Schnitzelbank-Comité


Archiv
Alle anzeigen

Filter anpassen

Zum Archiv

Hanslimaa

Steckbrief

Ein Urgestein des Basler Schnitzelbanks. Während über 40 Jahren prägte er mit seinen unvergesslichen Auftritten die Basler Fasnacht.
Comité-Bank seit 1979

2019

Verse

Y soll dr Banggnamen ändere – s isch fatal, denn Hanslimaa sig nid – gschlächtsneutral. Wel yych elai das Broblem nid leese kaa,
loss ych mii jetz beroote - vo dr Frau Aggermaa!

Won am Voogel Gryff vor em Glingedaal,
dr Alain Berset dr Huet lipft – magistral,
ha mi riisig gfrait, es isch zem schiesse,
wenn sich am Rhyybord - zwai Veegel begriesse!

Die Männermoode macht d Männer kaputt Oobe Bart – nid rasiert und unde nur blutt uff em Grind non e tätowierti Glatze,
und e Lumpe - zem poliere statt gratze!

Y kaa kai Änglisch und ha nie Franzesisch gleert
Y bin e Chaot und amme psychisch gschteert.
Doch käms druff aa, wär y drotz schwarz, gääl und root, ganz sicher dr Allerbeschti - im Bundesroot!

Letschdi bin ych von ere Horde,
Velofaarer iiberfaare worde.
Jetz liig y im Spittel, und dängg wie goots z Basel wyter? Iiberfaart niemerts dr Wessels – jä denne wird’s Schyter!

Y ka d Flexity- und Combino-Dram - die alte,
aifach nie und nid uusenander halte.
Dr Underschiid kasch nur gschpyyre, das sag ych iine, wenn si iiber Waiche faare - wo waicher sin als d Schiine!

Dr Ueli Murrer sait ungeniert,
won er sy Drei-Milliarde-Gwinn präsentiert, und vor Fraid wien e Chüngel ummehobblet, „Guet halbiert - isch au verdobblet!“

Bis zletscht han y bättet, ass unseri Siibesieche, im Slalom und Riise emool Eerschte mieche. Dasch machbar, wenn s wie bi de Fraue bassiert und me d Laufzyt vom Hirscher vo Hand korrigiert!

Wo dr Luther Martin afoot d Kirche spalte,
duet au dr Zwingli bi uns scharfi Predige halte, glyy druff aabe döönts vom Schlachtfäld ööäää und scho hets wiider - e Zircher weniger gää!

Y bi geege Pescht, Cholera und Droogehandel, geege Dryybhuusschwindel und Klimawandel, drum gib uns liebe Gott im Bundesroot oobe, statt einere Martullo - lieber zwai Schwoobe!

Wenn binere Kue dien d Hörner fääle,
git si weniger Milch, wel me si duet quääle. Do maint ganz fräch son e Buure-Gnilch
E Hund ooni Schwanz - git au kai Milch!

Y ha no d BAZ und dr Daagesaazaiger abonniert,
doch y bi nur no an de Doodesaazaige intressiert
jetz liis y Doodesinserat däglig zwaimool in dr Zytig und dr Film „Stirb zwaimool“ griegt en anderi Bidyttig!

Y mach jetz au mit bi däm Klimawandel
und mischle mit im CO2-Ablasshandel.
Mit so Zertifikat verdien ych am maischte, jetz kann y mir ändlig - en Ölhaizig laischte!

2018

Video

Verse

No nie isch e Kameel dur e Nodlenöör gheit,
no nie hets z Basel im Juli gschneit.
Au das hets no nie gää - me will uns nur foppe,
ass e Boscht-Auti e Fasnachts-Motto kaa toppe!

Scho wiider son en Äxtrablatt,
iiber Zuewanderig - y finds nid glatt.
Wenn d Bevölggerig soll singge, denn kaa joo,
d SVP aifach ins Ussland goo!

Dr Alex Frey sait zer Strellere,
y muess dr eppis verzellere:
„D Schütteler gingge mit Garantie,
no besser nooch eren Abgas-Theraphie!“

Z Basel isch ain unden am Rhyybord gloffe
und bim Hochwasser fascht versoffe
und z Davos isch e ain – es het grad gschneit,
em Deifel ab em Kaare gheit!

Die Schwarze doo - frogt dr Hansli dr Vatter,
schaffe die jetz alli bim Bestatter?
Nai, das Bild zaigt nur dr Bundesroot,
wien er z Bärn dumm ummestoot!

Syt 100 Joor – ass es d Lufthansa git
fliegt uff em Schwanz e Granich mit
und jetz bi dr GROKO mit de rote Genosse
gseesch glyy dr Plaitegaier uff dr Flosse!

D Frau Somaruga mäldet jetz efang,
em Juncker si Schmutz als Sexi-Zwang.
Do mäldet sich dr MINU au,
mit „MeToo“ au ych bin e Frau!

Y darf do no singe, wel y allem aa,
e klassische Inländervorrang haa.
Wär ych e Türk no dät me mi zwinge,
myyni Bängg nur no im Gündüli singe!

D Gnoche-Sammlig vo dr Universität,
wird ziiglet no Oberwil us Pietät.
Dert wärde si butzt, ass die Skelett denne,
z Lieschtel als Landrööt wytterpenne!

Wemme dr Wessels wurd seziere,
wurd yysalze, yybinde und mumifiziere
und zwaihundert Joor im Boode loo,
was mainsch - wie wäre mir allo froo!

Wenn Si wurde dr rächti Arm lo hänge
und denn under iire Stuel dien länge,
finde Si aagläbt und lyycht ranzig,
näbeme Kaugummi d Aggde P 26!

Zallereerscht kloont me s Schööffli Dolly,
denn s Äffli Hua-Hua im e Chineese-Zolli.
jetz hoff y nur si wän nid brobiere,
au no d Frau Aggermaa z klooniere!

Mit eme Räppli-Sagg vom Consi
und ere Larve gleent vom Fonsi
duen y diräggt ins Glaibasel jette,
und in dr Rhyygass d Fasnacht rette!

Impressionen

von

2017

Video

Verse

Hanslimaa 2017

Dr Wessels macht my nundefaane,
hässig mit Verkeers-Schikaane.
Jetz muess y seggle, s macht my schyssig,
vo Baiz ze Baiz – mit TEMPO Dryssig!

Hitt Morge - ych dängg gaar nyt Schlächts,
isch my Schaitel pletzlig rächts.
Glyy druff aabe – bla – bla – blaa,
lytet mir - dr Blocher aa!

S letscht Joor, sait e Wätter-Gryte,
syg s Wärmschte gsii, vo alle Zyte.
die Doddeli mässe voller Gschbass,
Temperature - uff em Oofepass!

My liebe Hansli - frogt dr Vatter,
die 7 – sin das jetz Bestatter?
Aber Bappe sait dr Soon,
das sin - die neie Pokemoon!

Das sin d Leuthard und e Kueh,
jetz lueget däre Kueh bitz zue,
lueget zue in aller Rueh.
Iibrigens: Das linggs isch d Kueh!

My Frau schänggt mir e Hörapparaat,
Jetzt höör y sii, ganz akkuraat.
Und syt se höör, haa n ych mir dänggt:
„Oo hätt si mir doch - kai Höörgrät gschänggt!“

400'000 bim Jagger Mick,
Dr Paabscht , dä findet das nid digg.
Er het halt nie esoo vyyl Äggschen
und als Paabscht - kai Sätisfäggschen!

S Thema uff dr 50-z’ger Noote,
isch dr Wind - dasch sauguet groote.
Das zeigt gnau, wie s vom Bortmonee hinde,
d Noote duet - uff s Styyramt winde!

Kenne Sii d Frau Regula Rytz,
die will kai Atom-Strom in dr Schwyz.
Und, gäbs e Blackout maint si haiter,
näm sii dr Strom - vom Blitzablaiter!

Dr Nora Illi iire Maa
Sait: „d Nora muess e Burka haa.“
Numme s Schmuuse syyg nid cool;
wäg de Faaseren - im Muul!

Impressionen

von

2016

Video

Verse

Sii ych bi wiider zrugg vo de Seychelle,
y muess nimm Kokosnüss jagen und Banane schelle.
Jetz hany z Basel e Stell, won y gwaltig muess Dängge,
y schaff bi dr Stadt - und due Poller versängge!

Ich bekämpf jetz erfolgryych das CO-
und bring jedes Mineralwasser-Blööterli hai.
Die vermisch y mit Haane-Wasser – ganz banal
und verkaufs in Fläsche - als Champager de Bale!

Rain rächnerisch – han ych mir saage loo,
het d Menschhait en 9. Planet bikoo.
jetz goots non e Monet – händ bitti Geduld,
denn isch dä Planet - am Klimawandel schuld!

Mi Frau die spart und duet no mee spaare,
si kauft drum nur no die billigschte Waare.
Falle d Priise no wyter, duet si mir oohni z geniere,
dr Salat mit Essig und Haizöl serviere!

Sii- ych find das garnid glatt,
das Diktatoregschnatter in däm Äxtrablatt.
Me sott alli Diktatore – ych wurd derfir sorge,
uff dr dunggle Syte vom Mond entsorge!

Au finanziell fäält uns dr Streller no immer
und goot dr Safari wirds au als wie schlimmer.
D Kasse glingelet wemmer an Embolo dängge
Und goot dr Morin – dä kasch nid emool verschängge!

In dr Primmeli han y no Hulliger-Schrift gleert,
jetz hets vo Schnierli- uff Basis-Schrift keert.
S isch egal wie me “HAMPE” schryybe duet,
am Beschte wärs - är nimmt dr Huet!

Dr Ueli Murer duet em Parmelää,
non e ghaimi Waffen iibergää.
Er zaigt em wieme dr Find verschreggt,
wemme d Soldate - in e Wawrinka-Hoose steggt!

Heere Si‘s au – wie die im Haifischbeggi kraische
und wie die sich politisch dien Zerflaische?
Speeter gseen Si, wär wäge wäm uff d Naase keit,
im nägschte Film vom Tarantino: “The Beautiful Eight”!

Ych frog e bekannte Medie-Maa,
fir was men e Zytig susch no bruuche kaa?
D NZZ legsch an Boode, wenn am Moole bisch
und in dr BAZ luegsch nur no - wär gstorben isch!

Daa – Daa – Daa- Daa, Dadaa- Dadaa,
Dadada – Dadada – Dadada-Dadaa,
Jä Daa – nei Daa – jä Daa – nei Daa,
Daa, will dr Wessels e Graabe haa!

Wenn e Dichter dichtet - gits e Gedicht,
wenn e Sanitär dichtet - sin d Rööre dicht,
wemme d Stadt verdichtet - verliert si s Gsicht
wemme mii dät verdichte - hätt y weniger Gwicht!

Mai hung ka wi du huu tscha tschoo,
Nai so mi hung cha nid la goo.
Yych bass mi aa - als alte Sogge,
wenn do inne - alles Chinese hogge!

Impressionen

von

2015

Video

Verse

Sii, ych find die Idee sauglatt,
die Blakat mit de Blutte in dr ganze Stadt.
Ych due mii jetz aute als Hanslimaa,
dä uff em Helge bin yych – ooni Gosdym aa!

S isch alles verbotte, darfsch joo nyt me saage,
duesch d Wooret verzelle, no goots dr an Graage.
iiberall gits Lämbbe, das wird eerscht wiider guet,
wenn dr Andreas Thiel dr Schawinski hyyrote duet!

Chapeau Bundesroot – my Komplimänt,
fir die Wyyberquote vo 30 Brozänt,
Simonetta - Doris - Eveline - darf y bitte,
aini muess goo – denn d Quoten isch iiberschritte !

Blau - sait dr Stadtblaaner - isch d Begägnigszoone,
im gääle Dail - sait dr Stadtblaaner - darfsch nimme woone,
grien - sait dr Stadtblaaner – do faarts Dramm - dasch geil,
und yykaufe - sait dr Stadtblaaner – muesch jetz in Weil!

Unseri hailig Doris National,
Isch als Atom-Graftwärgg-Tööter emotional
yyfersichtig uff d Simonetta, si het nur no ai Zyyl uff Äärde,
Si will au emool - vom Jean-Claude Juncker bisse wärde!

D Wätterfee sait lyycht erblaicht,
im letschde Summer hets nur gsaicht
und noch em Saiche – ischs no ko schiffe,
das het – dr Geri Müller jetz au begriffe!

Drei Mercedes fir Burkhalter, Berset und Muurer,
und e Tesla fir d Leuthard – do wird y no suurer.
S macht my schissig, wie die us iire Karosse gaffe
Und ych muess morn - mit em Rollbrätt go schaffe!

Sii ych hau ab – ych verreis uff d Seychelle,
go Kokosnüss jagen und Banane schelle.
Dasch dr ainzig Ort uff dr Wält per see,
won y dä gschisse Roche-Durm nit muess gsee!

Y waiss nid worum und y waiss au nid wiesoo,
yych jeede Daag d BAZ due gratis bikoo?
Aber ains waiss y sicher - liebi BAZ-Genosse,
Was nyt Wärt isch - wird aim nochegschosse!

Dr Brady Dougan het in New York gschwoore,
er haig nur bschissen und kai Gäld verloore7
und dr Thomas Jordan schwört er haig nur dr Frangge rette welle,
jetz hau ys wirgglig sofort ab uff d Seychelle!

Impressionen

von