Schnitzelbank-Comité


Archiv
Alle anzeigen

Filter anpassen

Zum Archiv

Gasladärne

Steckbrief

Eine Gasladärne ist vielleicht nicht CO2 neutral. Dafür erhellt sie Jahr für Jahr unzählige Gesichter in bummsvollen Beizen.
Comité-Bank seit 1977

2020

Video

Verse

S isch jeedem klaar, as unser Klima zimmlig spuggt.
Denn gohsch in Wald, wirsch vo de dürren Escht verdruggt
Und bald sin d Gletscher nur no halb so gross wie friehner
Numme s Bundeshuus in Bärn,- wird als wie griener

Der Wessels sait är möcht sich nümme wäähle loo!
Jä, das erstuunt ys well s isch unerwartet koo!
As är jetzt goht, do hänn mir sicher nüt dergeege
Uns bloggt nur d Angscht, är wurd sichs nomool überleege.

Unsri Schweschter het e Gottikind dasch s Lotti
Und das Lotti griegt vom Gotti do das Trotti.
Das Trotti losst denn s Lotti uff em Trottwaar schtoh...
Jetzt muess halt s Lotti wider z Fuess zem Gotti goo.

Well dä Chauffeur offebar der Hunger bloggt
- het är d Fahrgescht wo im Bus sinn zimmlig gschoggt.
Denn bim Neubad losst är sy Fahrzüg kurz ellai
und holt bim Sutter-Begg die letschte Maitlibai.

Unsri Frau Wänger goht zem Sutter näbedra
Und froggt eb si no e baar Maitlibai kennt ha.
Do maint d Verkäufere, si kennes jo probiere
In Ihrem Alter wirds halt schwär zem opperiere.

Was isch denn das doo für e Lärm am Himmel oobe?
Jä duet me doo emänd scho für e Luftkrieg proobe?
Do fliege Düüsejäger hi und wider zrugg.
Ah nai, sisch d Patrouille Suisse, die sueche Langebrugg!

Liebi Regula, schrybt d Greta der Frau Rytz,
as Du nid gwäält bisch, das beduur i scho e bitz.
Me ka als Grieni offebar halt numme glänze,
wenn me, wie ych, an jeedem Fryttig d Schuel duet schwänze!

Hundertfümfezwanzig Johr scho BeVauBee.
Das isch e langi Zyt, das muess me aifach gseh.
S Ainzig was uns an däm Laade hüt no steert..
Über hundert Johr und immer no nüt glehrt!

Im historische Museum fääle Sache
Drum sin si schnäll im Lager d Inwentur go mache
Die arme Sieche sueche hüt no wie verbisse
Wärs nur d Frau Ackermann, jä die wurd kein vermisse.

Mir hänn ys gfroggt eb mir e Brexitvärs wänn singe.
No hämmer dänggt es wird e jeede Bangg ain bringe.
Und wenn e jeede Bangg sy Brexitvärs will singe
Hänn mir ys gsait - mien mir nid au no aine bringe

Impressionen

von

2019

Video

Verse

Unsri Frau Wänger isch grad total motiviert
syt me d Mohrekepf und d Negro schikaniert.
Si will jetzt klaage, und si isch zem Kampf berait Bis e kaine me „Altybersummer“ sait.

Mir hänn im Summer an ere Garteparty gfeschtet und uf em Haimwäg denn die WC-Äpp no teschtet Dasch aber s'letscht mol gsi, die kenne ys jetz bloose Denn ohni Netz isch denn dä ganzi Saich in d Hoose

D Schwoobe wurde gärn e Fuessball Teschtspiil mache geege d Schwyzz! Do hänn mir afoo uuselache..
Jesses nai, das sinn doch keini Opzioone
Mir schutte nit geege so schwachi Nazioone

Wär macht denn doo e sone riise Sauerey
in der Garage vo der Basler Polizey?
Es isch der Baschi Dürr wo däubelet und fluecht und vom Elektroauti d Färnbedienig suecht.

Do maint e Kueh im Herbscht si wissi scho bald nimme, wie sie am Sunntig wäg de Hörner soll go stimme.
Do maint e andri: du schrybsch Nei, und ich stimm Jo no hän mer Rueh, und mien am Sunntig gar nit go.

Wie si kämpfe bis uf’s letschte, isch dr Hit.
Und s’isch e Freud wenn’d gsehsch, wie jeede alles git. Es macht ys wirgglig stolz im Härze, wie si laufe, wenn vom FC Basel d Fraue Los verkaufe

D Frau Schneider-Schneiter hets nid gschafft, trotz Frauepauer! Der Grund wieso, dä kenne mir e weeni gnauer.
Der Heiri isch entdüscht und findets allerhand.
S isch halt nid alles gfroggt us em Baselland.

Im Grosse Root soll’s Niveau styyge, duets ys schyne Drum nimmt me d Buschi jetzt an d Sitzige mit yne. So kasch si wiggle und mit schöppele verwööne,
und nääbeby grad au an Kindergarte gwööne.

D Waaremäss und d Muba dien ys bald verloo.
Und au an d Basel World wänn nimme alli koo.
Firs Ozeanium kennts dert Platz gää allefalls,
denn der Mäss Basel stoot scho s Wasser bis zem Hals.

Wie lang no kam e z USA der Trump verdraage.
Au em Dytsche Volgg liggt d Merkel uf em Maage.
Und luegsch noo Frankrych oder China, denn mergsch gly: Do mien mir z Basel mit em Wessels zfriide sy.

Si hän im Spiegelhof, bim grabe, ganz wyyt unde
Vom e Kamel e ganze Kieferknoche gfunde
Do sait dä Schugger, wo grad uf sy Rundi goo sett:
Was mainsch wie mängs Kamel bi uns do oobe gschaft het?

Doo uf em Märtplatz underhalte sich zwei Schnalle Du, was die BVB doo macht, das duet mer gfalle.
In Zuekunft wird sich unser Gschäft denn wider loone Mer griege wie s Glaibasel au so grieni Zoone

Impressionen

von

2018

Video

Verse

Stimmt näggschte Monet bi der Bilag d’Mehrheit JO
isch das vermuetlig denn in kurzer Zyt eso,
ass vom Schwyzer Färnseh aifach nyt me kunnt.
Jä und ?????

Dr Drämmlifiehrer Maier 3 funggt an d’Kollege:
„Waiss ain wo duurefaare? ...ych muess iberleege!“
Do mäldet d’Laitschtell: „Maier 3, kasch yynekho....
mr hän jo iberall scho d’Schiine uusegnoh!“

18 Kinosääl im Stüggi wär e Hit.
Das wär e Bombe, oder findet Ihr das nid?
Du wärsch als Zueschauer wohrschynts ganz elai.
Doch mit em Platzawyser wären Ihr scho zwai.

Si hänn in Ängland jetz Problem wäg’ ihrem Brexit.
Au d Katalane wänn vo Spanie en Exit.
Und us Italie hert me as me sehr beduuri,
ass es dä Fuessballexit git vo de Azzuri.

Unsri Frau Wänger ka das aifach nid verstoo,
wie das in Rastatt fir die Dytschi Bahn ka koo.
Si lipft der Rogg und maint im Geegesatz zue ihne,
haig si trotz ihre 90 Joor no gradi Schiine.

Wir Gaslaternen sagen artig „Danggerscheen“!
Schön, wenn sie uns auch gut als Deutsche Gäscht verstehn!
Wir sagen nur „UNESCO“ und scho tut euch schwaanen....
kulturerbmässig kommt ihr niemols dörten aanen!

Apropos Wältkulturerb das isch genial,
nur uf die ander Syte isch es scho fatal,
well Ihr die Erschte sinn, wo doderfir miend biesse:
Ihr händ doch sicher mee fir s’Ässe zaale miesse.

Me loht olympiamässig all die Russe dusse,
well mit Doping sin au Russinnne nur Russe.
Wäg Doping waisch nimm, isch,s e Maa oder e Frau!
By dr Martullo-Blocher frogt me sich das au!

Der Roger schwäbbt in akademisch gwejhte Sfääre.
Die Tatsach mechte mir begrinde und erglääre.
Är spiilt perfäggt, het zwai mool Zwilling, jetz mergsch gly:
Dä muess bim Döggterle scho rächt erfaare sy.

D Amerikaner hänn en Uhrwärgg konstruiert,
wo vom Trump die räschtlig Amtszyt registriert.
Mir hänn ys gsait, so aini dien mir au grad bstelle
und si bim Wessels denn dehaim vor d’Diire stelle.
As sich e huffe Männer ohni sich z’scheniere,
zwische de Fiidlebagge d’Hoor lehn wäg rasiere.
Das het e Vorteil wo me nid bestryte ka:
Es isch hygienischer wenn s’haisst l.m.a.A.

Me het ys gfroggt, eb mir als Männerbangg ys draue,
ebbis z’mache iber s’Thema Gwalt an Fraue.
Das isch nid lycht, hänn mir ys laider miesse saage.
Mir wänn doch nid, as me ys au no ka verklaage.

Impressionen

von

2017

Video

Verse

Jetzt wählt dr Putin in Amerika scho mit.
Das isch e Maischterlaischtig, findet Ihr das nid?
Das het e Värs verdient, mir dien das honoriere.
So duet me hüt ze daags perfäggt globalisiere.

D Monika Fasnacht darf jetzt nümm am Samschtig jasse.
Si wurd lutt SRF nümm in die Sändig passe.
Der bescht Ersatz wär doch der Shiva Mike dä Bääse,
denn dä ka jasse und glaub au no Karte lääse.

Mir sinn rein provilaggtisch Muggespray go kaufe
Falls denn im zwaite Wahlgang ebbis schief sott laufe.
E sone Spray hilft jo nid numme geege Mugge
Es näämt em Jogi Löw au undenumme s Jugge.

Unsri Frau Wänger goht zem Doggter Holestai
Sie hett so komisch roti Flägge an de Bai
Das isch e Sunnebrand und dä gäbs öfters schyynts
Wenn me die Moode mitmacht mit verissne Jeans.

Der Christoph Darbeley isch gar nid sone Lappi
Wird usserhalb vo der Familie nomool Pappi.
D CVP die findet das grad heldehaft!:
Es zaigt: Es het dr Christophe ändlig öbbys gschafft!

E sone Faart im Citybus duet sich doch loone.
Rot-wyssi Latte und e huffe 30-er Zoone
Aber ebbis mien mir Eych im Vorus saage
Dur unsri Innerstadt gohts nur mit Ross und Waage

Die Glaini frogt: Du Papi sag mir doch emoll
was die Markierig do am Boode haisse soll?
Es isch eso, die duet de Drottwaramsle nütze
und si in däm Revier vor Vogelgrippe schütze.

Das Glaid vom Doris, do am Gotthard Tunnelfescht.
Wirft scho no Frooge uff bi allne gladne Gäscht.
Denn vor der Bahnfahrt mit em Hollande und em Renzi
syg dä bundesrötlig Lumpe schynts no ganz gsi.

Fir schwääry Sache git s e Däschli mit zwai Rölleli
Ganz fyyny Unterwösch für jeedes Syydebölleli
Fir d Fiessli Balleryyna-Schiehli - joo nid z schwär
Das isch jetz s neyschte Materiaal im Militär!

Es het der Bundesroot grad welle duurestiere
AHV-Plus das wurd denn scho no rächt rentiere.
Das bedyttet fir uns und der Hanspi Wörnli
Am letschte Arbetsdaag dr Bus diräggt ufs Hörnli.

Impressionen

von

2016

Video

Verse

As me in Frick der gröschti Dino gfunde het,
ka gar nid woor sy, sait der Hansli, jeedi Wett.
Der gröschti Dino wo mir hänn, sait är zem Vatter,
dä läbt im Wallis unde und haisst Joseph Blatter.

Es maint der Christoph Mörgeli das syg jetzt z vyl.
Me löscht uf facebook ohni z frooge sy Profil.
Das goht jo nid Herr Mörgeli, well das jo so isch:
Me ka doch numme lösche was au wirgglig doo isch!

Unsri Frau Wänger wo gärn Tennismatch duet luege
Grootet bim Spiil vom Stan Wawrinka us de Fuege.
Si butzt sich d Brülle well si maint si gsäch nid guet
Und as der Stan in Underhoose spiile duet.

D Bärner Young-Boys möchte gärn e Titel hoole.
Das broleetet dert der Trainer unverhoole.
No e paar Runde isch me z Bärn denn ohne Worte.
Und gly druff aabe haissts denn: Ulli musse forte.

Mir dien e jeedes Joor e Fasnachtsbummel mache
Und besichtige dert interessanti Sache.
Au fir disjoor hämmer ganz e spannends Zyl
Mir bsueche d Fischer Bettwarefabrik Au bi Wädenswil
(am Mendig hämmer dicht!)

D Frau Spiess - Strich Hegglin, duet au gärn e Bierli dringge.
Syt e paar Monet duet das ihre aber stingge.
Zem Glügg ka si do jeedi anderi Marke ha,
denn si dringgt bombesicher nie me Hürlimaa.

Du darfsch hüt kaim me Näger oder Schwarze saage
Sunscht duet me di wäge Rassismus grad verklaage
Uf de Fuessballfälder isch hüt so e Gmisch
Drum muesch Di frooge - weele do der Farbig isch.

Falls Du im Lääbe mechtisch zylbewusst ersträäbe
Dy Lääbe lääbenswärt und megligscht lang z erlääbe.
Denn rauch was d kasch, suff Wy und Schnaps geege ne Durscht.
Aber iss verglemmi jo kai Flaisch und Wurscht.

Der Keenig Josef mecht e bitzli gsellig sy
Am liebschte mit em Keenig Michel – Platini.
Und au der Kaiser Franz isch zhaa für sottig Sache
Im Knascht bim Hoeness denn e tolle Schieber zmache.

Impressionen

von

2015

Video

Verse

Das mit däm Fuessballspray, das isch fir uns e Sääge
und kunnt fir uns in däm Johr gopfergässe glääge.
Mir hänn 3 Neji und die wisse jetzt eso
wo si bi jeedem Ufdritt gnau mien aanestoo.

Der Gille Buser bstellt e Pizza vis a vis
Und hofft der Pizzaboy - bring em die denn gly.
Dä kämpft sich fluechend über Dächer und dur Käller.
Wenn die Minischter furt sinn, gohts denn wider schnäller.

Me will jetzt z Basel ai Turm noonem andere baue.
Jä duet das unser Stadtbild nid e bitz versaue?
Der erschti Voorbehalt dä kunnt denn vom Tattoo:
Löhnd ys no e Schneise frei für d Dante Ju!

D Mannschaft vom FCB isch multinational
Der Georg Heitz kauft was är ka und überall.
Nur em Streller will das nid so richtig passe.
Wells däwääg nümm vyl het wo mit ihm könne jasse.

Unsri Frau Wänger wo scho über 90 isch
stoot wie verstaineret dehaim am Kuchidisch.
Was isch passiert as si e därewääg verschriggt?
Der Geri Müller het ere grad e Selfie gschiggt.

Die baide Ghaimnisdräger kemme bees ins zittere.
Denn dä Schwoob duet jetzt sy grossi Chance wittere.
Aer het vom CIA e haisse Tip bikoo
Är soll d Conchita Wurst e paar Stund singe loo.

Dä Basler Groossroot isch denn ganz e gscheite Maa,
är mecht die Zircher Sexbox au in Basel haa.
So kennte d Schuele sich dä Spiilzygkoffer spaare
und zem Unterricht diräggt deert aane faare.

Der Seppli Blatter sait: Jetzt hanis doch no gschafft,
as my Fifa nid no usenander klafft.
Jetzt mach i wytter so wie bishär unbeirrt
Und soll mer kain me bhaupte s laufi nid wie gschmiirt.

Dä neji Achter kam e gar nid wirgglig loobe,
denn wäg de Sitzbängg duet e harte Kampf deert toobe.
Aber nid well alli sich um d Sitzplätz rysse
s wänn alli stoo us Angscht sy fange no e Sprysse.

Zum Häftling Hoeness sait ganz lieb der Herr Diräggter
S Büffee isch heerlig, aber d Huusbar isch no pfläggter.
Der Pool isch ghaizt und s git e Himmelbett zem pfuuse.
Und mit däm Schlissel – wenns ne stinggt – kemme si uuse.

Impressionen

von