Schnitzelbank-Comité


Archiv
Alle anzeigen

Filter anpassen

Zum Archiv

Hansli Bargäld

Steckbrief

Wenn Hansli Bargäld den Saloon betritt, schweigt das Piano und es sinken die erhobenen Fäuste. Seine Schüsse ins Schwarze sorgen für rhythmischen Beifall.
Comité-Bank seit 2014

2020

Video

Verse

Der Wessels glopft jetzt d Fingge,
der Brutschin - goht em nooch
in wohlverdiente Ruehestand,
jä doo verschloot s aim d Sprooch.
Als Zuegab für die Abgäng
y main es wär e bracht,
und e Sääge fir ys alli, -wenn
sich d Aggermaa vom Agger macht.

Der Pabscht sait faadegraad:
„Das Zelibaat goht nimm“!
der Ratzi isch verzwyyflet,
erhebt empört sy Stimm:
„Mien mir jetzt au mit Fraue,
und nimm nur Maa zue Maa?
Nai,- der ainzig Grund isch numme:
me mecht e Variante haa.

S Biozentrum koschtet,
110 Millioone meh!
S Baudep lächlet numme,
als däät s ne gar nid weh.
Me haig e tolle Job gmacht,
es stoht jo,- immerhin
und wird au ai Joor friehner fertig,
als dä Flugblatz deert z Berlin.

D Greta sitzt am Bode,
im dytsche ICE.
Sy macht e suure Stai,
denn s Fudi duet ere schampaar weh.
Bi der SBB do wär sy
vo dääre Qual befreyt,
will sy scho bim glainschte Ränggli
zer offne Düüre uuse gheyt.

E Graf und none Herzog
Ich frog my, ob das goht.
im Ständeroot fir Basel,
das basst nit zue Grien-Root!
Und Gender-grächt ischs au nit,
do hänn si voll versait:
Denn koräggt wär s ehnder wenn me
Frau Gräfin und Frau Frauzog sait!

By der CREDIT SUISSE git s Lämbbe,
der THIAM gege der KHAN,
es git e riise Buff,
und leggt die ganzi Bangg fascht lahm!
Au im Federer syni Näärve
liige komblett blangg
"Jä isch die CS jetz en Kiosk,
oder gottfriidstutz e Bangg?“

Machsch Duu e Bicicletta,
driffsch d Balle iber Kopf.
Und spiilt me Catenaccio,
do saisch als Stirmer: Gopf!
Kassiersch du e Tunello,
kas sy, dass jeede lacht.
Und fliegsch als Sportchef hochkant uuse
Hesch du e Pipistrello gmacht!

D Gletscher schmelze drastisch
der Meeresspiegel styggt,
me sait es syg dramatisch,
deert am Gipfel in Madrid.
Sy sind sich alli ainig:
Das liggt am CO2!
Jä und denn gehn all die Schnuuri
mit em Fluugi wider hai.

Är isch e rächte Fäger,
und macht au zimmlig Lärm!
Die ainte dien en hasse,
die andre hänn en gärn.
Kunnt är, denn goosch uffd Syte
am beschte mit aim tschamp.
Das isch kai Offroad-Kare,
Ych red vom Donald Trump!

Dä Mega-Meghan-Meghxit,
erstuunt die ganzi Wält.
D Queen entschaidet sofort,
es goht jo au um Gäld.
Kai langi Diskussione,
die Sach isch schnäll vom Disch.
Jä d Brite kenne schnäll si;
wenn ebbis wiirgglig wichtig isch.

D Wätterfee vom Färnseh
sait: "D Wätter spiilt verruggt!
E grossi Depression herrscht,
wo diräggt uff Basel druggt!“
Doch wurdis bald scho besser
„Vorbei ist Eure Not!“
Der Grund isch glar, und aifach:
der Hanspi Wessels goht.

I bin e bitz am muudere
und s isch mer zimmli Stuurm.
Y han e son e Kötzele,
was isch das für e Wuurm?
Isch das die China-Grippe
won ych dra fascht grepier?
Nai, dasch nit s Corona-Virus
Das isch z viil Corona-Bier.

Impressionen

von

2019

Video

Verse

Der Frehner und der Thüring, die sin wie Digg und Doof. Der ainti spiilt e Giftzwäärg und der ander der bleed Goof. Dasch glatti Unterhaltig, die sett s Theater näh
Denn wird vermuetlig d Landschaft
au wider Subventione gää

My Gottemaitli, s Vreeneli,
das giigelet und lacht
Es goht scho uff e Haafe und Windle bruuchts nur z Nacht! Es ka scho Mamme saage,
d Entwigglig isch famos!
Und näggscht Joor duet s e Vordraag halte
am Wirtschafts-Forum in Davos!

Dä Tesla-Schlitte - Super!, het Blatz fir fascht drey Helm, jetzt bruucht s nur no drey Hirni, denn fangt me jeede Schelm. Das Auti isch so clever, as s aim fascht d Sprooch verschloot! Und bi der näggschte Wahl ersetzt das
der Baschi als Regierigsroot

Doch s git au e Brobleem, das Auto loost gärn zue.
Das haimlig spioniere, loot em Dateschutz kai Rueh.
S wird alles iberdraage, was men im Tesla heert.
Jo aso hey, do glaub y kuum, dass das Schnarche ebber steert!

Iber d Ackermaa isch letschti, e Mäldig yyne gschneit,
Sy haig e Fähldritt gmacht, syg iber e Schaal uff d Schnure gheit. Sii miess e bitz pausiere, bis sy wiider maag;
He loos, das isch fir die doch
e ganz normale Arbetsdaag.

Die duali Bildig, isch hit e Modewort.
Studiersch im Hauptfach Mathe, machsch nääbedraa no Sport. Und am Prieschter-Semi - als Nääbefach - wenn d kaasch, studiersch deert näbscht em Bibel-Lääse,
grad au no Fuess-Massaasch!

Das Duurenand bim Brexit, politisch soone Saich! Yyne oder use, das Gschwätz isch Biirewaich. Die Taktik vo de Brite, isch uns jo guet bekannt Ganz duss und doch derbyy syy,
das kennt men au vo Baselland!

Dä neui Trendsport Tschambbe, isch jetze total in.
Sogar Nancy Pelosi, drambbt uff em Trump-olin!
Ob Base-Tschambb oder Bungee, me gumbbt und alles gafft Und digg wär wenn denn ändlig,
der Wessels au der Absprung schafft.

Y stand mit mynere Droone am Euro-Airport duss.
Y schigg se kurz in d Luft und mit em Fluugverkehr isch Schluss. S CO2 isch gsungge und d Wäärt sin optimiert
und au e ganzes Joor die Warmluft
vom Gschwätz vom Wessels kompensiert.

Dä Helge do zaigt mi, in ebbe drissig Joor.
Y han e bitz meh Falte und nimme so vyyl Hoor
Y schieb do mi Rollator, y lauf drum nimm so gschiggt Doch bin y froh, will ändlig
sin alli BVB-Glais gfliggt.

Ych blan my Bruefskarriere und suech e Job mit Stil-
my Berooter glärt my ab; wo bin y schwach, wo han y z vyyl? Er briefft my Silhouette und maint denn ganz subtil
Jä bi der BVB wärsch richtig
dääne fählt scho lang Profil.

Das Baselbieter-Bashing, isch zuegää langsam faad
Doch als Bänggler druff z verzichte, wär jo fascht e bitzli schaad! Das isch e glatti Geegend, wo halt ständig e Pointe blieht
Drum häi mir au käi Land so lieb,
wie Euses Baselbiet, juhe
Drum häi mir au käi Land so lieb,
wie Euses Baselbiet

Impressionen

von

2018

Video

Verse

Im Jänner in de Alpe, bin ych unterwägs.
In dr dinne Luft do gseeni, ebbis wie ne Häggs.
E Tschäggede kas nid si, sag ych mir fassigslos
Denn luegi gnauer aane:
Dasch dr Trump am WEF z’Davos

Dr Tiffy ihres Grosi, hett dr 100scht gha,
und zitteret vor Angscht, jetzt kunnt d’Ackermaa,
Ich will kei Spanisch Grippe, sunscht muessi ins Spital,
Die muess doch wirgglig Grangg sy
Lueg doch emool dä Schaal

Dr Zyrcher so als Mensch, isch aigendlig OK,
Es hett dert nätti Baize und au e scheene See,
und wenn de mit em redisch, kunnt är no rächt guet mit,
Nur eins das kasch vergässe:
Nai schutte kann er wirgglig nid!

D’Uni hett kai Gäld mee, s’isch scho zimmlig arg
und d’Landschaft wott nimm zaale, die zaalt am Schluss dr Sarg.
Jetzt muesch als Studi ryych si, damit fyrs Studium längt.
Und sällem wos kennt zaale,
hänn si Doggter eifach gschänggt.

In dr Bible stoot beschriebe was e Paradies isch
au Papers uff de Caymans, die sin paradiesisch.
E paradiesisch Paper, sag ych als Chrischt ganz fromm,
Isch ainzig und ellai nur:
E Basler Zyttig ooni Somm!

Verliirsch du amme d’Närve, wie dr Constantin,
stalksch du wie dr Buttet, nach deux Boutailles de Vin,
Machsch Kinder wie dr Christophe, fir Di gits kai Tabu,
Denn sinn dini Gschichte
uf Häschtägg Wallis too

D‘Universal Studios lytte letschtens aa
Fyr dr negschti „Shades of grey“-Film, suecht me none Maa,
Wo Geissle glepft und geil wird, und steent wie sunscht e kain.
I gib ene dr Tip:
In Sissach gits so ein!

S’Verheltnis mit dr Landschaft, isch doch zimmlig flott,
Mir gänn 80 Kischte, und sie gänn uns ai Ott,
Me sett das no forciere, s’miest mee so Handel gää
Doch fyr die Pegoraro
Git‘s beschtefalls e Frangge zää

D‘ Museumsnacht do kyrzlig, hett mi komplett verwirrt.
I ha kai Strategie gha, und mi total verirrt.
I lueg dur Lotterschiebe, gsee Gstalte wiss und faal,
I bi nid im Museum,
Daschs Bruederholzspital.

Mit mym Härzstigg Tiffy, do giigts und ych bi froo;
mit em Härzstigg vo dr S-Baan, do giigts nid eso
S’verzeegeret sich d’Blaanig, me haltet sich bedeggt,
Dr Drooscht isch dass dä Gundstai,
eso dr Wessels nimme legt.

Dä unagmässni Umgang, das derf nimm lenger sy
Eb Hose oder Umhang, me fingerlet nid dry.
Drum Maa, due das dir merge, me längt e Frau nid aa
und wenn Du’s nid kasch si lo,
Wirsch Bresidänt z’Amerika.

Dr neu Boss vo Novartis, heisst glaub Simsalabim
är sig, meint ych en Inder, dasch wyter au nid schlimm
In dr Schwyz do gäbts doch sicher, au Männer mit Verstand
Us em Baselbiet, zem Bischbill,
und s’wäri au e Schwelleland

Dr Fritzli frogt dr Papi: was heisst das: „No Billag“
dasch eifach seit dr Papi: s’Färnsee gheit ins Grab!
D’Gälder fliesse nimme, fürd SRG wird’s äng,
s’isch wyter au nid tragisch,
will die scho e Bestatter hänn.

Impressionen

von

2017

Video

Verse

Ich sitz im letschte Summer, und dängg mir Värsli us
ich find e super Pointe, genial! Ich flipp grad us.
Doch merggi an dr Fasnacht die Pointe isch scho wägg
Do gits nur ei Erklärig:
Dr Putin hett mi ghäggt.

I kauf grad y im Migros, do an dr Ysegass,
do gseen i dert bym Obscht zue, e Schild das isch kai Gschpass.
„Dürr“ stoot druff und driber, drey Biire zimmlig faal,
Hejo, das schyynt no logisch:
Das isch alles zwaiti Waal

Im Jänner isch’s bassiert, dr Trump lytet mir aa,
und seit mir „Hansli Bargäld, los Du bisch mi Maa“
„Come into the White House, I tell you I love Cash“
Jo, unter einere Bedingig:
Du gosch dr Tiffy nid an d’Wäsch

Uff Facebook kunnt e Messitsch: Dr Wessels drättet zrugg
und hundert neui Pärkblätz, gäbs uf dr Wettstaibrugg
Ich grieg grads Ooresuse, s’isch wie ne Summer-Blues
doch laider stellt sich use:
Das sinn alles g’fakte-ti News

Druggsch du nid jedem d’Hand, denn gid das nur Brobleem.
Drby verdailsch eso, Baggderie und Exzeem
Drum loss ich’s jetze blybe, will ich mi Gsundhait schoon
Die einzig Uusnaam isch:
I grieg per Handschlag e Million

D’Syngenta isch am juble, es isch e woori bracht,
d’Aktie kürs dien stiege, quasi yber Nacht.
S’isch nid wäg de Chinese, die hänn das nid bewirgt,
D’Antwort isch ganz eifach:
Das neue Anti-Mück het gwirgt

Das neue Telebasel, sie, das isch e Hit.
Will’s dert all halb Schtund, e Wiederholig git.
Jetzt pfuusi vor em Färnsee, dä Sänder macht mi mied,
und verpass eso grad s’Beschti:
Dä Yberflug durs Baselbiet.

Si, do inn, duets müffle, s’macht mi scho ganz grangg,
Y ha in minre Nase e stächend üble Gstangg,
Y glaub es kunnt vo derte, sag mir, bisch Du das gsi?
Jetzt gib’s doch eifach zue,
Du hesch e BAZ derby.

Die Ladeeffnigszyte, mache eim konfus,
wär hett zue, wär offe, do kunnt doch kain me druus.
Bi eim nur do bisch sicher, s’git aim e gwissi Rueh
(gesprochen) d’Bettware-Fabrik Fischer in Au bi Wädenschwil
Die hett am Mändig zue!

Horror-Gleen hänn letscht Joor, das isch ganz vereggt
mit iire Waggis-Fratze alli Lyt verschreggt.
Jo, so kranki Sieche, holsch mit dr Bolizei
Nur ein dä hänn si nonig
Und dä regiert in dr Türkei

E kreadivi Szene, wo me als Slam-Poetry kennt,
Das sinn so schnällschwätz-Schnuuri, wo me denn Slam-Poete nennt.
Die dien expandiere und wänn e Bresidänt
wo dä Slam chönnt optimiere:
I hann an Schneider-Ammann dänggt.

I bau um jedi Gugge, e diggi Schallschutzmuur,
und d’Wäge die verbieti, I versprich, do byb i schtuur
ihr miend mi numme wääle, Ihr wärdeds gseh ...und denn:
Wenn ych mol an dr Macht bi
„I’ll make Fasnacht great again!“

Impressionen

von

2016

Video

Verse

I heiss zwar Hansli Bargäld, doch laider bin i blangg
Bi däm Probläm do hilft mir, au kai Schnitzelbangg
Doch waiss ich dank em Frehner wie-n-ich das leese ka
I wart nid uff Subventione
I gib mi eige Konto aa.

D' Nationaleootswaale, sinn wie e Märli gsi.
Us em Oriänt kunnt d'Sibel, die grieni Wunderfee.
vo hinter siebe Bärge, kunnt d'Matullo" mit vill Zack
Und d'Zircher geen uf s'Ganzi
Sie mache "Köppel aus dem Sack"

Erschtens han y nid gsait, und zwaitens au nid gmacht
und drittens isch es spoot gsi, und viertens dunggli Nacht,
und finftens, säxtens, siebtens, es isch doch nyt bassiert!
Das sin die „Seven Thinkingsteps“
Vom Baschi Dürr interpretiert!

Das gfäärlig ZIKA-Virus, gryfft s’ganze Hirni aa,
Drum sott me nid go Reise, in Südamerika,
Au z’Basel gits e Granget, die stoot no in keim Buech
D’Lüt keie grad in Ohnmacht,
Bym ene Drummeli bsuech.

D’NASA het zum Pluto, e Sonden uffegschiggt
und welle uusefinde, ob’s dert au Läbe git,
Mir sette d’NASA bitte, zu uns uf Basel z’ko
um schlüssig use z’finde,
läbt denn dä Engelberger no?

D’Widmer-Schlumpf hett kindet, und SVP marschiert,
sie sueche ein mit Kante, und nid z’fescht profiliert,
e uffrächt rächte Schwyzer wo ka mit Gäld umgoo,
de Parmelin kunnt yne,
Ych hätt dr Blatter Seppi gno

Ich glaub die Schwoobe hän do das Usmaass unterschetzt
me hätt do gschiider früeh scho dem Aasturm Gränze gsetzt
S’wird gschobe, grapscht und dränglet in Masse stoot me aa
Es wänn halt alli Schwiizer
die Mehrwärtstyyr erstattet ha

Ha-ha, Bärge, luschtig, Jodle, Milch und Kueh
Schoggimöggli gluschtig, und Cervelat drzue
Ländler, Vierrad-Aatrib, e Schwyzerkrütz im Schnee
So deent dr näggschti Wahlsong
vo dere glatten SVP

Kinder griege schuelfrei, und d‘Stroosse wärde gschmüggt.
Die Junge, die dien juble, die Alte sin entzüggt.
S‘isch nid dr Morin-Abgang, wo me do zelebriert.
Fyrs Drummeli vo nägscht Joor
haig ain zwai Billje reserviert.

Es isch so mit de Fremde sie hasse das isch schlächt
me sett sie nätt behandle das isch mir numme rächt
Waggis, Schwobe, Zürcher die loon i jetz in Rueh
und triff i sone Rampass
schloni mit 80 Kischte zue

Dr Oskar wär gern Kämpfer, doch isch es meh e Krampf
Si Kampf erzügt meh Heissluft, als Gösge täglich Dampf
Das könnt me sinnvoll nutze, und ich weiss au scho wie
im Waldeburgertäli
könnt er mit Volldampf s’Zügli zieh

Das wysse z’Nacht in Basel, das hett mi inspiriert,
drum hann mi fir hytt z’obe, ganz wyss goschtimiert.
Doch schwarz stand ich jetzt vor euch, ich fyyl mi ganz verkoolt,
Mi hett am Aeschblatz,
e VW- Diesel yberholt.

Impressionen

von

2015

Video

Verse

Das isch grad e Selfie, vo mir in voller Pracht,
das schiggi jetzt dr Tiffy, lueg, wie die scho lacht,
und s'nägschti ooni Hose, das isch doch was ihr wänd,
do bin i grad derby und wird Stapi no am Änd.

Dr Geri macht e Selfie, isch sini Ämter los.
Als Stapi macht är wyter, zwar völlig wirkigslos.
Ych han en denne treeschtet und flischtre ihm ins Oor:
„Das muess di nid betrüebe, Dr Morin isch das scho 6 Joor!“

I ha mi wyterbildet, my Niveau, isch jetzt hoch.
Ka wild Geschtikuliere, in jedre Landessprooch.
S‘ Diplom in Dreete spiele, das isch fyr mi kai Sach.
Denn hani alles zämme und ka zur DARU-WACH.

Letschti in dr Stadt, do frogt my ain vom Daig,
ob’s in däm Ussegheeg, au Nase-Affe haig.
„Nai, sag ych em frindlig, die git’s do niene mee.
Do ka me nur die Affe, vo dr OSZE gseh.“

Apropos däm Gipfel, je, was han ych glacht.
D'Armee haagt Basel yy, quasi übernacht.
Dä Yysatz muess me lobe, ihr hännd unsre Dangg verdient,
dass ihr ys vo däm Zirkus so guet beschitze dient!

Wo sie dr Merlin drille, wott's nid vorwärts go.
Dr Krane, dä blybt stegge, und kaine weiss wiso.
E Ingenieur meint simpel: "Es muess meh Ufftrieb gää!"
Y root em, nimm dr Wessels. Däm sy Hoolruum längt fir 10.

Dä Gipfel goot no wyter, mit menschelääre Tram.
Militär an jedem Egge, mir wird Angscht und Bang.
Droone dreene ständig. I gspyyr e grossi Gfoor,
Stellt me sich so dr Friede Fir ganz Europa vor!?!

Uff em Märtblatz ussre Doole, winggt e Menschehand.
AHA!-OSZE sait, mir mi Sachverstand.
Do brummlets unde uffe, „Vo OSZE kai Spuur!
Mir sin d‘Kehrichtabfuur Baselund yiebe Unterfluur!“

Unsri Basler Fasnacht wird UNESCO-Wältkultur!
Dr Kienbäse wird‘s nid, mei, sy d‘Rammel suur!
Si schryybe dr UNESCO: „Jetzt düend doch nid so stuuuur."
Nai, kunnt d‘Anwort drogge: "Sogar dr Böög hät mee Kultur!“

In Ziri stoot e Krane, das finde d‘Zircher toll.
Passt dä deert wirglig ane? I weiss nid was das soll!
Fir dä roschtig Huffe, hett me viill Gäld verprasst
Isch das jetzt Kunschtverständnis? Fir Ziri? -Jo das passt!

Das isch e „Blind- Audition“, ihr looset numme zue
schliessed euri Auge, und bewaared d’Rueh
wenn Dir mi jetzt no „Vouted“, wär das e grosses Gschängg
Y wär e rundi wyter in „The Voice of Schnitzelbäängg“

Mit Blamiere isch jetzt fertig, ich sag Eych s’git e Fescht,
Mir mache nämmlig mit, am European Song Contescht
Erfolg muess ändlig ane, mir stille Eych dä Durscht
Ych mach Eych schnäll e Liedli, - und är d’Conchita Wurscht

Impressionen

von