Schnitzelbank-Comité


Archiv
Alle anzeigen

Filter anpassen

Zum Archiv

Schnitzelbänke 2017

Rückblick

Anggewegglimaitli

Steckbrief

Hinter em Minschter hält das Comité Frauenpower feil. Mit herrlichen Anggeweggli-Versen des Anggewegglimeitli.
Comité-Bank seit 2008

Video

Verse

Ich bi vo Griegsgebiet zu Grieg ummejettet
Und ha vyli aarmi Mensche grettet.
En Armbruch im Ysatz isch d Folg - saage d Aggte.
Dasch e Byspiil fir alternativi Faggte.

Zwai Hegger, ai Mähne und Schaiche, vier,
Das isch doch e typisch Trumpeldier.
Kai Hegger, ai Mähne und e Schnuure draa,
Das isch e Kameel uss Amerika.

D Schugger-Chef, die hänn nit grisse,
Und systematisch bi de Speese bschisse.
Im Jobprofyl vo dääne Wääse
Haisst s: Kenntnis im Schrybe ooder Lääse.

Drotz Burn-Out, Zugger und Neuroose,
Gräbs und Gicht und Gneyarthroose,
Und wenn der Doggter nyt me ka mache:
Der Schneider-Ammann bringt mi zem Lache.

In der Basler Freye Strooss,
Joo in dääre Strooss isch ebbis los.
In dääre Strooss do git s kai Rueh,
All Henneschiss goht e Laade zue.

Hitzedaags het bald jeede Dandy
Son e Pay-App uff sym Samsung-Handy.
Soo d Rächnige zahle han i au brobiert,
Bi der Granggekasse isch s explodiert.

Terror doo und Terror deert,
Es näärvt, es gruust, schockiert und steert.
S Fasnachts-Comité - i nenn s bim Naame
Sait ussgrächnet jetzt: „Mer spränge dr Raame!“

Sitzt ebbe der Herr Wessels doo?
Jä wisset Ihr, es isch drum esoo:
Hälfet em, wenn er will haimeszue strääbe,
Är blybt nämli gärn am Sässel glääbe.

Der Beschtler het gsunge so lut er kaa:
Trari Trara, die Poscht isch da.
Und hitte singt d Chefin vo der Boscht - die Kueh:
Trari Tralidl, die Poscht isch zue!

Jetz will s Bundesamt - i find s vermässe,
Dass mir au no Insekte frässe.
Son e Maade-Burger - es het mi g egglet,
Isch mer doch letschti vom Däller gsegglet.

Impressionen

von

Brunzguttere

Video

Verse

Uns isch s im Grund gnoo gliich was iir hütt Zoobe machet:
Ob iir mit Äier wärfed, brieled oder lached.
Mir singe äinewääg s Brogramm, do sin mir stuur –
will unsri Pointe sin UNESCO-Wältkultuur.

Mit em Rollator und dr Hand am Delifon
dribt in de Fingge do im Goldfischdäich d Frau Cohn.
Grad noch dr Moorgespitex het s se überschlaage
wo sii im Gaarte isch e Pokémon go jaage.

Was unterschäidet uns als Mensche vom Schimpans?
Es siige Hemmige und öppis mit em Schwanz.
Wobii me saage muess, im wisse Huus git s Lüt,
die unterschäidet vom Schimpans im Grund gnoo nüt.

Das Baasler Laadestäärbe macht is dieff bedroffe,
s hän in dr Innestadt bald nuur no d Kiirche offe.
Und falls au d Rettig vo dr Hauptboscht nit sött glinge -
wo aane söll me denn s Zalando-Päggli bringe?

Es duet e Ooberschugger sich bim Dürr beklaage:
Das kasch nit mache, Baschi, loos, ich bruuch dää Waage!
Am Moorge duen i d Faarte suuber degglariere
und zoobe mues en haa zum Uber-Gescht schoffiere.

Es stoot im Schutzaazuug en AKW-Inschpäggter
vor Beznau 2 und säit zum AKW-Diräggter:
S isch höggschti Zit, jetz muess me handle, sunscht git s Liiche –
i würd zur Sicherhäit d Fassade nöi lo striiche!

Es mäint d Frau Erdogan zu iirem Schatz bim Butze:
Dass duu so “süüberisch” wüürd miir jo an sich nutze.
S Brobleem isch nur, i wäiss nit was es söll bezwägge -
will das wo stinggt, das isch dr Drägg bi diir am Stägge!

Das nöie Kunschtmuseeum dunggt is wunderbaar.
Dä Bau het Stiil, dä Bau isch schlicht, dä Bau isch glaar.
Dä Bau isch chiq, dä Bau isch glatt, dä Bau isch nätt.
Es wüürd is fröie wenn dää Bau en IIgang hätt!

Mir hänn dr Iigang denn no gfunde, dangg de Schilder
und stöön im Kunschtmuseum – niene hängge Bilder.
Mir frooge liicht verdutzt e Wäärter: „D Kunscht isch woo?“
„Iir händ das falsch verstande, d Kunscht isch s IInekoo!“

Impressionen

von

Doggter FMH

Steckbrief

Aaaah jä: Das ist unser Doggter FMH und seine Schwester Gundula. Wo er auftritt ist das Wartezimmer meistens borzig voll.
Comité-Bank seit 2005

Video

Verse

Y bi d’r Dr. FMH und das isch d‘ Schweschter Gundula
sy kunnt us Therwil das liggt im Baselland
und syy git mer jede Morge d‘Hand

Si, dr Unterschiid vom Bob Dylan zue mir dä isch ganz glai
baidi sin über 70 und baidi hän kurzi Bai
au mache mir uf dr Bihni die gliche Kapriole
aber dr Nobälbriis, dä wär ych go hole!

aber är mit sine churze Bei
chem us Stockholm nie mee hei

Si, nach em Abstieg vom FC Züri isch em Presidänt dr Bluetdruck explodiert
drum han ych dr Canepa mit Bluetegel therapiert.
Aber kai Bluetegel het, ych find’s verschisse
freywillig in dä Zürcher bisse!

Si, mi Gundula schwäbt sit Wuche in andere Sphäre
sit si sich nur no vegan tuet ernähre
doch jetzt weigeret si sich au no, dä Radiesli-Drache
Röntgebilder vo Niere und Läbere z mache

Si, dr Baschi Dürr ergläärt mir am e Wahl-Apéro
"ych ha mit so Strich markiert, wo die Proschtituierte jetz mien aanestoh!"
Si, und jetzt behauptet doch dä Kärli no unumwunde
är haig dr Stroossestrich erfunde!

Si, in Zuekunft wird d Menschhait, het mir ä Kollega erglärt
vo Inseggte, Würmer und Maade ernährt
also jetzt lueg ych doch, ych alte Maa
e Bandwurm mit ganz andere Auge aa

Nach d’r OPE nämme die – jo läng mer s’Gwehr
dä Wurm mit heim im Töpperwehr

Si, ych ha ganz kurz e russischi Granggeschweschter gha
jä die het vyyl meh gschafft als mi Gundula
blöderwyys isch die, wo chrampft het fir Siibe
innere Doping-Kontrolle hange bliibe!

Däm syni Diagnose die glorryyche
kasch sithär mit russisch Roulette verglyyche!

Si, an däre Fuessball-EM het me dr Jogi Löw - ohjeh
mit sim glaine Jogi in de Hose spiile gseh!
Liebe Jogi, wenn s näggscht mool gnüblisch do unde dra
legg wenigschtens so Händschen aa!

und bim ume chnüble witter unde
het dä e Schwoobekäfer gfunde

Si, nach em Sytesprung isch dr Darbellay dr Dummi
und das alles wägeme blatzte Gummi
jä Si, dr Pariser haigs, het är mir glaggt
wiene Fuessball-Lybli an dr EM verjaggt!

ich hät em sone Hänsche gäh
dä hät er fünf mool chönne näh

Si, kenne Si en Arztghaimnis bhalte? Jä do bin y aber froh
dr Dieter Behring isch mit 50 Kilo Übergwicht in d Praxis ko.
Y ha nem ä Diät verschriibe, won ä bitz länger goht:
5 Joor Kischte bi Wasser und Brot!

är isch kuum in dr Kischte saperlott
sin au d Wärter scho bangrott!

Si, dr arbetsloos Mike Shiva – jä dien si nid lache
duet jetz fir mi medizinischi Berootig am Delifon mache.
Si, dä liist ihne us de Karte für numme 55 Franke
ob si s nägscht Johr an Fuesspilz erchranke

Si, dr Karli Odermatt isch aim in Arsch gfahre mit 30 Sache
und d Bolizey bringt mr dr Karli zem e Promille Mässig mache
doch vor em Bluet näh het de eifach soo
zum beruhige – e halbe Wisse gnoh

und denn isch folgendes passiert
s’Mässgrät isch grad explodiert

Si dr Kollega Morin haut mi im Zolli a - bi de Affe:
"Kan ych äggscht in mym Alter als Spital-Clown go schaffe?"
ich sag ihm denn liebe Morin Guy
als Gloon do miesst me lustig syy

Impressionen

von

Dootebainli

Verse

Dail Lyt hänn Schiss, au z Baasel kennt s e Aaschlaag gää.
Drum sotti d Schuggerei doch eppis undernää!
Anderi sinn panisch und verstegge sich dehai –
Miir steen do driiber, wil mir sinn scho dooti Bai.

S richtet Root-grien im Rootliechtviertel nooch am Rhyy
E Voogelreservaat fir Drottwaaramsle yy:
E griene Strich, wo zaigt, bis woo dr Strich deerf goo,
Jä, z Baasel wird halt vyyl fir d Stadtbigrienig doo.

D Prämie wäärde wyter immer schnäller heecher,
Grangg syy isch z dyyr, d Leesig vo Exit ligt do neecher.
Fir d Gsundhait nämme mir als Bilverli und Thee,
Und nid vergässe: «Rire c’est bon pour la santé!»

Dr Noochber Heini isch mit jeedem Bäärg per duu,
Kennt jeedi Alp vo Piz Minschuns bis Col de Cou,
Firstspitz und Pfannestock – doch letschti het är gfluecht,
Und uf jeedre Kaarte dä «Amerikafirst» gsuecht.

Mir sinn letscht Summer gwandret in de Glarner Alpe,
Hänn uf re Alp e Rascht gmacht, bim dur d Alpe tschalpe.
Dr Senn serwiert si Kääs, e Gnuss, me kaa nid motze.
Dää Kääs bewyyst: Nid jeede Glarner isch zem Kotze!

Es bschliesst e Gricht, es syyg legaal und nid gemain,
Wenn me em Eric Wäber sait: «Du Naazi-Schwain!»
Si haige daas biroote, gwälzt in vyyle Stunde
Und am Schluss denn au kai bessere Namme gfunde.

Em Trump si Voogel, Sii, dä zwitscheret und twitteret
Mir hänn scho bi de eerschte Deen si Waansinn gwitteret.
Dä Voogel het en fescht im Griff, heert nimm uf schimpfe -
Dää sottsch soffoort mit Voogel-Grippe-Viire impfe!

E Muure wie z Berlin verlangt dr Trump fanaatisch.
Wenn me dä gheert, wiird aim dr Blocher fascht sympaathisch!
Miir wintsche s Bescht fir d Amis, hoffe fescht drbyy
Dr Trump, dä wäärd e Breesi wie dr Kennedy.

Als Duurischt, do wott e Schwoob jo allne gfalle.
Drum duet är uf Mallorca bi baar Bierli lalle.
Nach Ibiza fliegt är, wott är s Danzbai schwinge
Und in d Schwyz kunnt är goo Naaziliedli singe.

Dr Baschi speert s Gwartier, s deerf kain dur s Wettstai duure.
Vom Rocheduurm fliegt aim suscht e n Yyszapfe uf d Schnuure!
Är soorgi soo fir sichri Stroosse, gheersch en saage –
Drbyy wott äär nur ungsteert Pokemon go jaage.

S duet sich bim Röbi Koller ain als Schwaarz verkauffe,
Drbyy git s gueti Moorekepf doch numme z Lauffe.
So eppis goot nur doo, z Ameerikaa wäär s Gift,
Wil d Schuggerei deert jo no gäärn in s Schwaarze drifft.

Mit schweerem Häärze isch dr Leerer Boonestange
Zu dääre Fachstell geege Islamismus gange:
«E Schieler macht mer Angscht, do isch doch mee drbyy!
Dr Maxli mecht emool Laschtwaagefaarer syy.»

Uns gfallt s nimm uf dr Stross, miir sinn doo nid elai,
Luter Burkas, isch daas no bi uns dehai?
Die Fundis finde, alli andere syyge Drägg –
Zem Gligg sinn äntlig die Blakaat wiider ewägg!

Die Pokemon sinn dangg me Jagd-Spiil wider in.
Baasel Duurismus zaigt, ass die jetz gfäärlig sinn.
So Dierli, wo sich rääche – miir dien daas seer schetze:
S kennt Mool e Häärde schwaarzi Schooff dr Blocher hetze.

Die Biirgerligge z Baasel hänn grad aafoo schwelge,
Wo si sich voorgstellt hänn, e soo ne Boygroup-Helge ...
Nur kaa me s Gwicht vo soo me Bild – do draa muesch dängge –
Nid am ne soonig dürre Näägeli uffhängge.

Uff s Mool het s aafo räägne, wie no nie uf Äärde.
Us Muttenz-Dorf do gseesch e glai Venedig wäärde.
Dä Rääge zaigt, dass es sogaar d Naduur verstoot,
Ass es mit em Baaselbiet dr Bach ab goot.

S bewäärbe sich vyyl Länder vo dr ganze Äärde,
Hinter «America first» doch no «second» z wäärde.
Und mit däm gmainsame Konzäärt vo zwaite Gyyge,
Bringe mir vilicht die eerschti bald zem Schwyyge.

D Leererin, die schimpft, wo si dr Thescht zrugg git:
«Loos, Maxli, daas wo duu do schrybsch stimmt aifach nid!»
No sait dä fräch: «Doo ligt doch glyych e Säggser drin!
Wil das jo glaar alternativi Faggte sinn!»

Dr Trump isch au als Süüschee s Bescht wo s jee het s git s.
Jeedi Beweegig, jeedes Wort – e schlächte Witz.
Doch wenn mir numme greele, joomere und nyt mache,
Blybt uns denn zimlig glyy au sicher nyt me z lache.

Dr Chrigu Heitz vom FC Nänzdoorf-Hinterpflutte,
Dä waiss sogaar, uf weeles Gool ass är mues schutte!
Är drifft s zwoor sälte, doch bald spiilt är, me glaubt s nid,
Dangg Inländervorrang in dr Nati mit.

Impressionen

von

Dreydaagsfliege

Steckbrief

Diese Gruppe ist eine Augenweide und eine Ohrenweide. Bemerkenswert sind auch die raffinierten Helge in Fliegeschissli-Technik.
Comité-Bank seit 2011

Video

Verse

Wie macht me uss me Müggli ganz e groose Elefant?
Jä gib emoole z Däärwyyl ere Leerere nid d Hand
„Das muess jetzt in d Verfassig!“ maint do z Lieschtel d Madam Gschwind
Do schüttle mir scho lang nüm d Hand, do schüttle mir dr Grind.

Schwyzer Rächt vor Völkerrächt! Das isch e Glanzidee
Das wott i ha und wenn i's ha no wott i grad no mee
Kantonsrächt, Dorfrächt, Fuschträcht - eb das grächt isch isch mir glyych
Linggs isch lätz, nur rächts isch rächt, und rächt ha numme yych.

Die wunderscheen Europa het dr Zeus so fasziniert
Är het sich in e Stier verwandlet und si grad entfiert
Jä wie's mit Stiere goot, me losst si irgendwenn kaschtriere
Drum hets jetz so vyyl Oggse wo Europa wänn regiere.

D Frau Glarner und dr Andi sinn bim Augenarzt yygloffe.
"My Maa gseet iiberall nur Burkas" maint si ganz bedroffe.
Dr Arzt sait: " Si sinn lätz bi mir" und blettret in den Akte
"Dasch e Gaischteskranket. Är verzellt alternativi Fakte."

Grillierti Grille, Määlwurmburger, Heugumpersalat
Das neye Sortimänt vom Coop isch sälte delikat
Mir Fliege länge das nid aa, das könned-er vergässe
Mir wärde jo jetz allwääg unsri Jungi Garde frässe.

D Wooret die isch mängisch laider deftig oder barsch
zem Bispil isch und het dä Sultan Erdogan en (ZENSUR)
Esoo-ne groosse (ZENSUR) hän mir no nie gsee, wills is schyyne
Es kriecht em im Momänt au halb Europa hindenyyne.

Fiir Plastigg-Güggli muesch im Consi jetzt 5 Centimes bluete
Und au im Migros. Aber s schitzt jo d Umwält, das isch s Guete
Jetz hänn si ai Kummedi in de Lieschtlemer Filiaale
Will d Rammel dängg wie allewyl nur d Helfte wette zaale.

FD- LD- CVP mit alter Tradition
Die zämme mit dr SVP das isch e Perversion
Scho halber blutt steen si am Rhy und dien si aim d Auge quääle
jetzt waiss i au worum me erscht mit 18 darf go wääle.

Mit grossem Waan und glainem Gaischt spyylt aine Presidänt
Mee het in däm Tweet nid Blatz, drum isch dä Väärs scho z Änd

Impressionen

von

Dräggspatze

Steckbrief

Zwei freche Vögel mit rollenden Augen. Was sie während dem Jahr so aufpicken, werfen sie an der Fasnacht als geballte Ladung zurück ins Publikum.
Comité-Bank seit 2015

Video

Verse

Melodie: Le donne mobile
Naturvorgäng fördre duet sich immer loone
Drum het jetzt au Basel ä Grieni Zoone

zBasel am mym Rhy
Mir gfallt s’neu Museum, nur hätt me no selle
eppis Schöns kaufe zum Iinestelle

La ci darem la mano
Adieu, sait dr Imam nach em Sex mitenand
wärsch du kai Frau, gäb ich dir jetz no dHand

zBasel am mym Rhy
dIdee vo däm Kraan, wo sich dBasler löön schängge
sott nid numme sy, zum dr Köppel ufhängge

Chopin Trauermarsch
nach em Yykauf in Weil kasch uusruhe vom Gwiel
uff de Basler Innestadt-Stiel

zBasel am mym Rhy
bim Kaserne-Umbau plant me ganz lyysli
für Regierigsroot-Aawärter ä Baadehyysli

Beresinalied
S’wär nätt, sait dr Frehner nach de Waale zum Röschti,
Wenn är ihn wäg de Schimpfis vom Blocher denn tröschti

USA Nationalhymne
Dr Trump schimpft über dMedie – Feik-Njuus syg jede Satz
Ai Uusnaam gäbs – das macht ys stolz – är maint nadierlig dBaz!

SLied vom Eskimo
Am Nordpol glaagt dr Eskimo: das Gliimaa do isch mies
I gang zur Rosch nach Basel – döört hän sie schiints no Iis

Musette
Mir faare, mir faare zum Iikaufe nämmli
bald bis Paris mit em dreier Drämmli

Luegit vo Bärg und Tal
In Nizza sait dMuslimin bim Burka-Iipagge
jä nu, denn gang i hald nach Interlakke

il Silentio
Uns längts - mir löön uns jetz solang iifriere
bis dr Donald und dr Baschi nümm dien regiere

klingeling die Post ist da
dHauptposcht soll zuegoh – mir dien rescherschiere
was könnt mit de Heilige Halle passiere:
Im Wessels wurd am beschte gfalle
Sgäb ä Veloiistellhalle
Dr Baschi hätt gärn – är trauts nur nid zsage
Ä Garasch für syni Kaader-Dienstwaage
em Engelberger wär dä Platz
Ä guete Bruederholzersatz
Es joomeret scho dSVP
Oo jee, am Änd gits ä Moschee
Au als Dänkmool für dr Morin wär dHalle bereit
zum Dank für alles, was er nid het gsait
Für mi, wenn dPoscht zueduet, isch hald sDummi
wo kauf i jetz mini Radiergummi?

Impressionen

von

Gasladärne

Steckbrief

Eine Gasladärne ist vielleicht nicht CO2 neutral. Dafür erhellt sie Jahr für Jahr unzählige Gesichter in bummsvollen Beizen.
Comité-Bank seit 1977

Video

Verse

Jetzt wählt dr Putin in Amerika scho mit.
Das isch e Maischterlaischtig, findet Ihr das nid?
Das het e Värs verdient, mir dien das honoriere.
So duet me hüt ze daags perfäggt globalisiere.

D Monika Fasnacht darf jetzt nümm am Samschtig jasse.
Si wurd lutt SRF nümm in die Sändig passe.
Der bescht Ersatz wär doch der Shiva Mike dä Bääse,
denn dä ka jasse und glaub au no Karte lääse.

Mir sinn rein provilaggtisch Muggespray go kaufe
Falls denn im zwaite Wahlgang ebbis schief sott laufe.
E sone Spray hilft jo nid numme geege Mugge
Es näämt em Jogi Löw au undenumme s Jugge.

Unsri Frau Wänger goht zem Doggter Holestai
Sie hett so komisch roti Flägge an de Bai
Das isch e Sunnebrand und dä gäbs öfters schyynts
Wenn me die Moode mitmacht mit verissne Jeans.

Der Christoph Darbeley isch gar nid sone Lappi
Wird usserhalb vo der Familie nomool Pappi.
D CVP die findet das grad heldehaft!:
Es zaigt: Es het dr Christophe ändlig öbbys gschafft!

E sone Faart im Citybus duet sich doch loone.
Rot-wyssi Latte und e huffe 30-er Zoone
Aber ebbis mien mir Eych im Vorus saage
Dur unsri Innerstadt gohts nur mit Ross und Waage

Die Glaini frogt: Du Papi sag mir doch emoll
was die Markierig do am Boode haisse soll?
Es isch eso, die duet de Drottwaramsle nütze
und si in däm Revier vor Vogelgrippe schütze.

Das Glaid vom Doris, do am Gotthard Tunnelfescht.
Wirft scho no Frooge uff bi allne gladne Gäscht.
Denn vor der Bahnfahrt mit em Hollande und em Renzi
syg dä bundesrötlig Lumpe schynts no ganz gsi.

Fir schwääry Sache git s e Däschli mit zwai Rölleli
Ganz fyyny Unterwösch für jeedes Syydebölleli
Fir d Fiessli Balleryyna-Schiehli - joo nid z schwär
Das isch jetz s neyschte Materiaal im Militär!

Es het der Bundesroot grad welle duurestiere
AHV-Plus das wurd denn scho no rächt rentiere.
Das bedyttet fir uns und der Hanspi Wörnli
Am letschte Arbetsdaag dr Bus diräggt ufs Hörnli.

Impressionen

von

Hansli Bargäld

Steckbrief

Wenn Hansli Bargäld den Saloon betritt, schweigt das Piano und es sinken die erhobenen Fäuste. Seine Schüsse ins Schwarze sorgen für rhythmischen Beifall.
Comité-Bank seit 2014

Video

Verse

Ich sitz im letschte Summer, und dängg mir Värsli us
ich find e super Pointe, genial! Ich flipp grad us.
Doch merggi an dr Fasnacht die Pointe isch scho wägg
Do gits nur ei Erklärig:
Dr Putin hett mi ghäggt.

I kauf grad y im Migros, do an dr Ysegass,
do gseen i dert bym Obscht zue, e Schild das isch kai Gschpass.
„Dürr“ stoot druff und driber, drey Biire zimmlig faal,
Hejo, das schyynt no logisch:
Das isch alles zwaiti Waal

Im Jänner isch’s bassiert, dr Trump lytet mir aa,
und seit mir „Hansli Bargäld, los Du bisch mi Maa“
„Come into the White House, I tell you I love Cash“
Jo, unter einere Bedingig:
Du gosch dr Tiffy nid an d’Wäsch

Uff Facebook kunnt e Messitsch: Dr Wessels drättet zrugg
und hundert neui Pärkblätz, gäbs uf dr Wettstaibrugg
Ich grieg grads Ooresuse, s’isch wie ne Summer-Blues
doch laider stellt sich use:
Das sinn alles g’fakte-ti News

Druggsch du nid jedem d’Hand, denn gid das nur Brobleem.
Drby verdailsch eso, Baggderie und Exzeem
Drum loss ich’s jetze blybe, will ich mi Gsundhait schoon
Die einzig Uusnaam isch:
I grieg per Handschlag e Million

D’Syngenta isch am juble, es isch e woori bracht,
d’Aktie kürs dien stiege, quasi yber Nacht.
S’isch nid wäg de Chinese, die hänn das nid bewirgt,
D’Antwort isch ganz eifach:
Das neue Anti-Mück het gwirgt

Das neue Telebasel, sie, das isch e Hit.
Will’s dert all halb Schtund, e Wiederholig git.
Jetzt pfuusi vor em Färnsee, dä Sänder macht mi mied,
und verpass eso grad s’Beschti:
Dä Yberflug durs Baselbiet.

Si, do inn, duets müffle, s’macht mi scho ganz grangg,
Y ha in minre Nase e stächend üble Gstangg,
Y glaub es kunnt vo derte, sag mir, bisch Du das gsi?
Jetzt gib’s doch eifach zue,
Du hesch e BAZ derby.

Die Ladeeffnigszyte, mache eim konfus,
wär hett zue, wär offe, do kunnt doch kain me druus.
Bi eim nur do bisch sicher, s’git aim e gwissi Rueh
(gesprochen) d’Bettware-Fabrik Fischer in Au bi Wädenschwil
Die hett am Mändig zue!

Horror-Gleen hänn letscht Joor, das isch ganz vereggt
mit iire Waggis-Fratze alli Lyt verschreggt.
Jo, so kranki Sieche, holsch mit dr Bolizei
Nur ein dä hänn si nonig
Und dä regiert in dr Türkei

E kreadivi Szene, wo me als Slam-Poetry kennt,
Das sinn so schnällschwätz-Schnuuri, wo me denn Slam-Poete nennt.
Die dien expandiere und wänn e Bresidänt
wo dä Slam chönnt optimiere:
I hann an Schneider-Ammann dänggt.

I bau um jedi Gugge, e diggi Schallschutzmuur,
und d’Wäge die verbieti, I versprich, do byb i schtuur
ihr miend mi numme wääle, Ihr wärdeds gseh ...und denn:
Wenn ych mol an dr Macht bi
„I’ll make Fasnacht great again!“

Impressionen

von

Hanslimaa

Steckbrief

Ein Urgestein des Basler Schnitzelbanks. Während über 40 Jahren prägte er mit seinen unvergesslichen Auftritten die Basler Fasnacht.
Comité-Bank seit 1979

Video

Verse

Hanslimaa 2017

Dr Wessels macht my nundefaane,
hässig mit Verkeers-Schikaane.
Jetz muess y seggle, s macht my schyssig,
vo Baiz ze Baiz – mit TEMPO Dryssig!

Hitt Morge - ych dängg gaar nyt Schlächts,
isch my Schaitel pletzlig rächts.
Glyy druff aabe – bla – bla – blaa,
lytet mir - dr Blocher aa!

S letscht Joor, sait e Wätter-Gryte,
syg s Wärmschte gsii, vo alle Zyte.
die Doddeli mässe voller Gschbass,
Temperature - uff em Oofepass!

My liebe Hansli - frogt dr Vatter,
die 7 – sin das jetz Bestatter?
Aber Bappe sait dr Soon,
das sin - die neie Pokemoon!

Das sin d Leuthard und e Kueh,
jetz lueget däre Kueh bitz zue,
lueget zue in aller Rueh.
Iibrigens: Das linggs isch d Kueh!

My Frau schänggt mir e Hörapparaat,
Jetzt höör y sii, ganz akkuraat.
Und syt se höör, haa n ych mir dänggt:
„Oo hätt si mir doch - kai Höörgrät gschänggt!“

400'000 bim Jagger Mick,
Dr Paabscht , dä findet das nid digg.
Er het halt nie esoo vyyl Äggschen
und als Paabscht - kai Sätisfäggschen!

S Thema uff dr 50-z’ger Noote,
isch dr Wind - dasch sauguet groote.
Das zeigt gnau, wie s vom Bortmonee hinde,
d Noote duet - uff s Styyramt winde!

Kenne Sii d Frau Regula Rytz,
die will kai Atom-Strom in dr Schwyz.
Und, gäbs e Blackout maint si haiter,
näm sii dr Strom - vom Blitzablaiter!

Dr Nora Illi iire Maa
Sait: „d Nora muess e Burka haa.“
Numme s Schmuuse syyg nid cool;
wäg de Faaseren - im Muul!

Impressionen

von

Heiri

Steckbrief

Jo, jo, jo - diesen Baselbieter haben alle Städter schon lange ins Herz geschlossen. Grund: Er ist einfach ein geiler Siech.
Comité-Bank seit 2006

Video

Verse

Die mäischte Buure joomere. Em Heiri däm gohts guet.
Säisch daas als Baselbieter, denn bruuchsch scho zimmlig Muet.
Mir gohts super, well im Stall d Milch duet besser fliesse,
sit ych am morge myni Chüe mit Handschlaag due begriesse.

E Uni-Campus im Baselbiet! Die Idee isch nid für d Chatz.
Dir häid d Studänte, e Huffe Gäld. Mir häi e Huffe Blatz.
Im Geegezuug mach ich für euch, y hoff, dass euch das freut,
e Chälbermascht mit Muetterchüe im alte Poschtgebäud.

Dr Jogi Löw längt sich an Sack, grad vor dr Kameraa.
Ych stuun und stell ergriffe fescht: Dasch e ganz normaale Maa.
S Groosi z Buckte verliert drufaabe völlig dr Verstand.
Äs schüttlet wäg däm Jogigriff alle Manne nümme d Hand.

Si wäi d Aarbetszyte sänke bi de Basler Staatsbeamte.
S bestoht e Masseburnoutgfohr, behauptet so e Tante.
Aber wenn die weniger schaffe, so e Stündli oder zwäi,
denn gönge die arme Sieche z oobe nüm usgschloofe häi.

Basel selli andersch tigge, ganz ehrlig, ych glaub nid draa.
In Basel isch doch alles glyych wie in Amerika.
Hillary Clinton oder Trump, dasch Pescht oder Cholera.
Dürr oder Mück, dasch Valium oder Generika.

Die Basler häi e Egge ab, dr Guschti isch usser sich.
Die häi jetzt e grüeni Zoone statt me rollende Stroossestrich.
Achthunderdryssig Franke ha y dörte investiert.
E Zwanzger ha y em Chätzli gee, für e Räschte ha y parkiert.

Wenn y Bsuech ha uf mym Hof, nimm y Rücksicht, wo i chaa.
Drum legg y, wenn e Muslim chunnt, myyne Chüe e Burka aa.
Wenn dr Erdogan würd choo, nimm y dr Hund an d Lyyne
und falls dr Donald Trump set choo, nimm y die junge Hiehner yyne.

Bye bye, au revoir Champions League! Dr FCB spiilt schwach.
Verdelli Buebe, dir chönntet schutte, dasch nur Charaktersach!
De gsehsch käi Huggel, Streller, Frei, null Bursche, wo sich queele.
So chunnt s halt ebbe uuse, wenn d Baselbieter fehle.

E alte Basler säit zu mir: Die Wahl in Regierigsroot,
dasch e Uswahl zwüsche Schutt und Gröll, dasch Eeländ gege Noot.
Heiri, y schänk dr die Heidi Mück und die Blueme, säit är lyys.
Denn hän dr für euer Schwingerfescht e schööne zwäite Bryys.

Dir Basler sit halt scho ufgschlosse, do stuunt dr Heiri dr Buur.
Vier Bürgerlichi „oben ohne“, drei mit, äin ohni Frisuur.
Bi eus wär d Pegoraro und d Frau Gschwind uf däm Blakaat.
Doo mäint au äin vo dr SVP: E Burka wär e Gnaad.

In Weil floriere Hieber, Aldi. Dr Achter fahrt im Takt.
D Schnäbblijeeger fülle d Täsche, bis s die fascht verjaggt.
Im Stücki baut me jetzt e Kino gege d Shoping-Noot.
Dört zäige si denn rund um d Uhr: Spiel mir das Lied vom Tod.

Dr Herr Darbellay isch Katholik und är isch konsequänt.
Drum bruucht er käini Pariser und är nimmt au nid d Händ.
Uf Frooge noch sym Syttesprung reagiert är enerviert:
D Brite häi dr Brexit, y ha dr Sexit usprobiert!

Käi Bettehuus für s Bruederholz und Laufe mache si zue.
Das bringt e Baselbieter Buur samt Chalb nid us dr Rueh.
Dr Tierarzt zahl y sälber, solang y das no chaa,
und falls y sälber Bräschte haa, gang y zum Doggter FMH.

Y bi wirklig zimmlig sicher, oder mindeschtens vellicht. 
Eventuell ischs nooni klar, wohrschyynlig aber nicht. 
Statistisch gseh isch s unwohrschyynlig, vellicht blyb ych uf Kurs.
Y glaub vellicht grüess ych euch härzlig. Euche Fischer Urs

Heiri, y gib dr e Millioon, het dr Hampe Wessels gsäit.
Mach drfüür in dyner Schüüre z Buckte für eus e Park and Ride.
E Park an Ride intressiert käi Sau, gib ich ihm z bedänke.
Dasch glyych, mäint do dr Wessels, y due halt äifach so gärn schänke.

Impressionen

von

Penetrante

Steckbrief

Auffallende Kostüme, spitze Nasen und kräftige Stimmen. Mit wohltuender Penetranz singen die Penetranten über Gott und die Welt.
Comité-Bank seit 1997

Video

Verse

Wenn sii als d Schwyzer Hymne vor em Matsch dien bringe,
hänn iir eich gachtet, s duet kai Spiiler wiirgglig singe.
Das isch kai Grund, dass me die Buebe zämme schisst,
mit gschwelgter Bruscht isch d Gfoor vyyl z gross, dass s Lyybli risst.

A propos Lecher in de Lyybli, dasch modäärn.
Das drait d Frau Bundesreetin Leuthard als no gäärn.
Do schtuune alli, au der Ueli, dää glai Wicht,
äär maint mit Kennerbligg, jetzt isch si nimm ganz dicht.

Der Donald Trump dä siigi schiints fir d Wält e Gfoor.
Mir finde s Schlimmscht an dämm sinn sini gfäärbte Hoor.
Doch offebaar wirsch do dermit hit Präsidänt,
drum het s em Baschi Dürr nit fir s Präsidium glängt.

Es leggt der Darbellay der CVP e Ai.
Äär ziilt in d Mitti, aber laider nit dehai.
Im erschte Statement wo dää Usswäärtsveegler git,
maint äär: „Entschuldigung - ussbrietet han ich s nit“.

Fir Laarve, Goschdyym, Helgebueb muesch nimm wyt laufe,
hit duesch das alles digital uff Ebay kauffe.
Mir hätte gäärn d Regierig au uff Ebay bschtellt
und der Wessels sofort wiider iinegschtellt.

Das isch the new First Lady of the USA.
Do maint der Putin nur derzue: „Hey ey ey ey!
Mir hänn doch abgmacht, Waffen weg, Gewehr bei Fuss
und jetzt zwai riise Bombe zmitts im wysse Huus“.

Drufabe het der Donald Trump grad sofort twitteret
und dää Sachverhalt in glaare Woort erliteret:
„This balls are mine and they do really turn me on
and it is not Atom, it’s only Silikon!”

D Frau Pegoraro wuurd me gäärn in d Wieschti schigge.
Me wuurd die Wieschti z Lieschtel lieber nimm erbligge.
E Beduin schriibt, kumm zu mir du armi Seel,
denn spiile mir das Spiil, Kamel hoggt uff Kamel!

Das isch d Gitarreleererin, Frau Ackermaa.
Die Wääler hänn glaub ain uff der Gitarre ghaa.
Jetzt schtoot die Frau doch nei als Präsidäntin uff
und ziet am Moorge aifach anderi Saite uff.

Google het jetzt so ne fiererloose Kaare.
dasch ebbe gliich wie si im Aargau Auti faare
S goot ooni Fierig, ooni Blaan, am Schtiir kai Sau,
im Präsidialdepartemänt goot das jo au.

De siibe Zwäärgli bringt das Toi Toi sicher Glück
Uff der Bauschtell und zem Glück au ooni Mück
Wie siibe Saisoniers schteen s do e bitz elai,
mir hoffe Andi Saison göön sii wiider hei.

Mir sinn politicly correct als Schnitzelbangg,
doch unsri Sproochzensuur die macht uns langsam grangg

Nääger saisch scho lang nimm - Schwarz isch au verbyy
und bim Brunsli ässe git s e Hischterie

Bschtellsch e Wiener Schnitzel isch das Näärvekitzel.
Unde duure bisch denn bim Zigüünerschnitzel

Das isch e Blätzli vo Ethnische Minderhaite,
wo di Goldschmugg als ins Elsass dien beglaite

Immerhin git s an der Mäss no Düürgehoonig,
das waiss der Erdogan woorschiinlig aifach noonig

Nur iiber Ziiri Gschnätzlets darf me ungstrooft motze.
Das isch au richtig will das isch jo au nit guet!

Wenn d hit e Fotzelschnitte bschtellsch wirsch fascht verschosse,
mir hänn die Zyte mit de Maitlibai no gnosse

Au der Russezopf isch haiggel, s isch zem Griine,
me kaa s versueche, aifach ooni Sultaniine

Fir gschtampfte Jud im Milidäär griegsch zää Dääg Kischte.
Es wäär brobleemloos, s wääre numme gschtampfti Grischte

Machsch uss em Grischt e Stolle, isch das au nit kritisch,
doch der Judekueche isch antisemitisch

Der Pabscht in d Pfanne haue darfsch und jeede Schwoob,
doch nie der Mohammed, sunscht bisch islamophob

Doch dass das glaar isch, mir föön grausaam afoo wiete,
wenn die uns Baasler denn no d Schwööbli wänn verbiete

Drum singe mir au mit der Laarve do - gottloob
Iir glaubed s nit, doch ain vo uns do isch - e Schwoob
Dämm sait me Aartevyylfalt oder au Divörs,
drumm saage mir jetzt Tschüss, dasch unsere letschte Vöörs.

Impressionen

von

Peperoni

Video

Verse

Fir‘s Dreier-Dramm ins Noochberland,
git’s Stitz – versproche, nur in d Hand.
Der Wessels het sy schlächte Stiil dodermit no gstaigeret.
Jä Hampe, worum hesch du dert di Handschlag nit verwaigeret?

Isch äggscht d Frau Somaruga do?
Y hätt e Värs iber Asylante …und so.
Nai nit diräggt ain iber sii – y wott ere jo nit schlächts.
Und falls si schnäll wett uusegoo …s WC wäär hinde rächts.

Waisch no dä dolli Väärs vom Drämmli
vo wääge: “Uff di wart y nämmli?“
Hitt stoot’s Drämmli als scho do, der Drämmler lächlet schlapp;
luegt di aa, macht d Diire zue und faart denn vor dir ab.

So unter uns – y ha gescht z Nacht
uf mym Samsung Händy Raclette gmacht.
Y saag der numen ains: „Due das nit uusbrobiere!
Finfhundert Stai firs Händy und zwaidausig s Renoviere.“

Ych aut mi jetz und giib bekannt:
Als Baasler woon ych uff em Land.
Drum bring ych iber die kai Värs, das wäär e Stolperstai.
Denn, wenn d Fasnacht ummen isch, mues ych jo wider hai.

D Globalisierig macht nit halt.
Au ych als Bänggler gspyyr die Gwalt.
Y hätt e bombe Väärs, was im Roothuus so grumm lauft.
Doch d Kyneese hänn die Pointe sammt em “Pepeloni“ kauft.

Der Fischer seit de Spiiler sträng:
„Hütt stönd mer düüf – jaa… ee… d Rüüm sind äng.
En Viererchetti, Pressing, jaa.. ich dänke hinne muure.
Und dänn no gnüegend Gel id Haar, jaa ... dänn hebed au d Frisure.“

Wenn sich die Bruet nit kaa binää,
und dir sy Pfoote nit wott gää,
denn nutzt alles rede nyt, de schwätzisch an e Wand.
Gib dääne der glai Finger, denn wänn si die ganz Hand.

Wenn d wotsch mit em SIRI schwätze,
denn isch e Samsung siibe s lätze.
Wenn derte nonem Wessels frogsch, gspyyrsch, wie’s lyycht vibriert.
Und uff‘s Stichwort “Heidi Mück“ kaas syy, dass‘s explodiert.

Z‘ Las Vegas haut’s en alte Rocker
wäg däm Donald Trump vom Hogger.
Wo er gseet, wie dä sy Määne schwungvoll hindere gläbt,
rieft dä us: „Y ha’s doch gwüsst, dass der Elvis läbt!“

D Frau Merkel sait zem Donald Trump:
„I am the Boss - e German Vamp!
And wenn you mich begrabschen, so have we zämme Spass.“
Und dänggt sich: „Leute schaut mal her, ich schaffe sogar das!“

Isch d Simonetta wiider do?
Hänn sii sy scho gsee yynekoo?
Im Grund gnoo isch mir das jo wurscht – die dummi Zwängerei.
In däm Fall wett y mälde: s Hyysli wäär wiider frei.

Wär dur‘s Minder Baasel goot,
gseet, dass der Strich bim Strich aafoot.
S Millieu rot, d Hiiwyys grien, ab do wird animiert.
Do gseesch, dass au uff däm Gebiet, Rot-Grien dominiert.

Fir die wo d Oggsegass bewoone,
git’s quasi sone gschitzti Zoone.
Hett äggscht uff Wunsch vom WWF der Baschi iiber Nacht,
dert e Voogelschutzgebiet fir Drottwaaramsle gmacht?

Mi Frind het sone “E-Bike“ kauft
und stuunt, wie schnäll dä Geppel lauft.
Und will er nimm ka brämse, duet er mit der Glogge lytte.
S dumme draa isch numme: dä Baum isch nit uf d Sytte.

Impressionen

von

Pierrot

Video

Verse

Verrisseni Jeans sin modärn,
me drait so Hose gärn,
si sin beliebt, bi Männli und bi Wyybli,
und dr neischti Hit, sin Nati-Lyybli.

Zwai Buebe y finds e Schand,
gän dr Lehrerin nit d Hand,
lut em Babbe kenne si sich nit yberwinde,
s isch scho e Laischtig, dass si s Schuelhuus finde.

D Frau Merkel duet nit yberdryybe,
wenn si sait, Schwoobe wärde Schwoobe blyybe,
das isch au s ainzige uf Ärde,
wo si laider schaffe wärde.

Bolitisch het s bim Morin gharzt,
drum versuecht s är wider als Arzt,
au an de Apéro sehschen nimme straale,
he jo, jetz mues är wieder sälber zaale.

Im e Hotel gryfft e alte Maa,
us haiterem Himmel dr Blocher aa,
es haigi schynt s jo numme kracht,
will baidi nit gwisst hän, wie me e Selfi macht.

Hesch no kai feschte Schatz,
findsch ain bi uns am Arbetsplatz,
das Inserat isch zimmlig nei,
mäld di doch bi dr Bolizei.

Finde si das au gschpunne,
dä blondi Elvis-Verschnitt, het d Wahle gwunne,
ych hätt viel lieber d Hillary,
si wär nit besser, aber e bitz die stillery.

Im Rot-Licht steen d Dame stramm,
näbe dä griene Pictogramm,
dr Baschi duet das duure stiere,
das sin doch die baide Farbe, wo regiere.

No dr neischte Gaunertabälle,
hogge am maischte Afrikaner in dr Zälle,
drum darf sich kaine gross beklaage,
we mir de Kriminelle, dunggli Gstalte saage.

I ha Albanie - Schwyyz, au gsee,
im Prinzip macht e roti Karte wee,
dr Spiiler het gstrahlt, är zaigt kai Hass,
är het gmaint, är griegt dr Schwyyzerpass.

In dr FIFA het s Veegel us aller Wält,
es goht halt um e huffe Gäld,
drum sott dä Italo Boss, Spass vertraage,
wenn sim statt Infantino, Involtini saage.

Zwelf Joor het d Juschtiz gfluecht,
und em Behring sini Aggte gsuecht,
finf e halb Joor soll dä Riis verschwinde,
si mien numme no e passendi Kischte finde.

Impressionen

von

Schlyffstai

Steckbrief

Der Schlyffstai ist ein hochkarätiger Diamant der Bänkler-Szene. Die Verse haben Witz und der kunstvolle Vortrag ist ein absoluter Genuss.
Comité-Bank seit 2006

Video

Verse

99 Luftballons vo dr Nena
Hesch du grad bitz Zytt für mii, denn hätte mir e Tweet fir dii.
Dää isch uss sichrer Gwelle koo: vom Internet vo iirgendwoo.
Mit hundertvierzig gfeykte Zaiche, kasch hittigsdaags rächt vyyl erraiche.$
Ob woor ob falsch - isch doch egaal, Hauptsach du leiksch uns digitaal.

E russische Hägger sait vergniegt:
«Ych zaig euch jetz wie me d'Woored biegt!»
Tweets wäärde vo Compis gmacht, Strytt wird iber nyt entfacht.
Mir kommentiere annonyym mit «Troll Säggs-Nyyn» als Pseudonyym
Und schimpfe uff d'EU-Elite, wi's uusekunnt, gseesch bi de Brite.
Dr Donald gitt sich unverglemmt - wird faggdefrey grad Bresidänt.
Mit Fake-News schaffe mir e Wält, wo d'Meerhait sogar Duubel wählt.
Nur Baasel hett dr Wissensschatz: Mir finde d'Woored in dr BaZ.

Am Strandbad vom Mani Matter
Dr Sarkozy maint zum Burkini: «Das isch sini Kultuur und nid mini!
Will drait mini Frau e Burkini, weiss-i nimmi: Isch's mini?»
Mängi sett, mien mir saage, grad diräggt Burka traage:
E schalldichti denn, die wär super fir d'Marine le Pen.

Sugar Baby Love vo de Rubettes
Vier Schwiegerseen, wo bi de Waale go baade geen,
das sind unsri Bebbigleen (Dasch Uff-Schwumm)
Nur bolitisch gseen mir nid, wo si schteen.
Zum Gligg isch uns jetz allne glaar: Baasel hett e näije Suuperstaar:
Elsi Ackermaa, bisch aifach wunderbaar! Settsch dr Morin nid als Vorbild haa (Bla Bla Bla)
Dä hett nämmlig nur dr Kessler ghaa. Drotzdäm bisch du dr bessri Maa.
Dr Eric Juillard steert sich schampar draa: Als Balascht derfsch du d'Kasäärne haa.

Ein Ehrenwertes Haus vom Udo Jürgens
Bim Spiegelhoof verboorge hett's e riisegrooss famoose Wagepargg.
Und unsrem Boolizei-Diräggter isch's egaal wär mit däm Wagepargg so faart.
Är maint nur: «Näji Reegle bruuche drum vyyl Zyt und die han-i nid - waisch, wie's goot?
Ych gang drum lieber bitz goo dräjime - wien ych ächtsch wäär als Bundesroot.»
Joo, will der Waschi-Baschi laschi isch, ziet iin das Kaader raschi ibre Disch.
Nyt mol als Stapi händsen gwäält, das hätt no gfäält, will äär isch gryffbar wie ne Fisch.
Äär isch fruschtriert und bitz pikiert und schafft drum flyssig als wie mee bi sich dehaim, stell dir voor!
Wenigschtens deert isch äär erfolgryych, dangg Ariel, Omo und Lenor.

A far l’amore comincia tu vo der Rafaella Carrà
A-a-a-a In dr Regio wird bald gschwuunge
A-a-a-a Doch dr Wäg deert aane isch verschlunge.
In Aesch wälze sich kaini Beese, will si Richtig Laufetaal lieber deese
So lauft das allewyyl mit em Baaselland - statt ins Säägmääl setze si in Sand.
Kumm mir schwinge z'Baasel umd Wett
Schwinge isch wie modäärns Ballett
Dr Lauber verglaidet sich als Senn
Und sait: «Make Baselland great again!»
Mir wänn Schwingen au im Joggeli gsee
Denn gäb's Emotioone statt FCB.
A-a-a-a Dr Läändler mues ee spaarsam sy.
A-a-a-a Statt Uni gitt's e Deponie.
Neu wärde Beamti nach Laischtig zaalt - das saniert dr ganzi Staatshuushalt.
Nur d'Pegoraro luegt beklemmt - will's Woort Laischtig isch ire fremd.
D'Kultuur wird zämmegspaart
Au fits U-Abo blybt's haart
D'Bieter singe trotzig im Chor:
«Eech bruuch kä Dramm, eech han en Traktoor.»

Noochvärs: Hand in Hand vo Koreana
Z'Däärwiil gisch dr d'Hand, d'Gschwind hett's gschwind erkannt.
Nai, das isch nid aifach stuur, sondern joorduusig alti Kultuur

s'Zündhölzli vom Mani Matter
Online shopping isch dr Hit, drum shoppe mir rächt flyssig mit.
Bschtelle bi Amazon, Zalando und bi Le Shop. S'wird nyt lang go,
Scho isch's Zyygs, wo jede wott und kaine bruucht, bi uns ganz flott.
Und settsch im Juhee woone: Nach Lieschtel liiferet's e Droone.
Uff dr Strooss herrscht offe Strytt zwische Boscht- und FedEx-Lyt.
Im Stäägehuus wird's langsaam äng, will d'Pizzablitzer duurewän.
D'Pizza isch kalt, wo mir signiere, will mir zwelf Schuebaar aabrobiere.
Zää Teenie mit em iPhone jage hektischt Pokèmon.
Ych gheer uffs Mool e Riiseknall und gsee dr dritt Uffaarunfall.
Zum Gligg isch gescht mi Handy koo - i haa's uff Video uffgnoo.
Bim Youtube-Upload isch's bassiert - das Samsung exploodiert.
S'Huus kabutt, ych bättelarm - derfiir isch d'Pizza wider waarm.

Blown in the Wind von Bob Dylan
Worum hett der Bob Dylan ewig gnuuschlet und gspiilt,
Bis si iim dr Nobäl-Bryys verleije wänn?
D'Antwort mi Frind, es gitt do gueti Grind:
S'isch will s'en bis hitt nid verstande hän.

Mack the Knife vom Kurt Weill
Hett glaini Händ, en oorangsch Gsicht, Und wenn dä schwätzt, mainsch, dä sigi dicht.
Will e Muure haa und maint: «Heil USA!», und bi Muslime goot är gäärn au mol mit Folter draa.
Mexikaaner und au Iraaner und erscht Vegaaner sind im suspäggt
Und vor Fraue - so im Vertraue - hett är erscht ab Dobbel-D Respäggt.
Die Parallele kaa jede gsee zu Marine Le Pen und AfD
Zwar sind mir irritiert, aber nid alarmiert,
Solang dr Christoph Blocher nid uffs Mool sy Hoor blondiert.

Dr Hansjakobli und s'Babettli vom Mani Matter
Dr Erdogan entloot gäärn Richter, Boolizischte, Leerer und au Dichter.
Doch äär stoot uff gueti Journalischte - und steggt si drumm au gäärn ind Kischte.
Au Kurde, Gülen, Kemalischte sin fir in alles so Putschischte
Die deerfe sich im Knascht empeere - denn dien si in sym Baarlamänt nimm steere.
Är witteret drnoo Verschweerig, bi jedem wo im nid isch heerig.
Die ainzge, won-äär wott willkomme haisse, sin haissi unverhillti Gaisse.
Syni Boolitigg isch zimlig schytter. Bim Putin bringt's iin sicher wytter
Är hätt dr Vladi gäärn an sinre Syte, syt äär iin gsee hett oben-oone rytte

Bin-i Gopfridschtutz e Kiosk vo Rumpelstilz
Ych han zum Styyre spaare, mini eigni Styyrrefoorm.
Dasch lugratiiv, das glaubsch du nid, das lohnt sich ächt enoorm.
Ych han e Firma grindet, wo zwaar nyt produziert,
Si isch als Coiffeur yydrait - will si Zaale braav frisiert.
E Batäntbox hilft mir Spaare, will kain waiss, was es isch.
Uss Styyrenptimierigsgrind kunnt Kaviaar uff mi Disch
Due jedes Riiskoorn gältend mache, schryyb's fir d'Firma neume uff.
Ych fier drum sogaar Buech, wenn-i mi gnadeloos besuff.
Wie Novartis, Roche, Syngenta kan-i abziee, was-i wott.
Trotz Villa, Pool und Wagepargg bin-i offiziell bankrott
Do lyttet's an der Diir: D'Frau Herzog luegt mi ganz sträng aa:
«Si bekemme vo mir Styyre zrugg. Wänn si's jetzte bar grad ha?»

Kiss vom Prince
Bi däre Schwyzer Sexumfroog hän mir dänggt, mir mache mit.
Uns goot's wie vyylne Basler: Mir drey sin au gärn z'Dritt.
Jede dritte Bebbi goot schyynt's freudig fremd.
Nur mir drey Schlyffstai sind treu und bitz verglemmt.
Dä Saal hätt Potenzial und gäb uns d'Qual der Wahl
Kumm, jede Dritte lypft jetzt dr Arm: Mir gän uns warm.

Katjuscha, Katjuscha e russischi Wyys
Putin du bisch e sensible, zarte Mensch
Drum loosch nur Lytt ermoorde, wo du nid perseenlig kennsch
Dini Athlete wärde immer

liggt nyt nur am Russisch Fitnessdäller
Will Olympia halt di groose Draum isch
Doobsch du e jede wo bi drei nid uff em Baum isch.
Mit em Assad schaffsch du suuber Friide
Um das duet di dr Obama beniide
Du hilfsch de Syyrer sich besser z'orientiere
Indämm d'Aleppo mit Bombe duesch blaniere.
Putin, du bisch glai und rächt adrett
Danzisch wie ne Bäär uff diplomatischem Parkett
Ain vo dim Kaliiber als Partner hett dir gfäält
Zum das behebe, hesch du dr Trump schnäll gwäält.

Hotel California vo de Eagles
Die neui Wält gseet alt uss, syt dr Trump der Bresidänt stellt.

Und mir wäärde s'dunggle Gfyyl nid loos: Die hän nur alti wyssi Männerstimme zellt
D'Wält erfaart jetzt dääglich, egaal, ob Schiit, Hindu oder Sunnit
Ob är uss Luscht dr rooti Gnopf hit druggt, in sym moorgentlige Tweet.
D'Zuekunft foot in de USA erscht in vier Joor aa
Will dr Bresidänt em Putin d'Bruschthoor kämmt
Derfsch eifach nyt brobiere, was är sait, z'kapiere
Dr Castro hett's brobiert - und isch do draa krepiert.
D'Hair Force One isch jetz gstartet - S'isch dr Uur-American Dream:
Dr Bappe schänggt dir zum Gspass e Milliaarde - und die Aarme geen dir uff e Lyym
Uns kunnt das ee bekannt vor: Lutt, gross, blond und bitz groob
derfe nid vergässe: Dr Trump isch rain genetisch e Schwoob.

Impressionen

von

Schnaabelwetzer

Steckbrief

Schon das Goschdym bereitet auf einen bunten und rassigen Auftritt vor. Und er kommt. Mit bestechenden Pointen und Helgen.
Comité-Bank seit 1997

Verse

1
Pomaade, Föön, drey Büggse Spray – e jeedes Höörli sitzt
Drzue die wysse falsche Zeen – es glitzeret und blitzt
Mit dääre Fryyse, dääre Schnuure, top vo A bis Z
Isch s glaar, ass dört drzwüsche s Hiirni gaar käi Blatz me het.

2
Arosa, Schuls-Tarasp, Zermatt, Bergün und Fuulesee,
Valbella, Flims und Adelboode, Andermatt, Saas-Fee.
Jetz hämmer gnueg, uns schysst das aa – mir fliege nach Fäärnoscht.
Wär wäiss, villicht git s dört jo no e Schalter vo dr Poscht.

3
Vo Aafang aa het Beznau 1 im Beton schyynts so Riss.
Was isch das für e Inschiniör? Käi Plaanig – numme Bschiss!
Jä Sii, mir hänn dä Schluuderi jetz schwäärschtens im Verdacht:
Das isch dr glyych, wo d Lyybli vo dr Fuessball-Nati macht.

4
In vyyle Spunte het s dir no vor kurzem schampar gruust.
Amäise, Schaabe, Wäntele hänn in der Kuchi ghuust.
Hüt sinn die Bäize klinisch räin, perfäggt desinfiziert.
Und d Vyycher laufe nümmi umme, die griegsch jetz serviert.

5
«Du, Kläärli», rieft dr Ferdinand, «jetzt liis emoll die BaZ!
Bim flotte Dreyer hänn mir Basler schyynt s e Spitze-Blatz!»
«Soso», mäint s Kläärli, «loos, y glaub, y wäiss, wohäär das kunnt:
Stand ych am Baarfi, kunnt dr Dreyer achtmool in der Stund!»

6
Im diefschte Mittelalter, wenn d dr Tripper hesch bikoo,
Denn hänn sy dii im Siechehuus als Geschtöörte schmoore loo.
Statt Tripper git s e neui Süüch: Jä, die isch denn e Gruus!
Die kunnt per Twitter vo-m e Gschtöörte us em Wysse Huus.

7
Für jeede Fümfer im Französisch grieggt dr gläini Lutz
Dehäim sofoort e Gschängg, und für e Säxer git s zää Stutz.
Jä Sii, nit jeede grieggt sy Gschängg sofoort und subito:
Bim Darbellay sym ZwäieR isch s nüün Moonet spööter koo.

8
«Und 1 – 2 – Foxtrott – Tscha-tscha-tscha, nun links das rechte Bein!
Und vorwärts – rückwärts – Ausfallschritt! Jawoll! So muss es sein!»
«E soone flotte Danzkuurs», mäint dr Baschi, «find ych guet,
Do lehr y nämli äntlig, wie me richtig füere duet.»

9
Trotz Stau und Zytverluscht – my Frau het wider s Auti gnoo.
Der Kluge fährt im Zuge – denn uf d Baan kasch dii verloo.
Wo-n ych wott s Billje uuseloo und mach und murggs und drugg.
Isch d Frau mit iirem Kaare scho vo Züüri wider zrugg.

10
Als Bänggler rennt me an dr Faasnacht krüz und quer dur s Gmoscht,
Vom Spitz zum Baarfi über d Lyss zum Schlüssel by dr Poscht.
Jetzt hämmer d Naase voll vom Stress, drum gönne mir uns drey
E Gratis-Franggo-Dienschtfaarzüüg – vo dr Schuggerey.

11 (ohne Helgen)
Mit Paugge und Trumpete kunnt dr Blocher ins Spitaal.
Är häig sich alles broche – z Bärn – politisch e Skandaal!
«Herr Blocher, nur käi Paanigg», mäint dr Notfalldoggter Tschanz,
«Jo, d Naase isch kabutt, doch d Riiseschnuure isch no ganz!»

Impressionen

von

Schooffsuuri

Steckbrief

Sorgt für etwas Entschleunigung an der Fasnacht. Während sich das Publikum entspannt zurücklehnt, singen die Schooffsuuri Verse, die sitzen.
Comité-Bank seit 1992

Video

Verse

„Mia sann mia“ haissts in Minche fascht gweelt :
Kuum us em Knascht wiird der Hönnes scho gweelt.
Jetz kaasch do zwoor saage – der Schwoob isch esoo ;
Nur : der Groossroot het der Thüring als Breesi au gnoo ….

In Bäärn do wiird gstritte, wie s mit der Ränte soll koo,
es goot deert um d Voorsoorg und wenn de sottsch goo.
Mit Wessels und Baschi hänn mir en äänlig Brobleem
S git aifach kai wiirggsam Ent-Soorgigs-Syschtem.

Jetz isch mi vereerte Frind Dimitri dood
Wäär zaigt jetz im Alte wie s Eergeli goot ?
Und wäär maant d Bolitigger allewyl draa
Wie me - ooni vyyl z reede - ganz vyyl saage kaa.

Jetz stoot d Banggsioonskasse au no dumm doo,
Wie sool jetze d Landschaft no e Kippi umgoo ?
Wenn die im Dreispitz der 11er bloggiere
Wuurd der Wessels bestimmt drey Mylioone spändiere.

Vo Betty & Bossy het der Somm s Koche klaut,
was är au aadrifft – wiird in d Pfanne ghaut.
Und jetz no das Sujet – ai Pauggeschlaag
Dää sprängt der Raame jo fascht jeede Daag.

D Uni mues spaare – s Baaselbiet redt zwoor mit
Doch goots denn ans Zaale „no wei si das nit“.
Und jetze bim U-Abo - dänggsch au wiider draa :
Mien mer die wiirgglig bi uns unde haa ?

Stroossbuurg sait ganz glaar, der Eymaa haig rächt,
me drenni bim Baade hit nimmi no Gschlächt.
Geen Cramer und Baschi ooni Fraue in Ryy
Isch das also rächtlig nit suuber gsii.

Stimmed nur „Nai“ haisst s im Summer letscht Joor,
der „Service public“ dä isch nit in Gfoor.
Suechsch zem Stimme e Boscht – bruuchsch hit vyyl Phantasie
Goosch gscheiter im Roothuus perseenlig vorby.

Fir Cowboy und Trucker; schwärm ych scho syt glai
Gseen i denn ain - summ i „Country Road bring mi hai…“
Doch kunnt aine z bretsche – dänggsch syt Nizza – dasch marood
Bringt dää di jetz hai oder bringt dää der Dood.

Bisch hit iber 40 – sottsch ins Fitness goo
Denn d Sitzblätz im Drämmli hänn d Brimmeler gnoo.
Geen die denn in d RS bruuchts Schläppli statt Schue
Und der „Blick“ bringt bim Nachtmaarsch no d Mamme derzue.

I bi nit vegetarisch und au nit vegaan,
I bi lieber gligglig als gsund mit däm Waan.
E Yglemmts mit Schungge, do frai i mi draa
Nur : worum mues‘s in allne e Guggummere ha ?

Neggschtens do faar ych denn mit mim Koleeg
Uf Bäärn in die eerschti Migros-Abideegg.
Deert kauff i mit Cumulus-Phinggt s Viagra yy
Und wiird denne eerscht no „e M besser“ syy !

Impressionen

von

Schunggebegräbnis

Steckbrief

Selten sorgt ein Begräbnis für soviel Witz, Unterhaltung und gute Stimmung wie dieses. Übrigens nicht nur bei Veganern.
Comité-Bank seit 2012

Video

Verse

Dr Brexit isch Tatsach, dr Grexit no offe,
Italexit und Frexit sinn au praggtisch gloffe,
Españexit, Portugexit,
Österrexit, Dänemexit? –
Und wenn d EU nümm wird syy
tritt jo d Schwyz vilicht denn byy!

Bisch gärn einsam und elai, hesch nach Stilli s Verlange,
bisch friener no ins Stücki oder d Märthalle gange,
suechsch du hütt sone Plätzli,
wo de Rueh findsch mit em Schätzli,
roote miir dir – entre nous –
kauf e Billjee fir s Tattoo!

Es will d bz Basel en Usgoob jetz stryyche,
e Zyttig am Sunntig - e publizistischi Lyyche,
doch wenn d scho muesch spaare,
wär umkehrt au gfaare:
BaZ am Sunntig, s wär e Hit,
an den andre säx Dääg nit.

Im Krieg isch me friener uf d Wiise go morde,
em IS sy Schlachtfäld sinn d Innerstedt worde,
per Camion in d Masse
wurd z Basel nit basse,
wär an Barfi faare muess,
griegt scho am Steinebärg e Buess.

S dien d Rammel au bim Zolli – mir dien das beduure –
in Sache Finanze ganz jämmerlig muure:
«Büffel, Affe und Pfaue
chasch au z Lieschtel go bschaue,
öise Zolli isch komplett,
wenn dr Landroot Sitzig hett.»

Zwaidausigundsächzäh, zem Glügg git s dii nümme,
denn nit nur politisch het d Wält miesse schwümme,
au grossi Artischte
mien vyl z frieh in d Kischte,
nur öbbis Guets, das hänn mir gsee:
Züri in dr Nati B!

D Hauptposcht macht zue, s däät schynts nümm rentiere,
dr Bund will jetz s Schwingfescht dört inn duurefiere,
doch wie s halt so goot,
dr Bund isch scho z spoot,
s Tanja Soland hett über Nacht
schon e Hundepargg drus gmacht.

As Abfindig griegt unsre Kessler, s isch lausig,
vom Stüürzahler numme grad zweihundertdausig,
hätt dr Wessels ihn entloo,
wär s no vyl schlimmer koo,
will dr Kessler eifach so,
zwei Millione hätt bikoo.

Zer Wienachtszyt hänn mir mit grossem Entzügge
probiert, unser Vorgärtli wiehnächtlig z schmügge,
hänn dr Gartezwärg dekoriert,
e baar Kuugele platziert
und denn alles (wenn s nur nützt)
mit drey Beton-Blögg no gschützt.

Jetz will doch dr Eric, dä unsäglig Sträber,
zer SVP wäggsle, doch die wänn kei Wäber.
Isch s ächt, will er e Ploog isch?
Nai, das isch doch ganz logisch,
ass dä Transfer abverheyt,
dä wär für d SVP vyl z gscheyt.

Es wott kei Pilot me zer Schwyzer Luftwaffe,
will d Flugzüüg regelmässig iri Landig nit schaffe,
Dr Superpuma kunnt kuum aa,
dr Tiger fliegt in Eiger,
ire Trainer, dänggt me glyy,
muess dr Simon Ammann syy.

Jetz isch halt dr Stadtpresidänt wider Doggter,
im rot-griene Kittel im Sprächzimmer hoggt er
und nuuschlet: «Guets Däägeli,
wo fählt s denn, Herr Nägeli?»
«Y ha Dürrchfall, fürchterlich
und am Arsch e Mückestich!»

D Frau Gschwind meint ganz sträng: «Doo git s nüt dra z rüttle,
de Lehrer im Baselbiet muess me d Hand schüttle.»
Wär derzue nit parat isch,
isch is trotzdäm sympathisch,
denn wär git gärn in däm Land
eme Baselbieter d Hand.

Impressionen

von

Schwoobekäfer

Steckbrief

Zählt zu den kostbaren Insekten des Comités. Mit fein gedrechselten Versen bohrt er Pointenstachel ein, die sitzen.
Comité-Bank seit 2000

Video

Verse

Schwoobekäfer 2017

Dr Schuggeroffizier Ernesto Müller het e Waage
fir dienschtligs und au denne nur fir bsunders ärnschti Laage
Grad hitte het är wider sone dienschtlig Fäärtli goorderet
Es het en nämlig d Frau grad no zum Kuchidienscht beoorderet.

D Frau Hueber, die vom Blääsiring, die isch in neye Bau
vom Kunschtmuseum wo erstraalt in sattem, frischem Grau
Si isch grad am Ereffnigswuchenänd das Huus go bsueche
Und hitte isch si allewyl no dra dr Usgang z sueche.

Im Drottoiramsleschutzgebiet vom Baschi Dürr wird ghobblet
Dr Johnny us dr Rhyygass isch grad unter d Deggi grobbled
Do kunnt si Frindin yyne, hui, die ka denn aber flueche!
Är staggelet, i bi doch numme Pokemon am sueche!

S het uff sim Kryzzuug gege d Auto in de Basler Stroosse
Dr Hambbe Wessels ufgregt drei entsetzti Schrei usgstoosse
Wo n är entzückt dr letscht wyss Parkplatz het usrotte welle
Het dä scho aine haimlig unter Dänggmolschutz lo stelle

Jetz het die gueti Queen sogar dr Nynzygscht zelebriert!
Die het als jungi Keenigin dr Churchill dekoriert.
Und us dr friehschte Juged bsinnt si sich no voller Frohsinn,
Wie z Allschwil usse s letscht Mol neji Trämlischiine ko sin.

Me mues bim Gotthard-Basis-Tunnel-Feschtakt, däm gigantische,
Zwai Mol dr Säge gä, katholische und proteschtantische.
Und kum hän die dä Säge useglo, git Rom bekannt:
Wenn denn e Zug entglaise duet, isch s ain vom Proteschtant!

Dr Maire vo Saint Louis, dä het zue syner Frau gsait: Schatzeli!
Hüt kunnt uf Bsuech dr Wessels; dä bringt sicher wiider Batzeli.
Do derfe myni Bürger denn e Hämpfeli choisiere,
Fir dass si au in Zuekunft kenne z Basel go parkiere.

Dr Cramer als Regierigsrot, wo d Schuel und d Bildig pflägt,
Wott z Lieschtel sy Kollegin Gschwind begriesse voll Respäggt.
Är streggt dr Doope ane, doch är gseht: Das isch vergäbe;
Die längt, wel si nit anderscht ka, au bi de Händ drnäbe!

Und d Pegoraro, die bekannti Stroosse-Usbau-Zwängere,
Au die isch z Lieschtel nur no tätig als Drnäbe-Längere.
Und wenn die mit em Wessels sott das Härzstigg durestiere,
Denn wird am Änd e Zahnradbahn uf d Wasserfalle fiehre.

De Buure, wo in Uri und im Wallis Lämmerhärde
Uf d Alpe trybe, stinggt s efang, wie d Dier verbisse wärde.
Si wänn sich jetz vertaidige und zaige das ganz offe:
Si haige zem s Beschwöre sich in Wolfeschiesse troffe!

Bi däne neje Auto, wo me nimme mues bediene,
Sin nur no Apparätli drin – e Mentschekopf bruuchts niene.
Doch das isch gar kai Sensation; das isch en alte Zopf:
Au z Basel machts scho joorelang d Regierig ohni Kopf!

D Frau Buurgget goot uf d Haupt-Boscht fir e Wiehnachtsgschängg z versände
Und au grad no dr Heilsarmee e Räschtli Münz go spände
Si hüpft nervös vo Bei zu Bei und das nid ohni Grund:
Wenn numme ihri Nummere no vor dr Schliessig kunnt!

Das Schmäh Gedicht vom Böhmermann sorgt wältwyt fir Furore
Do het sogar d Frau Merkerl dr Humor e bitz verloore
Nur d Diirgge nämmes logger; schigge Gschänggli, ganz verseenlig
E sälbergmachte Geissekääs, dä kunnt vom Chef perseenlig.

Dr Arthur Cohn wott d Halle non em Federer benenne.
Jetz kunnt die ganzi Prominänz fir son e Ehrig z renne:
Dr Nejbau vom Museum wird als Oeri-Nordwand ghandlet,
Dr Frauedail vom Eglisee in Eyma-Strand verwandlet;
Und s Stadion z Sanggt Jakob unde wird zem Heusler-Pärkli
Als Frehnerli verkauft dr Blueme-Wyss jetz Gartezwärgli
Dr Altstoff-Lottner dauft me um in Parmelin-Museum
D Kasärne wird millioneschwär zem Julliard-Mausoleum
Zem Behring-Stübli wird e Zälle gmacht im Wooghof-Knascht
Und d Euleburg im Zolli wird zem Ackerma-Palascht.
D Anita Fetz darf s Ländli ibernä, das frait si grysli,
Und Palais Morin sait me z Basel jetz de ToiToi-Hysli!

Impressionen

von

Schyynhailig

Steckbrief

Einer der brilliantesten Geistlichen ist nur schyynhailig. Im Bänkler-Himmel hat er trotzdem seinen festen Platz.
Comité-Bank seit 2017

Video

Verse

Bi uns spränggt me d’r Rahme ych find no das goot
‘s git andery Länder dört truambbe s’ en z’ toot

’s lehrt d’r Blocher bim Ufprall als alte Ma
’ass me d’ Nase nid überall dryschtegge ka

Ych nimm wäg’em Erdogan’s Muul nid so voll
Schyynhailygy finden en aigentlig toll

‘ass d’ Bolizeyauto rund um d’ Uhr lohne
macht als d’r Baschy d’rmit Komyssione

Alternatyv- und poschtfaggdysch gseh
lääse lut BAZ jetz d’ BAZ wider meh’

So Baselbiet’r wo d’ Hand nid wäi ge’
kenne mir Schtetter syt eh und je

Vo seelysch und geischtyg g’schädygte Lüt
sing ych vo Bruef’s wäge grundsätzlig nüt

’s Format vo däm Helge macht d’ Froog no brysant
«hängg’sch so ain uff oder schtellsch en an d’ Wand?»

Bi däm Bildli wo d’ Fraue ihren AB finde
han y johrelang gmaint da’sch e Prieschter vo hinde

d’ Frauerächt sin im Yslam
immer no besser als im Vatykan

’s git G’sichter - ganz abgseh ob’s relygiös syg
do wär doch e Schleyer scho’ fascht en Erlösyg

Falls ‘s Zölibat ewägg falle sott
wüsst ych scho’ lang welle Ma ’ass y wott

D’r Martin Luther seg zimlig alt
’s soll my jo kaine frooge was ych vo däm halt

Mei bin ych gschpiggt uf die Glaubenskonfliggt
wär’s wohr hät schoh lang aine d’Heilsarmmee gschiggt

Impressionen

von

Singvogel

Steckbrief

Dieser Vogel kann nicht nur singen - er ist auch ein komischer Vogel. An jeder Fasnacht setzt er zu neuen Höhenflügen an.
Comité-Bank seit 1997

Video

Verse

Wäge dääre lange Kelti sinn mir Vöögel doo.
Mir sinn schaarewyys in d Basler Gäärte koo.
Esoo wie d Baselbieter und au d Baselbietere
löön mir uns jetz halt vo de Stedter duurefietere.

E soone Reed zem Taag der Kranken, s isch naiv,
wirggt mit em Schneider-Ammann kontraproduktiv.
Denn won er schluggt und schnützt, sich röisperet und niggt,
isch unser Groosi amme Lachgrampf fascht verstiggt.

D Fau Stämpfli het am Määrtblatz sich zem Fiffi buggt,
het em s Fuudi butzt und s Gschäft ins Güggli druggt.
Daarf ych jetz dääre – ohni der Konfliggt no z stäigere
und ohni Grichtsentschäid – der Händedrugg verwäigere?

Wenn sich der Donald duet am Moorge d Wälle föhne,
bringt är sy Melanie dermit beräits zem Stöhne.
Jä, Lüt mit Macht und Yyfluss sehn soo us wie s Trumpe.
Drum Baschi, nimm der Föhn und loss dy nit lo lumpe!

U-Abo joo, U-Abo näi, U-Abo villicht.
D Frau Pegoraro schwaaflet und zitiert e Bricht.
Für s CO-2 und d Umwält isch das aber s Lätze.
S wäär effiziänter, wenn si äifach nit wurd schwätze.

Jetz duet doch d Huebere, zum s Sagggäld uffpoliere,
underem Schüttstäi Källerassle kultiviere.
Si duet se schöppele und meschte und au daufe
und denn in Ööl yygleggt drei für zwäi verkaufe.

Der Schugger Meier 4 muess hüt ufs Departemänt.
Men erkläärt em s Häimfahrt-Speesereglemänt.
Bim Wöörtli Luftlinie lacht er, und denn stoppt er
und frogt: Ou cool, jä griege mer jetz Helikopter?

Als erschts im Laager frogt der Koch wäge Zöliakie.
Wär isst vegaan? Wär koscher? Wär het Lactose-Intoleranz?
Wär nimmt käi Schwyynigs? Wär het e Sellerie-Allergie?
Stolz rieft der Hansli: Ych ha nüt! – Doch do häissts: Bürschtli,
für äin eläi do mache mer käi Äxtrawürschtli.

Wo letschte Summer s Viererticket isch go baade,
do haan y dänggt, dasch gfährlig und die hänn e Schaade.
Und prompt: Bim Usstiig unde rächts gits äi Gezeeter.
Es fählt ussgrächnet grad der Rettigssaniteeter.

Wenn si d Jurischte jetz in Lieschtel unterbringe,
kunnt d Phamazie in d Mehrzwägghalle Wintersinge.
Und bimme Budget vo sibzäh Frangge zäh
wurd Brätzbl d Medizin und Buus der Räschte nää.

Eläi scho d Nämme Assad, Putin, Erdogan:
Das döönt martialisch, Aug um Aug und Zahn um Zahn.
Nomen est omen. Und drum muesch – das isch doch s Gröschti –
käi Angscht haa vor eme Parteichef namens Röschti.

Will bald scho s 3er-Dram z Burgfälde goht go kehre,
mien unsri Drämmler schlöinigscht Franziwöörtli lehre.
Allez hopp, bimm bimm! Le boeuf der Ochs, la vache die Kuh.
Döört kunnt äin z renne: Fermez la porte, die Türe zu.

Impressionen

von

Spitzbueb

Steckbrief

Der Spitzbueb ist ein spitze Bueb. Seine zugespitzten Verse sorgen für spitze Pointen.
Comité-Bank seit 2007

Video

Impressionen

von

Stroossewischer

Steckbrief

Die Strassenfeger der Stroossewischer haben Kultstatus. Ihre Bänke sind eigenwillig, schön gereimt und brilliant vorgetragen.
Comité-Bank seit 1996

Video

Verse

Wo mir als Zwaier-Ticket
göhn im Rhyy go bäädele
und no mit dausig andre
so der Bach ab wäädele,
isch dört der Baschi,
wo imene Strigg verwigglet isch.
Ah nai, dasch nit sy Kopf,
s isch so ne Wiggelfisch.

Jä in de Schuele,
- d Kinder rieffe do Hurra! -
foot jeede Moorge
d Stund rund zwai Stund spööter aa.
Denn d Schieler und au d Lehrer
stöhn im Hof binand
und alli -
alli schüttle allne zämme d Hand.

Hallo! Sprich ich mit öhmm…
…balam am Apparat?
Mir hän es super Aagebot
für syy baraat!
Es gaht um ihri Chrankekasse,
s choschtet nüüt,
mir müend nur ganz churz checke,
ob sy KLACK… düü-düüt, düüt, düüt...

So Glöön am Deelifoon,
die koschte uns Millione,
denn Granggekasse
zahle nit nur Provisioone.
Nach zähmool lütte, seggle, abnäh
jeedi Nacht,
het jetz grad geschter
s Dante Truudi d Schruube gmacht.

So als Metaphere
für d Boscht und ihr Verhalte,
könnt me die Hundezoone
vor der Hauptboscht gschtalte.
Denn d Hünd die schwäärme sehr
für d Süüle vo däm Bau
und so ne Schlitz
für d Schyssdrägg-Güggli hätti s au.

Will alli Medie
jo sowysoo dien liege,
verdraut der Trump nur Lüt,
wo d Wohret lyycht verbiege.
Sy beschte Fründ,
dä kunnt in allne Frooge druss,
es isch sy Gwafföör,
jä drum gseht er au so us!

Doo vor däm Laade
öörglet nit bsunders schön,
die aarmi Hutte
immer nur die glyyche Döön.
Dädyy-dädyy, meh kaa sy nit,
spiilt wie ne Kind,
will Gäld für s Baselbiet.
He grieziwohl Frau Gschwind!

Die z Lieschtl saage:
„Lieschtl förscht! Mer ziehn Bilanz!
Dir Stedter hait ys usgnutzt
syt der Hülfteschanz.
Jetz boue miir e Muur
vo Allschwil bis zer Birs,
und zwaar zäh Meter hööch
und zahle chönne diir s!“

Impressionen

von

Stächpalme

Steckbrief

Ein spitzer, immergrüner Bank mit roten Beeren. Während über einem Jahrzehnt war die Stechpalme eine feste Comité-Grösse. Wir vermissen sie schmerzlich.
Comité-Bank seit 2006

Video

Verse

I triff my Fründ z New York, bi zwääg,
verzell vo de drei scheenschte Dääg.
Do mäint dä: Liebe Bebbi, bitte wird vor Nyyd nid bläich.
Bi uns im Wysse Huus gits jede Daag e Morgestraich.

Was het dr Morin hinderloh,
e Spur im Sand? Jä, aber wo?
Sand het är e Huffe gha und was iin bsunders freut:
Är het en sich am liebschte in die äignen Auge gstreut.

D Frau Herzog zellt au nach de Wahle
zaggig iri schwarze Zahle.
Nur äine isch bim Zelle no e ganze Zagge schnäller.
Dr Baschi Dürr zellt ganz vergiftet d Lyychen in sym Chäller.

Es wott die guet Frau Pegoraro
bim Umwält-Abo spare, klaro.
Ich bruchs jo nur no äinisch, strahlt si, s lyt glaub uf dr Hand,
denn morn fahr ich us Lieschtel Town diräkt ins Pfäfferland.

Im Verglyych zum Benthaus isch er
e Nüssli, eusen Ursli Fischer.
Dr Janko het nur gschloofe, dr Delgado isch nümm gsprinteret.
Käi Wunder, dass me so nid europäisch überwinteret.

Jä, sage Si, Herr Darbelley,
hets uf dr Jagd e Blattschuss geh?
Gälle Si, dä Schuss isch voll ins Schwarze – sone Mischt.
Mi dunkt das alles halb so schlimm, Hauptsach, es git e Chrischt.

My Grosi, s Rosi, isch verscholle,
samt Handy, dä arm Syydebolle.
Me het nur sy Rollator gfunde, unde z Chembs am Ryy.
Es syg schyyns some gäggeligääle Pokemon hindedryy.

D Somaruga lauft dervo.
Si häig miessen uf s WC goh.
Mi erstuunt das nid, mir gohts jo gnau glyych nöimeduure,
päng grieg ich dr Dünnpiff, wenn dä Köppel afoht schnuure.

Ich halbier, i finds famos,
my äige CO2-Usstooss
uf CO1 – s isch wichtig, dass jetz ändlig öppis goht.
S Dumm isch nur, nach churzer Zyt, do bin iich mausetot.

Liebe Mobiliar, s ist klar,
was ich schreib, ist völlig wahr.
Die Scherbenhaufen hab ich nicht gemacht, ich bin kein Lump.
Sie stammen von dem Rest der Welt, bless you, Donald Trump.

My Frau schwümmt gärn im Eglisee,
doch hüt macht ere s Bade weh.
Die mit blutte Schwabbelbrüscht, si chas nid verstoh,
loht me und die schön Verhüllte wärden uusegnoh.

Was liis ich doo in myner BaZ:
D Frau Gschwind macht em e Neue Platz.
Si sälber wärd Dozäntin, doo dra gebs nüt z rüttle,
am Uni Standort Lieschtel – für Chopf- und Händeschüttle.

I ha ne Schneekanone kauft,
ganz gewaltig, wie die lauft.
Vom WC us beschneit si d Wohnig, d Ferie si e Gnuss:
D Stägen abe wäädle, wärend s nüt as schifft voruss.

D Queen in London schnuuft ganz flach,
s Land het mit dr EU Krach.
Dr Charly tröschtet: Mummy, froh zu sein bedarf es wenig.
Au mit Brexit blybsch du Queen – und ich wird niemols König.

My Muggedätscher isch parat,
doch zum dää verquätsche, isch er mer z schad ...

Impressionen

von

Syydiaane

Video

Verse

Äxgyysi fir’s schlächte Gitarrespiil,
das isch nit wiirgglig schygg.
Unsri Leerere, macht syt neischtem
nur no Bolitigg.
Aber lieber Bänggler, wo kai Doon
richtig kenne gryffe,
als noonemool vier langi Joor
soone Oorgelepfyffe.

D‘BVB Mylioone an d‘Waggis
Sind seer guet inveschtiert,
s wird dermit die zwait Verbindig
in d‘EU finanziert.
So gsee hilft dä Brexit uns
e huffe Batze zspaare,
denn uff London wird jetze sicher
nie e Drämli faare.

Lang no de Waale het uns d Froog
immer wiider gwäält:
Sind die wiirgglig so beschränggt
oder händ die sich verwäält?
So vyyl Dummhait muess jo
naime syni Gränze haa:
Nach unde isch es Mexiko,
nach oobe Kanada.

Yych waiss, mir händ jetz graad e huffe
Amis Unrächt doo:
D‘Helfti hätt das Trumpeldier
nie ans Rueder gloo,
die achte d‘Gsetz, respektiere d’Fraue,
sind au nit Rassischte –
Bim Erdogan do wääre die
scho lengschtens in dr Kischte.

E richtig schnälli Rundi
So mit allene Schyggaane,
mit Stailwandkurve und Loopings drinn
wie bi Achtibaane,
vilicht no zwai Verpfläägigsständ,
vo dr Lengi häär sotts glappe
und dr Baasler Weeloring
wird Tour de France Etappe.

Syt 200 Joor gits d’Bolizei,
doo daarf me gratuliere.
Z‘Fuess gseesch d‘Schugger midenand
d‘Freiie ab marschiere.
S‘Kaader het gmäss Wyysig
dooderfiir en Auti gnoo –
und wie immer het dr Baschi
gar nyt gwisst dervo.

S‘Schwyzer Fäärnsee zaigt dramatisch
24 Stund,
was basiert, wenn us dr Doose
kai Stroom me uuse kunnt.
In soomene Fall geen mir in Käller
und dien uns installiere,
denn e guete Roote kaa me au
im Dunggle deguschtiere.

S Myggeli vom Swisscomshop
sait e IPhone muess es syy.
Doo wäär graad fir e eltere Maa
alles mit derbyy:
E Lampe, e Luppe und e Heergräät –
s wäär nit emool so dyyr.
Kaufft händ mir e Samsung,
denn fir d‘Stimpe bruucht me Fyyr.

Letschti noo me Herreobe
Hämmer s Auti duss loo stoo
Und dien uns samt em Herrerüschli
Vomene Uber fahre loo
E Unterschid zem Taxi gits
Kaine hämmer dänggd
Die Zyt wo dää dr Wäg suecht
Hät no fir zwai Halbi glänngd

Feertig mit Willkommenskulduur,
s‘wird nimme jeede gnoo.
Im 8er wird vo Schwoobezellner
e Junge in d‘Zange gnoo.
Dä maint ganz frindlig: yych bi nit
uff dr Flichtlingsrutte –
My Namme isch Breel Embolo,
yych kumm zue eich go schutte.

Ziri suecht e neie Namme
fir s‘blaante Staadioon,
ain, wo meegligscht basst zum Club
und miteme Zircher Don.
Im Maximumm doo derf dää aber
zwai Silbe drinne haa,
drmit en soone Durchschnittszircher
wiirgglig bhalte kaa.

Dr Sommelier vom Mövepick
duet uns ghaim verroote:
S Maximumm sind 40 Joor
fir’s Laagere vom Roote.
S wurd im Wyy sunscht laider
wie dr Baasler Zytig goo:
S guete isch verduftet,
s wääre nur no Fläsche doo.

Impressionen

von

Vermieter

Video

Verse

o är bim Brexit liist au s Pfund muess undeduure
Keit em John si Fish & Chips fascht us dr Schnuure
Är merggt drum s Gueti nit wo in däm Ganzi steggt:
E änglischs Menü isch jetzt sovyyl wäärt wie s schmeggt

Z London sag y zu Frau und Kinder
No gömmer halt au hüt zum Inder

Munter folgt dr Kurt em Gschnupper vo sim Hündli
In d Wäbergass, dört haisst`s: „Kunnsch fir e Schöferstündli?“
Wo är sich ändlig ainigt iiber d Kondizioone
Rysst en s Hündli laider uss dr griene Zoone

D Schbytaalfusioon erfüllt aim mit Faszinazioon
Will ändlig gheersch vom Engelberger mol e Doon
Schbytaaljobs Stryyche syg für iin e Fruscht bim Blaane:
Wo duesch verdelli nohär all die Schwoobe aane?

Dr gröscht Paziänt in däm Verband
Blybt dr Kantoon Baselland

Statt em Toni luegt vom Blocher sine Knächte
E neue Preesi bi dr SVP zum Rächte
Mi Frau maint: „Röschti basst nit zu däm neue Pflogg:
Pfluddrig und lau, dä isch maximaal Häärdöpfelstogg“

D Dame im Erschte gryyfft als haimlig gärn zum Pflümli
Dr Herr im Zwaite züchtet Hanf im Nääberümli
Und will e Blüttlere im Dritte isch go woone
Het’s sich s mee als gloont, dr Kauf vo dääre Droone

Dr woori Ghaimdienscht kennsch au Du:
D Vermieter mit em Passepartout

Dangg däm Ablääs-Teleprompter glänzt neu jede
Vom Bundesroot mit ganze Sätz in sine Reede
Nur laider wird das Gräät, do kasch no lang dra rüttle
Au kaini grosse Reede usem Ärmel schüttle

Muesch, die Froog duet d Birger kwääle
Die näggscht Partei au grad mitwääle?

Was im Wallis d Chalet-Mieter Gräät verschlysse
No muess dr Abwart das go fligge, s isch zum Schysse
Uffem Wööschruum-Tumbler ka är zwai ertappe
9 Mönet schpöter isch dr Darbellay denn Bappe

Dr Darbelley muess, das isch s Dummi
Als Kathool striggt ohni Gummi

„Dasch s Letschti as mir do kai Bier usgschänggt bikömme“
Muult im Jugendzentrum muff dr Jan zum Dömme
Dä maint „hey Alte, das wird scho si zwägg erfülle:
Nüchtern kasch au Du Di Joint vyyl besser drülle“

Ai Vordail wo im Trump könntsch gsee
Gheersch nimm vyyl vo dr SVP

Kuum hoggt är im VBS ney uffem Troon
Schbaart dr Parmelin scho sini erscht Millioon
Dr F/A 18 blybbt, dr Vordail syg e Grosse
Zämmelääse könne die denn als d Franzoosse

Dr Ängelbärger maint zum Cramer „wärsch wie gmacht
Fir e beschte Hauptdarsteller in dr Oscar-Nacht“
Dä maint « Reschpäggt muess me Dir, Lukas au grad zolle
Ganz digg wie Du uffgoosch, in Dinere Nääberolle“

Impressionen

von

Wanderratte

Steckbrief

Die Wanderratte ist eine schützenswerte Spezies. Ihre glänzenden Pointen und lustigen Helgen haben absoluten Seltenheitswert.
Comité-Bank seit 2013

Video

Verse

E Fingerhuet, zwai Glugger, und e Stoffnaasduech,
drey Knepf und e Eugen A. Meier Buech.
All das han y fir my Aawalt gspaart,
falls mer ain per Gricht an Karre fahrt,
will y umsveregge, do bin y aige,
eych dä Helge do wott zaige.

Jede weiss das e Kind, au wenn`s no so wott,
nit sälber autifahre sott.
Zem Gas gäh isch es zwenig gross,
au wenn`s zeechelet gseet`s kuum uff d Strooss.
Dasch dr ainzig Grund, y mach e Wett,
ass me em Baschi dr Dienschtwagen ewäg gno hett.

Anhand vo Waldameisi, Müüs und andere Sache,
kenne d`Wätterschmöcker iiri Prognose mache.
aber vo däne bruche mir, so main y,
bi uns in Basel sicher kaini.
Do weisch`s wird wärmer und heert uff schneye,
wenn d`Yyszäpfe abem Rocheturm keye.

Wo dr SchneiderAmmann –
am „Tag der Kranken“ ganz profund,
mit sym Rire ce bon pour la Santé kunnt,
han em gsait, jä jä, Lache macht scho Gsund,
aber s`kunnt ganz druff aa, welle Gloon ass kunnt.
bsuecht di nämlig im FelixPlatter dr Guy Morin,
no ka dr däm sym Lächle au dr Räschte gää.

An däm Gotthardt-Basis-Tunnel-Fescht,
stell ych bi dr Doris mit Schregge fescht:
Statt im glaine Schwarze erschynt dä Sprysse,
im vo Schaabe zerfrässene grosse Wysse,
fähle nummen no d`Grälleli in de Hoor,
und sy gseht uss wie d`Uriella vor 30 Joor.

Siebe Lybli verisse, ai Balle vereggt.
Ain wo d`Hand ussem Schritt ziet und dra schmeggt.
Am Schluss muess no aine uff dr Wiese,
vor luter Fraid uffe Rase kiese.
So isch d`EM gsi, kurz zämmegfasst,
y glaub do han y nyt verpasst.

Dä Helge do, dä zaigt ys s`Änd,
vom amerikanische Presidänt.
Är het uffem WC, z`mittzt in dr Nacht,
zwai Stunde lang e Stinggi gmacht,
und denn bim Spieele, dasch veruggt
usversee s`rot Kneepfli druggt.

D`Hauptposcht wird uff kai Fall gschlosse.
Doch doch, die schliesst, das syg beschlosse.
Was isch jetzt woor, und was isch glooge?
Me muess sich do scho langsam frooge,
ob die Mäldig iber d`Poscht Faggt isch,
oder isch sy Poscht-faggt-isch?

Fahr ych vo do mit em Taxi hai,
no koschtet mi das 50 Stai.
5.50 zahl y, dasch zwor nit suuber,
fir die glichi Streggi, mit aim vo Uber.
Aber vyyl bequämer und erscht no Koschtefrey,
fahrsch mit Dienschtwäge vo dr Polizey.

De maischte goot dä Strossestrich,
im Glaibasel ääne gegene Strich.
Wäge däm gits jetzt e Strich fir e Strich,
deert deerfe sy bis zem Strich uffe Strich.
Aber au dä Strich, innerhalb vom Strich,
blybt unterem Strich immer no e Strich.

Unsere Stadtentwiggler isch in hochem Booge,
us Amt und Würde uusegflooge.
jetzt han em, will`s mir am Härze liggt,
e Schachtle Duplo Baukleetz gschiggt,
damit sich wenigschtens dä Maa,
no perseenlig wyterentwiggle kaa.

Jetz lueg emol das Bethli Ackermaa a,
wie das guet Guitarre spiile kaa.
Wenn`s jetzt no den Alten e Ständeli bringt,
und als Stapi vome heftige Räge singt.
Denn gwinnt bestimmt die Frohnatur,
no dr näggscht Nobälpryys fir Literatur.

Jetzt wott dr Albi, mir blybt au nyt erspaart,
dasch dä Unggle wo nie mit em Trämli fahrt,
bi mir im Garte, s`het my fascht us de Sogge ghaue,
e neyi Trämliroute baue,
und fir das het die Ratte ungeniert,
vom Wessels bereits e Million kassiert.

Impressionen

von