Schnitzelbank-Comité


Archiv
Alle anzeigen

Filter anpassen

Zum Archiv

Schnitzelbänke 2016

Rückblick

Anggewegglimaitli

Steckbrief

Hinter em Minschter hält das Comité Frauenpower feil. Mit herrlichen Anggeweggli-Versen des Anggewegglimeitli.
Comité-Bank seit 2008

Video

Verse

Hinter em Minschter isch Fahrverbott nämmli,
Drum bring ich mini Weggli in d Stadt mit em Drämmli.
S kunnt no schlimmer: Ich styg uss am Banggeblatz
Und flieg uf e Latz – wäg däm Weelooparkblatz.

Mit Verträg nämme s d Rammel nit so gnau.
Me sait au, si syge nit so schlau.
Jetz hänn si aber schnäll, die Sieche,
Ganz vyl gleert vo däne Grieche.

Die Angela, die traut sich ‘was,
Sagt einfach nur: „Wir schaffen das!“
In Basel sagt man solches nicht,
In Basel heisst’s: „Mir mache dicht!“

D Bangge sehn jetz langsam root,
Wenn s um d Verwaltig vo schwarze Gälder goht.
D CS macht s aifach, die nämme, bref,
Statt schwarzem Gäld, e schwarze Chef.

Hänn Sii der neyschti Bond scho gseh?
Also: Syni Frauen alteren als wie meh.
Wenn s so wyter goht, no ahni dumpf,
Haisst s näggschti Bond-Girl Widmer-Schlumpf.

Mir zahle und zahle, nit numme Styyre,
Jetz au no die neye Färnsehgebyyre.
Aber s Programm vom Matter wird nit glatter,
Der ainzig Höhepunkt isch der Bestatter.

D Schwoobe hasse nyt so wie s Bschysse.
Bim Gäld, do kenne si numme no s wysse.
Die Ehrligkait wird fascht scho zem Fimmel.
Bi VW stinggt si sogar zem Himmel.

Aaglaag, Dementi, Ergläärigsnoot,
Do dängg i grad au an e Regierigsroot.
Los, Baschi, bi der FIFA wurd s Der gfalle,
Die hänn alli Kepf wie Schuttiballe.

Apropoo Kopf und Schuttiballe:
D Martullo-Blocher duet mer gfalle.
Nur sottsch ere, wenn si will änglisch iebe,
E baar Läggerli in d Schnuure schiebe.

Fir d Staigerig vom Beliebthaitsgrad
Sinn Politiker zue fascht allem baraad.
Der beliebtischt Basler Regierigsroot
Wär sicher der Wessels, wenn er denn goht.

Impressionen

von

Blauaeugige

Video

Verse

Mir hän jetz au en Apple Watch und sin total vernetzt,
zum Byspiil wenn d uf s WC gosch, seit si: Jetz isch bsetzt.
Si schwätzt mit jedem Hushaltgrät, kauft y und das isch s Gröschti -
merggt sy bisch en SVP-ler - bschtellt sy dir e Röschti.

D Frau Leuthard wott e zweiti Rööre dur dr Gotthard leege
dr Gotthard sälber, wie me weiss, isch absolut drgeege
er meint dr Gschtangg, dr Lärm und d Laschter syg die glainschti Gfoor
doch käm er sich mit no mee Löcher als Emmetaler vor.

D Iibermuetter vo de Schwoobe ka nit gnueg bikoo:
D Grieche solle bynere blybe - d Syrer könne koo,
sy nimmt se uf mit offne Ärm - druggt se an d Kanzlerbruscht
nur iiri Teamkollege saage: Nai, mir hän kei Luscht!

Dr lieb Gott luegt uf d Aerde aabe, d Ängeli tien singe
aismool unterbricht er sy : Tiend mir e Färnglas bringe.
Er suecht und suecht, denn stöönt er uf: Nai bin ych e Depp,
dä isch nimm bi dr Fifa - nai - da spiilt dehai „Tschau Sepp!“

De Attentäter wird versproche, ass in Allahs Garte
zweiesibzig Jungfraue - seenligscht täte waarte
und wenn so ain bim Allah isch, tuet dä iin heeflig bätte
er sell bis wider e Jungfrau kunnt, halt im Garte jäte.

Luter Grieg und Flüchtlingsström - was ka me do nur tue?
Sexuelli Gwalt an Fraue - und d Bolizei luegt zue.
Dr Mani Matter het scho gwüsst, was es drus ka gää,
wenn me s brennend Zündhölzli nit tuet vom Deppig nää.

Waffe, Pizza, Körperteil – hüt druggt mes in drei D
scho jetz kasch so Roböterli wie Mensche laufe gsee
Mir hän us Jux dr Morin druggt – riskiere Kopf und Kraage
doch dä Kaib beweggt sich nit und ka nur griezi saage.

Dr Epfel fallt nit wyt vom Stamm – das Sprichwort duet ys gfalle.
Im scheenschte Epfel sitzt e Wurm – das dien mer au no schnalle.
Vom Räge kasch in d Draufi ko - das bassiert eso:
Im Nationalroot isch e Strupfer fir e Blocher ko.

Wenn d BAZ e Joor lang abonniersch bikunnsch e Goldblaggedde
mit däre Wärbig wott dr Somm sy Blocherblättli rette.
Mir hän ys dänggt mir wette doch die Glägeheit benutze
und leege d Goldblaggedde aa, wenn mir s Fudi putze.

Dr FCB tuet Spiler wäggsle - schnäller als die d Liibli
Elneny, Safari, Kuzmanovic verleen ys mit de Wiibli,
dr Embolo dä blybt no doo – vo YB isch ain koo
mit iim het jetz dr Tauli no - e Briederli bikoo.

Dr Nationalroot-Sänkrächtstarter , stellet eych das vor
seit dr Göring – eh – dr Blatter sig Schwyzer vo däm Joor,
dä IQ-150-Wolf het als Erklärig gseit
är heigi scho als Buscheli - gärn e Schoofpelz dreit.

D Mowag seit: Ei Duro wurd e Viertelmilliönli koschte,
me wurdi aber do drfür d Brämse no entroschte,
Schaalesitz, die käme z tüür, dr Parmelin dä well,
in jedem Duro fir sy Wyy, e sicher Fläschegschtell.
Dr Muurer seit: Y ha kei Luscht -und lot sich nit lo bitte,
spöter faart er mit de Journalischte zämme Schlitte,
er lot dr Schlitte suttere - lot sy alli stoo
jetz hämmer Angscht är wurdi au d Finanze schlittle loo.

I muess nur ei Zucchini ha – drugg us Versee Banaane
und wo-n-y d Waar tue scanne, mäldet sich doch nundefaane
my Smartphone mit me Bild dervo und e Stimm macht Drugg:
Sy isch nit riif – sy isch no grien – leg sy wider zrugg.

Mit Moltofil und Silikon, mit Gummi, Teer und Kleischter
gseen mir ain e Huus verschmiire, zeige iim dr Meischter
mir drooe mit dr Bolizey – do seit dä Schmiirfingg schlicht:
my Laade isch sit geschtert zue – jetz mach en nur no dicht.

Gang nur no go spaziere - mit mym scharfe Hund
I ha ne Pfäfferspray im Sagg wenn so ne Grüüsel kunnt
No däre beese Sylveschternacht - kasch niemertem me draue
drum begleite mi an d Fasnacht - myny beide Fraue.

Impressionen

von

Brunzguttere

Video

Verse

E fiechte Furz statt Kassesturz, käi Glooria und käi Glanz...
Us „Sport aktuell“ wird „Sport vo gescht“ - d Arena striicht me ganz.
Statt „ Äine geege Hundert“ spiilt me „Käine geege mi“,
und was diir do grad gsee händ isch dr Faasnachtsgweerschnitt gsi!

Im Pfäffergässli stoot versteggt e Bluemedopf im Schatte,
dört drüber säiche d Hünd und nääbedraa verwääst e Ratte,
und s Gürggli, wo dört äinsam waggst, so grau und halb verdruggt,
das griegsch für 17 Stutz als "Urban Gardening" Produggt.

Im Joor 3000 macht in Bärn e guet dressierte Hund
bi Graabige im Untergrund e grauehafte Fund:
Im Gwölbekäller vonere antigge Kubble het s
e halb verfuulte Stuel und oobe druff d Anita Fetz.

Bim Väärsli brünzle hän mir disggutiert: Wäär s aadegwaat,
wenn mir äin wüürde singe üüber Staat und Kalifaat?
Mir hän doo gwüssi Hemmige, das wänn miir nid bestrite,
es isch z Öiroopa häiggel woorde Gränze z üüberschrite.

Wir möchten uns entschuldigen im Kampf um Ihr Vertrauen:
Wir haben Dreck geschleudert und ins Klima Gift gehauen!
Für Manipulation und Bschiss - Pardon! Wir hoffen fromm,
dass sie uns trotzdem weiter lesen. Freundlich, Markus Somm.

Es schiint dr Iislamismus in Helveetie Konjunggtuur z haa:
Vor allem uff em Land häig hütt fascht Jeedi scho e Buur ghaa!
Scho fascht kei Burka mee kaa me drfüür im Eglisee gsee -
dört möcht me schiinbaar nuur no Burka haa mit ckdt.

In Lieschtel hän si überlegt - Sii, das isch zum Stuune:
Au d Helfti an Kultuur läng an sich für e gueti Luune!

D Martullo-Blocher, wo dr Christoph uns zur Rettig schiggt
isch us em gliiche Holz wie äär, das hän miir schnäll erliggt.
Nuur wenn de gnauer aaneluegsch, so froggsch unwiderrueflig:
Was isch das für e Schriiner gsi, und waas macht dää ächt brueflig?

Dr Blatter säit zum Platini:
"S isch nid mini Schuld es isch dini!"
Do mäint dr Platini zum Blatter:
"Du bisch für mi gsi wiene Vater:
An Schuld han i nummene fiini, und mini isch dini,
me haftet für sini Bambini - ciao Sepp!"

Impressionen

von

Bâlesagg

Video

Verse

Drei Flugi für e broches Bei,
Ä Emir, dä reist nie alei.
Nur s’Harem, losst er brav im Kaschte,
Er darf drum s'Bei no nit belaschte

Die wyssy Wienacht kasch vergässe,
Es wird alls wärmer, das kasch mässe.
D’IWB ka nyt drfür -
S isch d’haissi Luft vom Baschi Dürr

Bapyyrlischwyzer syyge minder.
Ächt Schwyzer sin erscht iiri Kinder.
Wär liegt wie druggt, wär zwängt und droht,
Dä griegt e zwaite Bundesroot.

Ych gang in d’Stadt und hol e Suff
Schwank heim, dr Spaalebärg duruff.
Kumm ych am Poller graad vrby,
Denn gang y no in d'Harmonie.

Mir fiere d’Frauequote y.
Doch d’Quote-Frau will kaini sy.
Die Kaderschtell bikunnt e Maa
Und mir feen wider vorne aa
Mir fiere d’Frauequote y....

D’ Kultur in Basel baut sich Tämpel.
Do s’Kunschtmuseum als Exämpel.
S' Casino griegt si Hülle doch,
Nur Lieschtel blybt bim Gülleloch.

S Theater Basel het elleggtrisch,
E glai Problem, will’s nei verleggt isch.
Dr Chef entschuldigt sich betroffe,
Si Biezer haig z’vyl Shakes-Bier gsoffe.

Dr neiy Papscht syg schyynt’s e Sozi.
Är will entschiide gege d’Not sy.
Zum Dangg will d’SP ganz bygott
Am Sunntig e Verkaufsverbott.

3+ zaigt uns dä Bachelor,
Dä Macho Fudi-Tätscheler.
Wenn'd dänggsch, das Niveau sänggsch nüm meh,
Denn sotsch mol Teleblocher gseh.

Zerscht wän si joo nit fusioniere,
Denn s’Gäld näh, ’s tuet si nit geniere.
Bald wänn die Rueche, wirsch es gseh
Als Bonus no dr FCB.

Impressionen

von

Doggter FMH

Steckbrief

Aaaah jä: Das ist unser Doggter FMH und seine Schwester Gundula. Wo er auftritt ist das Wartezimmer meistens borzig voll.
Comité-Bank seit 2005

Video

Verse

Si, dr Pabscht Franziskus, jä dä macht ys Bai
Nämmet doch bitte Flüchtling uff – bi euch dehai
Und dorum wohnt bi mir jetz, uf das bini stolz
E gflüchtete Oberarzt us em Bruederholz!

Und scho am erschte Daag isch öbis dumms passiert
Är het am Doggter si Kanarievögeli kaschtriert

Si, dr CEO vo dr Roche klaagt mir in einere Hyschtery
S hän alli Höheangscht im Turm – also Akrophobie
Ych hät dä Turm dr Regierig z Lieschtel gschänggt
Denn wär ihre Horizont nüm so beschränggt!

Ich glaub das Projekt wird schittere
Wo nüt isch chasch au nüt erwittere

Si, dr Helmut Schmitt het 96-zig Joor graucht wie ne Schloot
Und isch top fit gsi – bis kurz vor em Dood
Sy Läbe lang het dä Cigarette in d Schnuure gsteggt
Dr Fümoirverein isch scho nach drey Joor vereggt!

Si, kenne Si e Arztgheimnis bhalte, oder au zwei?
Ich ha nämmlig e Problem wäge mine kurze Bei
Denn i ha am Spalebärg, ihne ka nis jo sage
An some Poller mi Schälle agschlage

Und sithär sag ich zu däm chleine Maa
Nur no Schälle-Ursli FMH

Si, us Spargründ het s Bruederholzspital informiert
S’Operationsbschtegg wird nur no mit Baselbieter-Kirsch desinfiziert.
Und zum Gebäre hole si d'Lag isch prekär
Us Amel e alte Veterinär

Si, alli mit stargge Blaaige blybe nochhär no do
Die sotte alli in einer Kolonne zue mir ko
Denn ich glaub dass vor allem do die linggi Syte
D’VW Abgaswärt – wyt überschrytte!

Si s git e kai Aerztestop mee wäge dääne SVP Affe
S dörfen alli - au us Dütschland - wiider do ko schaffe
Und dorum bringt s näggscht Joor, das macht mi grangg
Sicher e Schwoobenarzt my Schnitzelbangg!

Und ich sag denn, als Ordensfrau
Statt salli zämme, Allaff hellau

D WHO legt e Gsundheitsstudie uff e Disch
Dass s Wurschtässe worschynlig läbensgfährlig isch
Dorum brucht me d Exit nümm, die chasch vergässe
Muesch eifach e dopplete Wurschtsalat ässe

Si, d Martullo Blocher het nit nur em Bappe sini Zeen
Nai au no sini Blattfiess, si Figur und sini SVP-Gen
Wo die im Bundeshuus schwört und so stramm anestoht
Bi n ich sicher, dass die dört uf‘s Pissoir got

Und wo si uf däm Pissoir denn will Wasser gäh
Stooht näbedra dr Parmelää

S humplet ain in mi Praxis, dä ka sich kuum beweege
Also, dr Glöggner vo Notredame isch e Seich drgeege
Ich lueg en kurz a und sag oh je!
Scho widder ein vom FCBee!

Impressionen

von

Dreydaagsfliege

Steckbrief

Diese Gruppe ist eine Augenweide und eine Ohrenweide. Bemerkenswert sind auch die raffinierten Helge in Fliegeschissli-Technik.
Comité-Bank seit 2011

Video

Verse

Die Bilder vo däm Menschestrom dien ain im Härze wee
Hunderti und Tausigi und dääglig wäärde s mee
Voller Sympatie und Mitlaid mien mr drüber brichte
Die arme, arme Schwizer wo in dütschi Lääde flüchte.

Was trybt is denn ins Schwoobeland? Hejo, es isch dr Gyz
Wobyy - mir Basler andersch tigge als die räschtlig Schwyz
mir göön uff Gränzach, Lörrach oder Wyyl go ummefloone
Zem däwääg unsri eedle neye Trottoir z Basel z schoone.

Dä Quarzsandstai us Alpnach isch schynts ganz e bsunders düüre
Dasch kai Poblem - dr Wessels zaalt das gärn mit unsre Stüüre
Ych hoff die eedle Trottoir-Platte blyybe ooni Schääde
Si aigne sich als Grabstai für die vyyle doote Lääde.

S Wätter spiilt verruggt und mir Inseggte mache mit
Es kunnt so wyt dass s im Novämber Maiekääfer git
Wäschpi stürze sich bald an den Oschtere ins Gwimmel
Und kurz vor Wiehnacht gheye jetzt scho Droone doot vom Himmel.

Mir rutsche stramm noch rächts, doch muess me d Gfoore au erwääne
Y main, so uff dr Karte gsee sinn mir fascht z Ööstriich ääne
no witter rächts do waggse langsam Höögge ussem Kryz
Denn simmer amne Ort in Poole und dä haisst Au-Schwyz.

Amstutz Brunner Köppel Brand de Courten Rickli Frai-
singer Frehner Giezendanner Blocher Nummer zwai
Rösti Rutz Heer Föhn ins Hösli Aeb' und Aesch' und Mür'
Derby het d WHO doch gwarnt: z vyyl Würscht gänn Maagegschwür

E Globi und en Aesch mit Oore und e Parmelin
Vo dääne Babbegaie nimmt me sälle us Bursin
Und sott dä plötzlig sälber aafoo dängge - gardez vous!
No kunnt em Chef sy Töchterli und bäägt: you dreamer du!

E Stüürgschängg do, e Stüürgschängg dert, do isch dr Rammel stuur
will: spaare kaa me schliesslig bi dr Bildig und Kultuur
Drum ischs nid lätz jetz achtzig Millioone z inveschtiere
Sunscht mien mr die in zää Joor wiider alphabetisiere.


Är stoot nur sich und uns im Wääg, dä Baschi, dasch verruggt
wenn s en bruuchti isch es so als haig en d Äärde gschluggt
s Profil isch dürr, me waiss nid rächt: was will er und was soll er?
Im näggschde Lääbe stoot dä glaub am Spaalebärg als Poller

und do no dää vom Guy (ooni Helge)

Me glaubts nid aber mängisch isch är nützlig, unsre Guy
dass är mol en Arzt isch gsi das hilft em do derby
letscht Joor het s Historische Museum profitiert
dert het är e Jungbluetvergiftig diagnostiziert.

Impressionen

von

Dräggspatze

Steckbrief

Zwei freche Vögel mit rollenden Augen. Was sie während dem Jahr so aufpicken, werfen sie an der Fasnacht als geballte Ladung zurück ins Publikum.
Comité-Bank seit 2015

Video

Verse

sGotthardroor und dr SVP-Uusschaffigsdrang
dunggt is, hän ä innere Zämmehang:
mer könne denn die, won is störe,
aifach uusedue dur die zwait Röhre

Obwool i sunscht aigetlig braav
Mach, was Bärn sait, dass me daarf
Han i an dr Herbschtmäss mit sauschlächtem Gwisse
ganz haimlig - in e heerligi Wurscht yynebisse

am Obe luegi mit dr Frau
amigs son ä Realityschau
und find bi dr Kim Kardaschian vo hinde:
i fahr glaub guet mit myner Zimmerlinde

s‘fielt sich mängä in Basel nüm wool
findsch es uusgstorbe, langwyylig, hool
die autofrei Stadt macht di krank
es fäält hald aifach – der Lärm und dr Gstangg

dFIFA het im Fall Blatter Seppi
könne leere vo de Basler Bebbi
Die wisse jede morge:
Ä Dräggsack muesch entsorge

Für die nägscht Fuessball-WM wär Lieschtel d’Idee
Dört wird nid bestoche, well sie hän kai Gäld mee

Ins Bruederholz kaasch nadüürlig immer no goo
Vooruusgsetzt, hesch dy aigene Doggter mitgnoo

än Asylant lütet aa uus dr Schwyz
und sait dänä dehaim: diend jetz loose:
sgoot de Mensche do gar nid so guet
mit dänä Löcher in ihre Hoose

rund um Europa wird gmordet und gschosse
gege Iidringling sin dGränze gschlosse.
Au Basel muess um dSicherheit bange
und het dAbwehr – ganz obe - am Spaalebäärg aagfange

Alls wie mee Gschäft in Basel göön zue
in dr Stadt findisch kuum mee Schue
mit lengere Öffnigszyte – so main i -
findsch aifach drei Stund lenger kaini

S’Auti faart ooni Faarer, dr Härd kocht sälber dehai
dr Rasemaaier lauft automatisch
- und sogar dr Morin goot von ellai

Wenn s Baselbiet by dr Kultur jetzt daas macht
lömmer die aifach nümme an dFaasnacht
und schicke denn die Dummeli
zur Stroof ans näggschti Drummeli

Impressionen

von

Fäärimaa

Steckbrief

Der Fäärimaa ist eine absolute Institution. Er ist auf unserem Fluss genau so wenig wegzudenken wie in unserer Bänkler-Landschaft.
Comité-Bank seit 1998

Video

Verse

Dr Groossroot Auderset bringt uns nööcher
die Mittlery Brugg wäär besser e baar Meter hööcher
jä guet, denn heebe mir halt s Niveau, esoo wie är wett
das goht bi dr Brugg sicher lyychter als bim Auderset

Mir kenne jo d Gfohre im Schiffsverkehr
speziell bi mir, denn ych fahr jo quer
ellay letschty Wuche, doo gsehsch jetz numme
isch mir dr Brutschin drey Mool vor d Fääry gschwumme

Bevoor sich d FIFA no ganz ent-Blatteret
hett sich dr Blatter scho wieder e Job ergatteret
drum wäärde denn d Kuehkämpf vom Wallis
oobe uff e andery Kuehwaid in Kuwait verschoobe

Die Firma doo isch am verlottere
d Motoore nit – aber d Mänätscher stottere
esoo verliert d Kundschaft trotz allem s Vertraue
wenn d Motoore intelligänter sinn, als die, wo sie baue

Das isch e Ranunculus Acris vor eme Wahlplakat
dr Zueschtand vo baidne isch desolat
aber trotzdäm erfreut das Pflänzli, die Griene
denn, andery Wäärbig für die Griene findsch jo niene

E Bligg uff my ROLEX zaigt, y muess myny KELLOG'S lo schtoo
und sofort mit em PORSCHE in d NOVARTIS goo
dört gitt s zeerscht e NESPRESSO – nur zur Orientieryg
das isch jetz halt so e Väärs gsi mit Produggteplatzieryg

Sie kömme us Flagranti über Seldwyla in dr Schenge-Ruum
und die maischte vo dääne Flüchtling mergge s kuum
aber die wo s mergge verzelle enand
die sinn jo no äärmer als miir im Basel-Land

Wenn jetz du dr Toni Brunner wäärsch
wieder zrugg im Stall und gsehsch die Äärsch
und saisch, nai, dää Wäggsel macht doch mir kai Mieh
denn spricht das au nit grad für dyny Kieh

Es muess nuur aine riefe: Kömmed ally in wyss
scho kömme dausigy vo Lütt ans „White Dinner“, däm Gschyss
ganz gratis isch es jo nit gsi – das nur so am Rand
also, yych haa niemerts gseh us em Basel-Land

Wo ych erfahr, dass dr Morin zrugg wird drätte
was mir e soo frieh doch niemools erwaartet hätte
doo ha ych mir dänggt, ganz intuitiv
Noochrichte sinn doch nit numme negativ

Villicht frogsch dy, was d Martullo für e Wääse isch
denn fallt uff, dass sie halb Blocher / halb Bääse isch
nur han y s Gfühl, wenn y die höör schnuure
es druggt immer mehr dr Bääse duure

Das isch dr Pak Kwang-Ryong, äär läbt in Pjöngjang
und hett gsait vor de Wahle: Y glaub, y gang
das isch in Pjöngjang au sehr z empfähle
immerhin – dr Wääg zur Urne darf äär sälber wääle

D Herbschtmäss isch z düür und – zum e baar Frangge spaare
gangy ins Stüggy mit de Kinder go Rollträppe faare
esoo könne d Kinder e bitz öbbis erlääbe
und für s Stüggy laufe d Rollträppe nit ganz vergääbe

Mit em Fumoir-Verain isch jetze Schluss
Schall und Rauch und d Luft isch duss
jetz muesch es nümme befüürchte, em Juillard sy Fauche
wenn du ainy wottsch vorusse rauche

Es gitt Sunnite, Salafischte und Schiite
Wahabite, Bandite und Alawite
doo isch es schwierig z wüsse, unter Religioone und Rasse
für dr Durchschnittsaraber, wäär muess y jetz hasse?

Impressionen

von

Gasladärne

Steckbrief

Eine Gasladärne ist vielleicht nicht CO2 neutral. Dafür erhellt sie Jahr für Jahr unzählige Gesichter in bummsvollen Beizen.
Comité-Bank seit 1977

Video

Verse

As me in Frick der gröschti Dino gfunde het,
ka gar nid woor sy, sait der Hansli, jeedi Wett.
Der gröschti Dino wo mir hänn, sait är zem Vatter,
dä läbt im Wallis unde und haisst Joseph Blatter.

Es maint der Christoph Mörgeli das syg jetzt z vyl.
Me löscht uf facebook ohni z frooge sy Profil.
Das goht jo nid Herr Mörgeli, well das jo so isch:
Me ka doch numme lösche was au wirgglig doo isch!

Unsri Frau Wänger wo gärn Tennismatch duet luege
Grootet bim Spiil vom Stan Wawrinka us de Fuege.
Si butzt sich d Brülle well si maint si gsäch nid guet
Und as der Stan in Underhoose spiile duet.

D Bärner Young-Boys möchte gärn e Titel hoole.
Das broleetet dert der Trainer unverhoole.
No e paar Runde isch me z Bärn denn ohne Worte.
Und gly druff aabe haissts denn: Ulli musse forte.

Mir dien e jeedes Joor e Fasnachtsbummel mache
Und besichtige dert interessanti Sache.
Au fir disjoor hämmer ganz e spannends Zyl
Mir bsueche d Fischer Bettwarefabrik Au bi Wädenswil
(am Mendig hämmer dicht!)

D Frau Spiess - Strich Hegglin, duet au gärn e Bierli dringge.
Syt e paar Monet duet das ihre aber stingge.
Zem Glügg ka si do jeedi anderi Marke ha,
denn si dringgt bombesicher nie me Hürlimaa.

Du darfsch hüt kaim me Näger oder Schwarze saage
Sunscht duet me di wäge Rassismus grad verklaage
Uf de Fuessballfälder isch hüt so e Gmisch
Drum muesch Di frooge - weele do der Farbig isch.

Falls Du im Lääbe mechtisch zylbewusst ersträäbe
Dy Lääbe lääbenswärt und megligscht lang z erlääbe.
Denn rauch was d kasch, suff Wy und Schnaps geege ne Durscht.
Aber iss verglemmi jo kai Flaisch und Wurscht.

Der Keenig Josef mecht e bitzli gsellig sy
Am liebschte mit em Keenig Michel – Platini.
Und au der Kaiser Franz isch zhaa für sottig Sache
Im Knascht bim Hoeness denn e tolle Schieber zmache.

Impressionen

von

Glettyse

Video

Verse

Wäg ere Brugg hänn d Urner sich mit em Teufel verschwoore
drum het vor 800 Joor e Geiss sy Seel verloore
jetz git me däm Gotthard scho widder d Spoore
i glaub die Geiss isch als Leuthardt wiidergeboore

Ooni Quote, kai Sponsor und kai Reklaame
drum bruchts im Schwyzer Schutte Sofortmassnaame
um für Spannig z sorge, vo vorne bis nach hinde
mien jetz d Basler Spiiler ai Bai uffebinde

Herr Blocher, e Froog ze iirer Ritze,
wie zem Teufel könne sii e so sitze ?
E jeede n andere wär scho lang verreggt,
wenn iim e Somm bis zum Hals im Füüdle steggt !

Hesch Probleem mit dynere Bruet
aber zem sy uuse keye fäält dir dr Muet,
due nit verzwyyfle und gib dir schnäll e Rugg
schigg sy zer Kesb und sy kömme niemee zrugg !

Hesch s Rysse, no stopfsch als Maa Viagra blau in Lyyb,
e Pink-Viagra schluggt dergäge neu e rammligs Wyyb,
denn git s no gendermässig so gmischti Laidi,
wie die Conchita Wurscht, die schluggt halt baidi !

D Schwoobe dien an d Flüchtling dängge,
in däm si jedem e n IKEA-Hysli schängge.
Zem sälber baue, do waiss doch jeede Goof,
dasch nit human, das isch e Stroof !

S`gitt e Fortschritt in de gsalbte Hyyser :
Dr Babscht erlaubt s Kinder haue und au Baryyser.
Jetzt darf dr Klerus syne Minischtrante unverhoole,
nach dr gschitzte Schändig au grad dr Arsch versoole !

D Steffi Bucheli, unsere „Benni Turnherr“ mit Buuse,
schnurrt ooni Pause, schynts sogar bim Schmuuse.
sy haig, verrootet iire n Alte,
nid e Mool bim gebääre d Schnuure ghalte !

In Köln dien dunggli Manne pöble
und junge Fraue am Fuudi ummedöple.
Das wär nie bassiert, sage die wo Köln verwalte,
hätte d Fraue gniegend … Abschtand ghalte !

Em Federer sy aagetrauti Schwalbe
duet zem 2. Mool e Doublette kalbe
und bewyyst dr Tenniswält, dr ruuche,
me ka dr Roger numme no fürs gmischte Doppel bruuch

Impressionen

von

Hansli Bargäld

Steckbrief

Wenn Hansli Bargäld den Saloon betritt, schweigt das Piano und es sinken die erhobenen Fäuste. Seine Schüsse ins Schwarze sorgen für rhythmischen Beifall.
Comité-Bank seit 2014

Video

Verse

I heiss zwar Hansli Bargäld, doch laider bin i blangg
Bi däm Probläm do hilft mir, au kai Schnitzelbangg
Doch waiss ich dank em Frehner wie-n-ich das leese ka
I wart nid uff Subventione
I gib mi eige Konto aa.

D' Nationaleootswaale, sinn wie e Märli gsi.
Us em Oriänt kunnt d'Sibel, die grieni Wunderfee.
vo hinter siebe Bärge, kunnt d'Matullo" mit vill Zack
Und d'Zircher geen uf s'Ganzi
Sie mache "Köppel aus dem Sack"

Erschtens han y nid gsait, und zwaitens au nid gmacht
und drittens isch es spoot gsi, und viertens dunggli Nacht,
und finftens, säxtens, siebtens, es isch doch nyt bassiert!
Das sin die „Seven Thinkingsteps“
Vom Baschi Dürr interpretiert!

Das gfäärlig ZIKA-Virus, gryfft s’ganze Hirni aa,
Drum sott me nid go Reise, in Südamerika,
Au z’Basel gits e Granget, die stoot no in keim Buech
D’Lüt keie grad in Ohnmacht,
Bym ene Drummeli bsuech.

D’NASA het zum Pluto, e Sonden uffegschiggt
und welle uusefinde, ob’s dert au Läbe git,
Mir sette d’NASA bitte, zu uns uf Basel z’ko
um schlüssig use z’finde,
läbt denn dä Engelberger no?

D’Widmer-Schlumpf hett kindet, und SVP marschiert,
sie sueche ein mit Kante, und nid z’fescht profiliert,
e uffrächt rächte Schwyzer wo ka mit Gäld umgoo,
de Parmelin kunnt yne,
Ych hätt dr Blatter Seppi gno

Ich glaub die Schwoobe hän do das Usmaass unterschetzt
me hätt do gschiider früeh scho dem Aasturm Gränze gsetzt
S’wird gschobe, grapscht und dränglet in Masse stoot me aa
Es wänn halt alli Schwiizer
die Mehrwärtstyyr erstattet ha

Ha-ha, Bärge, luschtig, Jodle, Milch und Kueh
Schoggimöggli gluschtig, und Cervelat drzue
Ländler, Vierrad-Aatrib, e Schwyzerkrütz im Schnee
So deent dr näggschti Wahlsong
vo dere glatten SVP

Kinder griege schuelfrei, und d‘Stroosse wärde gschmüggt.
Die Junge, die dien juble, die Alte sin entzüggt.
S‘isch nid dr Morin-Abgang, wo me do zelebriert.
Fyrs Drummeli vo nägscht Joor
haig ain zwai Billje reserviert.

Es isch so mit de Fremde sie hasse das isch schlächt
me sett sie nätt behandle das isch mir numme rächt
Waggis, Schwobe, Zürcher die loon i jetz in Rueh
und triff i sone Rampass
schloni mit 80 Kischte zue

Dr Oskar wär gern Kämpfer, doch isch es meh e Krampf
Si Kampf erzügt meh Heissluft, als Gösge täglich Dampf
Das könnt me sinnvoll nutze, und ich weiss au scho wie
im Waldeburgertäli
könnt er mit Volldampf s’Zügli zieh

Das wysse z’Nacht in Basel, das hett mi inspiriert,
drum hann mi fir hytt z’obe, ganz wyss goschtimiert.
Doch schwarz stand ich jetzt vor euch, ich fyyl mi ganz verkoolt,
Mi hett am Aeschblatz,
e VW- Diesel yberholt.

Impressionen

von

Hanslimaa

Steckbrief

Ein Urgestein des Basler Schnitzelbanks. Während über 40 Jahren prägte er mit seinen unvergesslichen Auftritten die Basler Fasnacht.
Comité-Bank seit 1979

Video

Verse

Sii ych bi wiider zrugg vo de Seychelle,
y muess nimm Kokosnüss jagen und Banane schelle.
Jetz hany z Basel e Stell, won y gwaltig muess Dängge,
y schaff bi dr Stadt - und due Poller versängge!

Ich bekämpf jetz erfolgryych das CO-
und bring jedes Mineralwasser-Blööterli hai.
Die vermisch y mit Haane-Wasser – ganz banal
und verkaufs in Fläsche - als Champager de Bale!

Rain rächnerisch – han ych mir saage loo,
het d Menschhait en 9. Planet bikoo.
jetz goots non e Monet – händ bitti Geduld,
denn isch dä Planet - am Klimawandel schuld!

Mi Frau die spart und duet no mee spaare,
si kauft drum nur no die billigschte Waare.
Falle d Priise no wyter, duet si mir oohni z geniere,
dr Salat mit Essig und Haizöl serviere!

Sii- ych find das garnid glatt,
das Diktatoregschnatter in däm Äxtrablatt.
Me sott alli Diktatore – ych wurd derfir sorge,
uff dr dunggle Syte vom Mond entsorge!

Au finanziell fäält uns dr Streller no immer
und goot dr Safari wirds au als wie schlimmer.
D Kasse glingelet wemmer an Embolo dängge
Und goot dr Morin – dä kasch nid emool verschängge!

In dr Primmeli han y no Hulliger-Schrift gleert,
jetz hets vo Schnierli- uff Basis-Schrift keert.
S isch egal wie me “HAMPE” schryybe duet,
am Beschte wärs - är nimmt dr Huet!

Dr Ueli Murer duet em Parmelää,
non e ghaimi Waffen iibergää.
Er zaigt em wieme dr Find verschreggt,
wemme d Soldate - in e Wawrinka-Hoose steggt!

Heere Si‘s au – wie die im Haifischbeggi kraische
und wie die sich politisch dien Zerflaische?
Speeter gseen Si, wär wäge wäm uff d Naase keit,
im nägschte Film vom Tarantino: “The Beautiful Eight”!

Ych frog e bekannte Medie-Maa,
fir was men e Zytig susch no bruuche kaa?
D NZZ legsch an Boode, wenn am Moole bisch
und in dr BAZ luegsch nur no - wär gstorben isch!

Daa – Daa – Daa- Daa, Dadaa- Dadaa,
Dadada – Dadada – Dadada-Dadaa,
Jä Daa – nei Daa – jä Daa – nei Daa,
Daa, will dr Wessels e Graabe haa!

Wenn e Dichter dichtet - gits e Gedicht,
wenn e Sanitär dichtet - sin d Rööre dicht,
wemme d Stadt verdichtet - verliert si s Gsicht
wemme mii dät verdichte - hätt y weniger Gwicht!

Mai hung ka wi du huu tscha tschoo,
Nai so mi hung cha nid la goo.
Yych bass mi aa - als alte Sogge,
wenn do inne - alles Chinese hogge!

Impressionen

von

Heiri

Steckbrief

Jo, jo, jo - diesen Baselbieter haben alle Städter schon lange ins Herz geschlossen. Grund: Er ist einfach ein geiler Siech.
Comité-Bank seit 2006

Video

Verse

Mir Baselbieter bruuche euchi soudüüri Uni nid.
Mir häi z Sissech d Buureschuel, wo s für euse Noochwuchs git.
Ohni die Gstudierte wärde mir vill günschtiger fahre.
Wenn s denn käini Ärzt me git, chöi mr au d Spitääler spaare.

Mir bruuche nid nur käi so Uni, s glyych gilt au für d Kultuur.
Bi dr Kultuur, do sy mir Buure generell sehr stuur.
Mir liebe nur d Literatuur, die choschtet käi Föiflyyber.
Mir lääse tääglig in dr Zytig d Inserat vom Hieber.

Wyss stoht em Heiri äifach nid, wyss macht mi schrecklich bläich.
So hock y bläich am White-Dinner und froog: Was söll dä Säich?
E Walliser mit Dôle im Goal säit: Iir Basler syd die Beschte,
Iir fyyret mit yysch em Blatter Sepp schyyni wyssi Weschte.

S Groosi vo Buckte lütet aa: Mr häi e Buur im Bundesroot.
Dä zeigt s all dene Glöön in Bärn, wo s in Zuekunft duuregoht.
Für s Kollegialiteetsprinzip isch dä Barmelin e Spitzechraft.
Als Wyybuur wäiss dä hoorgenau, wie me mit Fläsche schafft.

Häit dr s gseh am Spaalebärg? Dört stönde jetz sächs Pfoschte.
Si sy us Chroomstahl, het äin gsäit, damit si nid schnäll roschte.
Die Boller stönde stark und stramm. Si sy rund und oobe flach.
Si halte für d Basler Innerstadt symboolisch Dootewach!

Me will d Spitääler zämmelegge, Sii, dasch käi Furzidee.
Nur gmäinsaam chönne mr spaare, s Bruederholz bruucht niemer mee.
Öb Basel oder Lieschtel isch mir doch glyych, Gottloob.
Dä Dokter, wo mr hindenyyneluegt, isch äinewääg e Schwoob.

Liebi Basler, machet doch käi Gschyss wäge achzig Millione!
Schliesslig syt diir sälber tschuld, dir wäit jo z Basel wohne!
Und überhaupt, dr gröschti Däil het dr Heiri finanziert.
Ich ha nämlich letschti Wuche drei Mool bi euch parkiert.

Y will mit mym Hof an d Böörse, y will au emol abkassiere.
Bevor y aber starte chaa, muess y zerscht no inveschtiere.
Y ha wäg dr Frauequoote e neue Muuni kauft.
Dä han y denn Magdalena Martullo Blocher dauft.

Sit letscht Johr het Basel e Köönig. Basel isch jetz e Monarchie.
Dr Köönig häisst Marco Streller, nid öppe Morin Guy.
Är isch treu, het vill Charakter, isch dr Traum vo de Schwiigermieter.
Aber s bescht am Basler Köönig isch: Är isch e Baselbieter.

Die mittleri Brugg isch z niider. D Schiff miesse sich duurezwänge.
Y weiss nid, wo s Problem lyt. Die Brugg muess me nid spränge.
Me chaa in Weil e Haafe boue für d Tanker und für d Frachter.
Für die letschte Meter bis in d Schwyz näme d Waare denn dr Achter.

Y sitz im Summer uff mym Traktor und güllere myni Matte.
Y gniess dr wunderbaari Gschmack, y gniess d Sunne, gniess dr Schatte.
Plötzlich stinkt s. Dr Gschtank isch heftig, drum styyg y ab mim Chaare.
Do gsehn y, aha, dört isch grad äin mit sym VW duuregfahre.

D Brite häi e Royal-Baby, dasch e richtige Sunneschyyn.
Drzue häi si vier Prinze und notürlig au no d Queen.
D Schwoobe häi e pensionierte alte, häilige Vater.
Mir häi au en usrangschierte Pabscht: Mir häi dr Seppi Blatter.

Albanie schuttet gege d Schwyz, das sorgt für Unrue uff mym Hof.
Gege sich sälber schute, das finde fascht alli doof.
Dasch gnau so wie katholische Sex, erkläär ych s myyne Chälber.
Das darf sogar dr Churer Bischof: Schutte mit sich sälber.

Dr Helmut Schmidt isch nümme doo, är het ys läider verloo.
Nüünzig Joor lang het dä graucht, är isch trotzdäm nümme doo.
Ich ha läider ungsund gläbt, drum wird y früener müesse goh.
Hätt ich Dotsch doch nid jeede Daag e Wurscht zum Znüüni gnoo!

Impressionen

von

Penetrante

Steckbrief

Auffallende Kostüme, spitze Nasen und kräftige Stimmen. Mit wohltuender Penetranz singen die Penetranten über Gott und die Welt.
Comité-Bank seit 1997

Video

Verse

D Sibel Arslan, nei in Bäärn, das passt no guet.
Die waiss scho beschtens wie me Schulde mache duet.
Und s Nationalrootshonorar isch scho verwändet,
fir die ganz Legislatur isch s scho verpfändet.

Amo Homines haisst ladyynisch - ich bi schwuul!
Der Charamsa und si Mausi finde s cool.
Der Franziskus rieft, „FINITO, Schwuuli hai,“
ergo solus est – jetzt isch der Pabscht ellai.

D Widmer Schlumpf het gfroggt - und mir hänn gää als Root:
„S isch an der Zyt, dritt zrugg, s isch e scho 8 Joor z spoot.
Spiil mit de Änggel, liis ne voor uss Winni Puuh.
Mir hoffe die hänn nit der gliich stuur Grind wie du“.

Me isst e Beggeschmutz, anstell vom Näägerkuss
und wenn d e Moorekopf verlangsch, kriegsch ains an d Nuss.
Politisch unkorräggt isch alles und scho bald,
saisch uss luuter Angscht em Schwarzwald nur no Wald.

Helgen mit den Penetranten:
Die Lischte vo de riichschte Schwyzer macht is muff.
Mir hänn gsuecht und gluegt, doch nai mir sinn nit druff.
Jetzt sinn mir zimmlig konschterniert und s macht is grangg,
me muess doch gsee, mir sinn doch immerhin e Bangg.

Das isch kai Performance, iir miend das begriffe.
Au wenn sich vyyli Männer do druff dien verstiffe.
Doch s Baudep maint, mit Bligg uff soo vyyl Silikon,
es isch bewilliget, als Bauinstallation

Wer de FCB es bitzeli duet känne,
weiss dass die jetz neu em Bölle noche ränne.
Und wenn en Spiler e chli zwenig umerännt,
wird er vom Fischer noch em Spil als Böög verbrännt.

Der Petrus sait: „loos Sepp, du bisch e bitz e Lute
und erscht no gspeert, drumm darfsch du nit im Himmel schute.
Faar zer Höll, do Oobe hesch du di verirrt,
wirsch es gsee, deert unde lauft s fir di wie gschmiirt“.

Der Wessels will in Basel d Parkblätz ganz verbiete.
Äär maint, me ka jo au im Baselbiet ain miete.
Unser Parkblatzgsuech das wird uns glatt verwaigeret,
der letschti Parkblatz wird näggscht Wuche drumm verstaigeret.

Der Maurer sait, fimfdausig Stutz koschtet ai Gweer.
Fir fuffzäädausig kriegsch glaub zwai und no ains meer.
Fir die Dreisatzrächnig kriegt äär scho vyyl Loob
und fir sis neie n Amt leert äär scho d Niinerbroob.

„In Sache Burka draage“, maint der Brunner Toni,
„ganz eerlig, ich gsee d Fraue aifach lieber ooni!
Doch wenn s denn si muess, mache mir kai grosses Gschiss
und erlaube die uss Stoff mit Edelwiss“.
„What are the seven thinking steps“, froggt d Frau Martullo
und stoot am Reednerpult grad wie ne wilde Bullo.
So wie bim Stierkampf kunnt bi iire jeede draa,
nur dass e jeede Stier vyyl besser Änglisch kaa.

Langvers zum Mubahelgen:

Ändlig git s in Basel wiider e Event.
Fir d Miss Schweiz Waal kemme Promis wo me kennt.

D Beatrice Egli schaidet uss, es isch banal,
doch dangg em Utter gwinnt si bi Miss Simmental.

D Eva Herzog kunnt und findet s gar nit fair,
will si gwinnt d Kategorie Miss Frigidaire.

D Leutenegger Oberholzer schiggt me fuurt,
derfiir gwinnt sii der Wettbewäärb zer Miss Gebuurt.

Kai Chance het d Anita Fetz, das macht sii ranzig.
D Maas wääre ideal, 90 – 100 – 120!

S Tamara schitteret im Interview fatal,
si maint der Genitiv sig s glyych wie genital.

Als Delegierti vo de Schwoobe kunnt d Frau Merkel,
si gwinnt der OLMA Spezialbryys „Hübsches Ferkel“.

Au d Helen Fischer isch derbi, s dien alli loobe,
doch die vom Baselbiet wei eifach keiner Schwoobe!

Au Tina Turner kunnt dää unverwieschtlig Fääger,
doch die vom Baselbiet die wei au keiner – Schwaarze.

D Widmer Schlumpf dritt gaar nit aa, so kaa me lääse,
es isch will sii kai Paarkblatz kriegt fir iire Bääse.
Als Iiberraschig dritt d Martullo-Blocher aa,
doch d Schwäärgwichtsboxer sinn erscht näggschti Wuche draa.

Impressionen

von

Peperoni

Video

Verse

Bi Moord und Dootschlaag, bi Intrige,
heersch immer: „d Bolizei suecht Zyyge“.
Baschi loos, wenn‘d au emool, en Erfolg wotsch bueche;
Wie wäär’s, wenn statt de Zyyge, emool wurdsch d Raiber sueche?

Wääge Würscht kaa me lut WHO
s Bstegg abgää - so noo dis noo.
Gang froog emool di Metzger, denn luegt dä d Würscht im Gschtell aa
und sait: „Am deedligschte isch dängg, do dä MORDadella.“

Villic..cht ooo nit ee… do bin y froo..
Das - chhhha me soo …. nit eee.. gäute loo!
Mir müend ..ee … und …das isch wichtig, … so erkläärt ys fascht all Daag,
der Schneider Ammann, Schlaag uff Schlaag, unseri Wirtschaftslaag.

Wenn’d Hunger hesch, darfsch nit vergässe,
me kaa jetz au Inseggte ässe.
Määlwüürm, Grille und so Zyyg, doch nimm nie uus Versee,
so Spinner wo “in-Seggte“ sin, das git Ranzewee.

D Flichtlingsmueter Simonetta
bietet jedem wo kunnt e Bett aa.
In Schutzrüüm und Kasäärne, und denn git‘s no das Phagg,
das schlooft, bis es verhaftet wird, z‘Ziiri im Baur au Lac.

Bresidäntin wärde will y,
seit d Hillary zue iirem Billi.
Die alti Schachtle wett dä Job und voll Ibermuet,
frait si sich uff e Braggtikannt …. dä het si drum no z guet.

Der Morin Guy het ys verzellt,
är heeri uff, d Waiche sin gstellt,
fir das won är no mache will. Jä Guy waisch du denn nit,
dass es uff eme Abstellglais, gar keini Waiche git.

S Theater wott, han y vernoo,
d Landschäftler soo nimm yyne loo.
Die sette me draa zaale, doch dängget draa bim zwänge:
Ooni d Basler uss em Baselbiet, wurd’s Tabourettli länge.

Dä Helge do isch, wie si gseen,
so glunge wyss und wunderscheen.
E Gschyss in wyss, nur wyss in wyss und was me druff ka gsee,
das isch denn nit s White Dinner – dasch der Embolo im Schnee.

D Landschäftler, die arme Sieche;
Y main do unseri Regio Grieche.
Die pfyffen us em letschte Loch und lyyde Hellegwaale.
Falls si der Toni Lauber gseen, dien s em e warmi Subbe zaale.

Unter uns, es duet fascht wee,
wenn ych der neyi Playboy gsee.
Kaini blutte Wyyber me, und eppis isch frapant:
D Artiggel dungge mi uff s Mool, au nimm so intressant.

„Die achzig Chischte wei mer nit!
Do macht denn d SVP nit mit!
Nur wääge däre Uni do, wärdet zerscht konkreet.
Und überhaupt, was isch das gnau, en Uniwersideet?“

„Grüezi, do chönd‘s de Fischer gsee,
Bettware Au … am Zürisee.“
Dä zeigt dert mit em Thämperamänt vomene doote Fisch,
dass in Ziiri s Hinderland, au nit vyyl besser isch.

Impressionen

von

Pierrot

Video

Verse

Dr Blatter Sepp haig glooge,
drum isch är us dr FIFA gflooge,
au s Pflaschter uf dr Bagge sygi fuul,
das gheert bi ihm, doch uf s Muul.

Die zwai Millione, sin das myyni,
jo, das sin jetzt dyyni,
sait dr Blatter zem Platini,
im Brinzip, wäre s jo dr FIFA syyni.

Dr Hoehnes wird us dr Kischte entloo,
är darf jetzt wider haime goo,
s ganze syg jo nit fir d Katz,
är miech jo numme em Blatter Blatz.

Dass d Wahl in die richtigi Richtig lauft,
hänn d Schwoobe d WM 06 kauft,
drotzdäm hänn si nit dra dänggt,
dass s Gäld nit no fir dr Titel länggt.

In dr Schwyyzerfuessball-Nati,
soll s mit em Petkovic no glatt si,
die maischte Spiiler syge froh,
ändlig ain wo me wurd verstoo.

D Expärte saage Schutte isch gsund,
und au d Balle immer no rund,
nit fir alli isch das e Gschängg,
wenn i do an FC Ziiri dängg.

Dä Fischer do het scho Muet,
als Trainer isch är erscht no guet,
jä i zie vor im sogar dr Huet,
solang är numme mit dä Händ schwätze duet.

Us de Medie hesch s kenne erfaare,
s Schwyzerfäärnsee mues jetzt spaare,
me sehts bereits im 10 vor 10,
deert mien si scho e Clochard näh.

Dr Sascha Ruefer isch gaischtig nimm so zwäg,
drum verwäggslet är d Wuchetäg,
me muess en jo wäge däm nit stroofe,
vo mir us ka dä s ganz Joor duure schloofe.

Dr heggschti Turm im ganze Land,
e huffe finde, es syg e Schand,
d Archideggte heert me verzelle,
me haig numme welle, Ziiri in Schatte stelle.

Kuum isch s Fümoar verschwunde,
het me e nej s Brobleem use gfunde,
au Flaischliebhaber kenne Kräbs bikoo,
me seht si scho vor dr Baiz, bi de Raucher stoo.

E riise Buess fir VW,
das macht de Schwoobe so richtig weh,
Milliarde fliesse in d USA,
i ha gar nit gwisst, dass me Käfer mälche kaa.

E Schneemaa uf-ere byygi Holz,
isch dä Ziircher ire ganze Stolz,
egal ob dr Summer scheen wird oder durzooge,
i mach sowiso um die Stadt e grosse Booge.

Yber d Helfti macht e suure Stai,
statt go wähle blybt me lieber dehai,
und die glyche mache e riise Gschrei,
gwunne haig wider die falschi Partei.

Impressionen

von

Schlyffstai

Steckbrief

Der Schlyffstai ist ein hochkarätiger Diamant der Bänkler-Szene. Die Verse haben Witz und der kunstvolle Vortrag ist ein absoluter Genuss.
Comité-Bank seit 2006

Video

Verse

Melodyy: Der Nippel vom Mike Krüger
Im Summer hän mir welle mol spontaan in d'Ferie fliege.
Mit Billig-Eel - so hän mir dänggt - kasch s'Billig-Fliege iebe.
Fir d'Bildigsrais hän mir dernoo dr noochi Oschte gwäält,
Nur an Iberbligg hett's uns denn bald scho gfäält:

Dr Syyrer hett drum Strytt mit dääne vom IS, Und die hän mit Rebälle und Iraner Stress.
Will die Schiitte kepfe sin d'Ayatollas muff uff d'Saudis.
Uss Sicht vo däne sind derfiir d'Iraker Raudis.

D'Putin-Bomber hebe fir en Assad ab, D'Tiirke gseen's nit gäärn - schiesse dr Voogel ab.
Das steert jetzt wider d'Kurde, die sin am aigne Staat grad draa,
Und alli zämme flueche iiber d'USA.

Am Änd isch d'Rais seer leerryych gsy, das kaa me nit vernaine:
Bisch Find vom Find, findsch Frind bim Find, Au wenn d'Frind Find dien maine.
Uns Schwyzer isch's egaal, will mir sind nit vo dääre Wält.
Verkaufe Waffe ganz neutral und hiete dääne iires Gäld.

Melodyy: C-A-F-F-E-E vom Carl Gottlieb Hering
Lueg mool dr Erdogan - hett e Schnäuzli und dr Greessewaan.
Findet, Meedie gheere grad eliminiert, will das nur zu meer Demokratie-e fiert.
Dr Putin wott är vom Tisch dermit är dr ainzig Spinner isch.
Dr Kim Jong Un schreyt grad dry: «Ych wott der greeschti Spinner syy!»

Melodyy: Är isch vom Amt ufbotte gsy vom Mani Matter
Bim surfe uff em Netz han-i us Gwunder und zvyyl Zyt
Mol gluegt, was es uff Ricardo so alls z'erstaigere gitt.
Doch kauft han-i denn nyt – ych ha dr Sinn dervoo nit gsee.
Im Grund gnoo kenntsch fir das diräggt e Bebbisagg z'Hilf nee.

Uff Youtube bini denn e bitz go Schnitzelbängg go loose.
Doch rächts am Bildschirmrand erschyynt grad Wäärbig fir die Hoose,
Won-i vor finf Minute aagluegt han, s'gääb zwai fir drei.
Ich ha bitz dr Verdaacht, mi PC schafft fir d'NSA.

Das heert nimm uff! Die Hoose isch jetz immer mit derbyy:
Bim Ferie Bueche, Faarblaandrugg, surf ych nimm ooni si.
s'E-Banking wett si kaufe, will si sig so scheen und schlicht!
Und mittlerwyyle zaigt mir Facebook nei die Hoose statt mi Gsicht.

Vor lutter Hoose han-i bald my Bildschiirm nimme gsee:
Mit Pop-ups, Banner, Google-Mobbing, Clickbait und no mee.
Z'letscht han-i mir mit Mastercard die Hoose sälber gschänggt,
Und ha si denn dehaime in däm Bebbisagg versänggt.

Melodyy: Banana Boat Song vom Harry Belafonte
Hou je minee!
D'Schnitzelbängg hän friener iber Ziircher glacht.
Hitt wäärde Väärs ibers Baaselbiet gmacht.

Im Baaselbiet kasch ginschtig woone!
CHOR: Will d'Stadt subventioniert's mit achzig Millione.

S'Baaselbiet isch immer scho gaschtfrindlig gsyy
CHOR: Welcome Refugee uff dr Chemie-Deponie.

Baasel-Land, s'isch e Schand und im Grund allerhand fir dä Stand.
CHOR: Dr Unverstand gwinnt langsam Oberhand.

D'Baaselbieter wänn e Uni-Institut.
Dasch wichtig, will: «Bildung tut gut!»

S'isch nit nur schlimm, sin si dr letschti Pfoschte.
Derfiir kunn kei Chinees verbyy zum si go poschte.

Im Baaselbiet wird nei weniger gstoole.
Will d'Ybrächer wisse - do git's nyt mee z'hoole!

Melodyy: S'Thema vo «Der Pate» vom Nino Rota
Du hesch fyyrsoorglich d'FIFA als Famiglia gfiert.
Das hett nit z'letscht fir dini Frinde rächt rentiert.
D'Erträäg dien spriesse - Schmiergälder fliesse.
Alli kassiere, drum git's kain, wo regglamiert.

Mir zwyyfle, as d'em Putin d'WM graatis gisch
Und au as si nur per Zuefall z'Katar isch.
Sklave-Aarbed - isch drum nit dyyr
«En Wältcüp cha me nid cheufe» - usser bi dir!

Melodyy: Je ne regrette rien vo dr Édith Piaf
Dr Franz hett iim e baar Milliönli gää. Dr Sepp hätt si jo au nit miesse nää!
S'Ainzig, wo zellt, isch dr Ball — und s'volle Boorpmenee.
Korruption wird bi uns im Fall nur als e Summermäärli gsee!

Melodyy: 36 Grad vo Zweiraumwohnung
In Paris hän si mol wider ibers Klima diskutiert:
Wän mir d'Wält zwai Graad wermer oder drei?
Mir hän nit gwisst, as me das dää Wääg aifach styyre duet -
mir finde's guet und fordere frei:

36 Graad, wie im letschte Summer - jede Daag in Ryy und gar kai Kummer
Im Winter Shorts und Schii uff Kunschtschneebänder.
Sunneblueme an de Ränder.

Am Ryyboord voller Palme kasch mit em Holzgrill tääglig qualme
Mit em VW and Buvette, Sambatanz in Adilette.

Nur d'Ysbääre sin am Schmolle, tryybe ainsaam uff dr Scholle.
Will s'Meer so uffghaizt isch, gitt's zum Z'nacht nur kochte Fisch.

Fir d'Fasnacht git's Brognoose, Schnitzelbängg in kurze Hoose
Am Cortège gaffe mi Bambini uff alti Dante im Bikini.

36 Graad drumm au im Winter - do spaarsch Kleidig bi de Kinder
Eel bruchsch kains, de duesch bim Haize spaare.
So kasch lenger mit em Auti faare.

Dr Wessels findet's doll, är lacht - und hofft, as das sym Poller nyt ussmacht.
Dr Baschi Dürr befiilt ganz still, as d'Schmiir das alles dulde will.

Melodyy: La Isla Bonita vo dr Madonna
Letscht Joor, Summerferie: in Griecheland,
Mir drei gniesse d'Rue im Sand, Mojitos ir Hand.
E Schiff kunnt und spuggt Lytt an unsre Strand.
Um uns drei isch es heggtisch gsyy, d'Rue isch verbyy.

Lutt, kai Maniere und Smartphone derbyy.
Si bsetze dr Strand, hogge iiberaal hi.
Hän saufrächi Goofe und komischi Bryych.
Si schwätze iiri Sprooch und sin sunscht au nit schyych.

R: Lueg si aa, die schreege Lytt, rede gross und kenne nyt.
Kemme neecher als me wett - wän am Änd mit diner Frau ins Bett.
Malta, Kos und Zypere. Egaal wo s'isch, si hypere.
Isch allne klar, vo wämm d'Red isch? Dr dyttsch Pauschaltourischt.

Melodyy: Looking for Freedom vom David Hasselhoff
Mir singe jetzt e Lied fir d'Schwoobe.
Fir uns sind d’Schwoobe d’Nummer ains.
Mir wänn si fir iir Motto loobe: Lieber vyyl Brobleem als kains.

Die Dytsche blyybe rueig hän Willkommenskultuur,
die kennte meereri Millione Flychtling haa.
Wenn d’Merkel dääne sait: «Wiör schaffn das schoon»,
Denn glaube die bis zum Schluss do draa.

Dr Gliimaamotoor vo VW hett e Fäälfungtioon,
Doch dr Umwältschutz hett z'Dytschland Traditioon.
In Berlin mache si’s voor: Si investiere e Billioon
in e Fluughaafe – ooni Läärm und Emissioon.

Dert fliegt bis hit kai ainzigs Flugi. Das isch dr Merkel doch egaal.
Die gwagglet zwaimool mit em Fuudi – und gwinnt die neggschti Waal.

D'Schwyz hett Traditioon als e Flüchtlingsraisezyyl,
Drum waiss e jeedi Gmaind, wie d'Flychtling kasch umgoo.
Doch sin mir jezt belaidigt vo Chur uff Mimliswil,
will alli Flychtling - lieber wänn uff Dytschland goo.

Bi uns, do loot sich kuum ain bligge! Schwyyz Tourismus schloot Alaarm.
D'IKEA baut uns Billighitte. Die gän herrlig waarm.

Wieso hän die nit zue uns welle? Mir hän doch Bäärge, Schoggi, Schnee.
Bi uns kasch uff dr Rächtsstaat zelle: Wär ussgschafft wird, sait d'SVP.

Melodyy: Message in a Bottle vo The Police
D'Evi Widmer-Schlumpf findet's nimme glatt:
Acht Joor Gegewind, dr Staibogg hett's jetzt satt!
Im Bundeshuus hän si drum wiider gwäält
D'SVP kunnt druss, wie me mit «Kandidaate» quäält.

Wyybuur, Rassischt oder Blocherklon. Z'vyyl Promill und frankophon.
Dr Zuger Kirsch kasch nit vertraage. Dr Tessiner will nur Italiääner jaage.
Wär nit spuurt, dä leen si aabe. Dr Bescht isch no dr Zottel.
(Wär nit pariert wird exkommuniziert!)

Dr Toni Brunner hett si Amt uffgää
Und - das passt zur Schwyz - an e Röschti übergää.
Au andri Bolitigger wäärde bald abdauche.
Sogaar dr Helmut Schmidt hett uffgheert mit rauche.

Dr Hollande hett halt kai Format. Dr Obama stoot au nimm paraat.
Dr Assad hoggt uff em Pulverfass. Dr Le Pen isch dr Dochter z'krass.

Z’Baasel goot dr Guy. (Dr Morin goot, und kai Daag z’spoot.)
Är isch ganz e Nätte gsyy. (Dr Stadtpräsidänt isch als Huusarzt kompetänt.)
Wo soll dää jetz hi? (Qualitäät duet Noot, dä muess in Bundesroot!)

Impressionen

von

Schnaabelwetzer

Steckbrief

Schon das Goschdym bereitet auf einen bunten und rassigen Auftritt vor. Und er kommt. Mit bestechenden Pointen und Helgen.
Comité-Bank seit 1997

Video

Verse

Händ ihr scho moll Verstopfig ghaa? Jä, daas isch scho nit glatt.
De hoggsch und hoggsch und druggsch und druggsch und s findet gaar nyt statt.
Und bisch noch Stunde ganz k.o., erschepft und puudelnass,
denn dängg nur an d Frau Merkel, wenn si sait: «Wir schaffen dasss!»

«Jä nai», het d Mamme Köppel gsait, wo sii erfaare het,
Ass ihre Sohn, dr Roger, Naazi-Lyt aahimmleret.
«Jetz isch es z spoot», het sii sinniert und sich an d Stirne glopft.
«Hät ych dä nur vor fuffzig Joor in d Babyklappe gstopft.»

Im Wytsprung, Schwimme, jeedem Sport hänn d Russe abgarniert.
Die hänn mit ghaime Doopingsäftli d Laischtig optimiert.
Verzelled das em Morin nit – ai Schliggli in dr Noot
Und scho kasch nimmy sicher syy, ass dää au wirgglig goot.

Ych gang alls zu dr Julika und wird vo ihre quäält,
Wird gschlaage, gfesslet, aabegmacht– ych ha das sälber gwäält.
Das isch fir mii als Mänätscher dr ideali Drill,
Wenn ych moll bi dr Frau Martullo-Blocher schaffe will.

Das Hindli vo dr Meyere isch glai und digg und fett
Und haisse duet s Prinz Charles, will s schampaar groossi Oore het.
Jetzt het sy sich zem Hindli aane no-n e Scheefli kaufft
Und het das arme Unschuldslamm – Blatter Seppli taufft.

Dr Puls uf hundertachzig, Ooresuuse, Schittelfroscht,
Migrääne, Buuchgrämpf, Schwaissussbruch – was het dä Maa bigoscht?
Grad nooch dr Undersuechig maint dr Doggter Jon Padrutt:
«Dä Maa isch dotaal gsund – numme s Händy isch kabutt.»

Wie gfalle Ihne d Stroossekraisel doo in unsrer Stadt?
Die Schigganiererei, die findet d SVP nit glatt:
Muesch brämse, waarte, ummeluege, blochere kasch nit.
Und s Schlimmschte: S het im Kraisel immer dää vo linggs Voortritt!

Das Fuurze Daag und Nacht – jä Sii, das isch e Riisequaal.
Y bruuch e Doggter und y gang als Nootfall ins Spidaal.
Die hänn kai Aanig, wie me so vyyl Waarmluft reduziert.
Drum hänn sy mi zue VW gschiggt, die hänn das patentiert.

Ych zaal kai-kaini Styyre me – bloo-bloosed mir in d Schueh!
Wa-was dert z Lieschtel oobe laufft, ych ha-ha jetze gnue!
Sä-sällre Pegoraro gib ych nur e Ho’Hoosegnopf.
Die het sit Joore numme Stroh-Stroh-Stroossebau im Kopf!

Die ghaimi Yebig «Ains-zwai-drey» vom Schwyzer Milidäär
Laufft ab im Plaanquadraat X-zwai – do funggt dr Gfreiti Bäär:
«Dotaal verloffe, sinn im Saich», dr Fruscht isch riisegross.
«Stoggdunggel – alli Lääde dicht do in dr Freye Strooss.»

D Affääre Dieter Behring – Sii, das laufft jetz scho elf Joor.
Millioonebschiss, Gäldwäscherei, Betrug wirft me däm voor.
Goot daas no lang, denn isch s verjäärt und äär isch butzt und gsträält.
Und wird als näggschte Bresidänt – vo dr Fifa gwäält.

Mir kauffe bi Zalando yy, mien nimm in Laade goo.
Fir ai Baar Hoose leen mir uns zer Uuswaal siibe koo.
Und schigge alles portofrei denn zrugg, was uns nit stoot.
Schaad, gitt s kai Retuurpäggli fir dr ganz Regierigsroot.

Impressionen

von

Schooffsuuri

Steckbrief

Sorgt für etwas Entschleunigung an der Fasnacht. Während sich das Publikum entspannt zurücklehnt, singen die Schooffsuuri Verse, die sitzen.
Comité-Bank seit 1992

Video

Verse

I ha an der Wienacht vorusse grilliert,
s Wätter isch waarm gsy - dinn hätts au geniert.
I lueg a me Fluugi verdraumt hindedryy
Und dängg gopferglemmi wo fiert das no hii.

Am Oggdooberfescht z Minche leen sich d Männer lo goo,
Me pfätzt Frauefuudi, lipfts Dirndel dernoo
Am Ballermaa z Mallorca ischs fir Fraue extrem
Und Sylveschter in Köln isch e Flichtlingsbroblem.

E Bueb isch versoffe, wiird aagspielt an Land
Und jeede sait „Jesses – daas isch allerhand“.
Sinn d Flichtling bi uns – no verstand ich denn nit
Ob s z vyyl Flichtling oder aifach nit gnueg Mentsche git.

Hit luegsch uf s iPhone, bisch im Drugg hesch kai Zyt
Was zringsedum goot inträsiert Di jo nit.
Wie d Wält isch und s Lääbe waisch glyych ganz genau
Das leersch denne z Nacht in der Bacchelor Show.

Gniess ich als e Glepfer no dängg i – herjee
Hoffedlig het mi kai Landjeeger gsee.
S Choleschterin isch vom Deifel, au s Salz ab sofoort
Vo VW Motoore sait kain me e Woort.

Der Parmelin sait is, im syyg s denne glyych
Är spändi alles vo syynere Lyych.
Do kaasch Di frooge ob ain vo däm eppis will
Suscht hätt är am Ändi bestimmt z vyyl Promill.

Ich ha im Brunner zem Siig grateliert,
und gsait, isch das s näggscht Mool denn au garantiert ?
Der Dooni maint stolz – jä Du wiirsch es scho gsee,
Mir spaare bi der Bildig – no kemme no mee.

Der Morin husiert fir sy Stadt uf der Wält,
ob s nutzt kaasch nit saage – s koscht numme Gäld.
E gscheiti Regglame , macht ain – jä genau
Dää Bettwaare-Fischer vo Wädischwil-Au .

Alls redt vo Flichtling und maint die vo wyt,
nur glaub i es kunnt no en anderi Zyt.
Was mainsch, wär denn alles uf Baasel hi drängt,
wenn dääne in Lieschtel der Bulver nimm längt.

Im Fäldrääbe z Muttez wäärde Flichtling parkiert,
die wäärde deert alli ganz genau registriert.
I ha sofoort dänggt, das mues d SVP syy,
wäär suscht duet Flichtling uf e Müll-Deponie.

Wenn ich in d Abedeeg gang – jä Si denn goots loos
Was die alls wänn wisse, das isch kurioos
Wäg aim Aspirin - Si, das isch doch der Hohn
Do git s denn gaar nyt vo Dischgreetion.

Der Assad bombt all syni Landslyt in Dood,
z Baryys wiird ai Frytig die ganz Stadt bluetroot.
Und ainewääg glaube mir allewyyl draa
As e Ryssblei vyyl mee als e Kalaschnikov kaa.

Impressionen

von

Schunggebegräbnis

Steckbrief

Selten sorgt ein Begräbnis für soviel Witz, Unterhaltung und gute Stimmung wie dieses. Übrigens nicht nur bei Veganern.
Comité-Bank seit 2012

Video

Verse

Zwei ganzi Container sin z Rotterdam verschwunde,
me hett si z Birsfälde und z Basel denn gfunde,
Kokainbärge, wyss wie Schnee,
sovyl Schnee hänn mir scho lang nümm gsee,
wohrschynts isch s so, wie s uns schwant:
S näggscht «White Dinner» wird scho plant.

Kauft s Kokain e Banker yy,
no seisch däm Wyssgäld-Strategyy.

«Jaaa... irgendwie sicher ... de Böle la laufe...
Jaa klaar... ääh natürli ... vo dem chasch der nüüt chaufe...
Jaaa sicher... sehr wichtig...
Jaa schoo, säb isch richtig ...» – – –
Das git e guete Bundesroot,
wenn dr Schneider-Ammann goht!

Doch bis dä Schneider-Ammann goht,
isch s für dr Fischer au scho z spoot.

Jetz goht der Guy gly, das seit är usdrügglig,
mir schiggen is dry und sinn alli glügglig.
Nur dr Kessler isch druurig,
däm stinggt s sogar schuurig,
denn jetz fählt em über Nacht
ein, wo ihm dr Kaffi macht.

No blybt der Morin jo e Johr,
das Johr, das kunnt is ewig vor.

Syt kurzem herrscht dr Ueli über d Bundesfinanze,
jetz fliege dängg d Bundesfinanze uff e Ranze,
denn esoo, wie mir dä kenne,
git s ab sofort e Renne
mit em Baselbiet und sym Gäld
um s beschte Defizit vo dr Wält.

Dr Toni Lauber gsehsch jetz laufe,
in Lieschtel s SURPRISE go verchaufe.

In Dälsbärg schtygsch um, zem s Wälschland beehre,
dr Flugzug goht neuerdings z Züri go kehre,
uf Ascona, hört me sage,
nimmsch am beschte Ross und Wage,
nur ei Verbindig isch no heil:
Dreiminute-Taggt uf Weil.

Dä Achter stinggt mer, seit my Frau,
all acht Minute stohsch im Stau.

E Gipfel z Paris seit, ass d Luft uf dr Ärde
nümm mee as zwei Celsius wärmer darf wärde,
au d Schwyz duet signiere,
si well Warmluft reduziere,
dr Basler Bydraag, liebi Fründ:
D Baz hett numme no zwei Bünd.

Bi sällem Journalischte-Stil
isch au e halbe Bund no z vyl.

Dr Ysatzbyfähl luttet: schussdichti Weschte,
Sturmhuube, Zahnschutz, dr Schlagstogg am beschte,
göhnd au go d Pistole
und s Dräänegas go hole...
FC Züri? Frogt ein blaich?
Nei: Fraueschutz am Morgestraich!

Bi mynere wurd das nüt nütze,
muesch ehnder mii vor iire schütze!

Es seit dr alt Leu zue sym Sohn: «Lueg dört ääne
darfsch gar nie go spiile, dört wohne d Hyäne,
fallsch dääne in d Klaue,
kasch lang go miaue,
s sinn Schmarotzer, s isch e Schand...»
«Papi, isch dört Baselland?»

Hesch s as Hyäne nit so schwär:
Bisch 80-fache Millionär!

Impressionen

von

Schwoobekäfer

Steckbrief

Zählt zu den kostbaren Insekten des Comités. Mit fein gedrechselten Versen bohrt er Pointenstachel ein, die sitzen.
Comité-Bank seit 2000

Video

Verse

Dr Crédit Suisse vo Ziri het e neje Chef biko
Dä basst in s gwohnti Bild vom Schwyzer Bängger nit eso.
Doch grad fir uns in Basel isch dä neji Ma e Hit:
Me gseht bim erschte Augeschyn: E Zircher isch das nit!

D Frau Hueber het s nej Trämli, wo uf Weil fahrt, miesse nä;
S het drum im Märtkauf dört zem halbe Prys zwölf Aier gä!
Und bis si zrugg no all däm Stau am Bläsiring ka lande,
Sin statt de alte Aier scho zwölf Bybbeli vorhande.

Zem Gotthardtunnel hört me täglig d Doris Leuthard huuche:
Mir baue jetz e zweiti Röhre zum si denn nid bruuche!
Mi ka, was ych mues höre vo so Röhre, nit betöre
Und bsunders störe duet mi däre Leuthard ihri Röhre.

Der Johnny uss dr Rhygass kauft sich Kokain, vom Fyne,
Zem Zobe an däm Riisefescht in beschter Form z erschyne.
Doch d Schugger löhn en scho Zmidaag im Claraboschte lande:
Är het halt ebe das vom Wysse Dinner lätz verstande.

Dr Lauber Toni z Lieschtel sait zur Pegoraro: Gäll,
Du hesch doch au begriffe, wie das goht mit so Tunäll:
Die lange Autoschlange, wo Du ins Tunäll losch bruuse,
Die chöme denn noch feuf Minute äne wiider uuse!

S isch s Rösli in de Wanderschueh so schregglig gärn mit Andere
Bi Räge und bi Sunneschyn im Alperuum go wandere.
Das Rösli git s jetz nimme, denn äs het fir ewig Rueh.
Do kasch s bin letschte Selfie gseh mit ere Muetterkueh!

Si hän dr Roger Köppel no dr Wahl in s Bundeshuus
Im Interview befroggt, ob s ihm nit vor sich sälber gruus.
Do sait dä, s Gruuse kunnt mir als, doch numme ganz vo färn;
Wenn ych d Martullo-Blocher gseh, han ych mi wiider gärn!

Wenn z Basel Di dr Sänsema zem letschte Danz will hole,
Wirsch neyerdings im Zircher Krematorum zue Kohle.
Dr Schorsch im Alterheim zem Lamm spiilt mitem Röösli Schieber
Und dänggt: Die Sind isch mir das Wärt denn s Fägfyyr wär mer lieber.

Jetz händle mer in Basel scho um Achzyg Millioone
E aigni Uni wuurd sich fir die Rammel sicher loone
An däre strääbe sy und sinn fir Ney’rige parat
Und noonem Fyyr erforsche sy denn derte au no s Rad.

YOLO, ROTFL, LOL, ASAP, BRB, ILU, IMO - verschtoosch
BRB, IMHO, JK und OMG – wenn d‘ mit de Zyte goosch
Spaarsch Zeiche bi de SMS, so wird das hitte pflägt
drum isch au fir dr greeschti TRAMPEL d Kurzform TRUMP perfäggt!

Impressionen

von

Singvogel

Steckbrief

Dieser Vogel kann nicht nur singen - er ist auch ein komischer Vogel. An jeder Fasnacht setzt er zu neuen Höhenflügen an.
Comité-Bank seit 1997

Video

Verse

Mir het der Doggder gsäit, wenn ych das rächt verstand:
S Mandleschnyyde mache mir jetz ambulant.
Do han y gsäit: Ou näi, y mag das nit verlyyde,
wenn denn s Parkiere düürer kunnt als s Mandleschnyyde.

Yych find, dass sich d Frau Martullo guet verkauft:
Sii het e Muul, wo lauft und lauft und lauft und lauft.
Wobyy jo der Verglyych mit VW gar nit hinkt.
Denn das, was uusekunnt, das stinkt und stinkt und stinkt.

Wo zwüsche Stewi, Kugelgrill und Gaartetisch
zem dritte Moll e gääli Drohne glandet isch,
do säit der Räägewurm ze sym Kolleeg, em Schnäggli:
Jetz griegt d Frau Frey scho wider e Zalando-Päggli.

D Frau Köchli lauft der Heubärg ab mit ihrem Bello.
Em Hund däm stinkts e bitz. Er schnupperet amme Vello.
Denn findet är e Pfoschte, g’äignet für sy Zwägg.
Doch won er s Bäi denn lüpft, do isch der Pfoschte wägg.

Und während er als no stoht und stuunt ab däm Gebaare,
wird er vommene Liiferwaagen überfahre.

Wenn d Frau Martullo schwätzt, denn döönt das rächt kommuun.
Me frogt sich scho: Isch das jetz das Rumantsch Grischun?
Also yych verstand käi Woort. – Do wyyst mi äin druff hii:
Das won ych ghöört häig, syg vermuetlig Änglisch gsii.

Mir wo in Basel wohne, mir verstöhn das Gschyss nit,
wenns am Tattoo bitz Lärme vo der Patrouille Suisse git.
Mir finden überhaupt nit, dass die Fluugi stööre.
Mir mien denn fümf Minute d Duudelsegg nit hööre.

Y haan e Bünder gfrogt: Jä hänn dir denn e Knall?
Isch das jetz wirgglig eures beschte Ross im Stall?
Do säit dä: Näi, es isch meh praktischer Natuur.
Wenn sy in Bärn isch, isch sy wyt ewägg vo Chur.

Y bi ammene Oobe döört am Rhyybord gstande
und ha zwüsche Hochdütsch, Änglisch, Hochdütsch, Amerikanisch,
Änglisch plötzlig e baar Fätze Baseldütsch verstande.
Y ha dä gfrogt: Kunnsch au us Basel? Häi-äi-äi!
Do säit dä: Jee, dä Zuefall! Wie isch d Wält doch gläi.

Jetz will d Regierig z Lieschtel spaare, wo s nur goht.
Zem Byspiil s Loogo wird jetz faarbloos anstatt root.
Und oobedrüüber glääbe – s isch nümm z underbiete –
statt de siibe Düpf symboolisch no fümf Niete.

Hänn Siin en au scho gseh? Der Heidi-Film isch doo!
Das nätte Mäitli, härzerwermend früsch und froh.
Das macht die gueti Bündner Luft! – Und scho sehschs yy:
D Frau Martullo kaa nit us Graubünde syy.

Will d Menschen immer elter wärde, s isch esoo,
wird s Räntenalter bald uf achzig uffedoo.
In Ränte erscht mit achzig, näi, das wär denn schyssig!
S Tamara Wernli wird dä Herbscht erscht achtedryssig.

Uf der Autobahn vor Bärn kunnt d Frau Martullo
wäge Raase in e Bolizei-Kontrullo.
S miech äifach Spass, säit sii däm Schugger unverhohle,
wenn sii der äige Vater rächts könn überhoole.

In zwanzig Johr stöhn uf em Määrtblatz nach de Viere
zwäi Millioone Lüt, wo Faasnacht konsumiere.
Und zmittsdrinn pfyfft der letschti Ueli ehrevoll
für sich eläi die dritti Stimm vom Rossignol.

Impressionen

von

Spitzbueb

Steckbrief

Der Spitzbueb ist ein spitze Bueb. Seine zugespitzten Verse sorgen für spitze Pointen.
Comité-Bank seit 2007

Video

Impressionen

von

Stroossewischer

Steckbrief

Die Strassenfeger der Stroossewischer haben Kultstatus. Ihre Bänke sind eigenwillig, schön gereimt und brilliant vorgetragen.
Comité-Bank seit 1996

Video

Verse

Jä wemme Bängg singt, saisch däm hüt: „Mer mache sing“
und wemme Helge moole duet: „Mer mache Ding“.
Und wemme d Laarve aazieht, saisch: „Mer mache Gsicht“
und wemme Värs duet dichte, haisst s: „Mer mache dicht!“

Grad vorhäär hämmer do die Poller nümme gfunde.
Sy sin grad dunde, unter Räbbli ganz verschwunde.
Doch blötzlig jaggt s die Pföschte uffe und dernoo,
isch s halt scho wiider zun ere Cliquespaltig koo.

Jetz kasch im Tinguelymuseum ganz in Rueh,
go taschte, grabsche, fingerle als blindi Kueh.
De darfsch dört dööbble, jä vo oobe bis ganz unde.
Är haig s no gärn, het dä Museumswärter gfunde.

Jä d Basler Zytig wird jo immer wie kompaggder,
bestoht grad gnabb no us eme halbe Chefredaggder,
aim Fotograf, zwai Tägschter, ain dervoo in Ränte,
und die Vier sin glaub au die letschte Abonnänte.

Wo s Trudi d Stääge putzt im Roothuus, spitzt sy d Ohre
und hört, der näggschti Wahlkampf syg beraits verloore.
E grossi Niiderlaag miess denn d Partei erdraage,
doch weeli gmaint isch, das ka s Truudi au nit saage.

Dä Eric Wäber schrybbt pro Daag zäh Poschtulat,
doch was er schryyby syygy alles nur Salat.
Jä das ka s gää, denn dää het halt e bitz e Schyybe
aber Grossroot, Si hejoo, das darf er blyybe.

Vor unsrem Schwyzer Gsetz sin alli Mensche glyych.
Ob Maa, ob Frau, alt, jung, schwarz, wyss, ob aarm, ob ryych.
Doch wär das Gsetz verletzt und daas wott duuresetze,
däm sotsch per Gsetz jetz grad e Dritt in Arsch versetze.

Doo, für das wärtvoll Gmäld in reflexiver These,
sin acht Milliarde botte, von e baar Chinese.
Es zaigt do s Kader vo der Ems Chemie, lyycht schebbs,
und der Titel isch „The seven sinking Depps“.

Impressionen

von

Venezianer

Video

Verse

Willsch dr Stolz vo eim beflägge, bruchsch dr grösser Selfie-Stägge
Willsch hüt Ruhm und Ehr erlange, bruchsch die digger Selfie-Stange
Mir hän als no friehner in dr Schuel, y friss e Bääse
Mit däm Stängel in dr Pause miesse Drägg go zämmeläse

Über dr Morin Guy kasch jetzt gly kei Väärsli meh bringe
Und vom Wessels, jo däm Hampe, kasch so langsam au nüm singe
S‘Evi Herzog, s’isch fatal, die sorgt für unseri Schulde
Und dr Baschi Dürr, dä miemr uff Befähl jetzt halt no dulde

Scho länger uff dr Suechi, ha-n-y’s au mol welle usprobiere
Mi Visage in e Dating-Plattform z‘integriere
Zwei gfühlti Härzschleeg druff git’s mir die erschti Frau scho aa
Nur, wo isch denn jetzt dä Knopf wo-n-ich sie abelaade ka?

Scho dr Babbe het sich mit dr Schnüürli-Schrift ummegschlage
Und au mir liegt dä Schnörgel-Schischi übel uff em Maage
Das Gegnübel wird jetzt ändlig nümmi glehrt, y find das guet
Y weiss bis hüt nit, wie me SMS verbunde schriebe duet

Hesch e Brotwurscht uff em Täller, kaschs mit vielem kombiniere
Sygs mit Brot odr Salat, de kaschs mit Ziibele garniere
E bitzli Sänf und Ketschöpp harmoniert au ungemein
So passt au d’Rösti zu dr SVP, däm Wurschtverein

Im März dr erschti Sunnebrand, und zwar e ganz e fiiese rote
Im Juni kanni mini Würschtli uff em blutte Bode broote
Bis im Novämber miemr schmoore, do zeigt sich uns dr Grund
S’isch wägem Klimawandel wo vo däne VW-Autos kunnt

Vor zwei Joor do het dr Eric Wäber droht, dass är jetzt goht
Är well e Land ufsueche, wo syy Wääse meh verstoht
Mr hän’s nit glaubt, doch jetzt lueg aa, är isch e neue Maa
Und het absolut Erfolg als Donald Trump z’Amerika

Jo die Männer, jo die wämmer, aber nur wenn sie ein hän
Und wenn sie keine hän, dass sie zumindeschtt eine wänn
Syg’s e lange odr e kurze odr ein wo amme sticht
S’wird alles so viel liichter hesch als Maa bitz Hoor im Gsicht

Dr Reto Zanni isch passé, das duet uns schono bitzli weh
Denn wär könnt me jetzt no neh als Schwarzes Schoof bim FCB
E keine het zwei linggi Fiess, nit mol die uff dr Bangg
Do fallt uns yy, mr hän jo no e Dääge, gottseidank!

Ganz vrstohle frogt dr Blatter Sepp sy Kumpel, dr Platini
Sin die vo uns vrschobene Millione myyni odr dini
E-n-Ethik-Kommission probiert das Gsindel z‘überfiehre
Me sott sone Kommission bim Baselbiet mol usprobiere

Mir sin in d’Innestadt go priefe, ob’s so ruhig isch wie me seit
Usser Stadtentwickler Kessler sehsch kei Knoche wiit und breit
Mir hän scho welle go, doch gsehn bim Bluemerain no Lüüt
S’sin paar Herre mit Hiet wo schreye: „Drummeli-Tickets, koschte nüt!“

Impressionen

von

Wanderratte

Steckbrief

Die Wanderratte ist eine schützenswerte Spezies. Ihre glänzenden Pointen und lustigen Helgen haben absoluten Seltenheitswert.
Comité-Bank seit 2013

Video

Verse

E Rauhoordaggel het in e Eichhorn bisse.
Im Suchy sin d`Trainerhoose grisse.
Und d`BVB dailt hite mit,
e Billett-Automat lauft nit.
Däm sait me zwar jetzt nimm 7 vor 7,
aber inhaltlig isch alles bim Alte bliibe

Do letschti het aine mit sym Karre,
mi uffem Velowäg ibere Huffe gfahre.
Denn isch er mit Garacho ibers Rotliecht brätscht,
het dr Motor abgwirgt und isch ins Trämli dätscht.
Kurz druffabe han y us dr Präss erfahre,
dr Wessels lernt jetzt Autifahre.

Uff Rätoromanisch, dasch jedem klar,
saisch em Wäschlumpe Stratsch da selavar.
Caltchiel da launa saisch em wullige Strumpf,
Ciao Casa Federala dr Widmer Schlumpf.
Platta cun gas da campar isch e Campinggaskocher
und Domina dal Grischun d`Martullo Blocher.

Mit Poller versperrt me, isch das nit glatt?,
am Spaalebärg dr Wäg in d`Innestadt.
Jetzt kennt me doch no, zem d`Clique schelle,
e Poller vor jedes Gässli stelle.
No gäbs jedesmol, ych fänd das gwaltig,
wenn Aini durelauft, e Cliquespaltig.

In dr Biostund, do hämmer gleert,
wie und wo dr Mensch sy Darm entleert.
Dä Vorgang syg, ob arm oder rych,
bi allne eigentlig immer glych.
Nur bim Roger Köppel, s`isch zem gruuse,
do kunnt dr Schyssdrägg oben use.

Dr Krayer, dä mit Ypsilon,
schwätzt Baseldytsch in Perfektion.
Au dr Burckhardt mit CK DT pfläggt,
e Dalbanesisch-Dialäggt.
Aber schwätzt dr Fischer Urs, no weisch genau,
dä schriibt sich sicher nit mit V.

Si griesse frintlig und ziehn dr Huet,
das mache si jo an und fir sich guet.
Numme find y s`Fasnachtscomité,
glycht als wie mee dr SVP.
Baidi hän us mynere Sicht
s glych Motto gwählt: "Mer mache dicht"!

Ständig haut`s efang, das isch e Saumode,
en FA18 irgend neyme ungspitzt in Bode.
Wäge däm und will sy kai Ersatz me griege,
deerfe Zivilpersone jetzt nimm mitfliege.
Derby hätte mer doch no so gärn welle,
e Flug fir en Ueli Muurer bstelle.

Lut däm Heftli do, us Amerika,
isch d`Person vom Joor, s`Merkel Angela.
Und in dr Wältwuche wird, im glyche Effort,
dr Blatter Sepp zem Schwyzer vom Joor.
Jetzt kunnt im VogelGryff, y mach e Wett,
denn als Glaibasler vom Joor no dr Audersett.

Y ha im Kino, natirlig in 3D,
dr neyschti Film vom Heidi gsee.
Y bi begaischteret, y sag`s eych unumwunde,
nummen ains han y noonig usegfunde:
Wieso sy dr Alp-Öhi, wo mer doch alli
kenne in däm neye Film, Tschubakka nenne?

Uff dr Insle Wuaca-Wuacani im Titikacasee,
y gib jo zue, dasch e Bitzli im Juhee.
Aber deert gits, y find das Sagehaft,
en Ärdnissli-Wytwurf-Maischterschaft.
Und s`isch dr ainzig Sport, was hesch was gisch,
wo immer no Wettskandalfrei isch.

In dr Pubertät wird jedes Kind,
zem Biibeli ibersaite Betongrind.
Wo numme wenn d`em Sagggäld gisch,
nätt und frindlig zue der isch.
Dä Frontallappe gsteerti Geisteszuestand,
kennsch au vom Kanton Baselland

Darf y Vorstelle, dr Klaus Maria Kalbermatte,
dasch die aaghyyrooteni Walliser Wanderratte,
wo mit eme fiese Lächle im Gsicht,
liegt, betriegt und d`Lyt besticht.
Y bi sicher, dä wird mit däm Talänt,
am Änd no FIFA-Presidänt.

Impressionen

von