Schnitzelbank-Comité


Archiv
Alle anzeigen

Filter anpassen

Zum Archiv

Fäärimaa

Steckbrief

Der Fäärimaa ist eine absolute Institution. Er ist auf unserem Fluss genau so wenig wegzudenken wie in unserer Bänkler-Landschaft.
Comité-Bank seit 1998

2020

Video

Verse

Falls Du gsehsch vo usse – ou – doo vertringgt öbber im Rhyy
denn wart lieber ab – gump nit sofort dryy
will, es könnt jo syy – nit dass Du nochhäär no s Dotteli bisch
dass das wingge vo däm Schwimmer nur für e Foteli isch

Dr Bligg uffe zur Schwyzer Fahne, dää isch in Lieschtel gängig
nur, öbb die darf hängge dört oobe, blybt längery Zytt hängig
und momentan wird ganz genau unter d Lupe gnoo
öbb dää Felse, wo sie draa hängt, überhaupt doo darf schtoo

Im Regierigsroot behaupte nit nur böösi Zunge
es syg im e Ent-Wesseligskünschtler s Kunststügg glunge
är wird sogar Ehrebürger, hänn mir vernoo
die Mäldig allerdings, isch us Saint-Louis koo

Das VAR fiehre sie yy in dr Super League
es entschaidet womööglig über Niederlaag oder Sieg
das kunnt au am Cortège und zaigt bi jeedem Gaul
hett äär sich gheye loo oder isch es wirgglig e Foul

Wenn s muess syy, hett är gsait, dr Dario Cologna
lauf y no geera vo Chur uff Bologna
und genau doo wär jetz e Pointe mit SBB nötig -
duet mir Laid, die hett e halb Stund Verspöötig

Es isch nit ain dr Carlos und ain dr Brian
dr Brian isch dr Carlos, dää Brian wo y main
dr Unterschied zwüsche Brian und Carlos isch höggschtens dää
für dr Brian hänn mir bis jetz no kai Gäld ussgää

Im Prinz Charles hänn sicher d Ohre glütte
am liebschte gieng au äär no hütte
aber hütt muess är dringend d Queen go bsueche
es isch die Gläägehait, es gitt Dreikönigskueche

Äär isch bald zwölf Joor im Amt – aber öbbis stöört
hänn Sie ai Mool e Väärs über dää doo ghöört?

EBBE!!!!!!!!!!

Sie könne s jo, wenn s muess syy – aber, es fühlt sich aa wie e Stroof
au Hiehner könne fliege, no knapp über e Buurehoof
und, me gseht das vor allem bim starte und lande
es isch sogar doo e gwüssy Fluugschaam vorhande

Y waiss nit, was die Minderhaite, die Randgruppe so hänn
wo jetz au no e gliichschlächti Ehe für alli wänn
y wett nur gärn gsee, hett irgend öbber vo dääne dr Maage
so öbbis diräggt mynere Schwiegermuetter z saage

Es isch e glaini Sensation
dr Läppli gitt s z Basel à discretion
jetz erwartet scho die ganzi Stadt
es kääm bald e zwaite Karli Odermatt

Grad wo dr Alt-Bundesroot Villiger so gmietlig e Villiger raucht
lüttet s Telefon, doo hett dr Villiger hässig „Villiger“ gfaucht
jaa, daa isch Firma CRYPTO in Zug – ych verbinde: düüt:

Nüüt, hett sie gseit, nüüt, nüüt – duu weisch immer no nüüt, hett sie gseit, nüüt, nüüt, nüüt, hett sie
gseit, nüüt, nüüt . . . du weisch immer no nüüt

Impressionen

von

2019

Video

Verse

Wo dr Fascht-Bundesroot Maudet uff mynere Fääri prahlt dass äär dä Frangge sächzig für üübere sälber zahlt
hany gsait, joo das freut my und y wünsch vyyl Vergniege und denn nur no ghofft, dass sich d Bälgge nit biege

Die neue TESLA - das freut d Bandite diebisch sinn intelligänter, als unsere Schugger lieb isch sytthäär isch d Polizei nit untätig bliebe
me isch in dr Betriebsaalaityg uff Sytte siebe

Wo dr Stier dääre Kueh esoo nooche stiert
wo hornloos an ihm verbyy spaziert
dänggt äär, die Gläägehait – es isch scho no vertraggt hätty friehner no an de Hörner paggt

Dr Markus Somm isch nümm bi dr BAZ Vernunft und Argumänt hänn wieder Platz
wenn d BAZ vom Somm nüt meh muess drugge wärde vyyly Elefante wieder zu Mugge

Auto faare, esoo wie jeedy Frau
darf die saudiarabischy Frau jetz au
saudiarabischy Männer sinn ins Schleudere koo
wo hänn miesse saudiarabische Fraue dr Vortritt loo

Dr Presidänt vo dr Graiffeisenkasse isch nümme doo äär hett e so Eisenraiff um d Handglängg bikoo
jetz bsuecht äär e Wytterbildyg – au das muess syy döört lehrt äär die glai Differänz zwüsche myy und dyy

Das !:-(?!? - Rhygass-Logo mit däm !:-(?!? druff
das stoosst halt vyyle andere !:-(?!? uff
das Logo muess wägg – es ergitt für d !:-(?!? e Gwinn
und dass d !:-(?!? - Rhygass jetz eerscht rächt dr !:-(?!? sinn

Y haa starggy Zwyyfel – es raubt mir fascht dr Verschtand isch s Schneewittli wirgglig die Schönschty im ganze Land? Doo könne s Grimms vo mir uss no vyyl verzelle
was dr Spiegel sait, isch kai sichery Quelle

Doo leggt d Frau Kuckuck ihr Ai – anstatt z verhiete...
ins Näscht vo de Duube – sölle s die ussbriete
die maint wohl, mit ihrem Spatzehirni, däm dumme
sie kääm um dr Aigemietwärt villicht doch no drum umme

Das Buscheli vo dr Frau Steinle, dää glainy Knilch griegt d Politygg scho mit, mit dr Muettermilch
und merggt, doo gitts Groossrööt – und das isch prekär wo nonyg vyyl wytter sinn als äär

Dr Sam Käller vom Beyeler – jä, doo isch äär aige
hett mir e Picasso glehnt, zum an dr Fasnacht z zaige
d Rugggoob, wenn und wie, das isch no verschwomme aigentlig gitt s nit emool e Rahmeabkomme

No während ych do inne gsunge haa
um jeedy Pointe grunge haa
mit Väärs, so guet wie mööglig drächslet
hett im Schoofegg zwai Mool dr Baizer gwäggslet

Impressionen

von

2018

Video

Verse

Natüürlig profitier yych als Fäärimaa
Yyskäschte oder Wäschmaschiine kany gratis haa
sogar Mountain-Bike und Computer-Konsole
y muess es nur no vom Rhyy unde uffe hole

In dr Schwyz, das waisch, doo sinn mir froh
muess sich wirgglig niemerts sälber schloo
au für dää Prieschter in Sissach, normalerwiis
gäbs jo die Herre Constantin et fils

Dr Herr Nationalroot Yannick Buttet, dää hett denn Bedarf
sogar d Helvetia uff em Aifränggler macht ihn scharf
wie dää no hett könne isch z respeggtiere
bi soo vyyl Sex im Nationalroot, no politisiere

Momentan muess ganz Dütschland überbrugge
es herrscht e Regierigs-Bildigs-Lugge
sie fische im Triiebe vo Kiel bis Weil
yych wünsch nit numme dr Frauke Petri Heil

Sie wänn in dr Formel I, soo höört me brichte
uff dr Bääsewaage ganz verzichte
sie hänn jetz gmerggt, me kaa sich s spaare
will jo z hinderscht die baide SAUBER fahre

Dää Väärs doo hett mir dr Google gmacht
äär waiss jetz alles über mii sytt geschter znacht
und wenn yych dää Algorithmus richtig verschtoh
miessty spöötischtens jetz: e Pointe koo

Wenn dr Somm schrybt gitts nach rächts kuum no Spatzig
äär schrybt nit halb-BAZ-ig, nai, äär schrybt BAZ-ig
doo wirsch fascht grangg ab däm Doon, däm schrille
usserdäm wimmlets zwüsche de Ziile vo BAZ-ille

Uff dr Haimrais vo Italie mach y Statioon in Como
und kauf no Mortadella, Vino rosso und e Packig Omo
und denn kunnt dr Momänt, wony zämmezugg
doo gitts jo nit emool e Drämmli nach Basel zrugg

D Bolizey vo Basel möcht au rentiere
me erlyychteret s zahle und erschwäärt s parkiere
uns blybt ai Hoffnygsschimmer, e fahle
parkiere Sie soo, dass Sie d BILLAG no könne zahle

Myny Frau hett gsait, dr Hüppi gfallere
wenn äär in Sanggalle duet sanggallere
nur dr Sascha Ruefer losst sie erschauere
wenn dää am Färnseh uff solothurnisch duet aargauere

Impressionen

von

2016

Video

Verse

Dr Groossroot Auderset bringt uns nööcher
die Mittlery Brugg wäär besser e baar Meter hööcher
jä guet, denn heebe mir halt s Niveau, esoo wie är wett
das goht bi dr Brugg sicher lyychter als bim Auderset

Mir kenne jo d Gfohre im Schiffsverkehr
speziell bi mir, denn ych fahr jo quer
ellay letschty Wuche, doo gsehsch jetz numme
isch mir dr Brutschin drey Mool vor d Fääry gschwumme

Bevoor sich d FIFA no ganz ent-Blatteret
hett sich dr Blatter scho wieder e Job ergatteret
drum wäärde denn d Kuehkämpf vom Wallis
oobe uff e andery Kuehwaid in Kuwait verschoobe

Die Firma doo isch am verlottere
d Motoore nit – aber d Mänätscher stottere
esoo verliert d Kundschaft trotz allem s Vertraue
wenn d Motoore intelligänter sinn, als die, wo sie baue

Das isch e Ranunculus Acris vor eme Wahlplakat
dr Zueschtand vo baidne isch desolat
aber trotzdäm erfreut das Pflänzli, die Griene
denn, andery Wäärbig für die Griene findsch jo niene

E Bligg uff my ROLEX zaigt, y muess myny KELLOG'S lo schtoo
und sofort mit em PORSCHE in d NOVARTIS goo
dört gitt s zeerscht e NESPRESSO – nur zur Orientieryg
das isch jetz halt so e Väärs gsi mit Produggteplatzieryg

Sie kömme us Flagranti über Seldwyla in dr Schenge-Ruum
und die maischte vo dääne Flüchtling mergge s kuum
aber die wo s mergge verzelle enand
die sinn jo no äärmer als miir im Basel-Land

Wenn jetz du dr Toni Brunner wäärsch
wieder zrugg im Stall und gsehsch die Äärsch
und saisch, nai, dää Wäggsel macht doch mir kai Mieh
denn spricht das au nit grad für dyny Kieh

Es muess nuur aine riefe: Kömmed ally in wyss
scho kömme dausigy vo Lütt ans „White Dinner“, däm Gschyss
ganz gratis isch es jo nit gsi – das nur so am Rand
also, yych haa niemerts gseh us em Basel-Land

Wo ych erfahr, dass dr Morin zrugg wird drätte
was mir e soo frieh doch niemools erwaartet hätte
doo ha ych mir dänggt, ganz intuitiv
Noochrichte sinn doch nit numme negativ

Villicht frogsch dy, was d Martullo für e Wääse isch
denn fallt uff, dass sie halb Blocher / halb Bääse isch
nur han y s Gfühl, wenn y die höör schnuure
es druggt immer mehr dr Bääse duure

Das isch dr Pak Kwang-Ryong, äär läbt in Pjöngjang
und hett gsait vor de Wahle: Y glaub, y gang
das isch in Pjöngjang au sehr z empfähle
immerhin – dr Wääg zur Urne darf äär sälber wääle

D Herbschtmäss isch z düür und – zum e baar Frangge spaare
gangy ins Stüggy mit de Kinder go Rollträppe faare
esoo könne d Kinder e bitz öbbis erlääbe
und für s Stüggy laufe d Rollträppe nit ganz vergääbe

Mit em Fumoir-Verain isch jetze Schluss
Schall und Rauch und d Luft isch duss
jetz muesch es nümme befüürchte, em Juillard sy Fauche
wenn du ainy wottsch vorusse rauche

Es gitt Sunnite, Salafischte und Schiite
Wahabite, Bandite und Alawite
doo isch es schwierig z wüsse, unter Religioone und Rasse
für dr Durchschnittsaraber, wäär muess y jetz hasse?

Impressionen

von

2015

Video

Verse

Dää Unfall mit dr Merlin hett Näärve koschtet
und koschtet, will das Schiff jetz nur no roschtet
denn löön mirs halt roschte – es bruucht niemerts wo s pfläggt
irgendwenn wirds für Züüry e Kunschtobjäggt

Uss em Helikopter, während der OSZE
hänn s d Beobachter schöön vo oobe gseh
doo wird am hälliechte Daag, am halber Drey
in dr Oetlingerstrooss e Parggblatz frey

Dää Maa doo mit Bart, dää drait zwar e Röggli
aber, waisch glyych nit, isch es jetz e Gaissli oder e Böggli
me könnts au als Kueh oder als Hoornochs fiehre
das isch jo gar nit so aifach: Flaisch degglariere!

Dr Herr Gaugler bringt – will sie jetz d Zytt derzue hett
synere Frau am Moorge ihr breakfast ans Bett
es isch die ainzygy Hoffnyg, wo s doo no gitt
wenn sie schlooft oder isst, denn liiiegt sie nit!

Dr Moond, me gseehts bi klaare Nächt
verzichtet uff sys Gwoonhaitsrächt
sunscht kunnt äär bi däm Roche-Duurm, obwohl no schreeg
mit synere Umlaufbahn ins Gheeg

Mir kaufe yy in Dütschland – es regiert dr Gyzz
Weil am Rhein zellt jetz zur Schwyz
mir dien die Lääde z Basel laid, dasch glaar
zum Byschpil ALDI, LIDL oder SPAR

Sie sinn in dr zwaite Liga uff em nüünte Blatz
es bällt e Hund uff dr Hauptschtrooss und es miaut e Katz
im Summer kunnt dr Zirkus – doo lauft jo allerhand
in dr Kantoonshauptstadt vo Baselland

Sie sinn in dr Super League uff em eerschte Blatz
es bällt e Hund in dr Staine, am Spalebäärg miaut e Katz
uff em Määrtblatz spiele Kinder, zwai oder drey
Basel isch jetz autofrei

Dr Geri Müller, als ain vo de Nättere
präsentiert sich im Tschätt ere Tschättere
und die Tschättere fangt sofort aa wittere
dää wird no zittere wägem tschätte mit ere

Wieso lüüchtet myny Blaggedde e soo schöön und häll?
Sie fungglet sogaar, aber doch nit z gräll!
Und Ihry dernääbe wirggt aifach düschterer
Jää, mymy isch vom Bahnhof, vo mym Blaggeddeflüschterer

Sie kenne wohrschyynlig das Verfahre
zum e Schulterbroote niedergaare
dr Versuech am Mensch isch absehbar
an dr Fuessball-WM in Katar

Impressionen

von