Schnitzelbank-Comité


Archiv
Alle anzeigen

Filter anpassen

Zum Archiv

Schwingbääse

Steckbrief

Der Schwingbääse ist akustisich auch ein Swing-Bääse. Was er anrichtet ist kunstvoll aufgeschäumt, aber niemals aufgewärmt.
Comité-Bank seit 2019

2020

Video

Verse

Mir hän s ne gsait, mir hän sy gwarnt, mir hän s ne bumpt
es isch völlig glaar, Britannie verlumpt
sy veraarme ooni Brüssel und kömme gross in Not
als Byschbyyl kaasch jo gsee, wie schlächt s de Schwyzer goot

Maitlibai, Spitzbuebe und au Schänggeli
dr Pariserring isch wichtig, muesch dra dänggeli
vor em Vogelnäscht e Brunsli, bim Schnägg do ha n i glitte
drum kauf i nüt, gang haim und mach e Fotzelschnitte

Wäg dr Greta ha n i my SUV abgstoosse
e so hets vyyl mee Blatz gää uff de Stroosse
denn hän sich d Trotinett vermeert, es isch jo total gspunne
jetz frees i wiider BMW, my Jagdinstinkt het gwunne

D Klaagemuur am Barfi duet mir fääle
das mit dr Delifoonkabine duet my gwääle
s het alles miesse wäg, i kaa das nid verstoo
wo kaasch denn jetz dr Drugg ab dyner Blose loo

D SVP wär gärn «the voice of switzerländ»
sy wänn Sproochroor sy als ächti rächti Bänd
los zue, bass richtig uf, jä denne merggsch es wool
je luter so ne Roor isch, desto isch es inne hool

Achtzäähundertzwanzig hän sy z Oxford gschriibe
die Dampfyysebaan sig gföörlig übertriibe
will ab Tempo Drissig s Hirni schwere Schade nimmt
hütte waiss me ganz genau, dass die Studie stimmt

Dr CIA und d Bundesrööt dien karisiere
und e so d Neutralität neutralisiere
sy hän s nid ganz unter e Debbig gwüscht, i mach e Wett
will s z Bärn jo unter de Debbig gar kai Blatz me het

Meghan and Harry die sin uff und dervoo
d Froog isch numme, wo söll s denn aane goo
d Waal wo sy denn dräffe isch nid dr gscheitschti Ort
will Kanada an Waansinn gränzt und das in Süd und Nord.

Die katholisch Kirche het s Klima au entdeggt
dr styygend Meeresspiegel het die Gselle gweggt
die wüsse scho was mache, wenn s Wasser sötti koo
sy styyge in e Arche und faare denn dervoo

Freispruch Trump und d Hoffnig isch verby
dä Senat isch wie n e Käller voller Wy
es haisst im Wy seb d Woret, in vino veritas
by soovyyl leere Fläsche bezwyyfle mir grad das

Dante Schuggi duet im Hienerstall als bike
unsri Klimakinder könne das nid like
druss het die Dante gleert, e so isch s bicobello
sy het jetz Freilandhiener und überfaart sy mit em Velo

Impressionen

von

2019

Video

Verse

Bim Stadionyylauf sin die Glaine jo so syydig
an dr Hand vo Stars do wird e mängge nyydig.
De Fans duet dass no gfalle, numme schaad dass lut Statute, grad bim FCBasel, die Grosse nochhär schutte.

Dr Meyer vo dr SBB duet schliifere.
Bombardier ka dr Doppelstogg nid liifere.
D Bundesrööt sin sicher dä Deal isch kai Betrug, denn sitze sy in e Prototyp scho ischs e Fläschezug.

Denn stygt derzue no d SVP Fraktion an Bord jetz isch es e aschtraine Sondermülltransport.

Dr Insektesnack vom Konsi kasch vergässe.
Trotz Rabatt will kaine Würm und Made frässe.
Derby bruchts kai Aggzione vo so schlaue Wärbe-Glöön, will am Ablaufdaag die Vycher ganz vo sälber göön.

Und lot am Ablaufdaag vom Mensch dr Dood nit lugg, denn kömme alli Würm und Made wiider zrugg.

Hän sy gsee wie die elektrische Bolyyde,
dur Züri rase und jede Lärm vermyyde?
Die surre nur und stingge nid, e so wird d Wält no hailer, trotzdäm finde mir halt Santigläus uff Harley gailer.

Me söt dä Yuurowischen Song-Contescht,
wiider Grand Prix nenne das wär s Bescht.
Will Grand das isch französisch und stoot für s Sändegfääs und uff allne andre Sprooche, isch Brie e waiche Kääs.

Dr grossi Root vom grosse Gaischt begattet, stimmt ab und scho isch bättle wiider gstattet.
D Regierig git das via Twitter allne schnäll bekannt, macht 12 Millione Follower ellai us Baselland.

Unseri Drämmli faare uf neue Hightech Schiine.
Es schreit und gygst als wäres Schlyffmaschiine.
au wenn alli Glais verrroschte, sait dr Hampe Wessels stolz, falls me mi denn noomol wäält, mach i sy us Holz.

Dr Lawinedienscht z Davos drait gääli Weschte.
drum goot dr Macron nid ans WEF, är findet s Beschte. au dr Trump dä Gränzebauer kunnt nid an noble Disch, wo n är ghöört het, dass dr Ueli gar kai Muurer isch.

Doch die Muure wird us Bläch, drum frogt dä Trottel öp
är nach dr Wienacht ko ka, denn isch doch Spängler Cup.

Denn kriegt är zwenig Gäld und das verletzt sy Stolz,
no kunnt är halt uff Basel und dr Hampe zaigt em s Holz.

Impressionen

von