Schnitzelbank-Comité


Archiv
Alle anzeigen

Filter anpassen

Zum Archiv

Schnaabelwetzer

Steckbrief

Schon das Goschdym bereitet auf einen bunten und rassigen Auftritt vor. Und er kommt. Mit bestechenden Pointen und Helgen.
Comité-Bank seit 1997

2020

Video

Verse

Mit Riise-Uffwand wird dr Bahnhofblatz totaal saniert.
Belaag und Schiine, alles neu, s wird baut und renoviert.
S Verkehrs-Chaos, das blyybt, und trotzdäm isch es nit für d Katz:
Kunnsch unter s Dramm, liggsch gottseidangg jetzt am e schööne Blatz!

Bim Bsuech in Moskau mäint dr Ueli Muurer: Wladimiir!
Äi'm wery praud for Switzerland, dät äi darf syy bäy diir!
Dä Trump, oh shit – bät yuu e Hit! Let's gou, mir stoose-n aa!
Und dänggt drbyy: Scho gäil, ass ich esoo guet Russisch kaa.

Kennsch du d Nancy Pelosi nit? Dr Trump kennt die sehr guet!
Nach ihm isch das die gröschti Häx, uf die het dä e Wuet.
S Impyytschment sig e Häxejagd und Schluss! und Punggt! und Fakt!
Im Grund gnoo het dä rächt: Will jo die Häx dr Tüüfel jagt.

Äi Fliege säit zer andere: « Jetzt gib dir moll e Schupf!
Hoggsch numme uf em Fänschterbrätt – hesch äigetlig käi Pfupf?
Lueg duss dä heerlig Kuehmischt aa, das wär s doch – häyäyäy!»
«Näi, syt dr Greeta ha-n ich Fluugschaam, ich blyyb hütt dehäi.»

Hüt fliegsch doch nümm in d Feerie, näi! Näi, hüt blyybsch brav dehäi.
Dr Greta Thunbärg machsch e Freud – vo wäge CO2.
Verzicht uf s Flugzüüg, luttet s Motto, denn blybt d Weschte wyss.
Du wäisch au nie, wo d aane kunnsch – genau wie d Patrouille Suisse.

Grad wo dr Albert Einstein uf re wysse Wolgge schwäbt,
Froggt ihn dr liebi Gott, ob är im Himmel gmietlig läbt.
Näi, mir goht s schlächt. Y dängg z vyyl nooch, jä s Ganze isch verzwaggt:
Y ha drumm immer noonig z Bärn die Zauberformle knaggt.

Me hett halt s gläiner Übel gwählt – au mir sinn konschterniert.
Dr Cassis blybt im Bundesroot, die Grüene sinn fruschtriert:
Entsorge sottsch dä Bürogummi – d Schwiirigkäit do draa
Isch, ass me Gummi überhaupt nit komposchtiere kaa.

Bisch online, spiilsch am Händy – hüt wird alles regischtriert.
In Bärn, Sanggalle, Basel wirsch per Video kontrolliert.
Das wäiss doch jede gläine Goof vo Gämf bis Disentis.
Wo findsch no äin, wo das nit wäiss? He, bi dr Credit Suisse!

Rächt schryybe het die äint nit könne, lääse nit dr zwäit.
Die dritti hett kuum gschwätzt, dr viert im Rächne voll versäit.
Zerscht sinn die in e Gläiklass koo, damit s doch vorwärts goht,
Und ganz zum Schluss, do hogge sy denn im Regierigsroot.

Scho wider wärde d Billjee tüürer bi dr SBB.
Tessin und zrugg, Samaade äifach – s koschtet alls wie meh.
Im Gäägetäil, s wird billiger, will d Rächnig anderscht goht:
Hütt kasch vyyl lenger sitze blyybe – d Züüg sinn alli z spoot.

Sit vyylne Johr wird plaant und baut am Airport in Berlin.
No immer stinggt s noch Teer und Staub und nit noch Kerosin.
Bestimmt goht das no hundert Johr – mir mache jeedi Wett,
Ass Basel zletschtammänt no zerscht sy Biozentrum hett.

De griegsch mit bizzli Räinbenzin fascht jeede Flägg ewägg.
Au Soosse, Fett und Kaareschmiiri, Bluet und Katzedrägg.
Bi allerschwäärschte Fäll, do gosch mit Schawellwasser draa.
Das nützt – nur nit bim blonde Schandflägg us Amerika.

Impressionen

von

2019

Video

Verse

Dä Luusbueb mit sym Schuelsagg goht jetzt in die erschti Klass, Lehrt Änglisch und Französisch – und het erscht no richtig Spass! Hello, good morning, help yourself! Good-bye and merci bien!
Dä schwätzt scho jetzt vyl besser Änglisch als dr Parmelin.

S Kamel vom Ibrahim bin-Grufti trottet vor sich hii,
Hoggsch oobe uf em Sattel – fümfi zoobe isch scho gsi.
Uf äimoll stoppt das Trampeltier – worum das so verschriggt?
Dört stoot dr Markus Somm – dä hänn sy jo in d Wüeschti gschiggt.

S het uns äin kürzlig gfroggt: «C'est qui? C'est Guy? E Guy, c'est qui?»
Und hett grad noochegfroggt: «C'est qui? C'est Guy? E Guy, c'est qui?»
Käi Angscht, wenn d nümmi noochekunnsch und s Hirni drüllt und surrt:
So öppe goht s em Parmelin, wenn äine Änglisch schnurrt!

Mit Änglisch het dr Parmelin bekanntlig nüt am Huet.
Dä ka perfäggt Französisch – könne Sii das au so guet?
Manger häisst ässe, pleurer hüüle – s isch wie in dr Schuel.
Und was häisst Maudet? Glääbe, ganz fescht glääbe an sym Stueh

Loos, Meier, dasch dr Gnopf, ass s Auti tü-tää-tüü-tä macht.
Wenn mir mit unsrem Tesla ummerötze in dr Nacht,
Und bruuchsch d Sirene äimoll nit – käi Angscht, mir sinn zue dritt: Denn grööle mir zum Fänschter uss – sunscht ghöört me s Auti nit.

Im Vatikan dört z Rom düen d Unschuldslämmli höggerle Und hirne, was me mache sott mit däne, wo düen höpperle. Mäi-mäi!, mäint do dr Papscht zue syne Kirchedienerli: Grad ohni Znacht ins Bett – und dasmoll ohni Wienerli!

Das blöde Gschnurr vom Erdogan – do loose mir nümm zue. Au Putin, Macron und Frau Merkel – löönd ys doch in Rueh! Uns gfallt dr Trump, dä twitteret am Mahagooni-Tisch,
Wenn dä schnuurt, kasch denn sicher syy, ass alles glooge isch.

Wie hänn mir letschte Summer gschwitzt! Jä, wenn dr Petrus will, Denn schmoorsch bald jeede Summer wie-n e Klöpfer uf em Grill! Die Hitz, die kunnt ys grad no rächt, will friere wänn mir nit,
Wenn s zwüsche Basel-Stadt und Land die näggschtig Yyszyt git.

E Riise-Gschyss im Grosse Root, ob s au mit Buschi goht.
S wird gfluecht und debattiert, bis äine usse rächts uffstoht
Und yyneschreit: No so-n e Gnopf? Do bruuchts e scharfs Verbot! Y ha schon mit zwäi Gnöpf e Gnuusch, wenn ich abstimme sott.

Mir sinn total drgeege, wenn s um gläini Buschi goot.
So Schreihäls, Duumelutscher ghööre nit in Grosse Root.
E Goof, dä chräit, dä gyyxt und schreit – das Buschi wottsch nit
gschänggt.
Mir z Basel hänn jo schliesslig unsre Baschi – und das längt!

Die Teslas bi dr Schuggerei, do schnuurt e jeede dryy.
Jo, Baschi, gäll, an dynre Stell, mir hätte das lo syy.
Du arme Siech, jetzt griegsch sogar vom Thurgau diggi Poscht: Das syg scho skandalös – dä Tesla sufft jo nit moll Moscht.

Impressionen

von

2018

Video

Verse

Ans Fuudi länge, dööple, grapsche, fingerle us Glüscht –
Käi Wunder glaage d Fraue: D Männer länge au an d Brüscht!
Sogar d Frau Pegoraro glaagt – das hätte mir nie dänggt –
Sit Johre fühlt sy sich vom Läufel-Fingerli bedrängt!

Goht s dir verschisse, myys und schlächt und hesch e Riisetief?
Moralisch liggsch am Boode und s lauft alles numme schief?
Denn bau dy uff, dängg positiv – dur d Freud wird s Läbe glatt!
Dr Wessels freut sich uf die näggschti Bauschtell in dr Stadt!

«Bim Fringer goht s vyyl ringer», dänggt dr Monsieur Constantin
Und schmiirt däm äins ans Hirni – pas très gentil à la fin!
«Was mach y», dänggt dr Baschi, «wenn dä z Basel ummelauft?»
Und het für d Schuggerei sofort e Panzerwaage kauft!

Die z Lieschtel spaare numme – und mir Basler zahle druff.
Das sinn die letschte Batzeglemmer – hey, das macht ys muff.
Drumm freue mir uns still und häimlig: S kömme jo scho glyy
Paar hundert FCZ-Chaote z Prattele verbyy!

Franziska, Lisa, Monika, Jasmin und Annabelle,
Die glaage uf Beleschtigung, sit Johre – sexuell.
Jä, d Aaklaag, Sii, die isch brutal – juristisch duredänggt:
Dr Fritz häig ihne alls bim Mälche voll an d Zitze glänggt!

Us ryffe Pfluume brennt me Schnaps – dä Fuusel passt uns nit.
Doch s Destillaat uss Häidelbeeri – das isch unsre Hit.
Die mäischte Beeri ka me bruuche, süess und dunggelroot.
Doch s Cassisbeeri ohni Saft passt nur in Bundesroot.

Ych ha s nit glaubt: Jä, hundert Liter dringgt en Elefant.
Ych ha s em Zolli-Wärter gsäit – dä nimmt das ganz entspannt.
D Kamel – säit dä – die suffe meh, so vyyl, wie s numme goht.
Am beschte gseht me das bi däne uss em Grosse Root.

Hesch Osteochondritis? Und hesch Fuesspilz? Oder Gicht?
Mesaortitis dissecans? Prostata? Übergwicht?
Appendicitis chronica? Verdräisch käi Aspirin?
Gang frog dr Rotscher, dä isch jetz «Doggtor der Medizin»!

Politisch froggsch dy scho, ob äin bis 80 fahre darf.
Isch dä no fit und gäischtig zwääg? Und gseht är au no scharf?
Jä, wäiss dä no, wo d Kupplig isch? Und wie dr Blingger goht?
S kunnt nit druf a, will dä jo z Basel sowyso nur stoht.

Mit Dignitas und Exit ka me d Wält diskret verloo.
Und au s Hospiz hilft äim drbyy, ganz lyyslig äifach z goh.
Nit immer goht s so lyyslig zue, jä mänggmol git s Radau:
Gang numme mol uf Sissach und frog dört die tooti Sau!
E Château-neuf-du-Pape mit Johrgang nüünzähhundertzäh,
Dä hämmer us em Käller gholt, dä het me müesse näh.
Y ha dä eedli Saft ussgläärt – das isch denn öppis schwäärs –
My Frau het gsäit: E Zapfe mit däm «Weinstein» isch pervärs!

Impressionen

von

2017

Verse

1
Pomaade, Föön, drey Büggse Spray – e jeedes Höörli sitzt
Drzue die wysse falsche Zeen – es glitzeret und blitzt
Mit dääre Fryyse, dääre Schnuure, top vo A bis Z
Isch s glaar, ass dört drzwüsche s Hiirni gaar käi Blatz me het.

2
Arosa, Schuls-Tarasp, Zermatt, Bergün und Fuulesee,
Valbella, Flims und Adelboode, Andermatt, Saas-Fee.
Jetz hämmer gnueg, uns schysst das aa – mir fliege nach Fäärnoscht.
Wär wäiss, villicht git s dört jo no e Schalter vo dr Poscht.

3
Vo Aafang aa het Beznau 1 im Beton schyynts so Riss.
Was isch das für e Inschiniör? Käi Plaanig – numme Bschiss!
Jä Sii, mir hänn dä Schluuderi jetz schwäärschtens im Verdacht:
Das isch dr glyych, wo d Lyybli vo dr Fuessball-Nati macht.

4
In vyyle Spunte het s dir no vor kurzem schampar gruust.
Amäise, Schaabe, Wäntele hänn in der Kuchi ghuust.
Hüt sinn die Bäize klinisch räin, perfäggt desinfiziert.
Und d Vyycher laufe nümmi umme, die griegsch jetz serviert.

5
«Du, Kläärli», rieft dr Ferdinand, «jetzt liis emoll die BaZ!
Bim flotte Dreyer hänn mir Basler schyynt s e Spitze-Blatz!»
«Soso», mäint s Kläärli, «loos, y glaub, y wäiss, wohäär das kunnt:
Stand ych am Baarfi, kunnt dr Dreyer achtmool in der Stund!»

6
Im diefschte Mittelalter, wenn d dr Tripper hesch bikoo,
Denn hänn sy dii im Siechehuus als Geschtöörte schmoore loo.
Statt Tripper git s e neui Süüch: Jä, die isch denn e Gruus!
Die kunnt per Twitter vo-m e Gschtöörte us em Wysse Huus.

7
Für jeede Fümfer im Französisch grieggt dr gläini Lutz
Dehäim sofoort e Gschängg, und für e Säxer git s zää Stutz.
Jä Sii, nit jeede grieggt sy Gschängg sofoort und subito:
Bim Darbellay sym ZwäieR isch s nüün Moonet spööter koo.

8
«Und 1 – 2 – Foxtrott – Tscha-tscha-tscha, nun links das rechte Bein!
Und vorwärts – rückwärts – Ausfallschritt! Jawoll! So muss es sein!»
«E soone flotte Danzkuurs», mäint dr Baschi, «find ych guet,
Do lehr y nämli äntlig, wie me richtig füere duet.»

9
Trotz Stau und Zytverluscht – my Frau het wider s Auti gnoo.
Der Kluge fährt im Zuge – denn uf d Baan kasch dii verloo.
Wo-n ych wott s Billje uuseloo und mach und murggs und drugg.
Isch d Frau mit iirem Kaare scho vo Züüri wider zrugg.

10
Als Bänggler rennt me an dr Faasnacht krüz und quer dur s Gmoscht,
Vom Spitz zum Baarfi über d Lyss zum Schlüssel by dr Poscht.
Jetzt hämmer d Naase voll vom Stress, drum gönne mir uns drey
E Gratis-Franggo-Dienschtfaarzüüg – vo dr Schuggerey.

11 (ohne Helgen)
Mit Paugge und Trumpete kunnt dr Blocher ins Spitaal.
Är häig sich alles broche – z Bärn – politisch e Skandaal!
«Herr Blocher, nur käi Paanigg», mäint dr Notfalldoggter Tschanz,
«Jo, d Naase isch kabutt, doch d Riiseschnuure isch no ganz!»

Impressionen

von

2016

Video

Verse

Händ ihr scho moll Verstopfig ghaa? Jä, daas isch scho nit glatt.
De hoggsch und hoggsch und druggsch und druggsch und s findet gaar nyt statt.
Und bisch noch Stunde ganz k.o., erschepft und puudelnass,
denn dängg nur an d Frau Merkel, wenn si sait: «Wir schaffen dasss!»

«Jä nai», het d Mamme Köppel gsait, wo sii erfaare het,
Ass ihre Sohn, dr Roger, Naazi-Lyt aahimmleret.
«Jetz isch es z spoot», het sii sinniert und sich an d Stirne glopft.
«Hät ych dä nur vor fuffzig Joor in d Babyklappe gstopft.»

Im Wytsprung, Schwimme, jeedem Sport hänn d Russe abgarniert.
Die hänn mit ghaime Doopingsäftli d Laischtig optimiert.
Verzelled das em Morin nit – ai Schliggli in dr Noot
Und scho kasch nimmy sicher syy, ass dää au wirgglig goot.

Ych gang alls zu dr Julika und wird vo ihre quäält,
Wird gschlaage, gfesslet, aabegmacht– ych ha das sälber gwäält.
Das isch fir mii als Mänätscher dr ideali Drill,
Wenn ych moll bi dr Frau Martullo-Blocher schaffe will.

Das Hindli vo dr Meyere isch glai und digg und fett
Und haisse duet s Prinz Charles, will s schampaar groossi Oore het.
Jetzt het sy sich zem Hindli aane no-n e Scheefli kaufft
Und het das arme Unschuldslamm – Blatter Seppli taufft.

Dr Puls uf hundertachzig, Ooresuuse, Schittelfroscht,
Migrääne, Buuchgrämpf, Schwaissussbruch – was het dä Maa bigoscht?
Grad nooch dr Undersuechig maint dr Doggter Jon Padrutt:
«Dä Maa isch dotaal gsund – numme s Händy isch kabutt.»

Wie gfalle Ihne d Stroossekraisel doo in unsrer Stadt?
Die Schigganiererei, die findet d SVP nit glatt:
Muesch brämse, waarte, ummeluege, blochere kasch nit.
Und s Schlimmschte: S het im Kraisel immer dää vo linggs Voortritt!

Das Fuurze Daag und Nacht – jä Sii, das isch e Riisequaal.
Y bruuch e Doggter und y gang als Nootfall ins Spidaal.
Die hänn kai Aanig, wie me so vyyl Waarmluft reduziert.
Drum hänn sy mi zue VW gschiggt, die hänn das patentiert.

Ych zaal kai-kaini Styyre me – bloo-bloosed mir in d Schueh!
Wa-was dert z Lieschtel oobe laufft, ych ha-ha jetze gnue!
Sä-sällre Pegoraro gib ych nur e Ho’Hoosegnopf.
Die het sit Joore numme Stroh-Stroh-Stroossebau im Kopf!

Die ghaimi Yebig «Ains-zwai-drey» vom Schwyzer Milidäär
Laufft ab im Plaanquadraat X-zwai – do funggt dr Gfreiti Bäär:
«Dotaal verloffe, sinn im Saich», dr Fruscht isch riisegross.
«Stoggdunggel – alli Lääde dicht do in dr Freye Strooss.»

D Affääre Dieter Behring – Sii, das laufft jetz scho elf Joor.
Millioonebschiss, Gäldwäscherei, Betrug wirft me däm voor.
Goot daas no lang, denn isch s verjäärt und äär isch butzt und gsträält.
Und wird als näggschte Bresidänt – vo dr Fifa gwäält.

Mir kauffe bi Zalando yy, mien nimm in Laade goo.
Fir ai Baar Hoose leen mir uns zer Uuswaal siibe koo.
Und schigge alles portofrei denn zrugg, was uns nit stoot.
Schaad, gitt s kai Retuurpäggli fir dr ganz Regierigsroot.

Impressionen

von

2015

Video

Verse

Dä Haafekraan am Limmatquai – fir Ziircher isch s Kultuur.
Fir andri isch das Kunschtwärgg numme Gäld-Verduuble puur.
Mir Basler mechte so vyyl roschtigs Yyse nit moll gschänggt.
Drum hänn mir unsre Kraan mitsamt der Merlin grad versänggt.

«Versoorg sofort das Händy!», rieft dr Lehrer Lutz fruschtriert,
Will s Lotti zhinderscht hinde schtändig vor sich aabe stiert.
«Exgyysi», maint die Glai, bivor sy hoochkant uusefliegt,
«ych ha e komischs Selfie vom 'ne Geri Müller griegt.»

My Frau het mii zem Doggter gschiggt, will yych die ganz Zyt fuurz.
Bi soo vyyl waarmer Luft, do kunnt doch s Ehelääbe z kuurz.
Dr Doggter undersuecht und sait: «Sii hänn e Wind-Syndrom.
Das gheert uf Bäärn – us jeedem Fuurz macht d Doris Leuthard Stroom.»

Mir wänn in d Politigg! E Migros-Kuurs hänn mir scho gnoo,
Mit Smalltalk, Lächle, Händli-Schittle und gscheit Ummestoo.
Nur s Bschysse macht ys schampar Mieh – das blogt ys sogar znacht.
Drum luege mir jetz ganz genau, wie das der Blatter macht.

Dr Delfi isch gottloob scho doot – scho lang und das isch guet.
Au d Migros het mit so Figuure null und nyt am Huet,
Uff d Deggeli do gheert fir sii e richtig biid're Maa.
Drum lacht ys glyy bim Käffele dr Schneider-Ammann aa.

Woorschynts vom vyyle Velofaare – s Drampe wird e Qual! –
lauft s Hifftglängg vom Herr Wessels bletzligg nimmi optimaal.
Dr Doggter maint, wo-n är dä Maa denn operiere duet:
Vom Beggi uffe bis zem Hals wird alles wiider guet.

Vo Ebola und Voogelgrippe wärde mir bidroot.
No schlimmer, wenn e Meteor ganz Basel zämmeschloot.
Und au wenn d Wält sott untergoo – an uns goot das verbyy:
Mir wäärfe aifach schnäll e Hampfle Jodtablette yy.

Dr Fritz vom Baudep isch fruschtriert – saumässig, wie s däm stinggt,
Ass neyerdings d Verwaltigg nur no Haanebuurger dringgt.
Kai Mineral mit Koolesyyri – gopf, das ka s nit syy!
Sogar bim Schaffe isch es jetz mit Bleeterle verbyy.

Refleggdiere, gspiire, driiber schwätze, wie s aim goot,
Nit lehre, nai, entdegge, wo-n e Froogezaiche stoot,
Dr Lehrplan 21, Sii, dä isch e woori Bracht!
Und d Schieler kenne s Alphabet – vo ains bis ebbe acht!

S wird z Basel iiber s Abfallwääse gschumpfe und au gfluecht.
Drum hänn mir so-n e Underfluur-Container undersuecht.
Gigantisch, was dä schlugge kaa, die Mulde dänggt jo mit.
Sii nimmt nit jeede Giisel – d Basler Zyttig schluggt sii nit.

S isch bitter kalt und dunggel duss, e Kyyzli rieft dur d Nacht.
Voll Ehrfurcht steen mir um iin umme, kaine vo-n ys lacht.
Das isch en also, hänn mir dänggt, und finde s gar nit glatt:
Dr allerallerallerletschti Parggblatz vo dr Stadt.

«Hello to everybody here, my name isch Morin Guy.
Doo z Basel a mym Rhyy it 's nämmli very nice to be.
Hello and wellcome all of you – do fallt mir grad no yy ...»
Jä gottsaidangg isch do beraits sy Reedezyt verbyy!

Impressionen

von