het, und me het das regischtriert,
S Fach Friehfranzeesisch falsch interpretiert.

Armuet däät der Menschhait nutze,
Wohrschyynts duet äär au sälber butze.
Und vor de Fiess, so sait der Babbe,
Wäsch ych de Kardinääl no d Kabbe.

Das do isch, wie me ka gseh,
S Frauebad im Eglisee.
Jetz froog ych Sii, bi allne Gaischter:
Weeles isch der Bademaischter?

Der Badener Stapi Geri Miller,
Dä findet, si Kerper sygi e Kniller.
Är mailt syner Frindin: Liebschti, waisch,
Der Gaischt isch nur Bylaag, d Hauptsach isch s Flaisch.

I ha mi baadet und gschminggt, ha d Neegel laggiert,
I ha alles brobiert, sogar d Bai rasiert.
Bi zem Coiffeur, ha jetz blondi Hoor, nimm bruuni,
S het alls nyt gnutzt - är isch wägg - der George Clooney.

Impressionen

von

Blauaeugige

Video

Verse

Dr Jean Claude Juncker vo dr EU - loot sichs nit lo nää
dr Sommaruga bim Empfang e Schmutz uf d Bagge z gää.
Dasch alles was dr mitgää ka - mee duet nit dinne ligge,
de kasch wenn d wottsch au s Evelyne und s Doris zue mr schigge.

Mir hoffe d Unterfluer-Container wärde gly montiert,
mit dääne wär dr Nochbere – daas nämmli nit passiert.
Mit Loggewiggler, Gurggemassge - het sy in letschter Sekunde
dr Bebbysagg zum Trottoir brocht – sit denn isch sy verschwunde.

D Elifante griege in unsrem Zolli achtzig Fuetterstelle
wo sy s Rüsselspitzegfüül no mee entwiggle selle.
Die Aalag het no Potenzial - drum könnt me - s wär e Digge
dä gfüüllos Rüssler vo dr BaZ - zur Kuur dört aane schigge.

Die Z-zone in der Inne-st-stadt bringt scho ne Vo-vorteil mit
will s än – ändlig keini Au-auti me dört uf de Stro – osse git.
Wieso duesch du so staggele und machsch kei grade Satz?
Jä fa –faar emool im Ro-rollstuehl – ü –übere Münschter – platz.

No vor em Sääge seit dr Papscht und ziet derby e Lätsch
Es sig nit schlimm me gäb de Kinder mängmool Fuudidätsch
Me muess nur iiri Würde achte – do seit e Prieschter schlau
e Glapf uf s Fuudi isch nüt Bööses – das mache mir jo au.

Dr Shaqiri het zu Inter gwäggslet – d Lüt sin vonem bsässe
dr Zauberzwärg isch froo – jetz muess är nümmi Wysswürscht ässe.
Jetz isch die Bängglizyt verby – meinsch er duet s no raffe?
De Glaine droot me nämlig dört: Wenn d grooss bisch muesch go schaffe.

Dr Didier isch unsre Schwyzer - Schwyzer vo däm Joor
dä macht denn punggto Eleganz - im Ueli öbbis vor
denn wenn dr Ueli lache duet und zeigt derby s Gebiss
no griege syni Taigerli vor luter Schiss e Riss.

Dr Baaselbieterstab isch no de Waale nümmi root
s soziale Gwüsse vo de Rammel - isch so guet wie doot
es het jo scho dr Gotthälf gwüsst, dass dene arme Seele
wo numme s Gäld im Zäntrum hei - halt dr Geischt duet feele.

Karriere mache und Mami sy – egg freezing isch hüt cool
d Eili wärde abekielt – denn gosch zum Soomepool
d Eili ufdaut und befruchtet - duesch se spööter pflanze
Jä - wenn i dääwääg s Kind ufkläär - git d Frau mir uf e Ranze!

E Künstlerteam weiss nit wo aane sy mit däm Kraane selle
und dien dä Hochseehaafekraam - als Kunscht in d Limmat stelle
d Idee die hän sy z Basel gsee - wo me e Schiff belaadet
und wo dä kippt, hän d Zürcher gwüsst, wie gärn e Kraane baadet.

E Studie vo dr ETH seit - Kieh wo Glogge draage
hän Wee am Oor, am Gmiet, am Uter und in jedem Maage.
Es git e Chip wo hälfe ka – sogar sich z Orientiere
Dä könnt me doch zum Teschte zerscht - im Wessels implantiere.

Mir dien mitnander Zmorge dringge – s het grad afo daage
Do ghört me aine lut und dütlig: „Charlie heb do!“ saage.
Los e Demo, mir sause uuse – s isch zwor Ändi Jänner
doch uf em Trottoir stöön nur Mööbel und zwei Zügelmänner.

Wo mir bi eim e Blagette kaufe - dängge mir - oh je!
Dä Schublaadeduurm als Arbetsplatz - duet aim richtig wee!
Stell dr nur das Chaos vor - wie das z Oobe wäri,
wenn d Schublaade usgläärt wärde – und de wottsch uf d Fääri.

Im Kindsgi leert me s Lääbe kenne – vo de Tier im Wald
d Spuure wo me gseet bim Flüchte - wenn e Büggse knallt,
was si frässe, was si pigge, Greesli, Müüs und Körnli
do mäldet sich dr Fritzli – aber d Reh die frässe s Hörnli.

E Herr spilt mit ere Dame ame Fescht e gschpässig Schach
beidi stöön no drey-vier Züüg - gwagglig doo und schwach
die wyyssi Dame goot k.o. – dr schwarz König findets glatt
und die wo gschpilt hän mitenand - sin beidi jetz schachmatt.

Impressionen

von

Doggter FMH

Steckbrief

Aaaah jä: Das ist unser Doggter FMH und seine Schwester Gundula. Wo er auftritt ist das Wartezimmer meistens borzig voll.
Comité-Bank seit 2005

Video

Verse

Si, in mynere Praxis, jo das isch s Dumme,
het my Gundula für e sälbschtändigs
Baselbiet gschtumme. Und sithär
isch si bim operiere so komisch druff –

was ich zämmenai – trennt die wiider uff!

Zem d Patiänte schoone –
hämmer in dr letschte Nacht
bime Blinddarm e
Rysverschluss yne gmacht!

Si, ich ha dr Sexualtriib vo
männligge Schimpanse mit
em Geri Müller vergliche –
im Grosse und Ganze.

Si, und vom
Resultat här, jo do
bini baff dr
Verhaltensgstöörti
isch nit dr Aff!

Und grad vori
schiggt mir dä
Schimpans e
Selfie – vo sim
Affeschwanz!

Si, dr Ueli Muurer hoggt zmitts imme
Kärnreaggter
– jo das glaube si nit
als Schutz nimmt er nur sini
Jodtablette mit.
Dört sitzt är jetz und wartet uf
die näggschte Wahle und
duet friedlich vor sich aane
strahle!

und mit dene
Jodtablette das
sag ich Ihne
Entkalch ich im
Doggter si
Kaffimaschine

Si, alli Karriere-Fraue könne
ihri Eizälle hüt zoobe do in
mym Yyskaschte für spöter
yygfriere lo.
Au mynere
Ordensschweschter ihri
lagere ganz ellai im
Kloschterkäller z Mariastai!

Dört liige si
geduldig und
sin barat und
warte uf d
Uffhebig vom
Zöllibat

Si, dä Komet Tschuri hän si
durchlüüchtet vo oobe bis unde Jä
soone sältene Stai heige si no gar
nie gfunde.
Ych ha im Pschyrembel noochegluegt
uf Syte fünfhundertzwei si, dasch ganz
e gwöhnliche Gallestai!

Si, ych ha gmeint das Kürzel O S Z E
stoht für ORGAN SPÄNDE ZENTRUM
EGLISEE.
Drby kamme doch d Organ
– ich wills euch huuche vo
de meischte Politigger
überhaupt nit bruuche!

Si, hän si das mit em Hampe Wessels
au mit bikoo?
Dä het sich bim erscht Beschte sy
Huftglängg operiere lo. E
Zwaitmainig vo mir zaigt allefalls –
die grösseri Baustell wär ooben am
Hals!

Won ych dä Kopf
untersuech stell y
fescht e Hohlruumbehandlig
wär do s Bescht!

Si, d Fifa duet bi dr Novartis reklamiere
denn die wänn s Vitamerfen nümm produziere.
Mit däre Salbi hän si halt joorelang – unbeiirt
e mängge Delegierte-Arsch gsalbt und gschmiirt!

Si, e Patiänt klaagt über
Blaaige und starggem Wind,
jä under däm lyydi är scho sit
als Kind.
In Moskau gits e Spezialischt saag
ych däm kurz und knapp Jä dä stellt
dir denn s Gas scho ab!

D Frau
Leuthardt
angaschiert dä gli Die
macht us
jedem Furz
Energie

Si, d Conchita Wurscht
liggt bi mir uf em Schrage
und duet über ihre üppige
Damebart klage.
Wo sy mir denn no d’Aggslehoor zeigt
kumm i richtig in Stress die het dört e
Sytescheitel wie dr Gilbert Gress!

Doggter FMH. ... e Notfall, jä Si saage
ych kumm sofort mit mym Granggewaage.
Si dr Sepp Blatter isch hüt zoobe
zwüsche Säggs und Siibe am FIFA -
Sässel glääbe bliibe!

Impressionen

von

Dootebainli

Video

Verse

Im Himmel isch ai Gstiirm, d Ängel sinn empeert
So gieng das nit, me fiel sich bi dr Aarbed gsteert
Dr Udo gieng no – doch jetz miess me proteschtiere:
Im Ängelkoor kaasch kai Joe Cocker integriere!

D BLT will falschi Mainige berainige
Es steer si nit, dass doo zwai Männer sich verainige
Was si draa gruust und si nit kenne akzeptiere:
As e Baaselbieter und e Baasler fusioniere.

Dr Jeb Bush, dä mecht als Breesi kandidiere
Mir finde s digg und dien em sofoort grateliere
Und hoffe fescht, är gwinn, denn wenn im das wuurd glinge
Kennte mir alli alte Bush-Väärs wider singe.

Vo dääre gränzeloose Faart het är vernoo
Sythäär stiirmt dr Maxli: «Deerf i au mol goo?»
Dernoo maint är entdischt: «Was isch so toll do draa?
Die 8i-Baan uf Weil het gar kai Looping ghaa!»

Es kunnt e Infoblatt, das Jod däät gar nyt bringe
Und s dieg mit Jod nit emool s Joodle besser glinge
Dä Brief dä isch vo Greenpeace, mergge miir scho glyy
Wil so gscheit kaa jo e Bundesamt nit syy.

Facebook und Twitter dien uns Vier fuurchbaar fruschtriere
Au Instagram und Whatsapp dien nit funggzioniere
Mir finde uns so wiescht und Likes git s kaini mee
Uf jedem Selfie kaasch drum nur dr Schnaabel gsee!

S foot in dr Adria e Fääri afo brenne
Aaber im Meer do kaasch nit um di Lääbe renne
Me rettet alli mit vyyl Yysatz und vyyl Muet
Vor Lampedusa glappt das laider nit so guet.

Dass d Innestadt jetz autofrei isch dien mir schetze
Au wenn d Liiferante männgisch bitz mien hetze
Jetz wo d Lyt nimm ummesteen mit iirem Kaare
Kaa me uf de E-Bikes ändlig Vollgas faare.

Dr Ueli maint, die Sach mit dääne Menscherächt
Dieg uns yyschrängge, syyg am Änd fir d Schwyz doch schlächt
Derbyy vergisst är ebbis Wichtigs: Dass jo äär
Ooni Menscherächt fir uns glyy Freiwild wäär.

D Roche die het dä gruusig Duurm bald feertig baut
Mit em ne zwaite wiird denn d Stadt no mee versaut
Was uns dreeschtet, fallt dr Schatte als ins Zimmer:
Eso Twin Towers – die steen nit fir immer!

Dr Kalif schimpft mit syne IS Terrorischte:
«E fromme Moslem hoggt nit vor dr Flimmerkischte!»
Denn sait är: «D Uusnaam isch ‹Die Schweizer› vo letscht Joor:
D Männer hänn Bäärt und Fraue kemme kaini voor.»

Dr Thomas Borer hilft, wil im das schyynts no liggt
As me dr Chapurow uf Kasachstan zrugg schiggt
Doch mir gänn dä nit, au wenn die das gärn wänn
Dasch dr letscht Duurischt wo mir drotz Frangge hänn!

Unsre Frind Charles François us em Sündgöiland
Het Angscht vor Islamischte, s raubt em dr Verstand
Mir hänn em drum am Kebab-Stand, es duet is laid
Schnäll dr Döner gää und «Charlie, heb do!» gsait.

Mir hänn jetz Diirggisch gleert, dien d Zytig scho studiere
Mir mechte uns drum z Baasel besser integriere
Doch s Beschte isch, kasch di bi «Hürriyet» druf verloo:
Dert wiird nie dr Somm als Chefredaggter koo.

Ebola und Boko Haram-Fanatischte
Ukraine, Syrie und Islamischte
Uf dääre Wält git s nur no Hunger, Eeländ,
Doot Was hilft dergeege – mir brobiere s mol mit Jod!

RÄSCHT:
«Mir wei luege», saage d Baaselbieter Gselle
Nur fir d Fusion, do hänn si nit mool luege welle
Was «mir wei luege» haisst, kaasch bim Theater gsee:
«Mir wei zwoor luege – aber mir wei nüt dra gee!»

Boko Haram, die schleen meegligscht bluetig dryy
Dr IS mecht Määrtfierer fir Märtyyrer syy
D Al-Kaida bombt – do längts em Allah, är duet twittere:
«Looset Lyt! Suu nit! So mien mer Schiitere!»

Dr Achter faart uf Weil – nur maischtens nit rächtzyttig
Do het grieni Gränze e neii Bidyttig
Au d Bolizey frait das, wo si das ändlig raffe:
S isch billiger per Dram als per Fluugi uszschaffe.

Was isch das Ecopop? E Recycling-Kondom?
Isch es Popmuusig – gmacht mit Öko-Strom?
Het s amänd ebbis mit Bio-Popcorn z due?
Uns isch es fremd, und drum saage mir nai drzue.

Dr Shakiri het vo Bayern wägg goo welle
Het gsait: «Ich such jetz ändligg eine Vollzeitstelle!»
Aaber wenn d gseesch zu weelem Club är wäggslet: Schlimm!
Kai Wunder spiilt dä deert au nuur ad interim!

Impressionen

von

Dreydaagsfliege

Steckbrief

Diese Gruppe ist eine Augenweide und eine Ohrenweide. Bemerkenswert sind auch die raffinierten Helge in Fliegeschissli-Technik.
Comité-Bank seit 2011

Video

Verse

Für en Irokeseschnitt do bruucht e Coiffeur Stunde
Bim Thiel do isch es nid so schwäär, do goots e paar Sekunde
Will sälli Hoor sinn zäämool gscheiter als dä Gaischteszwärg
Bim Blödsinn wo dää uuselosst stöön die vo sälber z'Bärg.

Jetz isch die bruuni Subbe z Dytschland wider füüre ko
"Wir sind das Volk" skandiere si - jä goots denn dääne no?
Loosed iir Pegida-Debbe gönd grad wiider hai
wär Volk isch und wär nid bestimmt dr Blocher ganz ellai.

Dr Geri Müller kunnt derhär grad wien-e ungmacht Bett
Do froggt me sich was iin zue dääne Selfies gritte het.
I main - dass är e Würschtli isch, das isch nüt Unbekannts
Und dass är au e Würschtli het, das intressiert kai Schwanz.

Mi Noochber isch e Muslim und är het mi noonig köpft
Derby bin-ych vor luter Hyschterie scho ganz erschöpft
Ych waiss doch us de Medie ganz genau was Allah wott
Ych glaub dä glaubt nid was mir glaube dass är glaube sott.

Dr Mensch dä stammt vom Aff ab, stoot bim Darwin kurz und knabb
bim Muurer isch es umgekeert: dä stammt vo Mensche ab
Wenn är dehaim in Spiegel luegt no sait er goppfridstutz
Für mi bruuchts kaini Menscherächt – do längt dr Arteschutz

Mir hänn so Jod-Dablette kriegt, sinn danggbar und beriert
Mir wänn au nid dra zwiifle dass es nutzt und funggtioniert
Fliegt en AKW in d Luft, duets brenne und duets broodle
No könne mir dangg dääne alli non-e letscht Mool jod-le.

Mir sinn im Achter gsässe - das isch doch gar nid woor
Mir sinn im Achter gstande - s kunnt mer nid vyyl woorer voor
Mir hänn in Achter yyne welle, aber s'isch esoo
mir woone im Neubad - und do isch gar kai Achter koo.

Das do isch e Maade und das nääbedraa dr Spägg
die Maade frisst sich fätt im Spägg dasch iire Lääbenszwägg
vo Morge frie bis z Oobe spoot es isch e Katastroofe
und z Nacht do gropplet si denn haim ins Baselbiet go schloofe.

Die Wicht do brichte gwichtig me miess Basel jetzt verdichte
No richte si so Dürm uff wo das Stadtbild schlicht vernichte
Lueg ych die Regierig aa, no isch mi Bricht ganz schlicht
do kasch verdichte wie de witt - die sinn nid ganz dicht.

En Euro wo im freie Fall e Rubel droffe het
Het em gsait wenn mir scho gheie, gheie mir um d Wett
Und immer schnäller immer schnäller gheie si wie gschbunne
Und wär zerscht unter Null isch vo de beide – dä het gwunne.

Impressionen

von

Dräggspatze

Steckbrief

Zwei freche Vögel mit rollenden Augen. Was sie während dem Jahr so aufpicken, werfen sie an der Fasnacht als geballte Ladung zurück ins Publikum.
Comité-Bank seit 2015

Video

Verse

uus Angst vor de Döggter wott mi Bueb kaine gseeh
ins Bruederholz goht är gärn – well dört hets kaini meh

Gege obe zue, wo dr Turm sich verängt
Het wägä dä Pole s’Gäld nimme glängt

dr zwait Turm söll no höcher uffe wos luftet
dört störts denn kain, wenns in Prattele duftet

Tradition het in Basel dUnterfluurmedode
wel dIndustrie keit dr Drägg jo syt jehär in Bode

dBängger wänn unbeirrt wyterprasse
und wäggsle ins Management vo de Krankekasse

Dr Weber ka nüd derfür, dass er Schyssdrägg spuggt
Er het aifach zviel Wasser im Hallebad gschluggt

dSubventione fürs Theater find i kuul und less
sisch jewils än Obe - ohni Dichtestress

Gits ä Turm fürs Spital?– d’Wahl à Bâle isch ä Qual
s‘isch egal, well’s Spital het allemal kai Personal

Bym Müller und dr Gauglere hets im letschte Johr polteret
Er isch übers Bed – sie übers Breakfast gschtolperet

dass dHomos sich nid vermehre, duet die fromme Bischöf steere
so Nochwugs isch hald sehr e grossi Freud für gwissi Heerre

Social Freezing statt Gebäre isch, was mängi Frau wet
- bis me dKindschutzbehörde wieder abgschafft het

In dWüeschti goht dr Gaugin – zrugg blibt fruschtriert dr Morin
Für Basel wärs, so dänk i numme, allwä besser anders umme

Als Konzession an dGescht schaffe under dr Wuche
Im Eglisee-Fraueli nur no Eunuche

Liebe Franz, du hesch rächt, so sage dSaudi
Au by uns heissts ganz streng: wenn d’nid folgsch, so verhau di

Wenn dMählsuppe ufstosst, slärmt und druggt rund um d‘Uhr
sag ich zue mim Spatz: dasch jetz Wält

Impressionen

von

Fäärimaa

Steckbrief

Der Fäärimaa ist eine absolute Institution. Er ist auf unserem Fluss genau so wenig wegzudenken wie in unserer Bänkler-Landschaft.
Comité-Bank seit 1998

Video

Verse

Dää Unfall mit dr Merlin hett Näärve koschtet
und koschtet, will das Schiff jetz nur no roschtet
denn löön mirs halt roschte – es bruucht niemerts wo s pfläggt
irgendwenn wirds für Züüry e Kunschtobjäggt

Uss em Helikopter, während der OSZE
hänn s d Beobachter schöön vo oobe gseh
doo wird am hälliechte Daag, am halber Drey
in dr Oetlingerstrooss e Parggblatz frey

Dää Maa doo mit Bart, dää drait zwar e Röggli
aber, waisch glyych nit, isch es jetz e Gaissli oder e Böggli
me könnts au als Kueh oder als Hoornochs fiehre
das isch jo gar nit so aifach: Flaisch degglariere!

Dr Herr Gaugler bringt – will sie jetz d Zytt derzue hett
synere Frau am Moorge ihr breakfast ans Bett
es isch die ainzygy Hoffnyg, wo s doo no gitt
wenn sie schlooft oder isst, denn liiiegt sie nit!

Dr Moond, me gseehts bi klaare Nächt
verzichtet uff sys Gwoonhaitsrächt
sunscht kunnt äär bi däm Roche-Duurm, obwohl no schreeg
mit synere Umlaufbahn ins Gheeg

Mir kaufe yy in Dütschland – es regiert dr Gyzz
Weil am Rhein zellt jetz zur Schwyz
mir dien die Lääde z Basel laid, dasch glaar
zum Byschpil ALDI, LIDL oder SPAR

Sie sinn in dr zwaite Liga uff em nüünte Blatz
es bällt e Hund uff dr Hauptschtrooss und es miaut e Katz
im Summer kunnt dr Zirkus – doo lauft jo allerhand
in dr Kantoonshauptstadt vo Baselland

Sie sinn in dr Super League uff em eerschte Blatz
es bällt e Hund in dr Staine, am Spalebäärg miaut e Katz
uff em Määrtblatz spiele Kinder, zwai oder drey
Basel isch jetz autofrei

Dr Geri Müller, als ain vo de Nättere
präsentiert sich im Tschätt ere Tschättere
und die Tschättere fangt sofort aa wittere
dää wird no zittere wägem tschätte mit ere

Wieso lüüchtet myny Blaggedde e soo schöön und häll?
Sie fungglet sogaar, aber doch nit z gräll!
Und Ihry dernääbe wirggt aifach düschterer
Jää, mymy isch vom Bahnhof, vo mym Blaggeddeflüschterer

Sie kenne wohrschyynlig das Verfahre
zum e Schulterbroote niedergaare
dr Versuech am Mensch isch absehbar
an dr Fuessball-WM in Katar

Impressionen

von

Gasladärne

Steckbrief

Eine Gasladärne ist vielleicht nicht CO2 neutral. Dafür erhellt sie Jahr für Jahr unzählige Gesichter in bummsvollen Beizen.
Comité-Bank seit 1977

Video

Verse

Das mit däm Fuessballspray, das isch fir uns e Sääge
und kunnt fir uns in däm Johr gopfergässe glääge.
Mir hänn 3 Neji und die wisse jetzt eso
wo si bi jeedem Ufdritt gnau mien aanestoo.

Der Gille Buser bstellt e Pizza vis a vis
Und hofft der Pizzaboy - bring em die denn gly.
Dä kämpft sich fluechend über Dächer und dur Käller.
Wenn die Minischter furt sinn, gohts denn wider schnäller.

Me will jetzt z Basel ai Turm noonem andere baue.
Jä duet das unser Stadtbild nid e bitz versaue?
Der erschti Voorbehalt dä kunnt denn vom Tattoo:
Löhnd ys no e Schneise frei für d Dante Ju!

D Mannschaft vom FCB isch multinational
Der Georg Heitz kauft was är ka und überall.
Nur em Streller will das nid so richtig passe.
Wells däwääg nümm vyl het wo mit ihm könne jasse.

Unsri Frau Wänger wo scho über 90 isch
stoot wie verstaineret dehaim am Kuchidisch.
Was isch passiert as si e därewääg verschriggt?
Der Geri Müller het ere grad e Selfie gschiggt.

Die baide Ghaimnisdräger kemme bees ins zittere.
Denn dä Schwoob duet jetzt sy grossi Chance wittere.
Aer het vom CIA e haisse Tip bikoo
Är soll d Conchita Wurst e paar Stund singe loo.

Dä Basler Groossroot isch denn ganz e gscheite Maa,
är mecht die Zircher Sexbox au in Basel haa.
So kennte d Schuele sich dä Spiilzygkoffer spaare
und zem Unterricht diräggt deert aane faare.

Der Seppli Blatter sait: Jetzt hanis doch no gschafft,
as my Fifa nid no usenander klafft.
Jetzt mach i wytter so wie bishär unbeirrt
Und soll mer kain me bhaupte s laufi nid wie gschmiirt.

Dä neji Achter kam e gar nid wirgglig loobe,
denn wäg de Sitzbängg duet e harte Kampf deert toobe.
Aber nid well alli sich um d Sitzplätz rysse
s wänn alli stoo us Angscht sy fange no e Sprysse.

Zum Häftling Hoeness sait ganz lieb der Herr Diräggter
S Büffee isch heerlig, aber d Huusbar isch no pfläggter.
Der Pool isch ghaizt und s git e Himmelbett zem pfuuse.
Und mit däm Schlissel – wenns ne stinggt – kemme si uuse.

Impressionen

von

Hansli Bargäld

Steckbrief

Wenn Hansli Bargäld den Saloon betritt, schweigt das Piano und es sinken die erhobenen Fäuste. Seine Schüsse ins Schwarze sorgen für rhythmischen Beifall.
Comité-Bank seit 2014

Video

Verse

Das isch grad e Selfie, vo mir in voller Pracht,
das schiggi jetzt dr Tiffy, lueg, wie die scho lacht,
und s'nägschti ooni Hose, das isch doch was ihr wänd,
do bin i grad derby und wird Stapi no am Änd.

Dr Geri macht e Selfie, isch sini Ämter los.
Als Stapi macht är wyter, zwar völlig wirkigslos.
Ych han en denne treeschtet und flischtre ihm ins Oor:
„Das muess di nid betrüebe, Dr Morin isch das scho 6 Joor!“

I ha mi wyterbildet, my Niveau, isch jetzt hoch.
Ka wild Geschtikuliere, in jedre Landessprooch.
S‘ Diplom in Dreete spiele, das isch fyr mi kai Sach.
Denn hani alles zämme und ka zur DARU-WACH.

Letschti in dr Stadt, do frogt my ain vom Daig,
ob’s in däm Ussegheeg, au Nase-Affe haig.
„Nai, sag ych em frindlig, die git’s do niene mee.
Do ka me nur die Affe, vo dr OSZE gseh.“

Apropos däm Gipfel, je, was han ych glacht.
D'Armee haagt Basel yy, quasi übernacht.
Dä Yysatz muess me lobe, ihr hännd unsre Dangg verdient,
dass ihr ys vo däm Zirkus so guet beschitze dient!

Wo sie dr Merlin drille, wott's nid vorwärts go.
Dr Krane, dä blybt stegge, und kaine weiss wiso.
E Ingenieur meint simpel: "Es muess meh Ufftrieb gää!"
Y root em, nimm dr Wessels. Däm sy Hoolruum längt fir 10.

Dä Gipfel goot no wyter, mit menschelääre Tram.
Militär an jedem Egge, mir wird Angscht und Bang.
Droone dreene ständig. I gspyyr e grossi Gfoor,
Stellt me sich so dr Friede Fir ganz Europa vor!?!

Uff em Märtblatz ussre Doole, winggt e Menschehand.
AHA!-OSZE sait, mir mi Sachverstand.
Do brummlets unde uffe, „Vo OSZE kai Spuur!
Mir sin d‘Kehrichtabfuur Baselund yiebe Unterfluur!“

Unsri Basler Fasnacht wird UNESCO-Wältkultur!
Dr Kienbäse wird‘s nid, mei, sy d‘Rammel suur!
Si schryybe dr UNESCO: „Jetzt düend doch nid so stuuuur."
Nai, kunnt d‘Anwort drogge: "Sogar dr Böög hät mee Kultur!“

In Ziri stoot e Krane, das finde d‘Zircher toll.
Passt dä deert wirglig ane? I weiss nid was das soll!
Fir dä roschtig Huffe, hett me viill Gäld verprasst
Isch das jetzt Kunschtverständnis? Fir Ziri? -Jo das passt!

Das isch e „Blind- Audition“, ihr looset numme zue
schliessed euri Auge, und bewaared d’Rueh
wenn Dir mi jetzt no „Vouted“, wär das e grosses Gschängg
Y wär e rundi wyter in „The Voice of Schnitzelbäängg“

Mit Blamiere isch jetzt fertig, ich sag Eych s’git e Fescht,
Mir mache nämmlig mit, am European Song Contescht
Erfolg muess ändlig ane, mir stille Eych dä Durscht
Ych mach Eych schnäll e Liedli, - und är d’Conchita Wurscht

Impressionen

von

Hanslimaa

Steckbrief

Ein Urgestein des Basler Schnitzelbanks. Während über 40 Jahren prägte er mit seinen unvergesslichen Auftritten die Basler Fasnacht.
Comité-Bank seit 1979

Video

Verse

Sii, ych find die Idee sauglatt,
die Blakat mit de Blutte in dr ganze Stadt.
Ych due mii jetz aute als Hanslimaa,
dä uff em Helge bin yych – ooni Gosdym aa!

S isch alles verbotte, darfsch joo nyt me saage,
duesch d Wooret verzelle, no goots dr an Graage.
iiberall gits Lämbbe, das wird eerscht wiider guet,
wenn dr Andreas Thiel dr Schawinski hyyrote duet!

Chapeau Bundesroot – my Komplimänt,
fir die Wyyberquote vo 30 Brozänt,
Simonetta - Doris - Eveline - darf y bitte,
aini muess goo – denn d Quoten isch iiberschritte !

Blau - sait dr Stadtblaaner - isch d Begägnigszoone,
im gääle Dail - sait dr Stadtblaaner - darfsch nimme woone,
grien - sait dr Stadtblaaner – do faarts Dramm - dasch geil,
und yykaufe - sait dr Stadtblaaner – muesch jetz in Weil!

Unseri hailig Doris National,
Isch als Atom-Graftwärgg-Tööter emotional
yyfersichtig uff d Simonetta, si het nur no ai Zyyl uff Äärde,
Si will au emool - vom Jean-Claude Juncker bisse wärde!

D Wätterfee sait lyycht erblaicht,
im letschde Summer hets nur gsaicht
und noch em Saiche – ischs no ko schiffe,
das het – dr Geri Müller jetz au begriffe!

Drei Mercedes fir Burkhalter, Berset und Muurer,
und e Tesla fir d Leuthard – do wird y no suurer.
S macht my schissig, wie die us iire Karosse gaffe
Und ych muess morn - mit em Rollbrätt go schaffe!

Sii ych hau ab – ych verreis uff d Seychelle,
go Kokosnüss jagen und Banane schelle.
Dasch dr ainzig Ort uff dr Wält per see,
won y dä gschisse Roche-Durm nit muess gsee!

Y waiss nid worum und y waiss au nid wiesoo,
yych jeede Daag d BAZ due gratis bikoo?
Aber ains waiss y sicher - liebi BAZ-Genosse,
Was nyt Wärt isch - wird aim nochegschosse!

Dr Brady Dougan het in New York gschwoore,
er haig nur bschissen und kai Gäld verloore7
und dr Thomas Jordan schwört er haig nur dr Frangge rette welle,
jetz hau ys wirgglig sofort ab uff d Seychelle!

Impressionen

von

Heiri

Steckbrief

Jo, jo, jo - diesen Baselbieter haben alle Städter schon lange ins Herz geschlossen. Grund: Er ist einfach ein geiler Siech.
Comité-Bank seit 2006

Video

Verse

Liebi Bebbi, ich stand drzue. Y due mi nid geniere.
Au ich ha doozmol näi gschtimmt, näi zum Fusioniere.
Dr miesset s nid persöönlig neh, ich würd euch jo scho welle,
aber erscht, wenn y mi Traktor darf vor s Drei Köönig stelle.

S Baaselbiet isch äigeständig, mir bruuche Baasel nid.
Erscht rächt nid, sit s in Lieschtel en Intercityhaltstell git.
Au zum Boschte bruuchsch Baasel nümm. Läck mir, dasch megagäil!
Mir stiige z Prattele in e Dram und shope denn in Weil.

D Conchita chönnt vo dr Landschaft syy, jo das isch s Verruckte.
Die het prezyys dr glyychi Baart wie mis Groosi z Buckte.
Und überhaupt, das Fröiläin Wurscht het eus nid irritiert.
Mir wärde doo im Baaselbiet scho lang vo Würscht regiert.

Wäg däm dottlige Fahrverbot gang ich im Roothuus verbyy.
Y schrei dr Wessels wietig aa: Loo dä Schyssdräck ändlig syy!
Dr Hampe Wessels lächlet mild: Ich gniess mini Innestadtfahrte.
Ich ha wie alli Kolleege doo e Behindertezuefahrtscharte.

My Hoofhund dä legt Äier. Dä Chüe han y bälle glehrt.
Myni Hiener duen y mälche, mänggisch mach is umgekehrt.
My Frau säit däm e Huerepuff. Das häig si no nie erläbt.
Ich säg däm wie dr Paolo Sousa: Rotationskonzäpt.

Ich find d Johreszyte toll, y gniess se richtig intensiv.
Nur dr Herbscht macht mi als truurig, wäisch so richtig depressiv.
Sit letscht Joor isch es nümm esoo, ych ha im Herbscht e Vortäil gfunde.
Het s am Moorge dichte Nääbel, isch dr Roche-Turm – schwupp – verschwunde.

Vo Medizin verstand y nüt, dasch gar nid my Materie.
Y weiss grad knapp: S git Veene und eebefalls Arterie.
D Fraue häi glaub Ovarie. Bim Maa wäiss y s Fremdwoort nid.
Aber dank däm Müller wäiss au ich, dass es Geritalie git.

Wäg em OSZE-Theater lüt ich em Burkhalter aa.
Du chasch für en anders Mool sehr gäärn mi alte Chuestall haa.
Y chönnt für all die wichtige Lüt zum Znacht e Fondue mache
und my Hoofhund würd die Bandi zum halbe Bryys bewache.

Y ha bi dr Schwiizer Nati e Bewäärbig deponiert.
Mä schrybt mr: Sorry, Heiri näi, du bisch nid tätowiert,
hesch käi Baart, bisch schlächt rasiert, bisch moodisch totaal zruggbliibe.
E Chance hättisch höggschtens ghaa, hättsch mit Heiritsch unterschriibe.

D Tamara Wernli schrybt in d BAZ, es syg geg iire Wille,
dass me blutti Brüscht dieg gseh, wenn d Fraue dusse stille.
Vo Milch verstand y wirklich vill, loos Schätzeli Tamara:
Dy Räihefolg isch lätz, vor em Stille muesch e Maa haa.

Dr Hampe Wessels het mr gschriibe: Dy Traktor het Fahrverbot,
well niemer in dr Innestadt Motoreläärme wott.
Hampeli, du Schryybdischdääter, bi mir hesch du dii giirt.
My Motor isch grüschloos, dä wird vom Seppi Blatter gschmiirt.

Letschti schwätz y mit eme Schwoob bim Rhybaadhüüsli unde.
Är säit, är sygi integriert, häigi doo sy Häimet gfunde.
Dank em Roche-Turm fänd das eebefalls syyni liebi Frau.
Die chiem drum us dr DDR, dört gäb s au Plattebau.

D Medie mache us jedem Säich e Riisesensation.
Wär intressiert scho das Jointli vo däm Ueli-Murer-Sohn?
Ganz ehrlig, y ha dä Jüngling vo Aafang aa begriffe.
Hesch du dr Ueli zum Vater, hesch wirklig Grund zum Kiffe.

D Sibel Arslan het in Lieschtel e Stell welle übernee.
Dasch e linggi Türkin mit Schulde, empöört sich d SVP.
Dr Isaac Reber loot se gheie, er hofft, daas wäärd iim nutze.
Die sell doch bi dr Gauglere goo s Bed and Breakfast butze.

Dass d Karrierefraue scho bald Äizälle döörfe gfriere,
cha doch e modärne Landwirt käi bizzli irritiere.
Ich due scho lang dr Soomebank im Internet vertraue.
E so gseh sy doch myni Chüe scho lang Karrierefraue.

D BVB het en Egge ab mit däm Taktfahrplan zum Hieber.
Die beföördere im Minutetakt schnäbbli-gäili Wyyber.
Die chaufe Rindsfilet und Kaviaar, Chalbslääbere und Niere.
Z Baasel chasch fürs glyyche Gäld dy Töff e Stund parkiere.

Chönnt ich entschäide verdelli, gäbt s e Rolator für e Strelli.
Dr Yoichiro Kakitani, dä schickt y neume anders aani
und au dr Taulant Xhaka däät ich ins Usland verhaka.
Däm Giovanni Sio sääg ich ohni Druur aadio.
Au eusem Phillipp Dääge würd ich aadie sääge.
Ich miechti gaar käi Buff, y verchaufti au dr Zuffi.
Dört hinde, glaub mers, spaar y mit Freud dr Berang Safari.
Miechte die äi Franke füüri, gäbt y dr Gashi GC-Züüri.
Au ohni Davide Calla würd mir dr FCB gfalla.
Aber niä im Lääbe würd y dr Embolo goo loo!

Impressionen

von

Penetrante

Steckbrief

Auffallende Kostüme, spitze Nasen und kräftige Stimmen. Mit wohltuender Penetranz singen die Penetranten über Gott und die Welt.
Comité-Bank seit 1997

Video

Verse

An der Synoode vo de Bischöff z Rom im Dom,
erkläärt e Fachmaa dääne Heere e Kondom.
Do froggt e Erzbischoff und kratzt sich bitz im Schritt,
„Aber gäll, so unter uns bruucht s das jo nit?“

Der Berset froggt im Apple Shop ob sii das miechte,
me sott das Selfie doo vom Bundesroot beliechte.
„Ich ka das mache“, sait dä Maa und lächlet mild,
„denn sinn Sii häller druff, doch drotzdäm nit im Bild“.

Der Geri Müller het nit wirgglig grosses Gligg,
mit dämm Bild vo sim vermaintlig beschte Stigg.
Sii het s verlangt und äär het s gschiggt, dää armi Dropf.
Nur sii het gmaint, sis beschte Stigg das sig der Kopf.

FU haisst „fuck you“, MKS, „hey mach kein Scheiss“.
WDMW, „wo dini Mueter woont ich waiss“.
Wenn die zu uns denn saage, „Hey Mann was du wotsch?“,
do saage mir LDDD, „leer Ditsch du Dotsch!“

Der David Dääge duet s jetz nei in d Wiirtschaft driibe.
Äär will in s Mänätschmänt, sobald äär das ka schriibe.
Nur no der Philipp uff em Fäld, der David nimm,
sythäär isch Fuessball luege nur no halb so schlimm.

Ain vo de Mischtstogg-Rueche z Höllschte sait, „Dasch glatt!
Mir geue wiiterhii a d Fasnacht i der Stadt
und als Geegelaischtig, s Holz isch zwoor saudüür,
mache mir denn uff der Pfalz es Höhefüür“.

Mit dämm Haafegraan hänn d Ziircher s Niveau ghoobe.
Jetzt isch es wiider ebbe glyych wie bi de Schwoobe.
Jetzt isch er wägg, derbi hänn mir doch wirgligg dänggt,
der Böög dää wird, anstatt verbrennt, deert dra erhänggt.

Mit em Dääge Phillip sinn mir ains go dringge.
Mir hänn glii gschmeggt, dass dää so zimmlig fescht duet schtingge.
Äär duschi nimmi noo de Mätsch, das sig soo, gwiss,
äär haigi halt vor dämm Embolo -Virus Schiss.

Drotz hochem Alter bliibt der Federer derbyy
und zwischeduure macht äär Zwilling in Serie.
In fuffzig Joor kasch lääse - Gegner sind erbitteret,
Federer hat den Sieg mit seinem Stock erzitteret.

Es mecht der Sarkozy so gäärn zrugg uff e Droon.
Äär glaubt an die politisch Reinkarnation.
Äär sait, "Alors jusqu‘ à ce jour isch sein dann gross,
isch sitze gerne Angie Merkel auf das Schoss“.

Das Selfie zaigt der Bundesroot in corpore.
Do kasch die ganz Myseere guet uff aimool gsee.

Au der Burkhalter het uns e Selfie gschänggt.
So grau in grau hätt au e Abziebildli glängt.

D Somaruga knippst sich in e me blaue Schüpli,
in der lingge Hand e Sozialischtecüpli.

Und dää wältschi Taugenichts, dää ziet e Fratze.
In dääre Biire isch gliich vyyl wie uff der Glatze.

S Schneider-Amman Selfie interessiert kai Sau.
S isch nur Bewyys derfiir – aha dää git s jo au.

S Doris Leuthard grinsend, git uns grad der Booge.
Dääre hätte mir der Stegger lengschtens zooge.

D Widmer-Schlumpf het sich fascht sälber nit erkennt.
Friener hesch so Wätterhäxe no verbrennt.

Uff d Froog an Maurer noch sim Selfie, maint äär – „Äähm!
Ich miecht jo gäärn ains, aber waiss no nit vo wämm.

Impressionen

von

Peperoni

Video

Verse

Fruschtriert het unsere Wessels Hampe
no däm „NAI !“ sy Grind lo lampe.
Är hätt so gärn, wie in der Stadt, fir d Baselbieter Rammel
e Zone nur fir Wello gmacht, vo Scheenebuech bis Ammel.

Dä Roche Duurm bi der Solityyde,
wird äänlig wien e Pyramyyde,
gegen oobe glainer, was macht das fir e Sinn?,
kenntsch maine, dass ene noodisnoo, d Stütz usgange sin.

Frau Leuthard und die zwaiti Reere.
Y kaa das Gstiirm bald nimme heere.
Si hätt so gäärn das „Zwaitloch“ ...und jetze kunnt der Hit:
Mer baue das Loch, mer zaale das Loch … nuur bruche derfe mer‘s nit.

S Radio sait mer all Viertelstund,
dass no däm Stau der Näggschti kunnt.
Do mäldet sich mi Navi, und sait: „E scheene Gruess.
Und wenn de no wotsch aakoo hitt, denn gosch am beschte z Fuess.“

Der Schawinski läärt, was ych muetig find,
e Kiibel Yys iiber sy Grind.
Er het’s zwoor nit erfunde und ych sag‘s diplomaatisch:
Dass em derbyy no d Sproch verschloot, macht en diräggt sympaatisch.

Fir Schutt und Gröll git’s e Methoode:
Ab mit däm Mischt undere Boode!
So “Unterfluer-Container“ versänggt me in de Stroosse.
Und vor em Roothuus, nit vergässe, bruuchts denn e bsunders Groosse!

E Seggretääryn mit nyt aa,
derfiir mit Allem drumm und draa,
twitteret e Selfie, denn die hett offegstande,
Persone und Freizyygigkait, dotaal lätz verstande.

Der Gerri Müller macht frivol
unter sym Phult e Aigegool.
Das Selfie goot an‘s Zwaitwyyb. „Wie findsch mi fuudiblutt?“
Do schrybt si zrugg: „Bild nicht scharf …vermutlich Zoom kabutt!“

Wo der Ali in der Hochzytsnacht
sy Frau uusphaggt, isch die kei Bracht.
Was us der Burka uusekunnt, isch nit grad no sym Gschmagg.
Ali, do bisch sälber dschuld: …. me kaufft kai Katz im Sagg!

D Concita Wurscht het’s usbrobiert
und sich dä Fluumbaart abrasiert.
Denn stoot sy vor e Spiegel und luegt sich s Resultaat aa.
Und sithäär heisst das Wiirschtli nei: “Concitta Cippolata“.

Fir Ziircher isch dä Graane Kunscht
und uff e Schiff wartsch umesunscht.
So Läärläuf sin dert ganz normaal, wenn me d Bewooner kennt.
Die luege jo au jede Frielig, ob e Schneemaa brennt.

Impressionen

von

Pierrot

Video

Verse

Au mit e weeneli Schnee im Muul,
find ych dä Simi super cool,
in dr Luft lost Är sich ganz wyt dryybe,
und am liebschte, wär Är dobe blyybe.

S haisst immer unseri Bolitigger haige,
in dr Öffendligkait, meh Ruggroot z zaige,
aber Geri Müller du arme Maa,
ass me s Ruggroot e so verwäggsle ka.

Ob e Brotwurscht us San Galle,
au e Bebbi Glepfer wurd mir gfalle,
bi-n-ere guete Wurscht kumm ych in Faart,
d Hauptsach isch, si het kai Bart.

Drotz dr Greessi syg Är e Grosse,
dr Shaqiri mecht an d Spitze stosse,
d Italiäner dien en dreeschte,
si syge sälber nit die Greeschte.

Dr Willy, s nei Maskottli vo dr SVP,
hänn si sicher au scho gseh,
är isch still, duet numme penne,
si hänn gnueg Lyt, wo jo bälle kenne.

500 Joor soll s Roothuus scho stoo,
syt denn herrscht dert e ko und goo,
me plant scho s nägscht Fescht im Grosse Root,
fir dä Daag wo dr Wessels ändlig goot.

OSZE isch fir d Sicherhait,
nur het die Sicherhait versait,
in dr Stadt sehsch Bolizschte und Gitter stoh,
drotzdäm isch kai Chaot, hinter Gitter koo.

Uf dr Abfahrt macht me kai Stämmbooge,
d Öschtrycher hänn e Schlappe zooge,
au dr Küng het si Goldfahrt nit kenne gniesse,
Är haig s verletzte Bai, jo entlaschte miesse.

Simi fliiiiiieg,
kumm Simi fliiiiiieg,
ych ka dä Reporter guet verstoh,
nur het dr Simi das wort weertlig gno.

Dä roschtig Hafekran hänn si demontiert,
und als alte Schrott zue dr FIFA gfiert,
dert wird är wider ufbaut „step by step“,
als Dänggmool fir dr Blatter Sepp.

D BLT biete samt drum und dra,
e Billjeeverkauf per Handy aa,
aber d Automate sin e Witz,
also mins passt derte nit in Schlitz.

Dr Hoeness isch jetzt gottefroo,
Är darf am Daag drum haimegoo,
Gliggwinsch und e Gott sei Dangg,
kemme au vo sinere Bangg.

E Seggretärin us Bärn,
zaigt sich obe Ohni gärn,
jetzt macht si, no däm riise Flop,
in Ziiri kurz e Boxestop.

S „tapfere Schneiderlein“ vo de Brieder Grimm,
empfindet me z Brasilie bsunders schlimm,
d Fuessballer wärde vor Ärger bleich,
wenn si lääse: „Sieben auf einen Streich“.

Ohni Verkehr ka nit passiere,
in dr Ryygass ka me jetzt flaniere,
d Fuessgänger schätze das jo sehr,
grad z Nacht, gits dert no gnueg Verkehr.

Y fahr jeede Daag s isch geil,
mit em Achterdrämmli uf Weil,
kauf Schnäppli yy, fascht jede Moorge,
und d Frau dehaim duets denn entsoorge.

Impressionen

von

Schlyffstai

Steckbrief

Der Schlyffstai ist ein hochkarätiger Diamant der Bänkler-Szene. Die Verse haben Witz und der kunstvolle Vortrag ist ein absoluter Genuss.
Comité-Bank seit 2006

Video

Verse

Dr gweenlig Amerikaaner findet Folter wiirgglig schlimm.
E winzig Ussnaam macht är nur, wenn d'Opfer schwarz oder Moslem sin.

Dä NSA-Staat wott alles wisse: Was du schryybsch und saisch und fluechsch.
Si garantiere dir aber Anonymitäät, wenn'd e Pump-Gun kaufe duesch.

Wo blyybt dy Hoffnig, Obama? S'isch e Drama:
Bisch nyt wyss, in dämm Land, wirsch nyt mol Mittelstand.
Telefoniersch, Obama, nach Havanna, mit em Cuba Libre in dr Hand.

Guantanamo wird leera – d'Kubaner dien sich jetz vermeera
Wänn nach sozialistische Irrleera Kapitalismus neu vereera.

D'Bolizei macht deert ain uff Rambo. Dr Baschi Dürr stuunt lutt vor sich hii.
Äär leggt si Kartondäller uff e Dschund sait: Genau so wett ych syy!

Gryffsch nach unsre Bangge, Obama, wo eh scho laama.
Geege s'US-Defizit hilft d'Milliardebuess.
Hesch e Verdacht, Obama, Aaglaag gmacht, du muesch e Blaan haa
bis sogaar d'BKB denn bluete muess.

Dr gweenlig Amerikaaner isch im Grund en geile Siech.
Da deerf all die Sache mache, wo männge Schwyzer au gäärn miech.

Impressionen

von

Schnaabelwetzer

Steckbrief

Schon das Goschdym bereitet auf einen bunten und rassigen Auftritt vor. Und er kommt. Mit bestechenden Pointen und Helgen.
Comité-Bank seit 1997

Video

Verse

Dä Haafekraan am Limmatquai – fir Ziircher isch s Kultuur.
Fir andri isch das Kunschtwärgg numme Gäld-Verduuble puur.
Mir Basler mechte so vyyl roschtigs Yyse nit moll gschänggt.
Drum hänn mir unsre Kraan mitsamt der Merlin grad versänggt.

«Versoorg sofort das Händy!», rieft dr Lehrer Lutz fruschtriert,
Will s Lotti zhinderscht hinde schtändig vor sich aabe stiert.
«Exgyysi», maint die Glai, bivor sy hoochkant uusefliegt,
«ych ha e komischs Selfie vom 'ne Geri Müller griegt.»

My Frau het mii zem Doggter gschiggt, will yych die ganz Zyt fuurz.
Bi soo vyyl waarmer Luft, do kunnt doch s Ehelääbe z kuurz.
Dr Doggter undersuecht und sait: «Sii hänn e Wind-Syndrom.
Das gheert uf Bäärn – us jeedem Fuurz macht d Doris Leuthard Stroom.»

Mir wänn in d Politigg! E Migros-Kuurs hänn mir scho gnoo,
Mit Smalltalk, Lächle, Händli-Schittle und gscheit Ummestoo.
Nur s Bschysse macht ys schampar Mieh – das blogt ys sogar znacht.
Drum luege mir jetz ganz genau, wie das der Blatter macht.

Dr Delfi isch gottloob scho doot – scho lang und das isch guet.
Au d Migros het mit so Figuure null und nyt am Huet,
Uff d Deggeli do gheert fir sii e richtig biid're Maa.
Drum lacht ys glyy bim Käffele dr Schneider-Ammann aa.

Woorschynts vom vyyle Velofaare – s Drampe wird e Qual! –
lauft s Hifftglängg vom Herr Wessels bletzligg nimmi optimaal.
Dr Doggter maint, wo-n är dä Maa denn operiere duet:
Vom Beggi uffe bis zem Hals wird alles wiider guet.

Vo Ebola und Voogelgrippe wärde mir bidroot.
No schlimmer, wenn e Meteor ganz Basel zämmeschloot.
Und au wenn d Wält sott untergoo – an uns goot das verbyy:
Mir wäärfe aifach schnäll e Hampfle Jodtablette yy.

Dr Fritz vom Baudep isch fruschtriert – saumässig, wie s däm stinggt,
Ass neyerdings d Verwaltigg nur no Haanebuurger dringgt.
Kai Mineral mit Koolesyyri – gopf, das ka s nit syy!
Sogar bim Schaffe isch es jetz mit Bleeterle verbyy.

Refleggdiere, gspiire, driiber schwätze, wie s aim goot,
Nit lehre, nai, entdegge, wo-n e Froogezaiche stoot,
Dr Lehrplan 21, Sii, dä isch e woori Bracht!
Und d Schieler kenne s Alphabet – vo ains bis ebbe acht!

S wird z Basel iiber s Abfallwääse gschumpfe und au gfluecht.
Drum hänn mir so-n e Underfluur-Container undersuecht.
Gigantisch, was dä schlugge kaa, die Mulde dänggt jo mit.
Sii nimmt nit jeede Giisel – d Basler Zyttig schluggt sii nit.

S isch bitter kalt und dunggel duss, e Kyyzli rieft dur d Nacht.
Voll Ehrfurcht steen mir um iin umme, kaine vo-n ys lacht.
Das isch en also, hänn mir dänggt, und finde s gar nit glatt:
Dr allerallerallerletschti Parggblatz vo dr Stadt.

«Hello to everybody here, my name isch Morin Guy.
Doo z Basel a mym Rhyy it 's nämmli very nice to be.
Hello and wellcome all of you – do fallt mir grad no yy ...»
Jä gottsaidangg isch do beraits sy Reedezyt verbyy!

Impressionen

von

Schooffsuuri

Steckbrief

Sorgt für etwas Entschleunigung an der Fasnacht. Während sich das Publikum entspannt zurücklehnt, singen die Schooffsuuri Verse, die sitzen.
Comité-Bank seit 1992

Video

Verse

S Beese goot umme – die halbi Wält brennt,
Mir Drey draage Laarve –damit is kain kennt.
Drotz alle Verbräche – do glaube mir draa ,
ass e Bangg als no mee als e Kalaschnikov kaa.

Mir Baasler sinn Wältglass, hänn d Schmuckmäss und d Art
Industrie und Musee – und d Birsfälder Hard.
Doch kunnt d OSZE – jä do bisch denne baff
Wiird us unserer Wältstadt uffsmool grad e Kaff.

D BaZ liis ych uff em Bildschiirm – si isch denn ganz flach
Ass yych mer bim Lääse nit d Händ dräggig mach.
Und dräggeled der Somm - no macht miir das kai Mie
No kaani aifach der Stegger zer Wand uuse zie.

D Freiheits-Statue in New York erhebbt iiri Hand
Syt 130 Joor stoot si stramm fir ir Land
I wintscht mer si giengti vo deert emool fuurt
Und denn der CIA emool haim zinde wuurd.

Mit däm Geleretli bhauptet d UBS zwoor,
es gääb si in Baasel syt 120 Joor.
D Fusion aber isch eerscht 98 basiert…
sogar doo hänn si glooge und Zaale frisiert !

E Wält ooni Männer – maint e mängi – wäär digg
Und jeedes Stigg griegt grad dä sehnsüchtig Bligg.
Nur Fraue; kai Vyylfalt – jä ,das wääri „cool“
Und wehe nimmsch denne s Woort „Aifalt“ ins Muul ….

Stellsch der Abfall vor Diire, oder draisch en ewägg ?
Der Groossroot verdiefft sich in unsere Drägg.
Der Land-Vogt vo Rieche findt die Container Usswiggs
Nur : sy Leesig mit Segg isch woortweertlig fir d Figgs !

Fukushima zaigt is : AKW hälffe nit
Die Lyt in däm Eertli, die straale no hit.
Wenns bi uns denn e alte Reaktor versiecht
No sait dängg denn d Leuthard : der letschti lescht s Liecht.

Der Boopscht find i super – dä regiert zimlig baarsch
Und bloost au däm Fingg vo der Garde der Maarsch.
Wenn dää wyter mischtet und d Kiirche so fiert
Wiird der Blatter dängg das Joor exkommuniziert.
D Iiwanderigs-Initiative nimmt d Schwyz laider aa
Doch wie me daas umsetzt goot der Blocher nyt aa.
Är beschimpft no d Koleege und laufft us em Root,
dasch Demokratie - so wie äär si verstoot.

Ai Kantoon Baasel – ojee haa ni dänggt,
esoo isch das Nai - fir mi wiirgglig gschänggt.
Ai Kantoon Baasel – do wär y erblasst
Wenn scho d Sprooch nit in unseri Schublaade basst.

2015 Langvers

Jeedes Joor froog mi – willsch wiirgglig no goo
E whats up wuurd länge – was muesch aanestoo.
Jeedes Joor froog mi – was willsch do no goo,
De kenntisch doch aifach e shit-storm loosloo
Jeedes Joor dängg i worum bisch nit still,
es macht doch hit jeede nur daas won är will.
Jeedes Joor froog mi – ob i Värs aane grieg
De liisisch jo numme vo Flüchtling und Grieg.
Jeedes Joor froog mi – findsch das nit absurd,
ass mainsch ass sich d Wält wäge Diir ändre wuurd.
Und doch bini stolz und find das au scheen,
Wenn i gsee wievyyl andri mit mir aanesteen.

Impressionen

von

Schunggebegräbnis

Steckbrief

Selten sorgt ein Begräbnis für soviel Witz, Unterhaltung und gute Stimmung wie dieses. Übrigens nicht nur bei Veganern.
Comité-Bank seit 2012

Video

Verse

Mir wänn unserem rächt guete Imitsch nit schade,
drum git s au kai Värs über Männer us Bade.
Isch die Gschicht au e Knüller
und wär d Pointe au e Brüller,
was dä drybt döört in sym Ryych,
das isch uns doch pfyffe-glyych!

Bisch gärn einsam und ellai, hesch nach Schtilli s Verlange
bisch friehner ins Schtüggi und d Märthalle gange
Findsch mit eme Kater
dy Rueh im Theater
doch wirgglig ainsam, trotz Rabatt
bisch in dr Basler Innerschtadt.

Dr Aafang vom neue Johr lauft rächt verschisse,
in Liesbärg wird e Bueb vom e Hund fascht verrisse,
es töte Islamischte
10 Hebdo-Journalischte.
D Polizei hett schon e Spur:
si fiehrt zer KESB vo Winterthur.

Wenn dr Sepp emol zrugg tritt (theoretisch isch s dänggbar),
isch dä Club vo Ganove ohni Chef und nümm länggbar,
jä, denn bruucht me e neue,
zem die Gängschter z betreue,
unsre Gheimtipp wär dä:
Eifach d Sibel Arslan nä!

Wenn dr Edi dr Bruno küsst, isch das verbotte,
au s Bea und s Margreth sich kei Schmützli gä sotte,
hett der Edi aber, bitte sehr,
mit em Margreth gar Gschlächtsverkehr,
no kriegt d BLT kai Wuet,
denn Margrethestich isch guet!

Dä Turm, wo die Roche jetz do uffe duet hyyve
isch wahnsinnig hoch us dr Froschperspektive
Mir hänn ghört, will dä so hooch isch
und dr Flugplatz so nooch isch,
ass me d Kurve nit rächt kriegt,
und d SWISS nümm ab Basel fliegt.

S ney Budget zwingt Basler Bolizischte zum Spaare,
dasch eifach, syt d Velo über Rot dörfe faare,
s blybt nüt me bim Alte
wottsch nach rächts, muesch nümm halte,
au in Lieschtel miecht das Sinn
dört isch Rächtsabbiege in!

Jetz wänn doch die Grieche, die glungene Sieche,
probiere, wie ohni Europa si s mieche,
si verlöhn no de Waale,
die wo d Rächnige zaale.
Gnau eso macht s, s isch no glatt
Basel-Land mit Basel-Stadt.

Me söll jetz sy Mischt undrem Bode deponiere,
das wurd schynts in Chur scho lang funktioniere,
Dasch dängg klar, ass die Fründe
so Container hänn z Graubünde,
denn die bruuche das, weisch,
as Lager für ir Fleisch.

Mh mh mmmmh mmmh mh mh mmmh
Mmh mmh mmh nit lache!
Mh mh mmh mmh Mohammed
e Värs mmh mmh mache,
Mmh mmh mmh mitnichte
Mmh mmh mmh mmh dichte
mh mh mmh mmh Risiko
mh mh mh mh morn nümm doo!

Impressionen

von

Schwoobekäfer

Steckbrief

Zählt zu den kostbaren Insekten des Comités. Mit fein gedrechselten Versen bohrt er Pointenstachel ein, die sitzen.
Comité-Bank seit 2000

Video

Verse

Im Volggshuus tritt dr Blocher uf; dä macht jetz uf Historisch
Und sait em dumme Volgg, was nämlig gschichtlig wirglig wohr isch.
Au wenn si nur vom Blocher sin – die Gschichtli sin e Hit
Ganz bsunders, wel s jo laider s Trudi Gärschter nümme git!

Us Dubai kunnt e Emir in s Drej Keenig – dyyr und edel
Am nägschte Morge het är am Kamel e Buessezeedel!
Jä wär am Stroosserand s Kamel parkiert, bikunnt e Stroof;
Bi uns herrscht Ornig und es sin d Kamel im Spiegelhof.

D Frau Hueber mues am Claraplatz syt Stunde wietig wättere:
Dr Achter kunnt so gstoosse voll – si ka nit yne glättere.
D Verwaltig vo de BVB, die findet si nit toll:
Jetz hän die neui Trämli kauft und alli sin scho voll!

Dr Wäber Eric spinnt... nit nur im Groossroot... syni Fäde;
Und hinterlosst, so klage si, e Huffe bruuni Fläde.
Drby isch är in Wirggligkait e Gwinn im Groossrots-Saal:
Jetz wirgge alli Andere uf aimol ganz normal!

Ob Slalom oder Abfahrt oder Schanze-Abespringe:
De Schwyzere und Schwyzer wot au das Joor nit vyl glinge!
Dr Simon Ammann isch jetz schynt s uf s Schlittle übere gstiige:
Dört kan är denn vo Afang a grad uf em Ranze liige.

Was sin au numme das mit däne kryzte Händ für Sache,
Wenn Schwyzer Schutter wiider dr albanisch Adler mache?
Villicht het halt dr richtig Ort dä Xhaka nonig gfunde -
Sunscht sin die kryzte Dööpe doch bim Freistooss wyter unde!

Dr Pauli Buess vo Weislige wot d Partnerschaft jetz pfläge;
Är wot an d Basler Fasnacht go mit däne Waggiswäge.
Und won em son e Schangi dört denn e Plakette git,
Do sait är: Jo halt, aber me als d Helfti zahl y nit!

Me macht die eltschte Runzelränze hit zue Wäschbrätt-Büüch
Und d Lippe wärde über Nacht wie Veloreeder-Schlüüch.
S got drum jo au kai Ma me hit mit Ainere ins Bett,
Wo nit e son e Klääberli, wo druf stoht: „Bio“, het.

Verkehr, das kenni au, das isch wenn alles lauft wie’s sott
Und unt’rem eme Konzäpt verstoot me s generell Verbot
Dr Schugger Meyer isch dr einzig wo das rächt will gniesse
Dä stoot jetz drey Daag uf dr Brugg zum Waggiswääge biesse.

Me waiss nit rächt bim Johann Schneider-Ammann syner Büüle,
Ob är e bitzli lächlet oder nägschtens afoht hüüle;
Und wenn är öbbis staggelet, waisch au nit was es soll -
Wie s ebe isch bi aim wo merggt: Scho wiider d Hoose voll!

Impressionen

von

Singvogel

Steckbrief

Dieser Vogel kann nicht nur singen - er ist auch ein komischer Vogel. An jeder Fasnacht setzt er zu neuen Höhenflügen an.
Comité-Bank seit 1997

Video

Verse

Au Politiker dien wäärbe für d Sponsoore.
Der Carlo Conti wirbt für Defibrillatoore.
Für e Coiffeurketti wirbt der Isaac Rääber.
Und d Anita Fetz die wirbt für Langzytglääber.

Wo in Hollywood der Christoph Waltz ganz griehrt
uf em Walk of Fame sy nöie Stäärn beriehrt,
säit ihm der Arthur Cohn: Please take my great Verehrig!
Now you are glyych beriehmt wie Mister Juillard Eric.

Me wird in Basel mit em Baue als wie frächer.
Das kaa nit guet goo. D Spatze pfyffes vo de Dächer.
Doch bi de Düürm, wo sich bi uns rasant vermehre,
sinn d Dächer z hooch, als dass me d Spatze no könnt hööre.

Drei jungi Hünd, fümf Liter Schnaps, e Windleständer,
e halbi Kueh und siibe Meeter Balkongländer,
en Aquarium und e Disch us Elfebäi.
Y ha jo gsäit, die nöie Drämmli syge z gläi.

Im Volkshuus referiert der Blocher eloquänt:
Die grossen Basler, wo die Schweiz gerettet händ!
Hejoo, die ghöören ihm, sinn alli braav und fromm:
Karl Barth, Hans Holbäi, Rudolf Wettstäi, Markus Somm.

S git Lüt, wo hooch im schööne Baselbiet dien wohne,
die mäine, Basel sygi e versüüchti Zoone.
Doch dummerwyys, jä das isch draagisch und verruggt,
hänn si statt Joodtablette Näi-Tablette gschluggt.

Me het sich gfrogt, werums nur all die Mööbel het.
Sogaar am Määrtblatz Stiehl us Holz, e Disch, e Bett.
Wäiss ächt der Groossrootspresidänt, was är riskiert,
wenn är no nääbebyy e Bed and Breakfast fiehrt?

Wär kaa die schönen alte Lieder no verstoh?
Im Kindsgi singt me: S Elfi-Glöggli lüttet schoo.
Hingeege z Baade wäiss me, was das duet bedütte:
S duet wider äine mit sym Selfie-Glöggli lütte.

S Gläis ins Waldeburgerdaal isch als no Schmaalspuur.
Und jetz wäär d Chance doo zem wäggsle uf Normaalspuur.
Das wäär doch s Töllschte. Doch do säit der Gysi Peter:
Für die vo Höllschte längte füffzäh Santimeeter.

Wo der Götti het der Hansli loobe welle,
will är mit achti scho so priima könni zelle,
do säit der Hansli: Wäisch, ych bi au braav und flyssig.
Mir schaffe nämmlig mit em Lehrblaan 21, 22, 23 ...

En alte Wäschmaschiinefilter us em Käller,
s Schwyzer Stroofgsetzbuech plus 30 Kartondäller,
e Paggig bruuchti Pämpers, oordentlig verschisse.
Isch ächt em Baschi Dürr der Bebbisagg verrisse?

Me will für s Bruederholzspidaal e Standort finde
uf ere Liechtig zwüsche Buus und Käänerkinde.
Denn döörte könnte d Döggder, statt ins Lääre stiere,
doch wenigschtens no Füchs und Haase operiere.

Impressionen

von

Spitzbueb

Steckbrief

Der Spitzbueb ist ein spitze Bueb. Seine zugespitzten Verse sorgen für spitze Pointen.
Comité-Bank seit 2007

Video

Impressionen

von

Stroossewischer

Steckbrief

Die Strassenfeger der Stroossewischer haben Kultstatus. Ihre Bänke sind eigenwillig, schön gereimt und brilliant vorgetragen.
Comité-Bank seit 1996

Video

Verse

„Halt! Stopp! Verkehrskontrolle! Jä sin sy nit ganz bache?
Dasch z Basel sträng verbotte sii, was sii do mache!
Dosch Fahrverbott, das git e diggi Buess derfür!
Also Uswyys…! Ouh! Entschuldigung Herr Dürr…“

Der Gilles vo Haagedaal duet immer no de Viere,
das scheene Speerguet z Basel zämme ramisiere.
Uff aimool rumbblets kurz, denn gheersch en nur no lalle:
„Y bi in Unterfluercontainer aabegfalle!“

Do letschti spotte d Münschterdüürm queer über e Bach:
„Du Duurm dört ääne, goht s no hööcher, hösch? Wotsch Grach?
Und stand graad aane, du Banaane! Isch doch wohr!
Waisch hee, mit Ruggeweh stoosch kaini hundert Joor!“

Grad näbem Roche-Duurm stoot nur zwai, drey Hüüser wyter,
die ganzi Stadtbildkommission und d Laag isch schyter.
Es stööri s Stadtbild stedtebaulig kolossal,
das neye Gloggeschildli dört isch illegal.

D Frau Saaresyy schlaifft ihre Daggel, äär haisst Hainer,
und ihre Bebbisagg zem Unterfluercontainer.
Sii macht der Deggel uff, do isch sy scheen verschrogge,
will deert jo immer no der Gilles duet dinnehogge.

Jetz kasch bim Tinguely go d Naase yynestegge
und dört go Aggselschwaiss und alti Sogge schmegge.
Jä dä Museumsbsuech, dä kasch der aso spaare,
muesch nur am fümfi Zoobe, schnäll go Drämmli fahre.

Conchita Wurscht… …jo aso eehm, jo aso joo…
eehm aso joo, was isch do scho der Witz dervoo?
…ehm aso ebbe joo, do ryymt sich höggschtens „Durscht“.
Und sowysoo, waisch was? Uns isch die Wurscht doch Wurscht!

Jetz muess die moolerisch Südseeidylle - aaber, aaber!,
zem Kasse fülle aabe dört, zu den Araaber.
Mit zwai, drey Binselstrich het denn die hübsch Nafea,
so wie sich s ghört dört unde, none bitzli mee aa.

…und wenn die baide uff däm Bild sich sotte waigere,
denn könnt me d Usdruggsgraft au no ne bitzli staigere.

Grieg und Terror, Laid und Eländ, Menschehasser,
Kataschtroffe, Hungerdood und dräggigs Wasser.
Das kunnt sit sächzig Johr scho in der Daagesschau.
Ouhh! Glaub au uns wird s jetz grad schwarz vor Auge… tschau!

Impressionen

von

Stächpalme

Steckbrief

Ein spitzer, immergrüner Bank mit roten Beeren. Während über einem Jahrzehnt war die Stechpalme eine feste Comité-Grösse. Wir vermissen sie schmerzlich.
Comité-Bank seit 2006

Video

Verse

Am Rand vo dere Wält läbt stramm
e letschten indigene Stamm.
Mit dumpfe Gsäng und Zaubersprüch erregt är d Forschergmieter.
Är hüült in d Nacht bim Tanz ums Füür: mir blyybe Baselbieter.

D BVB het d Chance packt.
Si fahrt jetz im Sekundetakt
uf Weil und will die arme Bebbi so vill miesse trääge,
verchehrt dr 8er exklusiv nur no mit Gieterwääge.

Au ich ha rassig Euro poschtet
und mi drno in 8er gmoschtet.
Und wills mi intressiert, was mit de Schwyzer Aktie lauft,
ha mer z Weil als Erschts e tolli Tauchusrüschtig kauft.

Dr Oschterhaas git zue: jäwohl,
ich out mi, ich bi inne hohl.
D Frau Vischer, wo im Garte stoht, im Gras grad näbem Haas,
frogt ufgregt: isch denn der Herr Wessels au en Oschterhaas?

Dr Muurer Ueli isch im Wald
bim Biken an e Felse knallt.
Entwarnig, funkt dr Funker Hotz an sym Funkertisch.
Är isch nid detoniert, will är e Blindgänger isch.

Z Bärn gits bald e neue Lidl,
z Biel dr Gyygelade „Fyydl“.
Z Basel plant e Hundefreak dr Hundesalon „Wuff“.
Und z Bade macht dr Geri glyy sy Hoseladen uf.

My Frau, si schafft jetz au bi Apple,
het iPhone, iWatch und iTschäppel,
het Äi-Zällen yygfroore, wäg dr Karriere.
Jetz freu mi, bis i äi-nisch darf mit ere verchehre ...

Dank Lehrplan 21 glänze
d Goofe mit zig Kompetänze.
Statt Mathe leert dr Maxli neu als Erschts: wie mach ich Spesen?
Sobald er das dann kann, geht es ans Leasen (anstatt Lesen).

Hänsel und Gretel verirrten sich im Wald.
Es war so finschter und auch so bitter kalt.
Sie kamen an kein Häuschen und blieben drum verschwunden,
trotz GPS im Handy – der Akku war halt dunden.

Im Thurnheer Beni syni Schnuure
mag zwar nümm, doch zwüscheduure
schnuurt sy munter wyter, das trotz Publikums-Beschwärde.
Die Schnuure well schyyns no Unesco Wältkulturerb wärde.

Dr Kim Jong Un isch gääl und rund.
Me munklet, är syg nümm so gsund.
Es chiem drvo, dass är nur no dieg Ämmitaler schmatze.
Stell dr vor dä Chees-Tsunami, wenn dä Kim wurd platze.

Im Gfängnis strickt dr Hoeness Ulli,
will er friert, am ene Pulli.
Dr Wärter rieft in d Doppelzälle: dr Diräkter schickt
morn dr Blatter Sepp zu dir, dä het sich au verstrickt.

Dr Bundesroot isch irritiert.
Das isch jetz doch no nie passiert.
Zum erschte Mol in all de Johr wird d Session verschoobe.
Dr Nationalroot Müller häig schyyns d Hose noni doobe.

Dr Max, e Baselbieter Daggel,
macht nach em Znacht no rasch e Waggel.
Är lauft im Sturmschritt Richtig Stadt, won är sich nid lang ziert
und heftig mit dr nöggschde Pudeldame fusioniert.

Alli Äntli boue glyy
neui Näschtli doo am Ryy.
Hööch über den Äntli bout e stolze Schwan sy Näscht.
In dere schreege Chischte z nischte, gääb mir glatt dr Räscht.

My Frau vollfiert e Höllegschrei,
si häig jetz au e Freistossspray.
Won ich nid abwäsch, rieft si: Foul, drufabe sprayt si stur
Rasierschuum uf e Teppig und schiesst gnadelos in d Mu(-aua!-)ur.

I stand zmitts in dr Freie Strooss.
S isch nüüni znacht und nüt meh los.
Drum fahr i Richtig Hörnli mit em Trämmli Nummer säggs.
Im Friidhof si jo wenigschtens no Rehli underwäggs.

D Frau Stutz isch läider nid im Strumpf,
im Gegetäil: voll uf em Rumpf.
Si wälzt sich uf em Buuch und cha im Unterrock chuum schnuufe.
D Lunge druckt und d Zunge zuckt und s zieht dr Chiifer uufe.
Dr Kräislauf isch total verräist und d Niere dehydriert.
Käi Wunder, dass d Frau Stutz syt Stunde hyperventiliert.
Dr Dokter mäint mit churzem Blick uf e neu Unterrock:
Frau Stutz, Si häi nach irem Trip uf Weil e Tiefpryysschock.

I wäiss, i cha nid so schön singe,
und wenn i myni Värs due bringe,
hocked dir im Publikum mäischtens wie uf Noodle,
doch syt i Jod-Tablette schluck, joo, do chan ich jodle ...

Impressionen

von

Syydiaane

Video

Verse

Guten Abend midenand und herzlich willkommen
hier in Basel-Stadt!
Wir zwai sind ein Schnitzelbank,
das findet man hier glatt.
Sollten Sie, was blöde wär,
die Verse nicht verstehn,
dürfen Sie ganz ungeniert
aufs 8er Drämli gehen.

S’ Jumpferefäärtli im Flexity-Dram
iibere zue de Schwoobe
isch drotz de Holzstiel gmietlig gsi,
au d Uussicht daarf me loobe.
En Yyskaschte im neie Drämli
wär nit ybetriibe,
dr Yykauff wuurd halt uff em Wääg
e weenig frischer bliibe.

Im dieffschte Uurwald git s Kulduure,
die bätte Getter aa,
egaal ob glai und hässlig
oder ooni Hiirni draa.
Wenn e Museeum z Bäärn
sone Fyguur kaa retuurniere,
kennt daas mit em Somm nach Ziiri
doch au so funggzioniere.

Iir sind schizofreen, iir schnuuret dumm,
sind aadriibsloos und stumpf.
Bim Aint und Ander kennt s Alzhaimer syy,
iir sind gaischtig uff em Rumpf!
Mir hoffe jetz ihr dängged nit,
dasch Euri Diagnoose –
so schnuurt e Baapscht mit Kardinääl,
dermit sii uff en loose.

Dr Komandant Wessels luegt
in e vellig Freii Strooss.
Hurra, dr Stadtkäärn isch befreyt,
jetz kanni uff s Andere loos.
Yych gib kai Rue, mach Rewoluzioon,
kämpf um jeede Meeter –
dermit sich wiirgglig nyt bewegt
vo Rieche bis Groosspeter!

Gits irgendwo e neie Fuurz
mit Meediegarantyy
isch ganz bestimmt vo Aafang aa
au unsere Guy derbyy.
Im Sauglattisimus losst är s sich
sicher nit entgoo,
sy hoole Kopf mit kaltem Wasser
noochefille z loo.

S git Stimme, wo bhaupte, dass us Ziiri
e gueti Ydee kaa koo.
Drum gheere so Verrichtigsboxe
als Leesig iibernoo.
Liebe André Auderset,
do mien mir di beleere:
Dr beschti Schutz vor allem isch
mit Ziiri nit z verkeere.

Mir basse in kai Schublaade
kennt fir d Regierig stoo.
Graad wäge dämm het uns zwai das
no schampaar wunder gnoo.
Bim Noochemässe meergge mir,
dass e Leesig git:
D Regierig basst deert logger dryy,
d Weschmaschiine nit.

Uff Aafroog het d Frau Wäber
ain in d Woonig iibernoo
und sich dää graad ins Huus
wysawyy Saffrezunft lo koo.
Är isch stuuberain und, wenn si will,
daarf si mit em schmuuse.
Aaber no dr Konferänz
muess dä Schugger uuse!

Als Liechtbligg und als Geegestugg
zuer Bappdällerhyschteryy
stygt am Baarfi e häärzigs Myysli
zuer Naggtperformance yy.
Gieng daas jetz ganz eerlig gsait
frei nach unserem Wille,
deerft so aini jeede Daag
im Drämli au no stille.

D Rosetta-Sonde sändet Helge
uff unser smaarte Phone.
Was me deert so z gsee bikunnt,
isch gar kai Sensazioon:
E blasse Glanz, e kurze Schwaif –
e drooschloosi Galaxy.
Das kennt au guet e Selfi
Vo däm Müller Geri syy.

Dr glai Shaqiri wott nimm
bi de Bayern ummegingge.
Är hauts ab und schuttet nei
Z Milano bi de Tschingge.
S Ässe sygg vyyl besser deert,
s wuurd mee Bulver koo.
Und s Maximum isch: syni Greessi
duet uff em Lyybli stoo.

E bitzli eppis schyynt dä Sousa
vom Schutte joo z verstoo.
statt zwai Dääge Stolperi
hänn mer en Embolo bikoo.
Mir hoffe nur dr FCB
losst dä Jung au lauffe
und duet im zwaite Dääge
glyy en 8er Byyljee kauffe.

Aadie Euro Mindeschtkurs,
daas wär s fir d Wiirtschaft gsii.
Dr Export macht uff schyyndood,
alli Beerse uff Hyschteryy.
Nur d BVB blyybt zimmlig glasse,
gseet au s Guete draa:
Sii hängge aifach an dr Achter
no e Waage draa!

Impressionen

von

Wanderratte

Steckbrief

Die Wanderratte ist eine schützenswerte Spezies. Ihre glänzenden Pointen und lustigen Helgen haben absoluten Seltenheitswert.
Comité-Bank seit 2013

Video

Verse

Wo im TeleBasel mit einere Euphorie,
die neyi Chefin het welle luschtig sy,
und sich äxtra, y weiss das deent absurd,
mit „TeleBasel das isch Ziri“ verschnurrt.
Do hanere gsait: Los nimmsch mer`s nit krumm,
aber dy Sänder wär sogar de Zircher no z`dumm.

Im Dytsch-Unterricht, mit Blatt und Stift,
iebt d`Klass 4b grad Standard-Schrift.
Do het ain wo am Fänschter hoggt,
bi dr Lehrerin kurz noochegfroggt:
„Y weiss nit, bi däm Schrift han ys voll verpennt,
schrybsch Hey Alte jetzt zämme oder trennt?“

In der Schwyzer Illustriete, dass find y guet.
bewyst dr Tony Brunner wirgglig muet.
Und zeigt der Schwyz, dasch ganz veruggt,
wien är sy Brueder liebt und druggt.
Das Bild beriert my, numme weiss y nooni,
welle vo Beidne isch der Toni.

Dr FCBasel glycht, wenn au nur minim,
ime Amerikanische-Football-Team.
Beidi spiile uffem Rase miteme Balle.
Beidi hän Cheerleader wo aim gfalle.
Bi de Amis wingge d`Maitli mit Bompel in Rosa,
und bi uns, do fuchtlet dr Paulo Sousa.

Dr Papscht het syner Kurie d`Levite gläse.
Si syge träg und gaischtig am verwäse.
Usserdäm syge si au no Machtbesässe,
Hochmietig, Eitel und vo Gier zerfrässe.
All das, y han efang wirgglig gnue,
trifft au uff unseri Regierig zue.

Friener hesch zu Eel und Zugger griffe,
und mit däm Gschlabber s`Gsicht abgschliffe.
Hit kasch dy fir e Buschifidle zarti Bagge,
au mit ere Peelingcremé piesagge.
Aber wotsch e Tiefepeeling anebringe,
muesch wie dr Simi go Schanzespringe.

Also ych find dä Rocheduurm ächt e Hit,
und frai my ass es gly none Zweite git.
Vo mir us sott me, ganz im vertraue,
an jedem Egge so Diirm uffbaue.
Denn kaa me sich nämlig au getraue,
die Stelle vo dr Stadtbildkommission ab z`baue.

10 Joor isch d`Rosetta uffe Komet zuegreist,
wo Tschurjumow-Gerasimenko 67P heisst.
Deert het si, hän d`Forscher verlute loo,
iir Philae erfolgrych lande loo.
Als näggschts erwart y offe gstande,
ass sy uffem Mars e Nierstigg lande.

Vom viile Gliehwyy scho lycht käppelet,
isch d`Pegoraro richtig Muba däppelet.
Und am Riechering, do het die Tschättere,
vorem Absperrgitter avo umewättere:
„Was sell verdeckel dä Militäruuflauf,
heiter z`Basel jetz au e Harasselauf?“

Me het im Ensemble vom Sunntigsmatinee,
e paar ilegali Usländer glatt iberseh.
Und schafft me au die jetzt us, ganz konsequänt,
mit samt de antike Instrumänt.
Denn kasch in Zuekunft nur no go loose,
wie sy Haggbrättle, Jodle und Alphornbloose.

Schynts dät aim scho ai Jodtablette,
bi erheehter Strahlig s`Läbe rette.
Gits aber in Fessehaim e Havarie,
no wirfsch dr lieber grad zwei y.
Und s`ganze Päggli issisch gege d`Höllequale,
wenn vor de Wahle dr Morin wider avot strahle.

Uff däm Schmuddel-Selfie-Summerlochfüller,
gsesch numme dr Ranze vom Geri Müller.
Politisch het, wär hätt das dänggt,
sich dä dangg däm Bild versänggt.
Jetz hoff y ass dr näggschti Wambbe,
e Selfie isch, vom Wessels Hambbe.

Dr Salman Rattli my Halbbrueder us Mumbai,
dä fyylt sich in Basel wie dehai.
Do gits nämlig Indischi Supermärt,
wo alles hän, was är begährt.
Und wenn er Haimweh het, denn macht er,
e Fährtli ins Dytsche mit em Achter.

Impressionen

von

Wägwyyser

Video

Verse

…und si drülle, drülle, drülle gääl-wyss-rot
und kaine waiss genau, wo‘s duuregoot…

Liebe Geri, du kasch uns Selfies schigge
vo dim Zeche, vo dim Buuch, däm digge,
au dis Pfiffli versetzt uns nid in Rage,
aber verschon uns doch mit dinere Visage.

In Basel duet sich s'Autofahre nümme lohne,
uffem Mars hetts Lääbe – jo me könnt dert wohne,
uff dä Planet do kamme Aifach-Billiet bschtelle,
„Gueti Reis, Herr Wessels!“ - hänn mir saage welle.

Egal ob Basel, Rynach, Muttenz oder Mynchestai,
egal ob Zunzge oder Buebedorf s’isch einerlei,
egal ob Zyri oder Bärn es isch e Qual:
Dä gschiss‘ni Roche-Turm dä gseh‘sch vo überall.

Die Zyrcher meine doch, dä Krane sigi Kunscht,
doch die hänn vo Kunscht kei blasse Dunscht.
Kunscht in Zyyri isch erscht, jo so dien mir dängge:
Wenn dä Schawinski und dr Thiel am Krane hängge.

Vom Uuli Hoeness – do gitt‘s e gueti Gschicht:
Dä verliert im Gfängnis ganz vyl Uebergwicht.
Mir hänn dänggt, das wär doch ebbis – das wärs Gutzi:
Drey Wuche Kischte für dr Toni Bortoluzzi.

Wir sind Weltmeister - wieder einmal mehr.
Über neue Kunden freuen wir uns sehr.
Luschtig oder nicht – nur billig soll er sein…
Diesen Värs kauften wir in Weil am Rhein.

Bim Frauetennis – ka me sich jo wundere,
die klemme s'Bälleli eso am Fudi undere,
au mir dien ab und zue dert ahneschiele,
zem guete Glück tuet d‘Widmer-Schlumpf nit Tennis spiele.

Je suis un Wäägwyyser, oui oui, ça c‘est claire
et la Situation du Monde isch très précaire.
„Je suis Charlie“ isch in allne journaux gschtande,
mit friehfranzösisch – hätt‘ ich das au verstande.

Ich find Atomstrom toll und heiz mit Öl dehei,
mini WC-Schüssle isch us Elfebei,
mi Kaare sufft 20 Liter in dr Stund,
flieg mit mim Jet jedi Wuche ins Burgund,
ich friss nur Fleisch - Salat macht mi nur schissig,
…zem noochhaltig sii stirb ich mit drissig.

Dä Zuger Hürlimaa, dä obergeili Bock,
dä SVP-Maaaaaaa packt e griene Rock,
Wo sell s'Problem si? Mir könne gar nüt finde.
Isch doch schön, wenn rächts und grien sich so verbinde.

…und si drülle, drülle, drülle gääl-wyss-rot
und kaine waiss genau, wo‘s duurego

Impressionen

von