Schnitzelbank-Comité


Archiv
Alle anzeigen

Filter anpassen

Zum Archiv

Schnitzelbänke 2018

Rückblick

Anggewegglimaitli

Steckbrief

Hinter em Minschter hält das Comité Frauenpower feil. Mit herrlichen Anggeweggli-Versen des Anggewegglimeitli.
Comité-Bank seit 2008

Video

Verse

D Fasnacht isch, sind uff der Huet,
Unesco-Wältkultuurerb-Guet.
Derby waiss niemer, i mach e Wett,
Was e Gugge mit Kultuur z due hett.

Aber Ziiri muess sich jetzt scheniere,
Wenn si ihre Böögg gremiere.
Das kaa, sait d Unesco, Kunz und Hinz.
Ziiri isch und blybt Brovinz.

D Frau Herzog hoggt in der Styyrverwaltig
Uff Myllioone, dasch gewaltig.
Bletzlig schreit si: «Aso dää drybt mir s z bunt!
S Gäld ewägg, der Wessels kunnt!»

Am Regg, do muess fir e gueti Noote,
D Kür und au der Abgang groote.
D Kür hett der Wessels scho versaut,
S blybt numme no, dass är n schleunigscht haut.

«My Pfyffli isch lenger», heersch Buebe saage.
«My Schlitte isch schnäller», mien Bursche sich jaage.
Wenn Männer das Spiil nit stobbe, wird s beeser,
Denn sait der Donald zem Kim:
«My Adoomgnopf isch greesser!»

Fir e Tennisstund kan i jetzt, s isch esoo,
Zem Doggter Roger Federer goo.
Und d Rächnig, das duen i nit verbasse,
Die schigg i denn der Granggekasse.

Zem Junker sait d Leuthard: «Guete Maa,
Die Ains mit nyyn Null draa, die kasch haa.»
Ich gäbt däm lieber – ass är goht –
Die siibe Nulle vom Bundesroot.

Me hett s hit nimme lyycht as Frau,
Saag ich zem e Maa ganz lieb: «Ich au!»
No zitteret dää vor Angscht am Ranze
Und maint, ich syyg e «me too»-Emanze.

He Du dert mit der Unschuldsmyyne,
Du gnaissisch in my Usschnitt yyne!

Mi Aawalt kimmeret sich jetzt drumm,
Dasch sexuelli Beläschtigung!

S git Underschiid, so glaini fyyni,
Zwische Burka und Bikini.
Im Hidschab bin i en Anonyymi,
Im Dirndl waiss i: Das sin myyni!

Impressionen

von

Brunzguttere

Video

Verse

2018 Brunzguttere

Jetz söll dr Hüppi schiins im Oschte d Wändi bringe
do mien die Wüürscht bim Schutte um ihr Lääbe springe!
Will‘ s isch eso, für jeede Matsch, wo die verliere
duet är zur Stroof e Stund lang s Training moderiere.

Es mäint dr Federer beriert im fiine Kittel:
I dangg dr Uni für dr Eeredoggterthittel!
Das isch mim Baaslerhäärz e liebe und e düüre.
I wiird en sachgerächt in Wollerau verstüüre.

Mir bstelle Güggelschänggel z Löitschebach im Reschti
Vier mol blutt und ooni „Biilagg“, daas isch‘s Beschti!
„Viel Spass bim naage, dämfall,“ mäint dr Källner droche,
will ooni Biilagg git‘s bi uns käi Fläisch am Gnoche“

Die Junge stöön uff dä „verpaggigsfrei Konsum“ -
wenn die e Güggli gseen kunnt vor dr Schnuure Schuum.
Wänn d Waare spüre und s Erlääbnis zämme gniesse:
Es isch käi Wunder muess d Condomeria schliesse!

Bi unsrem Kiosk, do hänggt scho jeede zwäite Fritig,
e riise Schild, wo stoot, dr Blocher kauft e Zitig.
Das dunggt is nöime duure zimlig überdriibe:
Mir kaufe dääglig zwäi und nie stoot öbbis gschriibe!

Mir stöön im Kunschtmuseum vor em nöischte Bild.
Mit Strich und Bölle, rächt abstraggt und zimlig wild.
S hett käi Struggtuur und überall lampt öbbis drii.
Das isch worschiinlig die „Museumsstrategie“.

E pflägte Bolzeschuss im Oberstiirn-Beräich.
Me bricht se uff, me ziet se ab, me chlopft se wäich.
Me losst se süüferli lo hange und lo bluete.
So goot‘s mit Säu, und au mit Städter, daas isch‘s guete.

Händ iir die Jünger gsee bim Joggeli vorusse?
Dr Glaube läbt, s hett Italiääner, Phoole, Russe.
Äi seelig Bätte, nur käi Schwizer sin drbii.
Die fiire Schlussverkauff im Thämpel wisawii.

Es phausiere Herzog de Meuron bim baue
vo Düürm und Ruumschiff zum in d Stadt e Lugge haue.
Die hän jo joorelang um Anerkennig grunge.
Schöön für si, isch jetz dr Durchbruch ändlig glunge.

Me will de Raucher au bim Baanhoof nütt me schängge.
Mir gseen scho d Schilder in dr Schalterhalle hängge:
Bitte rauchen Sie vorussen, dört bim Pfoschte.
Do innen stöören Sie e Huffe Lütt bim boschte.
E halbi Pony-Schääse und e Zääntel Gugge,
drei vo uns und zwäi Japaaner, wenn mr drugge,
e schlaffs Mimösli und e Hampfle Räppli, nass,
denn isch si voll, die nöii „Baasler Faasnachtsgass“.

So riss di zämme, heilandsagg, jetz chunnt e Doggter
säit zum Schääse-Gaul dr Kutscher, lueg, döört hoggt er.
Wenn är di frogt, wisoo de schwanggsch, no säisch “Arthroose”.
Und mach mr jo nit’s Kalb, sunscht losst er di no bloose!

Es stiigt dr Harnverluscht im Alter hütt frabbant
ab 59 scho, drum hett in Baaselland
au d Pegoraro schiins e Sach mit iirer Bloose
und mues bi jeedem Gschäft befüürchte s gieng in d Hoose.

Mir hän am Clarablatz Koranverdailer gsee
Und ihne groote: „S Goschdüm wäär sowit okee
Jetz brüücht’s no Laarve, wissi Häntsche wääre eedel
und au die Biechli kämte besser wägg als Zeedel.“

Impressionen

von

Doggter FMH

Steckbrief

Aaaah jä: Das ist unser Doggter FMH und seine Schwester Gundula. Wo er auftritt ist das Wartezimmer meistens borzig voll.
Comité-Bank seit 2005

Verse

Si, friehner sin im Wartzimmer, jä hüt kaschs vergässe

5 Durchfäll, 3 Gicht und 2 Fuesspilz gsässe.

Doch hüt dien im Wartimmer, ych sags ihne drogge

nur no so usgmergletti Veganer hogge!

Diagnose:
Dasch kai Veganer im Wartzimmer hinde

dasch unseri düri Zimmerlinde!

Si, aagno dä Durchfall-Erreger do, verwandt mit de Salmonelle

hät in Verdauigstraggt vom Kim Joung Un yne welle.

Si, dä wurd die Bazille ohni mit dr Wimpere z zugge

mit syne Füdlebagge grad verdrugge!

Si, übrigens my Handbeweegig, jä die han ych patentiere lo

und die het jo d Frau Merkel eins zu eins vo mir iiberno.

Jetzt muess die halt, ich möchte nicht prahlen

für einmal soo machen, einen Euro bezahlen

Si, kenne Sie dä Sissacher Pfarrer, wo sich geisslet het, au?

Dä het jo bluetet wiene gstocheni Sau.

Dä Gaischtlig han y, do bin y gschiggt

mit siibe Grytzlistich zämmegfliggt

Si, so Sex-Übergriff wie in Hollywood sin garantiert

in mynere Praxis mit dr Gundula nie bassiert!

Also mit ihre hät ych - jä ihne kan ys jo verzelle -

mänggmol nur e bitz döggterle welle!

Diagnose:

Das kennt mym Döggterli so basse,

e „Undenuffe" wie bim Jasse!

Si, e Böschtler kunnt in d Praxis mit eme Rugge ganz eme schreege

also dr Glöckner vo Notre Dame isch e Saich dergeege.

Si, dä het am Schalter, jetzt muess ärs biesse

alli Blaggedde abstämple miesse!

Si, dr Hugh Hefner vom Playboy – han ych verno

het in de Ärm vo syne Hääsli derfe go.

Männer – au wenn s mit Viagra lenger goht:

"Zu viele Hasen sind des Jägers Tod!“

Si, s Rasser's bedryybe sit 60 Joor – Gott sei Dangg

s Theater do und sin sälte grangg.

Als ihre Doggter kenn ych do dr Grund:

Lache sy und sy bliibe gsund!

Si, vor 60 Joor hän S Rasser's s isch nid iiberdriibe,

s Fauteuil - Theater au als Arztpraxis bedriibe.

Denn an dr Premiere hets ghaisse, kurz und knabb:

"gän si ihre Stuehl an dr Kassen ab!"

Si, in mym Wartzimmer hets – gottverglemmi

sit Wuchen e richtigi Fraueschwemmi!

Au d Gundula isch am hienere und duet saudumm

jä, dr Doggter Federer macht bi mir sy Praktikum!

Si, s Olympische Comité duet mi ersueche

s Bluet vonere russische Langläufere z untersueche.

Dr Computer mäldet: „ wenn das Lämpli blinggt oben rechts,

dann ist die Langläuferin männlichen Geschlechts!“

Si, s eert mi, dass ych in mym Alter und mynere Figur

e Dail bi vo däre Wältkultur!

Und nach mym Uffdritt dien sich d Japaner, s isch zem schiesse

nur no mit „AAH JÄ“ begriesse!

Si, hets Baselbieter do inne? Jä denn saageds gly

wo an z diefem Bluetdrugg lyyde, also Hypotonie.

Zem dääne dr Bluetdrugg widder uffejaage

duen ych ganz lyyslig „PEGORARO“ saage!

Delifon:

Doggter FMH – giete Bonjour, jeh dr Maire vo Saint Louis isch dra

ych söll dr Wessels go hole, är haig z vyl Edelzwigger gha.

Si, dä het de Elsässer für e Suppegnoche

e Drammverbindig nach Paris versproche!

Impressionen

von

Dootebainli

Video

Verse

Es haisst in Baasel «d Boscht goot ab», grad Faasnacht buur
Daas deent fir uns nach Karneval, nid Wältkulduur.
Gliich isch es guet, me duet d Boscht uf d Blaggedde nää –
Denn waiss me weenigschtens, es het Mool aini gää.

Väärs yyber Ziircher syyge billig, haisst s vo Oobe
Und au Schwoobe deerfsch bim Bänggle nur no loobe.
Jetz bruucht s Ersatz fir die, wil d Lyt e Duubel wänn:
S isch scheen, dass Baaselbieter au e Uffgoob hänn.

Iir miend eych wäg NoBillag kai Angscht mache loo
Dr Määrt dä richtet daas, s git gueti Byspiil doo.
Dangg Inveschtore wiird e bessre Seerwis koo
Und daas kunnt guet, das isch jo bi dr BaZ au soo.

Wääred Taizé hänn baar Bsuecher bin is gschlooffe
Alles nätti – nur dr aint, e Katastrooffe!
E Franzoos, dä missioniert is: «Loos, au duu
Muesch Jeesus finde», no hänn miir gsait: «Taizé-vous!»

Dr Trump dä sitzt mol wiider zmitts im Schissistuurm
Do haisst s uf aimol, es brenni in sym Duurm!
Soo länggsch vo dyyne Luuge ab, wie me s scho kennt
S hänn bi eme soon e Breesi scho mol zwai Diirm brennt.

Dr Maxli dä kunnt us dr Schuel und maint ganz blaich:
«Du Mami, gäll das mit NoBillag isch e Saich!
Wil ooni Billag isch es faad, gäll, nid vergässe,
Stimmsch nai, i wott mi Wuurscht nid ooni Bommfritt ässe!»

Suechsch du im Baaselbiet e scheneroos Gidangge,
Kaasch weenigschtens fir d Hoochstammobschtbaim-Rettig dangge.
Au Bäärn isch schtolz, as es deert raari Frichtli git
Numme bim Cassis waisch – vo Hoochstämm kunnt dä nid.

Dr Macron giigelet nach e baar Gleesli Wyy:
Die Merkel luegi wien e suuri Guurgge dryy.
Si hätt au gäärn e Spruch wie «République en marche!»
Doch deert bassi eenter «Republik am Arsch».

Glagsch mit #MeToo in Hollywood geg Grabscherbande
Haisst s, du syygisch dumm, du haigsch das falsch verstande.
Wottsch du au in dr Schwyz di geg so eppis weere,
Denn ergläärt me dir, die Dummhait kenn me leere.

Es losst dr Baschi Betongletzli aanestelle
Falls e Laschtwaage an Wienachtsmäärt hätt welle.
Nur eppis dunggt is glunge, daas mien mir scho saage:
As d Gletz geg Islamischte sälber Burka draage.
D Frau Meeriaa griegt vom Soon d Alexa bresentiert:
«Lueg, die stellt d Haizig uf Bifääl waarm, wenn s di friert,
Bstellt Ässe und lescht s Liecht», druf maint sii bitz verloore:
«Aber Bueb, das macht doch s Maaryy scho sit Joore!»

Wäg dääre Metzgede in Sissach git s ai Grach
S gaisslet sich e Pfaarer, haut sich ains uf s Dach
Dangg «Fifty Shades of Grey» isch s in, sich sälber z gweele
Lueg mol, was mir doo als Regierigsreet dien weele.

Es wirft dr Trump voll Wuet em glaine Kim an Kopf
Äär haig dr greesser und dr besser – Bombe-Gnopf
Suechsch als Bänggler noch me Väärs, verzwyyflisch draa
Wil me do d Wooret schlicht nimm yyberdrumpfe kaa.

Dä «Fire and Fury»-Schryyber het sy Buech uns gschänggt
Deert stoot, dr Trump dä spinni – hättet iir daas dänggt?
Mir lääse s ganze «Fire and Fury», bis ganz hinde
Und finde, as mer «Fast and Furious» besser finde.

Dr Thomas Kessler isch bikannt fir glaari Woort
S isch gliich zu weelem Thema: Schwätze isch sy Spoort.
Wil em halt s Rampeliecht fäält – händ er en scho gsee?
Macht är jetz d Drottwaaramsle vo dr FDP.

S git Wannacry-Attagge und Atoom-Gnopf-Waan,
#MeeToo, Meltdown, Weinstein, Trump und Erdogan,
Syrie, Rohyngia, Jeme – findisch nid au duu
Doo kaa me nur no saage: «Wannacry? Metoo!»

Hesch nid baar Allergie, bisch hit nimm drbyy
Gheersch eerscht drzue, hesch au e Dingsbums-Zwangs-Phobie.
Au uns goot s hyffig schlächt, jetz het dr Doggter gsait,
Mir lyyde schyynts an Mensche-Unverdräägligkait.

Unter #MeToo verzelle Stars nach Joore no
Wie me drunter mues, zem ganz nach Oobe koo.
Und bringsch es nid ganz uffe, denn dängg aifach draa:
S mecht jo dr Weinstein gäärn e zwaiti Chance haa.

Es duet dr Constantin am Matsch dr Fringer schloo,
Drum deerf är jetz e Wyyli nimm in s Stadion goo.
Doch d Karriere, die goot wyter fir dä Maa:
Dr Trump dä mecht en schyynts als Prässesprächer haa.

Unsri iPhone lauffe hitte alli nimm
Kai Mail, kai Whatsapp und kai Twitter, es isch schlimm.
Mir hänn sit gescht d Alexa wo s Huus kontrolliert
D Siri isch yyfersichtig und het alls blockiert.

Zum Abschluss saage mir eich jetze no ganz offe:
Joo, au Schnitzelbängg sinn vo metoo bedroffe!
Sinn iir schoggiert, duet eich das duurenanderbringe –
Was meinet iir, wiesoo die Zwai doo deerfe singe?

Impressionen

von

Dreydaagsfliege

Steckbrief

Diese Gruppe ist eine Augenweide und eine Ohrenweide. Bemerkenswert sind auch die raffinierten Helge in Fliegeschissli-Technik.
Comité-Bank seit 2011

Video

Verse

Mir sin UNESCO-Wältkultur! Dr von Rohr isch in Trance
Au für uns pointeschwache Fliege ischs e Chance
Mir bringe unsri Väärs uff Änglisch - mai wie die denn schletze
Mr löön si aifach vom Tourismusby yro iibersetze.

Hello the world, we are a cutlet-bank and our points schletz
Because we have them all by Basel Tourist oversetz
Our president Miss Ackermaa losst au e welcome gää
her message is wie allew y yl: äh äh öh öh äh äh.

Ych hoff iir haiged alli euri Winterpneu montiert
S'isch schnäll passiert wenn s uff dr Strooss im Jänner schneit und gfriert
Und wenn denn no dr Trump erschyynt isch d Gfoor vom Schleudre grooss
No het s e braiti Spuur uus Schly ym vo Bärn bis uff Davos.

Juhui mir spaare d Bilag – d SRG die kaa s verbloose
Kai Rundschau mee zem luege und kai Echo mee zum loose
Mir schalte aifach s Hirni ab und luege unbeirrt
Fünf Stund lang wie bim Fischer z Au es Duvet gwäsche wird.

Was d Mumieforscher z Basel uusefinde isch frappant
Die Gen wo numme Fraue hänn sin bsunders intressant
Drum wurde si au s Schnitzelbangg-Comité nid bschaue
Mumie hets e Huffe, aber laider kaine Fraue.

D Helvetia isch zue mr koo (mir zwai sinn jo per Du)
Si miech bi dr Kampagne mit und saagi lut "Me too!"
So Type, läschtig, bsitzergryffend, waisch wie mi das schluucht
Ych wird jo scho syt Joore vo dr SVP missbruucht.

Dr Blocher isch jo allew y yl ganz gärn an d Fasnacht ko
Gottseidangg isch das bi sy ynre Tochter nid eso
das Joor heert me saage dass si au derby sy y wett
will s jo jetz am Cortege Pauseplätz für Rösser het.

Eb Merkel, Leuthart, May: S muess nur e Frau uff Brüssel koo
Und scho stoot dr Juncker wien-e Putzerfischli doo.
Är suugt sich aa, är schlabberet und schiilt no uff e Buuse
Und hindeduure hänggt er denn dr Haifisch wider uuse.

Dr Donald und dr Kim hän baidi nid grad v y yl im Kopf
Si zaige iir Rakeetli und hän Fröid am rote Gnopf
En alti Kindergärtnere die gääbt, i mach e Wett,
Ains linggs und rächts an d Oore und denn ooni z'Nacht ins Bett.

Jetz wänn die Rammel z Lieschtel iiri Schuele nümme butze
So spaari me und haig derzue no ganz en andre Nutze
Wenn d Pfoote wo si schüttle mien so richtig dräggig sy yge
No wurd in de maroode Spittel d Fallzaal wiider sty yge.

Impressionen

von

Dräggspatze

Steckbrief

Zwei freche Vögel mit rollenden Augen. Was sie während dem Jahr so aufpicken, werfen sie an der Fasnacht als geballte Ladung zurück ins Publikum.
Comité-Bank seit 2015

Video

Verse

Alle Vögel sind schon da
Ä Värs isch zwoor kurz mit numme zwei Ziile
Nur - wär wott scho lenger bim Köppel verwiile?

Kriecht ä Schnäggli
Goots öpperem zschnäll wenn mir Zweiziiler singe?
- denn könne mir dPointe gärn noonemol bringe

Mozart: Türkischer Marsch
dSpitzel vom Erdogan spitzle au hit
Zum Glück verstöön-aus-sie dZweiziiler nid

auf der Mauer auf der Lauer
het dSchwyz ä Hungersnot? frogt sich dr Kim Jong Un im Stille
Die ässe jo genau wie mir Heugümper, Würm und Grille

Über ä Gotthard fliege dBrämä
Dr Cassis het um Ufnaam ins Fasnachtscomité bätte
Jetz hän Sie nur kai Angscht, är isch jo scho wieder usträtte

Verdi: Lacrimosa
Es plaane Stadt und Land gemeinsam – s’dunggt is gar nid doof
Für iiri gmeinsame Projäkt ä gmeinsame Friidhoof

Im Mueterstübeli
Dr Bueb duet bi dr Mame briele – seesch wie dDrääne dropft
Sie het im uus Versehe dLöcher in de Hoose gschtopft

Chagrin d’amour
noch dr Weinstein-Affäre heissts bi uns z’Oobe: Duu
wie wärs denn wieder emol mit «metoo»

au jä! han i gsait, mir wänns zämme triibe
nur sottsch mir no voorhär do unterschriibe

au im Wallis heissts «metoo» bim Yannick Buttet
Är het bi dr Fründin ä bitzli z’lang glütte

drum gits jetz in Bärn ä neui Vorschrift
me fahrt ab sofort in trennte Lift

us Dschendergliichstelligsgründ aber sette
Maa, Frau und die andre uf die gliich Dualette

Amerikan. Nationalhymne
Es twitteret dr Doughnut Trump im Wisse Huus ganz lonely
Was redet ihr do vo «metoo» - für mi git’s nur: «meonly»

Äs wott ä Fraueli zMärit goo
«me too» sait au dFrau Ackermaa au ich ha jo kai Aanig,
wie my Vorgänger au, vo dr Museumsplaanig

dr Putin het denn frooge lo, ob är villicht könn nütze
är haig no vo Olympia här ä baar so Dopingsprütze

mir hän dr Ackermaa do groote, dGlägehait z’ergriffe,
nur sott vorhär no sUnispittel siini Noodle schliffe

zBasel am mym Rhy
dChinese hän für viel Gäld dSyngenta übernoo
do hätt doch könne gratis dr Wessels no mitgoo

jetz hän mir für ihn än andere Plan
Als Fiehrer am Rhy im Novartis-Roscht-Kran

sAntikemuseum könnt är au verwalte
Dört gits no ne paar so kopfloosi Gschtalte

me könnt jo villicht emol au probiere
Dr Wessels gentechnisch z’repariere

Nach em Abgang vom Morin sott är nämli bliibe
Was wotsch denn sunscht an Fasnacht no schriibe

Drei Chinesen mit dem Kontrabass
Die letscht Pointe fählt – siiged nid bees
I ha si verschärblet an dr Chinees

Impressionen

von

Fäärimaa

Steckbrief

Der Fäärimaa ist eine absolute Institution. Er ist auf unserem Fluss genau so wenig wegzudenken wie in unserer Bänkler-Landschaft.
Comité-Bank seit 1998

Video

Verse

Natüürlig profitier yych als Fäärimaa
Yyskäschte oder Wäschmaschiine kany gratis haa
sogar Mountain-Bike und Computer-Konsole
y muess es nur no vom Rhyy unde uffe hole

In dr Schwyz, das waisch, doo sinn mir froh
muess sich wirgglig niemerts sälber schloo
au für dää Prieschter in Sissach, normalerwiis
gäbs jo die Herre Constantin et fils

Dr Herr Nationalroot Yannick Buttet, dää hett denn Bedarf
sogar d Helvetia uff em Aifränggler macht ihn scharf
wie dää no hett könne isch z respeggtiere
bi soo vyyl Sex im Nationalroot, no politisiere

Momentan muess ganz Dütschland überbrugge
es herrscht e Regierigs-Bildigs-Lugge
sie fische im Triiebe vo Kiel bis Weil
yych wünsch nit numme dr Frauke Petri Heil

Sie wänn in dr Formel I, soo höört me brichte
uff dr Bääsewaage ganz verzichte
sie hänn jetz gmerggt, me kaa sich s spaare
will jo z hinderscht die baide SAUBER fahre

Dää Väärs doo hett mir dr Google gmacht
äär waiss jetz alles über mii sytt geschter znacht
und wenn yych dää Algorithmus richtig verschtoh
miessty spöötischtens jetz: e Pointe koo

Wenn dr Somm schrybt gitts nach rächts kuum no Spatzig
äär schrybt nit halb-BAZ-ig, nai, äär schrybt BAZ-ig
doo wirsch fascht grangg ab däm Doon, däm schrille
usserdäm wimmlets zwüsche de Ziile vo BAZ-ille

Uff dr Haimrais vo Italie mach y Statioon in Como
und kauf no Mortadella, Vino rosso und e Packig Omo
und denn kunnt dr Momänt, wony zämmezugg
doo gitts jo nit emool e Drämmli nach Basel zrugg

D Bolizey vo Basel möcht au rentiere
me erlyychteret s zahle und erschwäärt s parkiere
uns blybt ai Hoffnygsschimmer, e fahle
parkiere Sie soo, dass Sie d BILLAG no könne zahle

Myny Frau hett gsait, dr Hüppi gfallere
wenn äär in Sanggalle duet sanggallere
nur dr Sascha Ruefer losst sie erschauere
wenn dää am Färnseh uff solothurnisch duet aargauere

Impressionen

von

Gasladärne

Steckbrief

Eine Gasladärne ist vielleicht nicht CO2 neutral. Dafür erhellt sie Jahr für Jahr unzählige Gesichter in bummsvollen Beizen.
Comité-Bank seit 1977

Video

Verse

Stimmt näggschte Monet bi der Bilag d’Mehrheit JO
isch das vermuetlig denn in kurzer Zyt eso,
ass vom Schwyzer Färnseh aifach nyt me kunnt.
Jä und ?????

Dr Drämmlifiehrer Maier 3 funggt an d’Kollege:
„Waiss ain wo duurefaare? ...ych muess iberleege!“
Do mäldet d’Laitschtell: „Maier 3, kasch yynekho....
mr hän jo iberall scho d’Schiine uusegnoh!“

18 Kinosääl im Stüggi wär e Hit.
Das wär e Bombe, oder findet Ihr das nid?
Du wärsch als Zueschauer wohrschynts ganz elai.
Doch mit em Platzawyser wären Ihr scho zwai.

Si hänn in Ängland jetz Problem wäg’ ihrem Brexit.
Au d Katalane wänn vo Spanie en Exit.
Und us Italie hert me as me sehr beduuri,
ass es dä Fuessballexit git vo de Azzuri.

Unsri Frau Wänger ka das aifach nid verstoo,
wie das in Rastatt fir die Dytschi Bahn ka koo.
Si lipft der Rogg und maint im Geegesatz zue ihne,
haig si trotz ihre 90 Joor no gradi Schiine.

Wir Gaslaternen sagen artig „Danggerscheen“!
Schön, wenn sie uns auch gut als Deutsche Gäscht verstehn!
Wir sagen nur „UNESCO“ und scho tut euch schwaanen....
kulturerbmässig kommt ihr niemols dörten aanen!

Apropos Wältkulturerb das isch genial,
nur uf die ander Syte isch es scho fatal,
well Ihr die Erschte sinn, wo doderfir miend biesse:
Ihr händ doch sicher mee fir s’Ässe zaale miesse.

Me loht olympiamässig all die Russe dusse,
well mit Doping sin au Russinnne nur Russe.
Wäg Doping waisch nimm, isch,s e Maa oder e Frau!
By dr Martullo-Blocher frogt me sich das au!

Der Roger schwäbbt in akademisch gwejhte Sfääre.
Die Tatsach mechte mir begrinde und erglääre.
Är spiilt perfäggt, het zwai mool Zwilling, jetz mergsch gly:
Dä muess bim Döggterle scho rächt erfaare sy.

D Amerikaner hänn en Uhrwärgg konstruiert,
wo vom Trump die räschtlig Amtszyt registriert.
Mir hänn ys gsait, so aini dien mir au grad bstelle
und si bim Wessels denn dehaim vor d’Diire stelle.
As sich e huffe Männer ohni sich z’scheniere,
zwische de Fiidlebagge d’Hoor lehn wäg rasiere.
Das het e Vorteil wo me nid bestryte ka:
Es isch hygienischer wenn s’haisst l.m.a.A.

Me het ys gfroggt, eb mir als Männerbangg ys draue,
ebbis z’mache iber s’Thema Gwalt an Fraue.
Das isch nid lycht, hänn mir ys laider miesse saage.
Mir wänn doch nid, as me ys au no ka verklaage.

Impressionen

von

Hansli Bargäld

Steckbrief

Wenn Hansli Bargäld den Saloon betritt, schweigt das Piano und es sinken die erhobenen Fäuste. Seine Schüsse ins Schwarze sorgen für rhythmischen Beifall.
Comité-Bank seit 2014

Video

Verse

Im Jänner in de Alpe, bin ych unterwägs.
In dr dinne Luft do gseeni, ebbis wie ne Häggs.
E Tschäggede kas nid si, sag ych mir fassigslos
Denn luegi gnauer aane:
Dasch dr Trump am WEF z’Davos

Dr Tiffy ihres Grosi, hett dr 100scht gha,
und zitteret vor Angscht, jetzt kunnt d’Ackermaa,
Ich will kei Spanisch Grippe, sunscht muessi ins Spital,
Die muess doch wirgglig Grangg sy
Lueg doch emool dä Schaal

Dr Zyrcher so als Mensch, isch aigendlig OK,
Es hett dert nätti Baize und au e scheene See,
und wenn de mit em redisch, kunnt är no rächt guet mit,
Nur eins das kasch vergässe:
Nai schutte kann er wirgglig nid!

D’Uni hett kai Gäld mee, s’isch scho zimmlig arg
und d’Landschaft wott nimm zaale, die zaalt am Schluss dr Sarg.
Jetzt muesch als Studi ryych si, damit fyrs Studium längt.
Und sällem wos kennt zaale,
hänn si Doggter eifach gschänggt.

In dr Bible stoot beschriebe was e Paradies isch
au Papers uff de Caymans, die sin paradiesisch.
E paradiesisch Paper, sag ych als Chrischt ganz fromm,
Isch ainzig und ellai nur:
E Basler Zyttig ooni Somm!

Verliirsch du amme d’Närve, wie dr Constantin,
stalksch du wie dr Buttet, nach deux Boutailles de Vin,
Machsch Kinder wie dr Christophe, fir Di gits kai Tabu,
Denn sinn dini Gschichte
uf Häschtägg Wallis too

D‘Universal Studios lytte letschtens aa
Fyr dr negschti „Shades of grey“-Film, suecht me none Maa,
Wo Geissle glepft und geil wird, und steent wie sunscht e kain.
I gib ene dr Tip:
In Sissach gits so ein!

S’Verheltnis mit dr Landschaft, isch doch zimmlig flott,
Mir gänn 80 Kischte, und sie gänn uns ai Ott,
Me sett das no forciere, s’miest mee so Handel gää
Doch fyr die Pegoraro
Git‘s beschtefalls e Frangge zää

D‘ Museumsnacht do kyrzlig, hett mi komplett verwirrt.
I ha kai Strategie gha, und mi total verirrt.
I lueg dur Lotterschiebe, gsee Gstalte wiss und faal,
I bi nid im Museum,
Daschs Bruederholzspital.

Mit mym Härzstigg Tiffy, do giigts und ych bi froo;
mit em Härzstigg vo dr S-Baan, do giigts nid eso
S’verzeegeret sich d’Blaanig, me haltet sich bedeggt,
Dr Drooscht isch dass dä Gundstai,
eso dr Wessels nimme legt.

Dä unagmässni Umgang, das derf nimm lenger sy
Eb Hose oder Umhang, me fingerlet nid dry.
Drum Maa, due das dir merge, me längt e Frau nid aa
und wenn Du’s nid kasch si lo,
Wirsch Bresidänt z’Amerika.

Dr neu Boss vo Novartis, heisst glaub Simsalabim
är sig, meint ych en Inder, dasch wyter au nid schlimm
In dr Schwyz do gäbts doch sicher, au Männer mit Verstand
Us em Baselbiet, zem Bischbill,
und s’wäri au e Schwelleland

Dr Fritzli frogt dr Papi: was heisst das: „No Billag“
dasch eifach seit dr Papi: s’Färnsee gheit ins Grab!
D’Gälder fliesse nimme, fürd SRG wird’s äng,
s’isch wyter au nid tragisch,
will die scho e Bestatter hänn.

Impressionen

von

Hanslimaa

Steckbrief

Ein Urgestein des Basler Schnitzelbanks. Während über 40 Jahren prägte er mit seinen unvergesslichen Auftritten die Basler Fasnacht.
Comité-Bank seit 1979

Video

Verse

No nie isch e Kameel dur e Nodlenöör gheit,
no nie hets z Basel im Juli gschneit.
Au das hets no nie gää - me will uns nur foppe,
ass e Boscht-Auti e Fasnachts-Motto kaa toppe!

Scho wiider son en Äxtrablatt,
iiber Zuewanderig - y finds nid glatt.
Wenn d Bevölggerig soll singge, denn kaa joo,
d SVP aifach ins Ussland goo!

Dr Alex Frey sait zer Strellere,
y muess dr eppis verzellere:
„D Schütteler gingge mit Garantie,
no besser nooch eren Abgas-Theraphie!“

Z Basel isch ain unden am Rhyybord gloffe
und bim Hochwasser fascht versoffe
und z Davos isch e ain – es het grad gschneit,
em Deifel ab em Kaare gheit!

Die Schwarze doo - frogt dr Hansli dr Vatter,
schaffe die jetz alli bim Bestatter?
Nai, das Bild zaigt nur dr Bundesroot,
wien er z Bärn dumm ummestoot!

Syt 100 Joor – ass es d Lufthansa git
fliegt uff em Schwanz e Granich mit
und jetz bi dr GROKO mit de rote Genosse
gseesch glyy dr Plaitegaier uff dr Flosse!

D Frau Somaruga mäldet jetz efang,
em Juncker si Schmutz als Sexi-Zwang.
Do mäldet sich dr MINU au,
mit „MeToo“ au ych bin e Frau!

Y darf do no singe, wel y allem aa,
e klassische Inländervorrang haa.
Wär ych e Türk no dät me mi zwinge,
myyni Bängg nur no im Gündüli singe!

D Gnoche-Sammlig vo dr Universität,
wird ziiglet no Oberwil us Pietät.
Dert wärde si butzt, ass die Skelett denne,
z Lieschtel als Landrööt wytterpenne!

Wemme dr Wessels wurd seziere,
wurd yysalze, yybinde und mumifiziere
und zwaihundert Joor im Boode loo,
was mainsch - wie wäre mir allo froo!

Wenn Si wurde dr rächti Arm lo hänge
und denn under iire Stuel dien länge,
finde Si aagläbt und lyycht ranzig,
näbeme Kaugummi d Aggde P 26!

Zallereerscht kloont me s Schööffli Dolly,
denn s Äffli Hua-Hua im e Chineese-Zolli.
jetz hoff y nur si wän nid brobiere,
au no d Frau Aggermaa z klooniere!

Mit eme Räppli-Sagg vom Consi
und ere Larve gleent vom Fonsi
duen y diräggt ins Glaibasel jette,
und in dr Rhyygass d Fasnacht rette!

Impressionen

von

Heiri

Steckbrief

Jo, jo, jo - diesen Baselbieter haben alle Städter schon lange ins Herz geschlossen. Grund: Er ist einfach ein geiler Siech.
Comité-Bank seit 2006

Video

Verse

Wenn ych vo däm No-Billag ghöör, dänk ich an Berlusconi.
Ych mälch nur mit Sound im Stall. Exgüüsi, s goht nid ohni.
No-Billag isch e groossi Gfohr für jeede Schwyzer Buur.
Wenn s nur no Radio Blocher git, wird d Milch ganz sicher suur.

Y ha my Schüüre gmischtet und unter em Druckfass unde
vo mym Uurgroossvatter e son e alte Göppel gfunde.
Y schänk daas Velo em Wessels und erkläär em daas esoo:
Dä Göppel cha au nümm schalte, dr Rücktritt söt no goo!

Dass d Faasnacht Wältkultureerb isch, han ych mit Stuune vernoo.
Was son e Eerb bedüte sell, bin y nid ganz nooche choo.
Y schryyb drum dr Unesco e Brief und täil ganz hööflig mit:
S Baaselbiet stoht gärn parat, wenn s öppis z eerbe git!

Dr Dokter Federer säit zu mir: Du hesch e Schwellig an de Mandle.
Die muesch dr im e Fitnesszenter therapeutisch loo behandle.
Griegsch Fieber, drzue no Brächräiz, pass uf, denn säit me däm,
wenn d au no Duurchfall üüberchunnsch: e klassische Grand Slam.

Dr Polo Hofer nimmt s letschte Tram diräkt an Lauenesee.
Döört git s Whisky, e Huffe Graas und käini Gränze meh.
Au doo fahrt s Trämli gränzeloos noch Weil und St. Louis
und mit Drääne i de Ouge stirbt d Innerstadt ganz lyys.

Bisch e Männli oder e Wyybli, oder mäinsch du bisch doch ender
so öppis zwüscheduure, däm säit me glaub Transgender.
Froogsch, ob die e äiges Hüüsli bruuche, säg ych numme troch:
Z Buckte pfunde mr alli zääme ins glyyche Gülleloch.

Barcelona will wäg vo Espania, si wäi un Separación.
Madrid isch doo drgeege und macht uf Konfrontación.
Wenn Lieschtel mit Baasel Lämpe het, denn git s als Solusión
zum sich wiider gäärn haa una Hospital-Fusión!

Dummi Chue daarfsch nümme sääge, kritisch isch au blöödi Gäiss.
Doofi Gans isch voll dernääbe, gschupfts Huen isch mee als häiss.
Säisch häissi Chatz oder gäili Sau, chasch dr s Lääbe voll versaue:
Drum sääg y im Stall jetzt numme no: Guete Moorge liebi Fraue.

Moorechopf darfsch au nümme sääge. Gfööhrlig isch Mäitlibäi.
Frauefuurz syg voll sexistisch. – Die Probleem wo mir hüt häi!
Irgendwenn verbietet mr sicher non e son e fruschtrierti Chräie
zum Kaffi am Sunntignoomidaag myni Zwätschgewäie.

Euse Lukas Ott isch nümme z Lieschtel Stedtli-Präsidänt.
Är isch jetz Baasler Stadtentwickler im Präsidialdepartemänt.
Wenn Baasel sich entwickle wott, lyt em Heiri spotte fäärn.
Entwickligshilf isch guet und wichtig: S Baaselbiet hilft gäärn!
Dr Federer wird Dokter HC, daas macht mi schampaar stolz.
E wältberiemte Ehredokter us Baaselbieter Holz.
Daas ych daas nie erräiche wird, duet mir zwaar scho chly weh.
Vellicht längt s mr zum Ehrerammel vom Faasnachtscomité.

In de Bäärge het s e Huffe Schnee. D Laawiinegfohr isch grooss.
Zu allem Eeländ fliegt jetz no dr Donald uf Davos.
Dr Trump wird sääge: Dasch dr Bewyys, dass d Temparature gheie.
Look arround you, even here in Swaziland duets schneie!

S Tattoo macht jetz käi Gwünn me, s macht sogaar hindenaabe.
Schyynt s häigi s zvyyl so Tanzmaryyli und au zvyyl Sängerchnaabe.
Me welli mee so Drums and Pipes mit Schotterock um d Nuudle.
Frooget doch dr Bundesroot: Daas sy au so Säck wo Duudle.

Dä Buttet isch e Walliser, drum het er halt gäärn Wysse.
Drzue liebt er au d Fraue, obwohl die mänggisch bysse.
Är chaa nid verstoo, dass es Fraue git, wo sich döi beklaage.
Y ha nur welle stryychle. Dr Constantin hät gschlaage.

D Empöörig die isch riisegroos: Zwöihundert Millione
zaale die Pariser für die Neymar-Schuttkanoone.
D Läischtig bestimmt halt doo dr Bryys, daas macht mii nid schyssig.
D Frau Pegoraro gäbte mr euch für e Franke fünfedryssig!

Wenn ych e Säuli metzge, denn mach y daas diskreet.
Ych mach e käi so Metzgershow, wo jeede alles gseht.
Technisch schaff ych sehr präzyys, y wäiss wie me filetiert.
Jä, ich hät gwüsst wie me deene z Bärn s Härzstück präsentiert.

Impressionen

von

Penetrante

Steckbrief

Auffallende Kostüme, spitze Nasen und kräftige Stimmen. Mit wohltuender Penetranz singen die Penetranten über Gott und die Welt.
Comité-Bank seit 1997

Video

Verse

Wo d Suleika ganz elai uff Mekka faart,
muurmlet der Mohamed am Stroosserand in Bart:
„dass doo kai Maa derbyy sitzt, isch doch ainerlai,
sogar im Aargau faare d Fraue hit elai“.

D Italiäner ooni WM sinn fruschtriert.
Bim Bsuech vom Cassis z Rom isch s vellig eskaliert.
Wo n äär bim Apéro am grosse Staatsbankett
froggt wär gäärn Panninibildli dyschle wett.

S fühlt sich d Frau Leuthard au beleschtigt – sexuell.
Der Ueli luegi lüschtern - s isch si Naturell.
D Sommaruga maint: „mach jetzt doo druss kai Buff,
uff so ne Bligg doo wart ich scho s ganz Lääbe druff“.

Der Ignazius säuslet:
„Doris – cara mia,
tu sei in Bundesroot jetz mini Mama mia.
Dini Lache come sole, lago, vino
und dini Muul wie Gotthardrööre ins Ticino“.

Mit säggsesächzig het s au s Vreneli begriffe,
wo der Franz mit 10 si het ins Fuudi kniffe,
isch das Beleschtigung gsi, drumm glaagt si iin aa,
d Stroof die het äär scho, äär isch hit iire Maa.

Die nei Museumsstrategie isch jetzt baraad.
S git nur no grieni und dails rooti Exponat.
Und der Käärn vo dääre neie Strategie,
bim Yydrittsbryys isch s Glaiderkäschtli scho derbyy.

Der glaini Fritzli sait zem Hans im Kindergaarte:
„Ich mecht Chef si und do druff nimm länger waarte.
Mir geen uff Franggriich dasch der allerbescht Momänt,
in unsrem Alter wirsch deert nämlig Bresidänt“.

In Schwede froggt der Björn „Will dü ha Sex med mir?
Denn ünder skriva mi jetzt bitte das Papier.
Gewünste Stellung kryyzen Dü da unten an
Tack sa mycket, joo, dann fangen wir jetzt an

Hit outet jede sich e so grad wie s iim wool isch.
Die isch vegan, die säll e Trans und dää kathoolisch.
Egal ob Minderhait, verfolgt oder am Rand,
s git Lyt die oute sich – „mir si vom Baselland“.

Langvers
In fuffzig Joor im Lamm sait d Schweschter Klara barsch:
„Sii Frau Üsgülün, ihr Arschgwei hängt am Arsch

und au die wunderscheeni tätowierti Roose,
hängt zimmlig schrumplig, samt em Buuse iiber d Hoose“.

Jä s gheere alli irgendwenn halt zu de Alte
und denn verschwinde die Tattoos voll in de Falte.

Do kunnt in d Physio der Ärnscht mit sim Rollator,
liicht verblasst gseesch uff der Bruscht e Terminator.

Au das Kelte Gryz Tattoo vom Jonny Meier,
isch verblasst und hänggt ganz schlaff in Richtig – Boode.

Em Hans isch d Frau verschtoorbe und me gseet in lache,
will am Ooberarm isch jetzt si ainzig Drache.

Und das Dootekopfmotiv vom Harry Lesser,
basst sit sim Gheerstuurz und em Schleegli immer besser.

D Frau Huber bringt der Maa ins Haim, das isch e Ding,
will äär nit will, fiert sii iin halt am Naasering.

Und d Frau Merian die macht e riise Gschiss,
iires Zungepiercing hängi am Gebiss.

S Trudi isch scho in der zäänte Liftigsphase,
im Momänt isch iire Naabel uff der Naase.

Und sit d Frau Aenishänsli nimm ka Botox spritze,
gseet iir Muul uss wie s Dail wo sii druff duet sitze.

Bim John het s Ooreloch nie gross gnueg kenne si.
Hit isch das braggtisch, s Heergräät basst so beschtens dri.

Die gschwullne Gnei vo der Frau Lutz, so gheersch si toobe,
sig Silikon, das haig sich gopffriidstutz verschoobe.

Doch sinn die sälber Schuld die Scheenhaitswaansinnsgleen
und mir sinn froo, sinn mir vier vo Natuur uss scheen.

Impressionen

von

Pierrot

Video

Verse

Fir 10 Riise sufft e Chinees,
e gfälschte Whyski, mit eme Pockerface,
“its veli guud” het är do gstrahlt,
zum Gligg han ych mit Bitcoin zahlt.

Ziircherbolizei will d Nationalität, nim nenne,
dass me die Kriminelle nit ka erkenne,
aber wenn nit stoot, blybts drby,
denn ka s bestimmt kai Schwyzer si.

S git immer meh wo s nit vertraage,
we me em Mohrekopf, Mohrekopf duet saage,
und wenn y gierig in aine byss,
gohts grad los, das MeToo Gschyss.

So Wärbe-Wätter mässig gsee,
gheert s Sünneli zur SVP,
dr AfD isch s wurscht, ych stuun,
die sin au ohni Sunne bruun.

Fuessball isch e Massesport,
me schuttet praktisch an jedem Ort,
doch wenn denn alli z Russland gingge,
mien Tschingge vo dehaim us wingge.

Jetz het me wider rueh,
d Aggte Jamaica isch ändlig zue,
au d Merkel haig das Wort scho ghasst,
he jo, si hätt jo gar nit in so Glaider basst.

Es git bestimmt e riise Gschrei,
dr Bahnhof isch jetz Raucher frei,
s goht nimme lang und d Yysebaan,
wird zuckerfrei und au vegan.

Layana, Leaticia, Gökaalp, Selik, Hasan,
Ilinka, Melin, Yusuf, Dünya, Ahaan,
unseri Stadt isch schampar froo,
mir hänn wider ächti Bebbi bikoo.
Em Hüppi het s bim Fährnsee, nüm gfalle,
är het gwächslet zum FC St. Galle,
so wie dä schnörrt sötsch welleweh,
em gratis grad no de Wessels geh.

Jede Schwyzer haig e halbi Millioon,
das gheert scho fascht zum guete Doon,
hätt ych e ganzi, ha ni dänggt,
denn hätt y si au em Elsass gschänggt.

Y dringg gärn am e lauschige Plätzli,
e Gleesli Wyy mit mym Ami Schätzli,
du Gryysel, schreit si, ich glaub ich spinn,
schau, in meinem Glas, ist Weinstein drin.

Impressionen

von

Schlyffstai

Steckbrief

Der Schlyffstai ist ein hochkarätiger Diamant der Bänkler-Szene. Die Verse haben Witz und der kunstvolle Vortrag ist ein absoluter Genuss.
Comité-Bank seit 2006

Video

Verse

Mir Schlyffstai, mir steen hit mit schlächtem Gwisse doo.
Mir sin drei Männer, zimmlig wyss und eenter heteroo.
Hän kai Frau bi uns derbyy, sin wäder stumm, blond no vegaan,
Diskriminiere aber niemer – nit mol d'Elsi Ackermann.

Mir sin diväärs - au bi de Väärs.
Singe fir Ziircher, Baaselbieter – jo, s'isch kontroväärs.
Mir singe fir e jede, wo will, as s'sich ryyme duet,
Und au fir die, wo wäder Ryym no Pointe wichtig finde.

Au dr Musliim und si Burkakatz. Und linggi rooti Sogge.
Oder Grieni mit em Poorsche und Eeko-Henna-Logge.
Au dr Baschi Dyyrr deerf ghaimdienschtmäässig bi uns yyneloose,
Und vo de Bachelorkandidaate au die oni rooti Rose.

Liebsch du Fraue, Männer, Ditti, Transe, bisch derbyy.
Hesch Millione gno, korrupt wie’s Poschtauto, du deerfsch so syy.
Mir sin hit inklusiiv, nit exklusiiv, bi uns hett jede Blatz.
Mir hän nur ai rooti Linie: Hesch du en Abo vo dr BaZ.

Vor dr Waal sait d'Le Pen, «Vive la France.»
Zum Gligg hett die an dr Urne kai Chance.
Är isch jung, gseet guet uss und macht's mit Elegance.
Bi im gheit jedi Grand-Maman in Trance.

Oh, Macron! Bisch en Attraction.
Du bisch frisch wiene Pfäfferminzbonbon!
O Macron, glai Napoleon.
Machsch la France wider richtig grand.

Syni Frau isch im Verglyych nit daufrisch.
Wie das bi dr aigne Leerere halt soo isch.
Hett Obsession fir ryffi Fraue, är laadet d'Merkel yy
Und froogt si schyych: «Willsch du mi Muddi sy?»

Si sait: «O Macron. Bist flamboyant.
Mit deinen Augen und EU-Vision.»
O Macron. Dr Schulz isch e Gloon.
Mach du mit iire e groossi Koalition.

In knapp zwai Wuche goots ums Gligg vor SRG.
Wääge No-Billag git’s scho bald nimm seer vyyl z’gsee.
Denn mien mir wider zämme rede, jemine!

Jedi Sändig koschtet nei e Fixbetraag,
Bestatter, Boulevard, Epiney nur mit Uffschlaag.
Rabatt git’s, luegsch d’Noochrichte eerscht am neggeschte Daag.

Vyyl wänn kai Radioo und staatlig Färnsee.
Uff Facebook dien si lääse, was si wän gsee.
S’ Wichtigscht duesch jo graatis im Netz bikoo:
Kochrezäpt und Unfäll und Byysivideoo.

So verdumme d'Lyt in rasendem Tempoo.
E Leesig wär bir Tagesschau wuurdisch dernoo
Fir jedes Luege dausig Supperphinggt bikoo.

Mir wänn scho am Mittag e Rendevouz haa.
Wenn’s syy muess, mit vyyl Glanz und Gloria.
SRF isch Hochkultuur, das duet mängmool wee:
Drum muete die uns zue, dr Schawinski z’gsee.

D’Unesco maint as d’Faasnacht z’Baasel e gueti Gattig macht.
Zur Wältkultuur kunnt alli Wält. Das hett uns grad no gfäält.
Dr Moorgestraich foot speeter aa, dermit dr Charter lande kaa.
Si steggele duur d’Innestadt und drugge alli Räppli blatt.
Und bi de Määrsch, das goot doch nit, do singe sii auf Hochdeutsch mit.
E Waggis wirft Mimeeseli und sait: «You want e Reeseli?»
D’Chineese stuune d’Chaise aa und frooge ob me s’Ross au ässe kaa.
In Käller git’s e Druggede wägg de Japaner-Gruppede.
Trotz Unesco-Gschyss blyybe’s ainewääg die schenschte drei Dääg.

Mir isch e Frau uffgfalle, elegant, won-i denn dett
Trotz BL-Schild an irem Auti kenneleere wett.
I hool my Handy fiire, wie me das so macht,
Und han’re via SMS e Hyyrootsaatraag gmacht.

Doch si sait mir ganz diräggt: «Ych bin im Fall zur Zyt e Maa,
Und erscht in zwai, drei Joor wird-i mi Pfiffli nimme ha.
Doch wäg' däm, bin-i denn nit Frau, das haisst, Frau bin-i au.
I-bin e Maa im Frau-Umbau, aber nimm’s nit so genau.»

Mir hän denn aafoo date, Gschlächt isch mir halt egaal,
Ob Maa, ob Frau, ob äs, si, är, ob bi oder neutraal.
In Dytschland gitt’s jo neischtens, si bekemme drum vyyl Loob,
Näb Maa und Frau e Drittoption im Bass, nämmlig: DAS Schwoob.

Nei trans-formier au ych mi. Hesch Optioone, macht’s di froo.
Und simmer eerlig: s'Synonyym fiir «eed» isch «heteroo.»
Nur ai Dilemma han-i jetz, das hätt-i nie gsee koo:
Mi «Sii» sait: «Sitz!», mi «Är» sait: «Stoo», wenn-i muess uffs Hyysli goo!

Mir ässe Sändwich ooni Flaisch, lääbe vegaan
Zum z'Morge Fääderkool, das gitt uns vyyl Elaan.
Statt Milch wird Flissigsoya gnoo
Fisch und Rookoscht extraroo.
D'Reeschti frei vo jeede Geen
D'Määlsuppe nei ooni Gluten.

Und Flaisch, gitt‘s nur, wenn d‘sicher bisch, as Bio isch.
Nur Flaisch wo umwältverträäglig, dynamisch optimiert, perseenlig massiert, fair in
d‘Schwyz g’ruederet woorde, mit zwanzig Eekoleibels versee, imene In-Lokal verkauft,
und mit emme Laschteveloo transportiert isch, kunnt uff e Disch
E Määlwuurm-Steak isch moorn denn d'Norm
Und Kääfer-Waaie sind konfoorm.
Inseggte sind jetz voll refoorm.
Die wäärde gmeschtet, nur as du ’s‘waisch,
Mit eme Sändwich mit vyyl Flaisch.

Das Bruderholzspitaal deert oobe, das isch e trutzig Burg.
Si pflääge, operiere; jo, sie hän au e Chirurg.
Das Spitaal isch baut zum heile, wenn d’e Pfläschterli bruuche duesch.
Besser isch es trotzdäm, wenn d‘nit deert aanemuesch.

Es räägnet yyne, isch halbläär, es hett e Gylleduft, e schaale,
Mache si zum Gspass e Renggebild, foot’s iberall a straale.
Si sin modäärn, das isch kai Froog, und das isch guet fir’s Renommée.
Im dritte UG hän mir guet versteggt e PC gsee.

Zum Lukas Engelbärger passt die herrlig Rue.
Kai Pflääger kunnt koo steere, und d’Rezeptioon isch zue.
Är will d’Fusioon mit dr Ruine, mir finde’s nit seer glatt.
Nur ai Grund spricht derfiir: dr Bligg uff Baasel-Stadt.

Es wott e Maa e Frau bedränge und yyänge
Är wott jo nur bitz aanelänge.
Will är sig e Maa, und als Maa duurft' är do draa.
Und wird derfiir beloont am Änd:
Jetz isch dä Ma US-Bresidänt.

Au s’Bundeshuus hett reagiert und publiziert
E Flirtveroornig, wo brilliert.
In Lift deerfsch nimm elai ooni Pfäfferspray.
Lächlet ain dr Buttet aa,
Isch froo, wäär guet Karatee kaa.

Iber kurz oder lang tweetet jedi Frau: «Hösch, ych au!»
E Maa mit Macht wird schnäll zur Sau!
D’Fraue setze sich zur Weer: Verweigere Verkeer.
Nur dr Erdogan hett kaini Klaage gha,
Will e Gaiss «Määä too» nit tweete kaa.

Melodyy: Return to Sender
Du aitle Bländer. Hesch im und uffem Kopf nur Schtroo
Verwäggslisch alli Länder, und dyni Fraue sowiesoo.

Dr Trump landet in dr Schwyz
Blick und Schneider-Ammann gän sich ganz verliebt.
Sii hoffe aber, as är nit uss Witz
D’US-Botschaft nach Ziiri verschiebt.

D’Uffreegig wäge iim isch riisegross
Dergääge isch d’Burglind e sanfti Brise gsy
D’Teresa May hoggt em säuselnd uff em Schooss
«Nach em Brexit han-i wiider Zytt fir di.»

Du wirre Twitter-Sänder! Hool wie dr Kim Jong Un im Kopf!
In eurem Waansinn wänder wisse, wär hett dr greesser rooti Gnopf.

«Shithole» tweetet är vom WC uss
an Länder ooni Zuekunft oder Gäld zur Hand.
Mir proteschtiere: «Halt du di do druss!
So redet me doch nit vom Baaselland!»

Impressionen

von

Schnaabelwetzer

Steckbrief

Schon das Goschdym bereitet auf einen bunten und rassigen Auftritt vor. Und er kommt. Mit bestechenden Pointen und Helgen.
Comité-Bank seit 1997

Video

Verse

Ans Fuudi länge, dööple, grapsche, fingerle us Glüscht –
Käi Wunder glaage d Fraue: D Männer länge au an d Brüscht!
Sogar d Frau Pegoraro glaagt – das hätte mir nie dänggt –
Sit Johre fühlt sy sich vom Läufel-Fingerli bedrängt!

Goht s dir verschisse, myys und schlächt und hesch e Riisetief?
Moralisch liggsch am Boode und s lauft alles numme schief?
Denn bau dy uff, dängg positiv – dur d Freud wird s Läbe glatt!
Dr Wessels freut sich uf die näggschti Bauschtell in dr Stadt!

«Bim Fringer goht s vyyl ringer», dänggt dr Monsieur Constantin
Und schmiirt däm äins ans Hirni – pas très gentil à la fin!
«Was mach y», dänggt dr Baschi, «wenn dä z Basel ummelauft?»
Und het für d Schuggerei sofort e Panzerwaage kauft!

Die z Lieschtel spaare numme – und mir Basler zahle druff.
Das sinn die letschte Batzeglemmer – hey, das macht ys muff.
Drumm freue mir uns still und häimlig: S kömme jo scho glyy
Paar hundert FCZ-Chaote z Prattele verbyy!

Franziska, Lisa, Monika, Jasmin und Annabelle,
Die glaage uf Beleschtigung, sit Johre – sexuell.
Jä, d Aaklaag, Sii, die isch brutal – juristisch duredänggt:
Dr Fritz häig ihne alls bim Mälche voll an d Zitze glänggt!

Us ryffe Pfluume brennt me Schnaps – dä Fuusel passt uns nit.
Doch s Destillaat uss Häidelbeeri – das isch unsre Hit.
Die mäischte Beeri ka me bruuche, süess und dunggelroot.
Doch s Cassisbeeri ohni Saft passt nur in Bundesroot.

Ych ha s nit glaubt: Jä, hundert Liter dringgt en Elefant.
Ych ha s em Zolli-Wärter gsäit – dä nimmt das ganz entspannt.
D Kamel – säit dä – die suffe meh, so vyyl, wie s numme goht.
Am beschte gseht me das bi däne uss em Grosse Root.

Hesch Osteochondritis? Und hesch Fuesspilz? Oder Gicht?
Mesaortitis dissecans? Prostata? Übergwicht?
Appendicitis chronica? Verdräisch käi Aspirin?
Gang frog dr Rotscher, dä isch jetz «Doggtor der Medizin»!

Politisch froggsch dy scho, ob äin bis 80 fahre darf.
Isch dä no fit und gäischtig zwääg? Und gseht är au no scharf?
Jä, wäiss dä no, wo d Kupplig isch? Und wie dr Blingger goht?
S kunnt nit druf a, will dä jo z Basel sowyso nur stoht.

Mit Dignitas und Exit ka me d Wält diskret verloo.
Und au s Hospiz hilft äim drbyy, ganz lyyslig äifach z goh.
Nit immer goht s so lyyslig zue, jä mänggmol git s Radau:
Gang numme mol uf Sissach und frog dört die tooti Sau!
E Château-neuf-du-Pape mit Johrgang nüünzähhundertzäh,
Dä hämmer us em Käller gholt, dä het me müesse näh.
Y ha dä eedli Saft ussgläärt – das isch denn öppis schwäärs –
My Frau het gsäit: E Zapfe mit däm «Weinstein» isch pervärs!

Impressionen

von

Schooffsuuri

Steckbrief

Sorgt für etwas Entschleunigung an der Fasnacht. Während sich das Publikum entspannt zurücklehnt, singen die Schooffsuuri Verse, die sitzen.
Comité-Bank seit 1992

Video

Verse

2018 Schooffsuuri

S git z Baasel e Schildli, ganz glai und ganz fyyn
Druff stoosst ain sy Weeloo – s wiirggt scho fascht intim.
Ooni Luppe gseet s kaine – me faart draa verbyy
Dasch sicher au d Absicht vom Wessels derbyy.

D SBB-Chefin, d Frau Ribar het dänggt,
zem Maserati gäbt s der Parkblatz grad gschänggt.
Und s Sagg-Gäld verdient si z Angola derzue
Entglaisige het unsri Baan doch scho gnue .

Isch aine e bornierte, ganz aarme Dropf ,
No sait me, dä haigi e Brätt vor em Kopf.
Hit isch es kai Brätt me - denn die Funggtion
ibernimmt jetz bi jedem s Mobil-Deelefoon.

Luegsch im Kim Jung Un sy Fryyse so aa
No wuurdsch nit grad saage – dasch e Bombe dä Maa.
Und glyych – an der Olympiade, do wänn si en haa
Ass är deert Lawine statt Lyt spränge kaa.

Y haa im Kindsgi zem Frailain gsait : Sii,
Wenn yych emool grooss bii no hyyroot y Dii !
Jetz rauf y mer d Hoor und dängg : mai, daas wär der Clou,
Das Frailain verzaig mi und saagi „me too“.

Der Baanhoof wiird rauchfrei – nur wiird me nit biesst
Wenn aine deert inne sy Gräbsfuetter gniesst.
Verbotte wiird alles – kain haltet sich draa
Das gseesch au de Weeloo am Spaalebäärg aa.

D Leuthardt will nimmi – y saag nur oh Schregg
Wäär zaigt is jetz wyter die moodische Regg.
Y dängg an d Frau Ackermaa – no wär si ewägg
Nur kimmeret die sich um d Moode e Drägg.

Y mach mi Faasnacht nit eppe fir Gäld
Nai – numme fir myy ; nit fir die ganz Wält.
Y pfyff uf das Eerb do vo däre Kultur
Do bin y as Bebbi halt aige und stur.

E Maa mit vyyl Bulver kaufft Zytige yy
Billig Zyyg in der Oschtschwyz und aini am Ryy
Die wo n em nit gheere – die schryybe bigott
als iber dää wo me dootschwyyge sott.

In Sissach isch e Gschyss und e ganz e grooss Gschrei
E Metzger duet metzge – me finds ai Sauerei.
E Pfaff muess sich geissle – fascht wie ne Fakir,
Y haa immer scho dänggt – die sinn anderscht as mir.
Im e Filmli sait Baasel Tourismus rabiaat,
Mir syyge e „Wältstadt im Däsche-Formaat“ !
Baasel syyg „d Stadt mit de kiirzischte Wääg“
Bim Wessels sinn s Kurzschliss iber meereri Dääg.

Jetz wänn si in Baasel no s Haize verbiete
Sinn in der Regierig denn numme no Niete ?
Mit der Fäärnhaizig haize, das wuurd mi no raize
Aber nur wenn d Regierig grad au kennsch verhaize.

Impressionen

von

Schunggebegräbnis

Steckbrief

Selten sorgt ein Begräbnis für soviel Witz, Unterhaltung und gute Stimmung wie dieses. Übrigens nicht nur bei Veganern.
Comité-Bank seit 2012

Video

Verse

Bisch gärn ainsam und elai, hesch nach Stilli s Verlange
Denn bisch friener no am beschte ins Stücki abegange
Doch d Oase vo dr Rueh
Goht bald ändgültig zue
Mir hän Ersatz mit Garantyy
Lueg bi dr Baselworld verbyy

Im Büro, uff dr Toilette, in dr Sauna und bim Schwimme
im Huushalt grad bim Glette, in dr Baiz und bim Stimme,
im Theater und im Kino,
im Stadion, im Casino
s git kai Ort wo d BaZ nid bsuecht
und dr Hampe Wessels suecht.

Z Sissech hett e Metzger ganz öffentlich gschlachtet,
s ganz Volgg isch empört gsi und hett en verachtet,
as Pointe no vom Ganze
gitt e Pfaff sich uff e Ranze….
Son e Witz - sich sälber schloo,
kasch doch dr Constantin lo koo!

Uns fallt uff, ass die Rammel sich gebärde wie Barbare:
S darf nüt koschte, s darf nüt koschte, s darf nüt koschte – numme spare!
«Wenn an d Uni ych - öbbis zahle muess,
muess es billig sy - e schöne Gruess»
schrybt ys d Monica Gschwind,
«denn ych bin en ALDI-Kind!»

S darf z Burma dr Papa «Rohinga» nid saage,
s Wort «Groko» schloht z Dütschland em Schulz uff e Maage
Saisch «EU» zum Röschti
git s Lämpe - und zwar grööschti -
und der Wessels schloht grad dryy,
seisch «BVB» und «St. Louis».

Dr Emil kunnt wider mit uralte Sache
und trotzdäm verjagts syni Fans fascht vor Lache,
bald nünzig voll Wöhli
macht no immer dr Lööli,
do fallt uns mit Schreggen yy:
Dr Almi isch erscht fuffzig gsi.

Dr Kim Jong hett e Gnopf, au dr Trump hett so aine,
em Trump syn isch gross und der Kim hett e glaine.
S herrscht Alarmstuefe «Rot»
Wie bi uns im Gross' Root,
will de nie weisch, s isch verruggt,
wär uff s falsche Knöpfli druggt!

Dr Steffen zieht wyter, dr Streller nimmt s logger
und bschtellt sich z Berlin e fascht unbruuchte Stogger,
by Zalando, dasch s Digge
kasch Niete zruggschigge,
also Pipi, jetz bigoscht
due dä Brigger gly uf d Boscht!

Dr Roche-Turm isch dr höggscht in der Schwyz, das isch gschpunne,
Egal wo de bisch, stoht dä Turm vor dr Sunne
Jetz gits öbbis, wo no höcher isch
und meischtens no vyl nöcher isch,
es isch sensationell:
D Randstei vo dr Tramhaltstell!

Die Mumie vo Basel, mir könne s nid fasse
soo alt, die hätt no gege dr Täll könne jasse
wo me sy het welle
in d Vitrine schtelle
macht si s Aug uff und seit «Sii,
hänn Si jetz d Museumsstrategie?"

Impressionen

von

Schwoobekäfer

Steckbrief

Zählt zu den kostbaren Insekten des Comités. Mit fein gedrechselten Versen bohrt er Pointenstachel ein, die sitzen.
Comité-Bank seit 2000

Video

Verse

Ych wott jo gwiis nit au no die Frau Ackerma verdrambbe;
Es isch scho druurig gnueg, wie die duet rootlos ummelambbe.
Und wo si vor em Rothuus Gescht empfangt, do rieft ain knabb:
Herrjee, y glaub, im Zolli isch e Schleyer-Eule ab!

In Ängland wird dr Philip mit bald Hundert pensioniert;
Do het dr Alain Berset mit dr Queen delifoniert!
Är frogt - mit Unterbrächige – wil s Änglisch fallt em schwär:
Frau Königin, wo nämme Si das Räntenalter här?

E Fremde kunnt zem Bahnhof us und wird vom Tram halbiert
Denn rutscht er in e Baustell, won er driiber balanciert.
Und in dr Yysegass verwitscht e Biker en no ganz –
Mir bruuche kai Tourischtebus; uns längt e Ambulanz!

In Sissach het dr Metzger uf dr Strooss e Sau versääblet
Dr Pfarrer mit dr Gaissle isch vor Kummer fascht verrääblet
Mit Bluet- und Läberwürscht verpflägt me ganz e Huffe Lüt
Und alli sin sich ainig gsi: De Stedter gämmer nüt!

Am Rhybord fehn em Wessels syni Bagger näggschtenz a:
Und leege son e Sandstrand aa wie an dr Adria.
Dört ka me denn schynt s unschyniert und fiidleblutt go baade,
Es gseet Di sicher kaine hinter däne Grillrauchschwade.

Es faart dr Dreyer neyerdings diräggt uff Sääluyy
D Frau Hueber, die vom Bläsiring, stygt in das Drämmli y
Si isch scho ganz begaischteret: Die schöni, langi Faart!
Do git dr Drämmler duure: Ändstation Birsfälde-Hard...

Vo Brüssel isch dr Junker ko – in Bärn het kaine gfäält!
Dr Bundesrot im Sunntigsgwand isch uusebutzt und gsträält.
Dr Junker luegt si a und froggt dr Ma vom Protokoll:
Wär isch vo däne siibe Glöön denn jetz dä Papa Moll?

E Schääse-Ross, das het vom Comité sich priefe lo;
Als diplomierte Gaul het s derfe zrugg an d Schääse go.
Und wo s denn e baar Bölle falle losst in syner Spur,
Do sait s: Ych hätt s jo au nit dänggt - das isch jetz Wältkultur!

Dr Bundesrot, dä het Problem mit däne Oschtmilliarde,
Wo druff in Oschteuropa ganzi Gaunerschare warte.
So bhaltet doch dä Pulver; dä verschwindet do vyl pfläggter
Im kurveryyche Schuurggegschäft vom Poschtautodiräggter.

Im Konsi zahlsch fünf Santym jetz für son e Plastic-Gugge,
Wo Du denn für Dy Znacht dehaim d Insäggte dry kasch drugge.
Nur bass mr mit däm Güggli uf, voll Käfer, suuber ghäxlet,
Dass nit dehaim Dy Frau s no mit em Robidog verwäxlet!

Impressionen

von

Schyynhailig

Steckbrief

Einer der brilliantesten Geistlichen ist nur schyynhailig. Im Bänkler-Himmel hat er trotzdem seinen festen Platz.
Comité-Bank seit 2017

Video

Verse

Jedem vo Euch wo nid mitsingt syg gsait
da’sch d’r erschty Schritt in d’ Schyynhailigkait

So’ne Ehredoggd’r ehrt d’r Roger kai Schpur
denn schtürtechnysch het’r scho lang d’ Professur

Es schtoht em Franziskus d’r Wältschmärz im Gsicht
wo d’r Trump ihm bim Handschüttle d’ Finger fascht bricht

Zue de Machtmissbruuchs- und Sexismusklage
kan ych do als Pfarrer jetz nüt derzue sage

denn wäg’em Zölybat und em Pontyfex
ha au ych nie yvernähmlige Sex

D’r Hüppi findet’s z’ St. Galle soo schön
well ihn dört d’ Mensche jetzt ändlig verschtöhn

Für’s Guete vom Trump bis jetz efang
isch so’ne Zwaizyyler scho wider z’ lang

Am Schtrytt über d’ Grössy vom Knopf nimm y a
het im Himmel e Sigmund Freud d’rüber ka

’ass Jede und Jedy jedes ka ha
g’seht nit Jedes Jedem und Jederen a

Foht’s z’ Franggryych aa schneye isch’s mir ainerlai
denn nimm y d’r Dreyer und fahr wider hai

Doch denn schtyyg y schpontan in Achter um
villicht duet’s Wätter im Dütsche jo nid eso dumm

Über d’ Schtänderöt wo ins Bundeshuus göhn
het d’ BAZ recherchiert ‘ass die Lingge nid schtöhn

Sy klöpfe mit Geissle sy schlachte vo Hand
jä das isch d’r Kultuurbytrag vom Baselland

E ähnligs Galaama für’s Schlachte dehai
macht e Veganer scho wäg’em en Ei

Impressionen

von

Singvogel

Steckbrief

Dieser Vogel kann nicht nur singen - er ist auch ein komischer Vogel. An jeder Fasnacht setzt er zu neuen Höhenflügen an.
Comité-Bank seit 1997

Video

Verse

Jetz spiilt d Regierig als im Roothuus e Sonata:
S Adagio us der Fantasia desolata.
Doch bim Allegro laufe d Lüt beräits dervoo:
Der Gitarrischtin het s der Schaal in d Säite gnoo.

Aua, aua! Dä Vegaaner het böös glitte.
Er het bim Rieblischelle sich in Duume gschnitte.
Drzue kunnt s schlächte Gwüsse, won en sithäär druggt:
Denn är het s Bluet vom Duume abgschläggt und denn geschluggt.

Geschter zoobe het der Babbe gfroggt bim Znacht:
Was hesch für Noote, Bueb? – Do het der Hansli glacht.
Hüt bruuuchts käi Noote me! Hänn iir das nit kapiert?
Y ha my Sagggäld voll in Bit-Coins investiert.

Am Bahnhof Lieschtel säit d Frau Pegoraro: Ou!
und bestellt im Pronto-Shop e Käffeli to gou.
Jo waas, Sii göhn?, frogt e Passant und hebt ere d Düüre.
Und d Kioskfrau holt beräits der Schämpis füüre.

Scho sorgt dä Tunnäll under em Rhyy für Unbehaage.
D Doris Leuthard will schyynts gege der Wessels klaage.
Zerscht häig er numme gfrogt: Wämmer s zämme mache?
Doch won er säit: My Häärzstück!, häig si em äini bache.

S wird d US-Bootschaft in Jerusalem platziert.
Scho het d Frau Gschwind mit em Herr Trump delifoniert.
Si haig probiert, ihn au no grad derzue z beweege,
s Konsulat vo Bärn uf Titterte z verleege.

Sytdäm der Federer als Doggder isch veräidiget,
syg der Karli Odermatt e bitz beläidiget.
Und au der Hakan Yakin, dä verstohts nur schwär.
Wenn äin im Döggderle Erfahrig häig, denn äär!

S git Lüt, wo schlittle, bis dr Schlitte duet versplittere,
wo göhn go flittere, statt Schritt für Schritt z verwittere.
Doch s git au die, wo zittere, wenn s kunnt ko gwittere,
d Verschwörig wittere und s Fänschter dien vergittere
und offebar vor luter twittere – verbittere.

Die nöi Museumsstrategie, die goht esoo:
Daas vo döört das kunnt nach doo. – Und das vo doo
das wird döört üübere züüglet, und denn het me glyy
gnueg Blatz für d Blään vo der Museumsstrategie.

Ich find my Tante Burglind äigetlig e tolli,
e gietig-ufmerksaami, samfti, liebevolli.
Doch wo si unaagmäldet koo isch aafangs Jänner,
hesch gmeergt, dass Fraue au nit besser sinn als d Männer.
E soone Paartnerschaft bringt immer wider Nöis:
Mir wäi au e Dail vor Uni do bi öis!
... e soone Paartnerschaft bringt immer wider Nöis:
Dir chöit zahle, doch s Kantoonsspitaal ghört eus!
... e soone Paartnerschaft bringt immer wider Nöis:
Mir häi au Wältkultuur und Politik bi öis!
In Sissech d Metzgete, in Eptige es Bad
und in Titterte scho bald es Konsulat.

Impressionen

von

Spitzbueb

Steckbrief

Der Spitzbueb ist ein spitze Bueb. Seine zugespitzten Verse sorgen für spitze Pointen.
Comité-Bank seit 2007

Video

Verse

S wäär s bescht, wenn aine, haa n y dänggt,
em Schneider-Ammann e Velo schänggt;
no leert er, wenn er s rächt schtudiert,
wie n e Ruggdritt funktioniert.

Dr Burkhalteer goot, vyyl sinn froo gsii.
Me froggt sich: Isch er wirggligg doo gsii?
Und denn isch jo dr Cassis koo.
Jetzt froggt me sich: „Und dää isch woo?“

D Martullo sait, doo gsee n y root:
„Im Nootfall wird yych Bundesroot“
Die wuurd jo, und mit ’me Lache,
im Nootfall au no Päbschtin mache.

Abdailig „Am Ryy isch s verbyy“

Im Altershaim zem Lamm, extreem,
het d Frau Möschli znacht Brobleem.
Si wintscht sich, dass si schloofe kaa,
e Reed vom Elsbeth Aggermaa.

Dr 8er faart uff Weil am Ryy.
Dr 3er nei uff Sää-Luyy.
Als näggschts, dr Baubeginn isch moorn:
Dr 6er bis uff s Matterhoorn.

Abdailig „An dr Frängge, kasch dr s schängge“

Lauber, Pegoraaro, Wääber,
die vo Hölschte und dr Rääber,
dien schbaare, schbaare, schbaare, schbaare.
Ych due mir jetzt au s Ryyme ... schbaare,
und d Pointe n au, trallallallaa.

Abdailig „S Wätter isch au e Saich“

Ych find dä Klyymawandel guet:
Wenn z Dytschland s Meer rächt styyge duet,
hätt daas jo au e nätte Zwägg:
Es wäscht denn nämmlig s Bruune wägg.

S Lawyyneninschtitut z Davoos;
bi miir, do isch d Enddyschig grooss:
Dr Schnee isch doo, dr Trump isch doo,
s isch numme kai Lawyyne koo.
Räägedropfe, Baareblyy,
dr Morin Guy, dää schifft in Ryy.
Harnreerelängsmuskulatuur.
Dä Saich-Väärs isch jetzt Wält-Kultuur.

Abdailig „keini Feik-Njuus“

Wenn d Billag abgschafft wird, ojee,
git s numme noo Reklaame z gsee.
24 Stund, da’sch vyyl:
Fischer, Bettwaare, Wädischwyyl.

Ych bstell in Londe ’Tea for Two’.
Do sait e Frau am Disch: „Me too!“
Y haa s e n aagluegt und haa dänggt:
„Woo haa n y dääre n aaneglänggt?“

Abdailig „halt d Schnurre – oder y hau dr eins“

Dr Constantin, dumm, ryych und aitel,
en Arsch vom Färse bis zem Schaitel,
infantil, beschränggt, am Änd
wird dää no US-Presidänt.

Impressionen

von

Stroossewischer

Steckbrief

Die Strassenfeger der Stroossewischer haben Kultstatus. Ihre Bänke sind eigenwillig, schön gereimt und brilliant vorgetragen.
Comité-Bank seit 1996

Video

Verse

2018 Stroossewischer

Sit s in der ganze Schwyz
das Raasergsetz do git,
hän die vom Aargau
ganz e bitzli Mieh dermit.
Jä dasch jo klaar,
dass die das Gsetz jetz loggere wänn,
will die meh Raaser dört,
als Gfängniszälle hän.

Do drambbt der Trump z Davos
ins Wirtschaftsforum yyne
und alli rieffe uffgreggt:
«Achtung, e Lawyyne!»
«Jä und was stinggt denn doo noch Gülle
wie nit gscheit?»
«Jä är isch do hinde
in e Shithole yynegheit.»

Bim King Kong Un sin d Schwyzer tschuld,
jetz mien der loose!
Dä isch jo z Bärn in d Schuel
und singt gärn «Albberoose»,
und sputtet Ämmedaalerkääs
jetz noch und nöcher,
drum isch er unde rund
und oobe drin sin d Löcher.

Für d Abgaastescht
hän die der Mensch brucht als Proband
und alli hüüchle hindedryy
das syg Schand!
Dasch doch e Witz,
die hän Millioone Teschtpersoone,
wo sit Johrzähnte
an den Autobahne wohne!

Hän diir dä Bombe-Väärs do
über d Aggermaa,
ächt daasjohr au scho ghört?
Jä öbbis isch scho draa!
Mer hän se gfroggt
ob d Pointe wohr isch oder glooge
do het sy gmaint:
«Do muess y zeerscht der Maa go frooge.»

Uff sonere Luxusrais
mit Unterhaltigswäärt
kaufft sich d Norvartis mit Erfolg
der griechisch Määrt.
Bim Fondueplausch git s Wyber, Wy
und daas und säll
und none Zuestupf,
«E chli stinke muess es, gäll!»
Wäge däm Millione-Bschiss
bi de Boschtauto & Co.,
duet plötzlig d Polizei
dört vor em Hauptsitz stoh,
doch d Chefin schlyycht dervoo
und schafft s au fascht no knabb,
do rieft der Schugger Maier:
«Achtung, d Boscht goht ab!»

Impressionen

von

Stächpalme

Steckbrief

Ein spitzer, immergrüner Bank mit roten Beeren. Während über einem Jahrzehnt war die Stechpalme eine feste Comité-Grösse. Wir vermissen sie schmerzlich.
Comité-Bank seit 2006

Video

Verse

2018 Stächpalme

I bi bis hüt käi You Tube Star,
ha käi Community – so far.
I tröscht mi mit em Jesus, är isch au en arme Maa
und het wien ich am Afang nur grad zwölf Follower gha.

Käi Stäibock schläckts ewägg, käi Gäiss:
In den Alpen isch es häiss.
D Gletscher schmelze rääiewyys, d Laag isch tryscht bis schyter.
Do loob ich mir die bäide Basel: Doo goht d Yyszyt wyter.

Dass ich zum Wältkulturerb zell
und erscht no immateriell,
isch toll – doo non e Hiiwyys zur Erbouig vo de Gmieter:
D Helfti vo däm Erb si materielli Baselbieter.

Dr Wessels isch nach Rom ufbroche.
Worum? Är wird dört häilig gsproche!
Dr Papscht belohnt dr Hampe für sy chrischtlig Grundidee.
Die lutet jo syt je: geh isch seliger als neh.

Dr Lieschtler Stapi Lukas Ott
spiilt neu in Basel liebe Gott.
Drfür zieht d Achermaa uf Buus, wo si, no voll im Saft,
im Mai 2050 s Konzäpt fürs Schnapsmuseum schafft.

Im Wald, do balge sich zwee Kläffer,
e fäisse Fluumer und e Bäffer.
S isch klar, dass si dr Sinn vom Läbe blind begriffe häi:
Kläff lüter als dr Find und schiff em denn no gschwind ans Bäi.

S git läider nid meh AHV.
Was wird us mir und myner Frau?
I ha käi zwäiti, dritti Süüle, dir, mir droht dr Brexit.
Als letschti Süüle blybe nur no Cumulus und Exit.

Natürlisch isch aab Monsieur Fringer
nischt nur gewickelt um den Finger.
Isch aab gespuckt, geohrfeigt und mit Fäusten ihn traktiert,
doch weil isch bin für Fairplay, ihn nischt ganz exekutiert.

Dr Trump het gnueg vom Wysse Huus und wird neu Chef vo Twitter.
Dr Papscht hürotet d Lindsey Vonn und landet hinder Gitter.
D Merkel stalkt dr Macron znacht im Dusel vor em Huus.
D Queen kifft mit em Butler – ich ha voll dr Fake News Blues.

Jetz gohts em Santichlaus an Chraage.
Die alt Frau Niggli isch am Chlaage:
Är häig ere vor achtzig Johr, si häig das lang verdrängt,
won er se in Sack gsteckt häig, ans lingge Schiinbäi glängt.

Im Vollsuff torklet äin in d Chille.
Dr Pfarrer rieft: um Himmels Wille,
ich schick Sii, Monsieur Buttet, mit em Darbelley uf Lourdes,
au wenn lut Häiland d Häilig vo so Schyynhäilige duurt.
E Buur vo Buus het in sym Stall im Fall die gröschti Mieh:
Chuum foht er afo mälche, blöke syni Chie.
Si grunze, wenn si brunzen oder schysse, s isch e Gruus.
Jetz het dä Buur wäg syne Chie au scho dr Fake News Blues.

Wäg deere Söilischlachterei
in Sissach gits e wältwyts Gschrei.
Derby schlachte jo d Baselbieter fascht scho mörderlich
das unschuldige Trämmli bi Margrete mit äim Stich.

I ha an ere Tombola e WC-Rolle gunne
und yytuscht no an Ort gege Niveacrème für d Sunne.
Die Crème het mir äin abkauft, iich derfür sy Sennehund.
Dä han i tüschlet gegen e Klavier, jo, mir laufts rund.
Für das Klavier und vier, fümf Bier han ich e Yacht bychoo
und, statt die ins Wasser z loh, Roche-Aktien übernoh.
Die Aktie han i, zagg, gegen e Nobelhotel tuscht,
bi flugs in d Luxussuite gruscht, my Schatz isch zue mer ghuscht.
I ha mym Spätzli Diamante, mir zäh Bitcoin boschtet.
Das alles het chly meh als my Nobelhotel koschtet.
Dummerwyys het denn e Wäschpi in die Bitcoin gstoche.
Die si platzt und s Hotel samt mym Spatz isch zämmebroche.
Jetz hock i uf dr Strooss, d Frau bin i los, i fühl mi gscholle:
My Bloose druckt, my Darm rumort – mir fehlt my WC-Rolle.
D Sunne brennt, i ha käi Crème, ich armi Chillemuus
ha au käi Troscht vom Hund – i ha dr Bitcoinbloose Blues.

Impressionen

von

Syydiaane

Video

Verse

Guete Oobe midenand, mir mechte Iine
häärzlig gratuliere,
Sii dien mit Iirem Sagggäld graad
Wältkulduur fynanziere!
Und finde Sii unseri Pointe schwach
oder kenne die nit verstoo,
denn isch das halt vermuetlig
kuldurell bedingt esoo.

Dr Drämlifierer Hampe Wyss
funggt in d Laitzentraale:
Am Barfi dien graad zwai wie lätz,
ich kaa nimm wyterfaare.
En Ami schreit e Koreaner aa,
jetz gänn sii sich uff d’Gugge,
sii strytte wäär als erschte daarf
dr rooti Diirgnopf drugge!

Geege s’Stryyche vo dr Billag
hätte mir phersee joo nyt,
uns duure halt die Aarbetsblätz
vo de Schwyzer Fäärnseelyt.
Denn nit e männge isch vermuetlig
deert esoo beschränggt,
dass es fir e neii Stell
bi Telebaasel längt.

Die Dytschi Baan blyybt ime Loch
kuurz voor Freibuurg hange.
Vo deert us isch’s denn numme no
als Bilger wytergange.
D Schwoobezaal duet sich esoo
in Baasel graad halbiere,
vo uns us hättsch das Loch jo gaar nit
miese repariere!

D’Uni macht zue und in de Heersääl
laageret jetz Strau,
im Spittel liige binenad
e Ross, e Kue, e Sau.
Bim Spaalebuggel gits en Uffzuug
es steen Joodler binenand.
Doo meergsch dr neii Stadtentwiggler
kunnt us Baaselland!

So Buurereegle, wo als
uff Kaländerblettli steen
sind schambaar braggtisch, will sii au
fir’s Wiirtschaftslääbe geen
E gsundi Kue, die ganz Zyt mälche
syyg joo gaar nit schlau,
das waiss me jetz bi Basel World
syt neischtem nämlig au!

Daas neii FCB Konzäpt
mit dääne Emozioone
wurd sich au im Wallis
fir dä Constantin no loone.
Denn mit de Emozioone schafft
dä Siirmel amme au,
basst im nämlig aine nit,
denn schloot eren root und blau!

Im Fanshop findsch jetz Aichesäärg
und Uurne root und blau.
S’git au e letschts Hemmli
ooni Sägg bedruggt mit «tschau».
Daas Sortimänt het au
dr FC Ziiri intresiert,
liebi Ziircher dängget draa:
Mischt wiird komposchtiert!

Liebe Angie, wir tun dir
ganz fescht gratulieren.
Wir wissen nämlig wie das isch
sich schambaar zu blamieren,
wenn kainer ainen wiirgglig will
und man kann nyt dafür.
Es grüssen dich ganz häärzlig
Hampe Wessels und Baschi Dürr

E häärzig glaine Phanzer
kääm im Baschi Dürr graad rächt.
Denn geege Therrorismus wäär e Phanzer
gaar nit schlächt.
Är wuurd en guet mit Schugger bsetzt
geege Mariastai boschtiere,
vo deert us kennte nämlig Mench
uff Baasel yymarschiere!

Dr Federer het spoortlig gsee
e Brachtskarieere ghaa,
drum daarf är vo dr Uni au
dr Doggterdittel haa.
In Zuekumpft rächnet är jetz aifach
schygg und gnapp
s’Duurnier, wo är in Baasel gwinnt,
iber TARMED ab.

Us luter Me Too Hyschteryy
gedrausch di als Maa nimme uuse
oder mit dr aigene Frau
e weenig ummeschmuuse.
Mir myyde jeede Bliggkondaggt,
zem Znyyni kai Banaane –
nur zem Brinzle hogge mir
halt immer nooni aane.

Kauffsch in dr Freie oder Staine
e Bäärli Winterschue,
gits graatis no e Kundekäärtli und Guetschyyn
mit derzue.
Wotsch e Mooned speeter denn
als Kund go brofydiere,
isch’s guet meeglig, dass sii deert
jetz Kebab dien grilliere.

Dass dä Macron z’Franggryych ääne
so guet reüssiert,
ligt zem groosse Dail
an synere Frau, wo in regiert.
S’isch als Bresidänt halt braggtisch,
wenn du au am Oobe
bi Sache, wo de nit verstoosch,
di Leerere kaasch frooge.

Es demonschtriert e Metzger z’Sissach
fir jeede, wo’s muess haa:
Wie macht me uusere gschlachtne Sau
e Hampfle Cervelats.
Die leere halt am beschte an Bryych,
wenn au e bitz an ruuche –
jetz waisch worum sii im Baaselbiet
bstimmt kai Uni bruuche.

Impressionen

von

Wanderratte

Steckbrief

Die Wanderratte ist eine schützenswerte Spezies. Ihre glänzenden Pointen und lustigen Helgen haben absoluten Seltenheitswert.
Comité-Bank seit 2013

Video

Verse

Ich due als my Kopf ine Sturzhelm drugge,
und schnall mer zwai Air-Bags uffe Rugge,
am Buch trag y e Kyssi und fir d`Bai do hool y,
Schiinbaischooner vome Yyshockeygooli,
damit unbeschadet und das isch`s schweere dra,
dr Bahnhofsplatz yberqueere ka.

Kuum erklärt das dumme blonde Kamel,
Jerusalem zer Hauptstadt vo Israel,
geen die Ainte wider uff die Andere los.
Aber glaubsch, au do wär dr Deyfel los,
wenn d`Pegoraro, das geistig Räbeliecht,
Lieschtel zer Hauptstadt vo Basel miecht.

Wier hey nie wie d Mültini afa rammlu,
und sii wäärli öi nit ga Parüüla psammlu.
Aber di Goggowärgjini brüüchund Sunnuschii,
und där Güegu a ner Welbi mottut schii.
Lieber hämmer e Trainer wo me nit verstoot,
als e Presidänt wo d`Lyt abschloot.

Luut däm Sissacher Pfarrer sotte mir ys miesse,
fir jedes gmetzgete Tierli mit dr Peitsche biesse.
Drum los y mer jetz, wenn y Gopfriidstutz,
e Mählwurmfleischbälleli verputz,
fir jede Mählwurm mit dr Fingerspitze,
e Gummibändeli ans Handglängg pfitze.

Au ych bi mit dr Frau, wie alli andere Gescht,
im Ersatzbus an das Trämmlifescht.
Deert isch ys dr Wessels, obwohl mer nit hän welle
syni Daigschaaberweisheite go verzelle.
Nochhär bin y wider hai, nur my Sydebolle,
suecht hyt no s`Hyysli zem d`Ykäuf verzolle.

Ass dr Hüppi und dr Sutter gange sinn,
isch fir d`SRG en ächte Gwinn,
wemme jetz und das wäri wirglig gschiggt,
dr Schawinsky, dr Breuer, und dr Brotz no schiggt,
denn kennt au ych mi derzue beweege,
fir d`NoBillag e NAI in d`Urne z`leege

Isch es gygantisch hoch und doch,
gruusig wien e unputzts Naseloch.
Isch es drey mol dyyrer als wie besproche,
obwohl au die mit Wasser koche.
denn isch es, do kasch dy druff verloo,
e Projäggt vo Herzog und De Meuro

Jedes mool wenn y gmietlig im Abfall ligg,
paggt my die bleedi Katz im Gnigg,
no wird y vo däre, dasch ganz verschisse,
durekätscht, vergräblet und umegschmisse.
Mir längt`s efang, jetzt gang ych au,
und mäld das uff Häschtägg Mi-au

Me hätt d`Unabhängigkeit vo de Katalane,
scho akzeptiere kenne, Nundefahne!
Au hätt me de Lombarde, Baske und Schotte,
dä Schritt scho längschtens erlaube sotte.
Oder händer`s Gfiehl mir tätes unterbinde,
wenn Ziri en aigene Staat wurd grinde.

Duesch dr Kim Jong-un us em färne Oschte,
zämme mit em Trump in e Juttesagg moschte.
Hänggsch denn dä Sagg amene Seili uff,
und schriibsch ganz gross Piniata druff.
No kasch druff umme haue wie de wotsch,
s`trifft jedes mool dr richtig Dotsch.

Mir hän als Wältkultur ganz kultiviert,
useme Schliichwägli e Fasnachtsgass kreiiert.
jetz briele sy in Ziri lycht belaidigt und suur:
„umme Böög umme ränne syg doch ä Kultur!“
Muesch luege, die mache fir iires Defilee,
no us dr Bahnhofstroos e Böögenallee.

My glayni Nichte d`Hannelore,
het im Tischtennis spiile mit den Oore,
ganz unverfrore, scho syt Joore,
wältwyt no nie e Match verloore.
Drum wott sy jetz mit allne Mittel,
au sone Ehredoggtertittel.

Impressionen

von