Schnitzelbank-Comité


Archiv
Alle anzeigen

Filter anpassen

Zum Archiv

Spitzbueb

Steckbrief

Der Spitzbueb ist ein spitze Bueb. Seine zugespitzten Verse sorgen für spitze Pointen.
Comité-Bank seit 2007

2020

Video

Verse

Dr Sutterbegg säit „Mäi mäi mäi!
Nümm Beggeschmutz, nümm Mäitlibäi.
Au Fuudiweggli kaasch vergässe.“
Guet, Haubtsach s wird no Spitzbueb gfrässe!

Im ’Elle et Lui’, nid ganz bache,
will äin e Bäiz füür Blutti mache.
Ych gang döört goo n e n Ässe haa.
Aaber d Laarve bhalt y aa!

Sii, waas miir uff d Latte goot;
y haa s nid gäärn, wenn me miir droot:
Doch d Aggermaa, ganz unscheniert,
säit, dass si nomool kandidiert.

Abdäilig „miir wäi scho n e bitz, aaber miir häi nüt“

Im Bruederholzspidaal, verglemmi,
meerggsch gaar nüt vo dr Äärzteschwemmi.
Y bii go luege, haa käin droffe.
Aaber s Kiösggli isch no offe!

S Baselbiet duet wiider glänze,
mit neue Schildli an dr Gränze:
„Häärzlig willkomme“, s macht mi hii.
Miir sinn döört nie willkomme gsii!

Si hänn uff em Mars, im Boode n unde,
schyynt s Lääbe, brimityyvs, no gfunde.
Ych saag s no schnäll, bevoor y gang:
Daas git s im Baselbiet scho lang.

Abdäilig „dr Halbschue git käi Rue“

Dr Trump, z Davoos, er schnuurt und schnuurt
und schnurrt und goot denn wiider fuurt;
er schnuurt und schnuurt, es duet mr läid,
er schnuurt und het denn doch nüt gsäit.
Abdäilig „Drämmli, näärvsch mi völlig, nämmli“

„Do’sch d Läitstell vo dr BVB;
jeede Daag e Glanzidee;
neu in unserem Brogramm:
Im Momänt faart gaar käi Dramm!“

„Do’sch d Läitstell vo dr BVB;
bim Noochezelle hänn mr gsee;
die Mäldig vorhäär het nid gschtumme:
S faart nöime no n e Drämmli umme!“

„Do’sch d Läitstell vo dr BVB;
das Dramm, wo faart isch niene mee;
s isch grien und hinde het s e Waage.
Wäär s gseet, dää soll s doch bitte saage!“

Abdäilig „“

Bii dr BAZ, doo dien si gryyne;
am Moorge, zoobe, zwüschenyyne;
dr Wessels goot, daas drifft se schwäär:
Jetzt blybt die ganzi Zytig läär.

Abdäilig „vo Hiroschyymaa bis uff Lyymaa isch s Klyymaa aaber bryymaa“

Vo Müülebäärg dien d Brennstääb straale,
no äi Millioon Joor, daas sinn Zaale.
Und zwäi Joor druff, wenn s käin versaut,
wird z Züüri denn e Staadioon baut.

Friener het me n allem aa
Angscht ghaa vor em Schwarze Maa.
Dasch verbyy, drfüür het jeede
Angscht voor em Mäiteli uss Schweede.

Ych höör vom Mami hüt no d Döön:
„Iss uff, denn wird moorn s Wätter schöön!“
Jetzt hämmer d Stroof, dass Gott erbaarm:
Yych vyyl z digg und s Klyymaa z waarm.

Impressionen

von

2019

Video

Verse

Abdailig „säälig sinn die gaischtig arme“

Acht Joor lang dänggsch bim Schneider: „Aaa, Mann! Nimm doch dr Finger uss em A., Mann!“
Denn isch er luschtig, wo n er goot;
laider baides acht Joor z schboot!

Dr Trump kunnt nid zem Ueli Muurer; er bruucht füür d Muure jo n e Muurer; jetzt het er gmerggt: Dää Ueli Muurer isch nur e n Ueli und kai Muurer.

’Kue mit Hoorn’, miir hätt daas gfalle; yych hätt dr Zapfe graad lo knalle; jetzt miesst d Martullo, bim e ’Joo’, jo d Höörner wiider waggse loo.

Abdailig „si schutte s schöön – nid!“

Dr FCB fyyrt ganz intyym:
D Männer – ooni s Fraue-Tyym.
Sunscht hätt s am Fescht, y mögt s ne gönne, au Gescht ghaa, wo bitz schutte könne.

Abdailig „si schutte s toll – nid!“

Veryoungboyse haisst Schyssdrägg baue, d Maischterschaft und s Gäld versaue. Weiss’s aini nid, verzell ere:
Dämm sait me hüt ’verschtrellere’!

Abdailig „si schutte s wirggligg wundervoll – nid!“

Dr Burgener will z Indie hinde,
dass s mee Phünggt git, noo Schbiiler finde; will z Indie hänn die Yygeboor’ne
scho d Phünggtli uff dr Schtiirne voorne.

Abdailig „gaischtig sinn die armsäälig“

Dr Gallacchi, CVP, maint drogge:
„Daas Buscheli muess dusse hogge!“
Denn macht er s Grütz und sait no gschwind: „Füür uns zellt numme s Jesuskind!“

Düü-daa-doo, und ääne, dääne, disse, Boschtautoo, jä, miir hänn bschisse. Damit au niemerds d Wooret kennt, hänn mir in Chur no d Büss verbrennt.

Dr Parmelin griegt s “WBF“,
wird Wirtschaft-, Bildig-, Foorschig-Scheff. Die foorsche döört, vo nüün bis siibe,
in well’re Wirtschaft isch sy Bildig bliibe.

Dr Trump, dr Kim, da’sch s Foteli, sinn z Vietnaam gsii, die Dotteli; döört hänn si e bitz dottelet,
und sinn denn wyter zottelet.

Abdailig „voll Roor am Boode“

S kunnt ain uss Züüri in e Dierlihandlig und kauft e Fisch. Dr Fisch, dää schtinggt, will er scho lang gschtorbe n isch. Und jetzt nomool im kurze Satz:
S kunnt ain uss Züüri und kauft d BAZ.

Abdailig „bass uff, was de saisch“

Schaqiri, Xhaka, isch ain dinn, merggsch graad vo woo die Buebe sinn: Si mache denn gäärn voor em Lyybli allewyyl no s Basler Dyybli.

Nümm ’Nääger’, ’Yugo’, nümm ’Polagge’,
nümm ’Tschingg’ und ’Schlitzaug’ und ’Kanagge’; au ’Sauschwoob’ isch e Laadehieter.
Was knabb no goot isch ’Baselbieter’.

Impressionen

von

2018

Video

Verse

S wäär s bescht, wenn aine, haa n y dänggt,
em Schneider-Ammann e Velo schänggt;
no leert er, wenn er s rächt schtudiert,
wie n e Ruggdritt funktioniert.

Dr Burkhalteer goot, vyyl sinn froo gsii.
Me froggt sich: Isch er wirggligg doo gsii?
Und denn isch jo dr Cassis koo.
Jetzt froggt me sich: „Und dää isch woo?“

D Martullo sait, doo gsee n y root:
„Im Nootfall wird yych Bundesroot“
Die wuurd jo, und mit ’me Lache,
im Nootfall au no Päbschtin mache.

Abdailig „Am Ryy isch s verbyy“

Im Altershaim zem Lamm, extreem,
het d Frau Möschli znacht Brobleem.
Si wintscht sich, dass si schloofe kaa,
e Reed vom Elsbeth Aggermaa.

Dr 8er faart uff Weil am Ryy.
Dr 3er nei uff Sää-Luyy.
Als näggschts, dr Baubeginn isch moorn:
Dr 6er bis uff s Matterhoorn.

Abdailig „An dr Frängge, kasch dr s schängge“

Lauber, Pegoraaro, Wääber,
die vo Hölschte und dr Rääber,
dien schbaare, schbaare, schbaare, schbaare.
Ych due mir jetzt au s Ryyme ... schbaare,
und d Pointe n au, trallallallaa.

Abdailig „S Wätter isch au e Saich“

Ych find dä Klyymawandel guet:
Wenn z Dytschland s Meer rächt styyge duet,
hätt daas jo au e nätte Zwägg:
Es wäscht denn nämmlig s Bruune wägg.

S Lawyyneninschtitut z Davoos;
bi miir, do isch d Enddyschig grooss:
Dr Schnee isch doo, dr Trump isch doo,
s isch numme kai Lawyyne koo.
Räägedropfe, Baareblyy,
dr Morin Guy, dää schifft in Ryy.
Harnreerelängsmuskulatuur.
Dä Saich-Väärs isch jetzt Wält-Kultuur.

Abdailig „keini Feik-Njuus“

Wenn d Billag abgschafft wird, ojee,
git s numme noo Reklaame z gsee.
24 Stund, da’sch vyyl:
Fischer, Bettwaare, Wädischwyyl.

Ych bstell in Londe ’Tea for Two’.
Do sait e Frau am Disch: „Me too!“
Y haa s e n aagluegt und haa dänggt:
„Woo haa n y dääre n aaneglänggt?“

Abdailig „halt d Schnurre – oder y hau dr eins“

Dr Constantin, dumm, ryych und aitel,
en Arsch vom Färse bis zem Schaitel,
infantil, beschränggt, am Änd
wird dää no US-Presidänt.

Impressionen

von

2017

Video

Impressionen

von

2016

Video

Impressionen

von

2015

Video

Impressionen

von